Maakö 9

1'N ɔ yuëë 'dɩ 'nyɛ ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ, a gla'mö a ‑mumuë ‑wa glɩɛ dɛ'ɛ, wa 'naa 'kä ‑bhlɛ 'ku, 'n wa 'nɩɛ 'pɩwʋ mää Lagɔ 'kämanɩɛ mää 'kää 'ɔ 'mötɛɛnɔɔ 'mö yinɩ 'ylɩmö 'wëë.»

Zezwii a ‑gänɩwa ta yɛ 'ɔ 'ghïlinɔɔ 'ylɩmö

(Matie 17.1-13; Lwiikö 9.28-36)

2'Ylɩ gbʋplʋ 'plɩɛ, 'n Zezwii yiɛ Piɛlɩ ‑nyɛ Zaakö 'sɔ 'wʋ 'libhï, Zaa kökä, 'n ɔ ‑nyʋä yiɛ wa 'yize ‑gäga ‑vʋkwa ‑bhlʋ 'klʋ mö. Wa 'yila 'klʋ 'n ɔ yiɛ zʋzlɔnɩ. 3'Ɔ ‑banɩɩ mɩɩ plɛɛ tenyii buu. 'N yɩ yiɛ 'mö lɩ. Sɛ yɩ bunmanɩɛ, nɩkpɛ 'nɩɛ mä'ä 'ylʋ zɛmö bhɛnɩ ɔ 'kä ‑sɩbhä ‑lu bumanɩ. 4'N wa yiɛ Lagɔ a bhlamö a 'möbhïlanɩnyɔ Elii ‑nyɛ Moyizɩ 'sɔ 'ylɩmö, wa ‑nyɛ Zezwii ‑wʋ 'dɩ ‑sɛ dɔ'wʋ. 5'N Piɛlɩ yiɛ Zezwii 'dɩ 'nyɛ ɔ lɛ naa: «‑Atʋ, yɩ nɛnɩ ‑a 'käa'a mä'ä glɩ. Zaa, ‑a 'kä ‑gligbï ta 'sɩbhä, ‑na ‑na ‑bhlʋ, Moyizɩ a ‑na ‑bhlʋ, 'n Elii a ‑na ‑bhlʋ.» 6Wa ta ‑kpɔ nganɔɔ a za wa'aa wanyɩ ‑yi, zaa Piɛlɩ 'nɩɛ ‑mi ɔ bhïlaa ‑yi. 7'N ‑kpu yuëë 'wʋ wɛnɩ. ‑Mä ‑kpu 'la 'mö 'n wɛlɩ yiɛ ‑mä 'bhöönɩ, yɩ lɛ naa: «‑Mɔ nɩ 'dɛɛ mɔɔ glɩnɩɛ 'na ‑wawayuu. A nɩ ‑pʋnɔɔ 'yukwli.» 8Wa lɛ zʋa sɛ'ɛ cuu, Zezwii a 'yize mɔɔ nɩgböa'a ‑lɛ. ‑Muë'la 'nɩa'a ‑lɛ ‑wʋ.

Zezwii 'a ‑gänɩwaa kɔ Elii a wɛlɩ 'wʋ 'yɩbhänɩ

9Wa ‑wʋ ‑gägaa kwli dɔ'wʋ, 'n Zezwii yuëë 'dɩ 'nyɛ ɔ lɛ naa: «'Saa a 'yɩɛ dɛ'ɛ 'ylɩmöö, a nɩ ti ‑bhlɛ ‑sɛ, Nɩkpɛ a 'Yu 'kää glu 'wlʋ 'wë.» 10Wɛlɩ 'la, wa 'zwi 'klʋpamö, ‑maa nimï wa 'yɩbhäyɩbhänɩɛ, nɩɩ: «'Saa ɔ la bhä ɔ 'kää glu 'wlʋ 'wë?» 11'N wa yoo nimï yɩbhä nɩɩ: «Moyizɩ 'a Gböö a 'cɩawaa, sɛ'ɛ wa nʋä nɩɩ, Elii mɔɔ 'kää yi 'wë, 'saa kä ɔ 'nglɩ?» 12'N Zezwii yuëë 'dɩ 'nyɛ ɔ lɛ naa: «Elii mɔɔ 'kää yi ɔ 'kä ‑lii 'wuë 'wlu gïganɩ, 'wë, Puënyɔ Lagɔ ‑sɛɛ ‑lɛ 'kä yi. Nɩkpɛ a 'Yu a dɛ, sɛ'ɛ yɩ cɛlɩɛ nɩɩ, ɔ ‑kä yii, ɔ yi 'zwɩ a ‑bɛ zi, wa yo 'ylimö fälanɩ. 'Saa kä ɔ 'nglɩ?» 13Abhʋa n nyɛɛ gbëaa 'dɩ nɩɩ, Elii ‑ɔ 'kä a‑a yii, ɔ yɛ a yi 'wë. ‑Maa, 'Saa wa 'yɩbhää 'mö wa noo 'wlu. ‑Sɩbhä yɩ cɛlɩɛ ɔ dɛ ‑mä Lagɔbɔgʋʋ 'mö.

Zezwii yɛ 'yu ‑ɔ kää zuzukwëzokwë ‑gömö yɛmanɩ

(Matie 17.14-21; Lwiikö 9.37-43)

14Wa ghlɛɛ ‑lɛ 'ɔ ‑gänɩwa ‑muë'la yɔwʋʋ, wa lɛ 'bhöö lɛ, Moyizɩ 'a Gböö a 'cɩawaa ‑mumuë ‑nyʋä 'sɔ wa ‑wʋ kpɛnɩ dɔ'wʋ, nɩkpa a 'kɔkɔmlɛ ‑binuë. 15Nɩkpaa a ‑bʋbʋʋ 'yɩɛ Zezwii 'ylɩmö cuu 'n wa yiɛ 'mö ‑bulublunɩ, 'n wa yo gbanɩɛ 'mö, wa 'kɔ bhälɩ. 16'N ɔ yuëë nimï 'yɩbhä nɩɩ: «'Saa‑gbʋ a ‑nyɛ nɩkpa nɩ kpɛnɩ bhä 'mö nɩ?» 17'N ‑mä ‑bʋbʋʋ 'mö a nɩkpɛ ‑bhlʋ yiɛ gbʋ ‑dɩ, ɔ lɛ naa: «‑Atʋ, 'na yuu 'mö n ‑lamöä, zuzukwëzokwë ɔ kää ‑gömö, a za ɔ'ɔ ‑dɩ gbʋ. 18A ‑kä glu 'bhöö, zɛmö ɔ bhliɛ, 'n ɔ ngli pää 'pïpïli 'n ɔ liɛ gla 'mö 'n ɔ plɛɛ ‑gbɛngʋʋ. 'N n yiɛ ‑na'a ‑gänɩwaa yɔwʋ bhibhe wa 'kɔ a zuzukwë 'la ‑gömö kpëti, ‑maa yɩ'ɩɛ ‑mä mö.» 19'N Zezwii yuëë gbʋ 'wʋ ‑dɩ ɔ lɛ naa: «Abhʋa ‑sɩkaa nɩkpaa! 'Ylɩ ‑zɩmö n 'kanyɩ bhä ‑bhlɛ ‑sɩkaa jijo'wʋ ‑sɛ 'nɩ? 'Ylɩ ‑zɩmö n 'kanyɩ bhä ‑bhlɛ ‑sɩkaa kɛ yɔlɔnɩ 'nɩ? Bhee n kɩ 'nʋ, ‑maa a ‑laa yuu.» 20'N wa ‑nyɛ yuu yiɛ yi. Zuzukwëzokwëa 'yɩɛ Zezwii 'ylɩmö cuu, 'n a yiɛ yuu ‑glasɛ 'mö 'siasianɩ, 'n yuu yiɛ zɛmö bhli. 'N ɔ yiɛ 'bhɛtɔ, 'n ɔ ngli yiɛ 'pïpli 'pä. 21'N Zezwii yiɛ ɔ dɩba nimï yɩbhä, nɩɩ: «A kɔ 'wʋ bhli a 'ylɩ ‑zɩmö bhä dɛ'ɛ 'nɩ?» Ɔ lɛ naa: «Ɔ ‑wʋ a 'tikëyi 'wʋ 'n a yoo ‑gömö bhlinɩ.» 22'Tɛnyɩ ‑mɛmɛɛ 'mö, a pɔ ‑kosu 'mö. 'Tɛnyɩ ‑mɛmɛɛ 'mö a pɔ 'nyu 'mö. Sa'a a ‑sooo 'kukusɛ. Zaa, ‑n ‑kä bhɛnɩɩ, 'pä ‑aa ngäzɩdlɩ. 23'N Zezwii yoo 'dɩ 'nyɛ nɩɩ: «'Saa wa la bhä, ‑n ‑kä bhɛnɩɛ 'nɩ? ‑N ‑kä Lagɔ dlɩ 'tɛɛnɩɩ, ‑lu nɩmöa'a kɛ'mö tɛɛnɩ.» 24Zezwii gbää sa'a cuu, 'n yuu a dɩba yiɛ 'mö 'kpa, ɔ lɛ: «N 'tɛɛnɩ yɩ Lagɔ dlɩɩ, ‑maa ɛ'ɛ ‑bhöa'a 'tenyii. Zaa, yiii 'wʋ!» 25Zezwii ‑nyɛ nɩkpɛɛ 'sɔ wa ‑wʋ bhïla dɔ'wʋ, 'n nɩkpaa 'titanuëë yɔwʋ 'wlu 'yize. Zaa, 'n ɔ yiɛ zuzukwëzokwëa yɔwʋkanɩsɛ 'dɩ 'nyɛ, nɩɩ: «Zuzukwëzokwë, ‑nmö kää 'nglɩ 'n yu nɩ 'nɩ bhïlaa 'n ɔ'ɔɔ ‑ngöö, ‑nmö n nyɛɛ dɛ'ɛ 'dɩ, 'bhoo ‑sɩkaa ‑gömö, ‑n toa'a 'sɔ ‑gömö yi.» 26'N zuzukwëzokwëa yoo ‑gömö 'bhöö. A ‑wʋ 'mö 'kpa dɔ'wʋ 'n a yoo ‑glasɛ 'mö 'siasianɩ. 'N yuu yiɛ yɔmanɩ, ɛ kä ‑bhɩɛ 'ku ɔ yɛ 'ku. ‑Mumuë a'bhë nʋ ‑sɩbhä. 27'N Zezwii yoo 'sɔ köbhänɩ, 'n ɔ yoo 'wlu 'libhï, 'n yuu yiɛ ghäyɩ 'nɩgbönɩ.

28Zezwii ‑nyɛ 'ɔ ‑gänɩwaa 'sɔ, 'n wa yiɛ 'ligbë 'mö mö. Wa 'yize wa glɩ ‑lɛ, 'n wa yoo nimï 'yɩbhä nɩɩ: «Zuzukwëzokwë 'la, sɛ yɩ ‑wʋ ɔ 'mö a‑a yea sɩɛnɩ 'nɩ?» 29'N ɔ yuëë 'dɩ 'nyɛ nɩɩ: «Wa'a kpëti sa'a a zuzukuzoku 'la 'fʋ, n‑n 'nɩɛ Lagɔ bhibhe 'wëë.»

Zezwii yɛ'ɛ 'ɔ 'kwiea ‑nyɛ 'ɔ gluwlʋwlɛɛ 'sɔ a 'dɩ bhïla

(Matie 17.22-23; Lwiikö 9.43-45)

30Zezwii ‑nyɛ 'ɔ ‑gänɩwaa 'sɔ, wa 'bhööä ‑lɛ, 'n wa yiɛ ‑mä Galilee‑bhölɩɩ 'mö 'wʋ 'tʋ. Ɔ'ɔɔ 'yɩbhä nɩkpa nɩ ‑yi dɛ ɔ ‑wʋä dɛ. 31Ɛ'ɛ ‑bhö nyɩasɛ, ‑maa 'saa 'kɔɔ ghlɩ a dɩɩ, 'mö ɔ ‑wʋä 'ɔ ‑gänɩwaa 'nyɛ dɔ'wʋ. Ɔ lɛ naa: «Nɩkpɛ a 'Yu, wa yoa'a ‑pa nɩkpa kä'mö plɩnɩ, wa 'kɔ 'lɩbhä ɔ 'kä 'ku. ‑Maa 'ylɩ ta ‑kä 'plɩ ɔ yi glu 'wlʋ.» 32Wɛlɩ 'la, wa'aa sɛ yɩ sɛ zɛmöä ‑yi. ‑Maa wa 'kɔ nimï 'yɩbhä a dɔ'wʋ, ‑gu wa guä.

‑Ɔ kä bhä dɛsɛ ‑ɔ zi ‑muë'la 'wuë 'wʋ?

(Matie 18.1-6; Lwiikö 9.46-48)

33'N wa yiɛ Kapɛnaɔmö glɔ ghlɛ. 'N wa yiɛ 'ligbë 'mö mö. 'N Zezwii yuëë nimï 'yɩbhä nɩɩ: «Wɛlɩ a ‑mi a kpɛnɩ bhä ‑ka ‑mä 'yio 'wʋ 'mö 'nɩ?» 34Ɔ 'yɩbhʋä nimïï, wa 'wuë 'wʋ wa ‑gɔɔ. Wɛlɩɩ wa kpɛnɩɛ 'mö miɛ nɩɩ, wa gla'mö a dɔ'wʋ, ‑ɔ kä bhä dɛsɛ ‑ɔ zi ‑muë'la 'wʋ. 35'N Zezwii yiɛ sɛ glɩ. Wa kʋgbä 'sɔ ‑kpɔ 'n ɔ yuëë wäzɩ, 'n ɔ yuëë 'dɩ 'nyɛ nɩɩ: «A gla'mö ‑mɔɔ ‑kä 'yɩbhä ɔ 'kanyɩ 'yuku ‑gänɩ nʋʋ, ɔ nɩ 'libhï ɔnyɩ a gla'mö a 'tikëyi 'mö 'wʋ, nzɩɩ ɔ 'kanyɩ 'yli ‑wʋ.» 36'N ɔ yiɛ 'ywilɛ 'wʋ 'libhï, 'n ɔ yoo ‑lɛ wa jijo'wʋ 'nigba, 'n ɔ yoo dlɩ gbönɩ, 'n ɔ yuëë 'dɩ 'nyɛ nɩɩ: 37«Sɛ'ɛ a 'ywilɛ, ‑ɔ ‑kɔɔ pälaa, ‑amö ɔ yɛɛ päla. ‑Ɔ ‑kaa pälaa, na 'yize ‑amö ɔ'ɔɔ päla, ‑maa ‑ɔ tieaaa, 'mö ɔ yɛɛ pälamö.»

‑Ɔ 'nanyɩ ‑gblɩɩ nimï ɔ ‑wʋanyɩɛ

(Lwiikö 9.49-50)

38'N Zaa yoo 'dɩ 'nyɛ, ɔ lɛ naa: «‑Atʋ, nɩkpɛ ‑bhlʋ ‑wʋ ‑na 'nglɩ 'mö nɩkpa zuzukuzoku ‑gömö kpëti dɔ'wʋ a‑a yoo 'ylɩmö. Ɔ'ɔ ‑bhö ‑aa gla'mö a ‑nɔ. Zaa, a‑a yoo 'dɩ 'nyɛ nɩɩ, ɔ nɩ tɩ ‑sɩbhä 'zʋ.» 39Zezwii lɛ: «A nɩ ‑sɔɔ kɛ yɔwʋ, ‑maa nɩkpɛ ‑mɔɔ 'kää na 'nglɩ 'mö zɩzɛli ‑bhɛ 'wë, cuu ‑ɔ 'kää na 'nglɩ nyimaa, ɔ'ɔɔ ‑bhölɩ. 40‑Ɔ ‑nɩnyɩ ‑gblɩɩ, nimï ɔ ‑wʋnyɩɛ.

41‑Tiamö n nyanyɩɛ dɛ'ɛ 'dɩ nɩɩ, sɛ a glɩnɩɛ Kliisɩ a ‑nʋa a za, nɩkpɛ a ‑mɔɔ ‑kaanyɩ 'nɩmänɩmänyu 'nyɛɛ, Lagɔ yo yɩ 'ylimö a ‑lu 'nyɛ.

‑Wa bhlɩɛ nɩkpa 'nyinyloli 'mö sɛɛ

(Matie 18.6-9; Lwiikö 17.1-2)

42Na ‑nʋa a gla'mö a ‑nɔ ‑bhlʋ ‑ɔɔɔ dɛsɛ ‑kä nɩkpa 'yila 'klʋ a dɔ'wʋʋ, 'n nɩkpɛ ‑kɔɔ dula 'n ɔ ‑kɔɔ na gbʋ dlɩ 'wʋ ‑sɛɛ, ɛ nɩkpɛ 'la, yɩ nɛnɩ ɔ dɔ'wʋ nɩɩ, wa nɩ gwanɔɔ kpiyigwli ‑bʋlʋ 'mö nzɩɩ wa 'kɔ ‑mä gïnyɛ 'mö 'pä. 43'N ‑na'a kätɩkpaa ‑kamö 'nyinyloli 'mö kwää, ‑daa 'wʋ, yɩ nɛnɩ ‑n 'kä sɔkïbhë ‑kä, ‑n 'kä 'pɩwʋ mää 'naa 'kää 'yli bhɩɛ ghlɩ. Yɩ zi ‑n 'kä kätɩkpö 'sɔ 'yli ‑kä, ‑n 'kä ‑kosu 'mö mö 'wʋ. [44‑Mä ‑kosu 'la 'mö, nɔɔ ‑wʋ liɛ ‑gäzɩɩ, wʋ'ʋ 'ku, ‑kosuu a'bhë, wʋ'ʋ 'ngïmo.] 45'N ‑na'a kpëlea ‑kamö 'nyinyloli 'mö kwää, ‑daa 'wʋ. Yɩ nɛnɩ ‑n 'kä bhʋ kïbhë ‑kä, ‑n 'kä 'pɩwʋ mää 'naa 'kää 'yli bhɩɛ ghlɩ. Yɩ zi ‑n 'kä kplɩ 'sɔ 'yli ‑kä, ‑n ‑kä ‑kosu 'mö mö 'wʋ. [46‑Mä ‑kosu 'la 'mö, nɔɔ ‑wʋ liɛ ‑gäzɩɩ, wʋ'ʋ 'ku, ‑kosuu a'bhë, wʋ'ʋ 'ngïmo.] 47'N ‑na'a ylii ‑kamö 'nyinyloli 'mö kwää, ‑sɛɛ ‑mä. Yɩ nɛnɩ ‑n ‑kä 'yifa ‑kä, ‑n ‑kä 'pɩwʋ mää Lagɔ 'kämanɩɛ 'bhle ghlɩ. Yɩ zi ‑n 'kä 'yila 'sɔ 'klʋ ‑kä, ‑n 'kä ‑kosu 'mö mö 'wʋ. 48‑Mä ‑kosu 'la 'mö, nɔɔ ‑wʋ liɛ ‑gäzɩɩ 'nɩ 'ku, ‑kosuu a'bhë, wʋ'ʋ 'ngïmo. 49Sɛɛ gïbhï nɛmanɩɛ ‑zɛpʋ nglii, ‑sɩbhä ‑a 'kää ‑mä ‑kosu 'la 'mö ghlɛnɩ, nzɩɩ ‑a 'kä 'wlɩlɩ plɛ.

50Gïbhïï, ‑li a ‑li yɩ glɩnɩɛ, ‑maa yɩ ‑kä 'lʋngli bhɩɛɛ, 'saa wa 'kɩ ɔ 'mö zʋ nzɩɩ yɩ 'kä 'sɔ mɛnɩmanɩ 'nɩ? A nɩ glɩnɩ ‑tiamö a gïbhï, a nɩ tɩ 'lʋngli bhɩɛ. Miɛ nɩɩ, a ‑nyɛ nɩkpa 'wuë nɩ ‑wanɩ.»

Seçili Olanlar:

Maakö 9: bet

Vurgu

Paylaş

Kopyala