लूका 19

जक्कय ने घेर यीशु

1एवी यीशु यरीहोमाय प्रवेश केरील एने तामायरीन तो ओगाण जात एतो. 2ताहारी जक्कय नावान एक माणुह एतो, तो करवसुली केरणारान मुख्य एतो. 3ताह यीशुह देखताला एता कि काल्ल्हा हि. पुण ताह गर्दीमुळे दिसत नाह एतो, कारण तो बुठकु एतो. 4तेवी ताह देखणेनकेरिन तो एक उबरान झाडापूर चेढील, कारण यीशु तान वाटीन जाहू एतो. 5ताहेरया यीशु तान जागे पोचना तेवी उपेर देखीन तान कियील, “हे जक्कय, जेल्दी उतरीन आव; कारण आज माहु तारो घेराम रेणेन हि.” 6तो आनंदमाय उतरीन आपणो घेराम लीन गीयो. 7हे देखीन आखा माणुह कुरकुर केरूह केणेंन लागिल, “तो तर एक पापी माणहान घेराम गीयो हि.” 8जक्कयान उबरीयेल रेयीन प्रभुह कियील, हे प्रभु, मी आपणी अर्धी संपती गारीबांह आपथु एने जर कुणान काही पुण अन्यायाने लीईल हि तर ताह चार पट्ट पोशा केरुहू. 9तेवी यीशु ताह कियील, “आज आवो घेराह उद्धार प्राप्त एय गीयो हि तामुळे हा पुण अब्राहामान सोरो हि. 10कारण माणहान सोरो टाकाईयलाह होदणे केरता एने तान उद्धार केरणेन केरता आवा हि.”

दोह शिक्का

(मत्ती 25:14-30)

11ताहेरया ते ज्याह वातू होंबलेह एता तर तान एक वार्ता कियील, ज्यानकेरता कि तो यरूशलेम आहने एतो, एने ते होमजाडणे एता कि बोगवानान राज्य ऐवी प्रकट एय हि. 12केरीन तान कियील, “एक श्रीमंत माणुह सेटो देशाम चालहु म्हणजे तो राज पद मेलावीन फिरीन आवूह. 13तान आपणो दासामाय दहा जाणाह हादाडळीन ताह दहा शिक्का आपील एने ताह कियील, मी पोशा आवूह ताहउर लेनदेन केरुहू. 14पुण तान नगरात रेणारे ताहेर्यो द्वेष केरुहू एने तान पासाण वकिलान द्वारे केयीन मोकलील कि आमूह नाहं जुवी कि हा आमऱ्येपुररीन राज्य केरुहू.”

15“ताहेरया तो राज पद मेलावीन फिरीन आवा तेवी इही एय गीयो कि आपणो दासांना ज्याह तान रोखडी आपील एता आपनेहेऱ्यो हादाडळीन लावील म्हणजे मालूम केरुहू कि तान लेनदेन ने काय-काय कोमाईल. 16तेवी पेल्लाचने आवीन कियील, हे मालिक, तारो शिक्क्याने मी दहा शिक्का कोमाईल हि. 17तो ताह कियील, धन्य, हे हाजो दासान जादा एने थोडो माय विश्वास योग्य निकलील ऐवी दहा नगरापोर अधिकार मेलील. 18दिहरो आवीन कियील, हे मालिक, तारो शिक्क्याने मी आजू पाच शिक्का कोमाईल हि. 19तान ताह पुण कियील तू पुण पाच नगरांम अधिकारी एईन जा. 20तीस-याने आवीन कियील, हे स्वामी, देखू तारो हा हिकू हि ज्याह मी घासाडीमाय बांधीन मिलील हि. 21कारण मी तुवाह बियीईन एतो ज्यानकेरता कि तू कठोर माणुह हि जे तू किरील नाहं ताह विसीन लेणे एने जे तू पेरील नाहं ताह तू काटीह. 22तो ताह कियील, हे दुष्ट दासान, मी तारीच मुया केरीन तुवाह दोषी ठेरावीन हि तू माहु जाणांम एतो कि मी कठोर माणुह हि जे मी मिलील नाहयेतोतो मी विसीन लेणे एने जे मी पेरील नाहं ते मी काटीह; 23तर तू मारा सावकाराउगी का मिलील नाहं कि मी आवीन व्याजाहे-रो लीन लीईल हि. 24जे माणुह आहने उबरीयेल एता तो ताह कियील तो शिक्का ताफायरीन लीन ली एने ताह दया ज्याफाय दहा शिक्का हेते. 25तो ताह कियील, हे स्वामी, ताफाय तर दहा शिक्का तर हेते? 26मी तुमूह किथु कि ज्याफाय हि ताह आपील जाय; एने न्यानहेऱ्यो नाहं ताफायरीन तो पुण लीन लीईल जाय जो ताफाय हेते. 27पुण मारो ता दुश्मना ज्याह लागणे नाह एता कि मी तां पोर राज्य केरूह ताह न्या मार ओगाण आवीन तानकेरीन घात केरू.”

यरूशलेम माय विजय प्रवेश

(मत्ती 21:1-11; मरकुस 11:1-11; यूहन्ना 12:12-19)

28हि वात केयीन तो यरूशलेमान तान ओगाण-ओगाण गीयो. 29ताहेर्यो तो जैतुन नावान डोंगरापोर बेतफगे एने बैथानी आहने पोचना, तेवी तान आपणो चेला मायरीन दुय जाणाह ज्यो केयीन मोकलील, 30ओगाणवालु गावाम जा; एने तामाय पोहोचताच एक गेदडान पिलो जीपोर केविज कूण प्रवेश किरील नाहं बांधीन मिलील तुमूह जुडी ताह सोडीन लीन आवो. 31जर कूण तुमूह फुसहु कि काहा सोडनु, तर ज्यो केणेन कि प्रभुह ज्ञान गिरीज हि.

32ज्याह मोकलील एता तास जाइन ताह कियील एता, तोहोलोच देखाईल. 33जेव्ही तो गेदडान पिलाह सोडथू एता, तेवी तान मालकाह ताह फुसील, ज्या गेदडान पिलाह का सोडथू हि. 34तान कियील, प्रभुह ज्ञान गिरीज हि. 35तो ताह यीशु हेऱ्यो लीन गीया एने आपणा फाडका ता पिला पोर टाकीन यीशुह तापोर बोहाडीन आपील. 36जेव्ही तो जात एतो तेवी तो आपणा फाडका वाटी पुर मेलतांलोन जात एता. 37आहने आविह एतालून ताहेरया तो जैतुन डोंगरान उतरनीपोर पोचना तेवी चेला आखीच कलीसिया ता आखा सामर्थ्यान कामान वजसे जे तास देखील एता आनंदित एईनमोटला शब्दान बोगवानान स्तुती केरूह लागिल, 38“धन्य हि तो राजा, जो प्रभुने नावान आवथू! स्वर्गाम शान्ति एने आकाशगंगेत स्तुती ओहलो”

39तेवी गेर्दीमाय वालू काही फरीसी केणेंन लागिल, “हे स्वामी, आपणो चेला जुल्यो.” 40तान उत्तर आपील मी तुमूह किथु, जर ज्यो ठावको रेहू तर दिगुड आयडणार.

यरूशलेमान केरता दुख

41ताहेरया तो आहने आवा तेवी नगराला देखीन तो रेडील. 42एने कियील कोलाक हाजो एय गीयो हि कि तूच आवो दिहा एने हाजो वातूह समजील हि पुण ऐवी ते तारो डोळ्याने लिकाईन गीया हि. 43काहाकाय ता दिह तारपोर आवीती का तारा दुसमोन होम्च्यू केरीन तुवाह बांधीन एने चारुबी उखररीन तुवाह दाबती; 44एने तुवाह एने तारो सोराह जा तुमरीमाय हेते, माटळ्याम मेलावणार एने तारेपोर देगडापूर दिगुड भी नाय मेली; काहाकाय तू ता वेलाह नाह सोमजनो तारपोर कृपा-दुष्टी केरील एती ती तू ओलखणु नाहं.

मन्दिरान सफाई

(मत्ती 21:12-17; मरकुस 11:15-19; यूहन्ना 2:13-22)

45तेवी तो मंदिरामाय जाइन वेचणाराह बाहेर काडने लागो. 46एने तांह केयो, लिखील हि; मार घेर प्रार्थनान घेर रेंय, “पुण तुमु ते ताह डाकून गुफा बोणाव दियील हेते.” 47तो दाडीन मंदिरामाय लिकाडतालु आपतेन एतो; एने मुख्य याजक एने शास्त्री एने माणहान प्रमुख तान नाश केरणेन केरता योग्य टाइम होदतेन एता. 48पुण कायीच उपाय काडीन शकले नाहं कि, हे कायताहा प्रकारे केरुहू कारण आखा माणुह मोठला आवडीने तान होंबलेह एता.

Seçili Olanlar:

लूका 19: NLXNT

Vurgu

Paylaş

Kopyala