Ap'u 35
35
Atua imhmah an a Sikup arna nut a Petel
1 #
Ap'u 28:11-17. Sarei, Atua ivr an a Sikup kavr ti a, “Pap'tir kav'el kadav'a asn nut a Petel kalak atlera kahl nev'etetan Atua atlera, la itv'iv'en sera Hin anh ha, naran kruh asn nah tv'alm, iv'i a Isau.”
2Sarei, a Sikup ivr anr nelnal al nmahan, m'er arm'ertu udlani avlak asnn kavr ti a, “Pavsranr atuar v'anu uraur la avrater arna p't nut nam'i ha, kavsila kam'i kavp'as arna nahn Atua kavua klus p'asam'i. 3Sarei, p'vp'tir kavrav'a eia arna nut a Petel. Atlera kana p'ehl nev'etetan Atua, la ivrpren kana naran der ier kana ha, kalak asnk arna navanel nsapei.” 4Laha, avtau atua uraur udlani, la avrater asnr ha, an a Sikup, m'er hapirar udlani la avrater al drlnar ha. Sarei, a Sikup itinr a nv' nap'ak la iter asn nut a Sekem ha.
5Sarei, avv'el, v'eti Atua iani ti m'ertu udlani arna v'anu lilil avratertalu anr avdedrn anr istudau, laha ti ahavtp'ev' a natn a Sikup udlani. 6Laha, a Sikup, m'er arm'ertu udlani avsapei, avier nut a Lus (iv'i a Petel), arna nut a Kenan. 7Kahl nev'etet atlera, katu naha nut lera iv'i El Petel, sena ti Atua iv'iv'en Hin ani naran iruh arna nah tv'aln.
8V'eti a Tipura, iv'i tav'et ip'aur a Ripeka, im'a. Laha, avtini mima asn nut a Petel, a nv' nap'ak. Dav'a, atu naha nut nen iv'i Alun Pakut (nap'ak na tklien).
9Sarei, Atua iv'iv'en Hin ml an a Sikup, naran iendan asn Patan Aram, kamhmah ani. 10#Ap'u 32:28.Laha, Atua ivr ani, kavr ti a, “Naham iv'i a Sikup, v'eti naham ikav'i a Sikup ml, v'eti naham ipav'i a Isrel.” Laha, itu nahan iv'i a Isrel. 11#Ap'u 17:4-8.Laha, Atua ivr ani, kavr ti a, “Kana nv'i Atua Na Nut Hua Udlani. A natm apavstudau kavnelnal. V'anu ki ipamk m'a v'anu kinkin uraur apavandan asnm. Mlin lilil apaviak asnm. 12Nadep' la nttu sarei an a Epraham m'ei Aisak ha, p'etau anh, katu nadep' laha anr a natm apavtauatah anh.” 13Sarei, Atua iendan arna nut la itv'ana sarei m'ei hara, kadav'a eia. 14#Ap'u 28:18,19.Laha, a Sikup ilev' nav'et lil iamk kahi arna nut iv'ana m'ei, kahsran naui m'iel aranan, kahsran ueil aranan ml, iv'i uvrin. 15Laha, a Sikup itu naha nut Atua iv'ana m'ei, iv'i a Petel.
M'ienen a Retsel
16Sarei, avandan arna nut a Petel, v'eti naran adavier asn nut a Evrat, a Retsel irn ti v'atn irer istudau, sena ti irn ti ihua a ti ipalev' sei. 17Naran a ti v'atn irer istudau dav'a a ti ipalev' sei, tav'et ilak asnn sena ti ipalev' sei, ivr ani, kavr ti a, “Madedrn, sena ti klev' dui ml.” 18Dav'a, naran nut pa ti ipam'a (sena ti im'a), itu nahan ani iv'i a Penuni (mardel na derak), v'eti a tetian itu nahan iv'i a P'ensamin (net m'ldauk). 19Laha, a Retsel im'a. Atini arna navanel iv'a a Evrat (iv'i a P'etliem). 20Sarei, a Sikup iah nav'et arna tah nen. Ki laha iv'i mak na tah nen a Retsel ier dika.
21Sarei, a Isrel iv'el kahl nmah kanuisan arna tv'eliel na nmah p'arei ahli a ti apavp'aus nut, iv'a eia arna nut a Eta.
A natn a Sikup
(1 Krunikel 2:1-2)
22 #
Ap'u 49:4. Dav'a, naran a Isrel ilak arna nadep' lera, a Rup'en iv'a kam'atr m'ei a Pilha iv'i tav'etan a tetian (inep'a ti iav'i a naun dau). Laha, a Isrel irn ti ien si lera. A natn a Sikup arnal lman iru. 23A natn a Lia avv'i a Rup'en, iv'i a natn a Sikup titiamu dau, m'ei a Simiun, a Livai, a Suta, a Isakar, m'ei a Sepulun. 24A natn a Retsel arv'i a Susev' m'ei a P'ensamin. 25A natn a Pilha, iv'i vitar na m'akarienan a Retsel, arv'i a Tan m'ei a Navtali. 26A natn a Silpa, iv'i vitar na m'akarienan a Lia, arv'i a Kat m'ei Aser. Ki lera avv'i a natn a Sikup, la aviak asnn arna nut a Patan Aram.
M'ienen Aisak
27 #
Ap'u 13:18. Laha, a Sikup ima asn a tetian, iv'i Aisak, arna nut a Mamrei arna Kirsat Arpa, iv'i Eprun kav'i nut a Epraham m'ei Aisak arlak tituei. 28Laha, paian Aisak inelnal iv'amk pln inelsatl (180). 29Laha, Aisak iam'im'in ml, kadam'a, kap'lt m'er a pupuan, katrtarep' istudau. Laha, a natn, arv'i a Isau m'ei a Sikup, artini.
Seçili Olanlar:
Ap'u 35: nmb
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2023 Presbyterian Reformed Church of Australia