लूका 18

विधवा एने अधर्मी न्याय केरणार

1तेवी यीशु तान विषयाम नित्य प्रार्थना केरावी एने तुट गीयो नाहा हा वार्ता कियेल. 2“कूण एक नगरामाय न्यायाधीश रेथे एतो; तो बोगवानान बियीईन नाह एतो एने काल्लूच माणहान पोरेनदीही केरतीन नाह एतो. 3ता नगरामाय एक विधवा रेथे एती, जी तान आहने आवीन आवीन किथी एती, मारो न्याय चुकाडीन माहु मारो कर्जदाराफायरीन वाचाढो.” 4काही टाइम ताहवोर तो ते मानू नाहं पुण सेवट मोनाम विचार केरीन कियील, जर मी बोगवानान बियीईन नाहरेने, एने माणहान कालजी केरता; 5तेभी हि विधवा माहु त्रास आपतेन रेथू, ज्ञान केरता मी तीन न्याय केरूह, केध्दीह इही होवो कि घडी घडी आवीन माहु त्रास आपुह.

6प्रभु कियील, “होमलू, हे अधर्मी न्यायी काय किथे? 7ज्ञान केरता काय बोगवान आपणो निवाडीलाहा न्याय तो केरुहू नाहं का, जो रात दिह तान धावा केरणू? काय तो आपणो विषय माय टाइम लागाडूह? 8मी तुमूह किथे, तो चालूच तान न्याय केरूह तेभी पुण माणहान सोरो पृथ्वी उपेर न्यावालो तेवी ताह पृथ्वीपोर विश्वास रेंय काय?”

कूण धर्मी ठेहराय?

9तो तान उगेरीन तापोर विश्वास मेलतांलोन एता, कि आमु धार्मिक हि, एने दिहीरा तुच्छ मानत एता, जोस वार्ता कियेल: 10“दुय माणुह मंदिरामाय प्रार्थना केरणेन केरता गीया; एक फरीसी एने दिहरो जकात लेणार.” 11फरीसी उबरील रेयीन तान मोनाम प्रार्थना केरूह लागिल, “हे बोगवान मी तारो धन्यवाद करने कि मी दिहीरा माणहा सारखो टेगनारा अन्यायी, एने व्यभिचारी नाहं एने नाहं चुंगीलेणारा सारखो हि. 12मी आठवड्या मायरीन दुयीवारी उपास मेलीही; आपणो कोमाईन दहावा भाग पुण आपथु.” 13“पुण जकात लेणार सेटोच उबरील रेयीन, स्वर्ग उगे देखहुं ईच्छी, नाहं तर आपणी छाती ठोकीन ठोकीन कियील, हे बोगवान पाप्यापोर दया केर. 14मी तुमु किथु कि तो दिहरो नाह, पुण ज्योच माणुह धर्मी ठेरील एने आपणे घेर जाईल; कारण कि जो कूण जीवाह मोठू बोनाडी, ताह आत्यो केरणेन आवी; एने जो जीवाह आत्यो बोनाडी ताह मोठू केरणेन आवी.”

बोगवानान राज्य आतल्या सोरान होस

(मत्ती 19:13-15; मरकुस 10:13-16)

15ओवतो माणहे आपणो सोराह पुण तान आहने लावणेन लागिल कारण तो तापोर आथ मेलील एने; पुण चेलाह देखीन ताह जुल्यो. 16यीशु सोराह आहने हादाडळीन कियील, “सोराह मारो उगे आवणे दिवू, एने ताह नाह केहू मा; काहाकाय बोगवानान राज्य तान सारख्या ताणुच हि. 17मी तुमूह खेरो किथे कि जो कूण बोगवानान राज्या सोरोन हारका स्वीकार केरुहू नाहं तो तामाय केधीच प्रवेश केरूह शकणार नाहं.”

एक मालदारान यीशुह प्रश्न

(मत्ती 19:16-30; मरकुस 10:17-31)

18कूण एक अधिका-याने ताह फुसील, “हे हाजो गुरु, अनंत जीवनान अधिकारी रेणू केरता मी काय केरूह?” 19यीशु ने ताह कियील, “तू माहु हाजो का केणे? कुनुस हाजो नाहं केवळ एक, अर्थाम बोगवान.” 20तू आज्ञाना जाणीह: “व्यभिचार नाहं केरुहू, हत्या केरूह मा, एने चोरी केरणेन नाहं, खोटी गवाही आपुह मां, आपणो आबुक एने आपणो आहाकान आदर केरहू.” 21तान केयेल, “मी तर आवो आखाह जुवान पणा तारीन देखतालु आवूह हि.” 22जो यीशु ने ताह केयेल, “तुमरीम ऐवी पुण एक वातून थोडो हि आपणा आखा काही पाकील गारीबांह आपिन टाक; एने तुवाह स्वर्गाम धन जुडी, एने आव चाल मारो पासाण आव.” 23ज्यो होमलीन तो जुलुम नाराज एनो, काहाकाय तो जुलुम श्रीमंत एतो. 24यीशु ताह देखीन कियील, “धनवानान बोगवानान राज्यामाय प्रवेश केरीन कोलाक केठीन हि. 25बोगवानान राज्यातम धनवान केरता प्रवेश केरणेन केरता उंटळान हुईन नाकाम जाणू सोपो हि.” 26ओवतो उपेरीन होमलणार कियील, “तर ओवतो कुणीन उद्धार एहू शकणे?” 27तान कियील, “जो माणहा फायरीन नाहं एहू शकत, तो बोगवान फायरीन एहू शकते.” 28पतरससान कियील, “देखू आमु तर घेरदार सोडीन तारो पासाण आवा हि.” 29तान ताह केयेल, “मी तुमूह खेरोच किथु कि ओहलो कुणीचनाह जो बोगवानान राज्या केरता घेर किवा बायकू, किवा बाहाक, किवा आई-आबाक किवा सोराह सोडीन आपील हि. 30एने आवो टाइम मोक्तास पटीने जुडील नाहं एने आवणारा युगात अनंत जीवन.”

पुनरुस्थानान भविष्यवाणी

(मत्ती 20:17-19; मरकुस 10:32-34)

31ओवतो तो बाराजणान हेरी लेईन जाइन ताह कियील, “देखू, आमु यरूशलेमाम जातेन, एने जोलाक वातू माणहान सोरोनकेरता भविष्यवक्ता द्वारे लिखील गीया हि, तो आखा पुरो एय हि. 32काहाकाय तो दिहरी जातीयांन आथाम होपील जाय, एने तो तान चेष्टा केरती एने तापोर थूपती, 33एने ताह फटके देती, एने घात केरती; एने तो तीन दिहामाय पोशो जीवतालू एय.” 34पुण तो ओवतो वातू मायरीन काल्लीज वात होमजील नाहं; एने ती वात तास लिकाईन मेलील एने जो कियील गीया एता तो तान लक्षांम आवा नाह एता.

आंधला भिखारीह डोला

(मत्ती 20:29-34; मरकुस 10:46-52)

35ताहेर्यो तो यरीहो आहने पोचना, तर एक आंधलो रोडान मेरापूर बोहीन भिख मांगतेन एतो. 36ती गेर्दीन जात वालाह आवाजा होमलीन फुसणे केरीन लागिल, “ज्यो काय एता हि?” 37तास ताह केयेल, “यीशु नासरी जात हि.” 38तेवी तो आयडीन कियील, हे यीशु दाविदान सोरा, मारो उपेर दया केरू 39जो ओगाण ओगाण जात एता, तो ताह जुलने लागिल कि ठावको बोह; पुण तो जास्तीस आयडणेन लागिल, “ज्यो दाविदान सोरा, मारपुर दया केरू” 40तेवी यीशु उबरील रेयीन आज्ञा आपील कि ताह मारो उगे लावो, एने तेवी तो आहने आवा तेवी तान ताह फुसील, 41“तुवाह काय जुविकाय कि मी तारो केरता काय केरूह?” तान कियेल, “हे प्रभु ज्यो केर कि मी देखहुं शकेल.” 42यीशु ताह कियील, “देखहुं फोलरेना तारो विश्वासान तुवाह हाजो किरील हि.” 43तेवी लागीच तो देखणेन लागिल, एने बोगवानान महिमा केरतीन तान पासाण निकलीन गीयो एने आखा माणहान देखीन बोगवानान स्तुती केरील.

Seçili Olanlar:

लूका 18: NLXNT

Vurgu

Paylaş

Kopyala