Maakö 8

Zezwii yɛ nɩkpa a 'dwi kʋgbä (4.000) lile 'nyɛ

(Matie 15.32-39)

1'Tɛnyɩ ‑mɛmɛɛ ‑bhlʋ 'mö, nɩkpa a 'kɔkɔmlɛ su'ɛ ‑lɛ Zezwii yɔwʋ, wa'aa lililu ‑kä, zaa 'n Zezwii yiɛ 'ɔ ‑gänɩwaa wäzɩ, 'n ɔ yuëë 'dɩ 'nyɛ nɩɩ: 2«Nɩkpa nɩ, ngäzɩ 'wʋ wa ‑bhööä, wa 'ylɩ ta dɛ'ɛ na yɔwʋ, 'n wa'aa lililu ‑kä. 3‑Mumuë 'yuku wa 'bhöönɩɛ, wa 'nɩ ‑lu li, 'n n ‑kʋä 'yi 'tatinɩ wa ‑kä wa 'bhili möö, ngɔmʋ a za, wa yi 'yio 'wʋ 'kplɛnɩ.» 4'Ɔ ‑gänɩwaa lɛ naa: «Miɛ ‑maa, 'klokwëjijo'wʋ ‑a ‑wʋä dɛ'ɛ, zaa sɛ ‑a 'kä bhä 'zʋ a‑a 'kʋä bhä lile 'nyɛ?» 5Zezwii lɛ naa: «A'bhï 'fɔlɔbhï ‑zɩmö a ‑su bhä?» Wa lɛ naa: «‑A ‑su 'fɔlɔbhï ngbi'sɔ.» 6'N ɔ yiɛ nɩkpaa 'wuë 'dɩ 'nyɛ nɩɩ: «A nɩ glɩ dʋdʋ 'wʋ sɛ.» 'N ɔ yiɛ 'fɔlɔbhï ngbi'sɔ ‑kpɔ 'wʋ 'libhï, 'n ɔ yiɛ yɩ za Lagɔ bhälɩ, 'wë 'n ɔ yiɛ 'mö ‑dɩdɩnɩ, 'n ɔ yiɛ 'ɔ ‑gänɩwaa yowʋ 'nyɛ. 'N wa yiɛ nɩkpaa 'wuë dilanɩ. 7Wa ‑sumö a 'yɛ zibhïyie. 'N ɔ yiɛ 'nyu 'pä, 'wë 'n ɔ yuënyɩɛ yowʋ 'nyɛ, 'wa kɩ nɩkpaa dilanɩmö. 8Nɩkpaa 'wuë, 'n wa yiɛ li 'n wa yiɛ lʋ, 'n yɩ yiɛ 'wʋ tʋʋ. Kïbhïï ‑yɩ tʋʋä 'wʋ wa ‑nyɛɛ möä, yɩ yie ‑käkö ngbi'sɔ 'wʋ. 9‑Wa liɛ lile 'laa, wa ‑bhli nɩkpa a 'dwi kʋgbä a sɛ (4.000). Wa liɛ 'wëë, 'n Zezwii yuë 'dɩ 'nyɛ nɩɩ, wa nɩ mö wa 'bhili. 10Wa möä 'wëë cuu, Zezwii ‑nyɛ 'ɔ ‑gänɩwaa 'sɔ, 'n wa yiɛ gɔlʋʋ 'wʋ 'libhï, bhlɩɩ wa laa Damanutaa, 'n wa yiɛ ‑mä mö.

Falizɩɛwaa lɛ Zezwii nɩ 'pänɩ ‑lɛ wa 'yila 'klʋ zɩzɛ

(Matie 16.1-4)

11'Ylɩ ‑bhlʋ 'mö, Falizɩɛwa ‑mumuë mʋa ghlɩɛ ‑mä Zezwii, wa ‑nyɔɔ 'kä kpɛnɩ, wa 'kɔ ‑mä 'pä. Wa lɛ naa: «Tulanɩnyɩ 'ylimö nɩɩ Lagɔ mɔɔ tiamöä, 'pänɩ dɛ'ɛ ‑aa 'yila 'klʋ zɩzɛ!» 12Wa gbää sa'aa, 'n Zezwii yiɛ nyɛmʋ slu ɔ lɛ naa: «'Saa kä bhä 'nglɩ 'n ‑sɩkaa a nɩkpaa yɩbhä bhä wa 'kä zɩzɛli 'ylɩmö 'nɩ? Abhʋa n nyɛɛ 'dɩ gbëaa, zɩzɛ ‑bhlʋ a'bhë ‑ɛ 'kanyɩɛ 'ylimö tulanɩ nɩɩ Lagɔ mɔɔ tieaaa, a 'naa 'kɛ 'ylɩmö.» 13Ɔ gbää sa'aa 'wëë, 'n ɔ yuëë ‑gömö panɩ, ɔ ‑nyɛ 'ɔ ‑gänɩwaa 'sɔ 'n wa yiɛ gɔlʋʋ 'wʋ 'libhï 'n wa yiɛ nyuu 'tʋ.

A nɩ 'nɛmanɩ Falizɩɛwaa ‑nyɛ Eloodɩ 'sɔ 'a 'cɩawɛlɩɩ 'wʋ

(Matie 16.5-12)

14Wa 'kää möä yii, Zezwii 'a ‑gänɩwaa dlʋ wa dlʋä, wa'aa 'fɔlɔ pɩa. 'Fɔlɔbhë ‑bhlʋ ‑kpöö 'mö wa ‑suä ‑mä gɔlʋʋ 'mö. 15'N Zezwii 'yuëë 'dɩ 'mö zʋ, ɔ lɛ naa: «Falizɩɛwaa ‑nyɛ Eloodɩ 'sɔ, a nɩ 'nɛmanɩ 'wa levii 'wʋ.» 16Zezwii gbää sa'aa, 'ɔ ‑gänɩwaa kpɛnɩ wa kpɛnɩɛ wa 'yize, sɛɛ wa'aa 'fɔlɔ ‑su a za. 17Zezwii yɩbhlɩnɩɛ 'wa dlɩpäsaa, 'n ɔ yuëë nimï 'yɩbhä nɩɩ: «'Saa bhä 'n a kpɛnɩ sɛɛ a'aa 'fɔlɔ ‑su a za 'nɩ? A'aa ɔ ‑bhlɛ ‑lu 'mö 'nʋ ‑a? 'A dilaa 'mö yɩ 'tuunɩ bhä ‑a? 18A kä 'yila 'klʋ 'n a'aa sɛ yɩlɩ, a 'kä 'yukwïla 'wlu 'n a'aa ‑ngö. A'a ligba bhä ‑a? 19‑Zlɩ n ‑dɩdɩnɩɛ 'fɔlɔbhï ngbï 'mö, 'n nɩkpa a 'dwi kʋgbä'sɔ nɩkpa a gwlɩ kʋgbä (5.000) yi a‑a lii, ‑käkö ‑yɩ yie 'fɔlɔkïbhï ‑yɩ tʋʋä 'wʋ a ‑nyɛɛ möä, ‑zɩmö yɩ ‑bhli a bhä 'nɩ?» Wa lɛ: «‑Käkö kʋgbä'sɔ.» 20Ɔ lɛ naa: «'N ‑zlɩ n ‑dɩdɩnɩ'ɛ 'fɔlɔbhï ngbi'sɔ 'mö 'n nɩkpa a 'dwi kʋgbä (4.000) yi a‑a lii, 'fɔlɔkïbhï wa sɩɛnɩɛ, ‑käkö ‑zɩmö yɩ ‑bhli a bhä'ɛ?» Wa lɛ: «‑Käkö ngbi'sɔ.» 21Ɔ lɛ: «Zaa, a'aa bhä ‑bhlɛ da'a ‑lu 'mö 'nʋ 'yize ‑a?»

Zezwii yɛ 'kukwlekänyɔ yɛmanɩ

22Zezwii ‑nyɛ 'ɔ ‑gänɩwaa 'sɔ wa ghlɛɛ ‑mä Bɛtɩsayidaa, 'n wa yoo 'kukwlekänyɔ ‑bhlʋ ‑lɛ, 'n wa yoo yɔwʋ bhibhe ɔ 'kɔ kɛ zɩ. 23'N Zezwii yiɛ nɩkpɛɛ sɔ köbhänɩ, 'n ɔ ‑nyɔɔ yiɛ ‑mä glɔ 'mö 'wlʋ, 'n ɔ yoo ‑dɛlɛ 'ylimö 'daa, 'n ɔ yoo kätɩkpö 'yila 'klʋ zʋ. 'N ɔ yoo nimï 'yɩbhä nɩɩ: «‑N yɩlɩ bhä ‑lu 'wʋ ‑a?» 24Ɔ lɩa yilaa, ɔ lɛ naa: «N yɩlɩ nɩkpa 'wʋ, wa ‑bhɩɛ swi, 'n wa nɛmöä.» 25'N Zezwii yo'ɛɛ kätɩkpö 'yila 'klʋ zʋ. Nɩkpɛɛ lɛ lɩa'a yilaa, yɩ yɛ do, yɩ lɩ sasɛ. 26'N Zezwii yoo 'dɩ 'nyɛ nɩɩ: «Mö 'ligbë 'mö, ‑maa tɩa'a ‑mä glɔ 'mö plɛ.»

Piɛlɩ lɛ Puënyɔɔ Lagɔ ‑sɛɛ ‑lɛ 'mö Zezwii glɩnɩɛ

(Matie 16.13-20; Lwiikö 9.18-21)

27Zezwii ‑nyɛ 'ɔ ‑gänɩwaa 'sɔ, ‑glɔɔ wa laa Filipö a Sezalee, wʋ ‑kʋkʋyɔwʋ a ‑gwlɩɩ 'mö 'n wa yiɛ ‑mä mö. Wa ‑wʋ mö dɔ'wʋ, 'n ɔ yuëë nimï 'yɩbhä nɩɩ: «Nɩkpaa lɛ ‑mɔ n glɩnɩ bhä?» 28Wa lɛ naa: «‑Mumuë lɛ Zaa Batisɩ mö ‑n glɩnɩɛ. ‑Mumuë lɛ Elii mö ‑n glɩnɩɛ. ‑Mumuë lɛ Lagɔ 'a 'möbhïlanɩwaa a gla'mö ‑bhlʋ ‑n glɩnɩɛ.» 29'N Zezwii yuëë nimï yɩbhä nɩɩ: «Abhʋa abhlɩ, a dɔ'wʋ, ‑mɔ n glɩnɩ bhä?» 'N Piɛlɩ yiɛ gbʋ ‑dɩ, ɔ lɛ naa: «Kliisɩ, Puënyɔɔ Lagɔ ‑sɛɛ ‑lɛ, mö ‑n glɩnɩɛ.» 30'N Zezwii yuëë yɔwʋkanɩsɛ 'dɩ 'nyɛ nɩɩ: «A nɩ tɩa 'saa n glɩnɩɛ a 'dɩ ‑bɛ 'nyɛ.»

Zezwii yɛ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla

(Matie 16.21-28; Lwiikö 9.22-27)

31Ɔ gbää sa'a 'wëë 'n ɔ yuëë 'dɩ 'nyɛ nɩɩ, Nɩkpɛ a 'Yu, ɔ yi 'zwɩ a ‑bɛ zi. Zwiiföwaa 'a 'nɛɛnɩwa 'kädɩɩ muë, 'wa Lagɔbʋbɔwaa a 'kifiea muë, 'n Moyizɩ 'a Gböö a 'cɩawaa, wa 'wuë, wa yo nimï ‑sɛ. Wa yo 'lɩbhä ɔ yi 'ku. ‑Maa 'ylɩ ta ‑kä 'plɩ ɔ yi glu 'wlʋ. 32Ɔ 'nyʋä ‑sɩbhä gbëaa 'dɩɩ, 'n Piɛlɩ ‑nyɔɔ yiɛ zigbanɩ, 'n ɔ yoo 'lʋnɩ. 33'N Zezwii yoo ‑gömö panɩ, 'n ɔ yiɛ 'ɔ ‑gänɩwaa 'yi gö, 'n ɔ yiɛ Piɛlɩ 'lʋnɩ. Ɔ lɛ naa: «Sataa, 'dionɩɩ gwë! ‑Nn 'pä Lagɔsɛ dlɩ, nɩkpɛsɛ ‑n pää dlɩ.»

Sɛ ‑a kää ‑a 'kä Zezwii ‑gänɩɩ

34'N Zezwii yiɛ nɩkpaa a ‑bʋbʋʋ ‑nyɛ 'ɔ ‑gänɩwaa 'sɔ wäzɩ, 'n ɔ yuëë 'dɩ 'nyɛ ɔ lɛ naa: «‑Ɔ ‑kä ɔ ‑kaa ‑gänɩ nʋʋ, ɔ nɩ ‑sɛ ɔnyɩ dlɩ. Ɔ nɩ ‑su 'ɔ 'klʋkʋnɩsuu ɔ ‑kaa ‑gänɩ. 35‑Ɔ ‑kä ɔnyɩ 'wʋ gwɩ ɔ 'käa 'pʋ a za‑a, mɔɔ 'kää 'yli bhɩɛ, ‑maa ‑ɔ ‑kä ɔnyɩ dlɩ ‑sɛ na za 'n Lagɔ 'a 'Mänatɩtɩ a za‑a, mɔɔ 'kää 'pʋ. 36Nɩkpɛ 'kä mä'ä 'pɩwʋ a ‑lii 'wuë ghlɩ a za, 'n ɔ ‑kä 'wʋ nglu ɔ 'kä 'ɔ 'pɩwʋ tɩɩ, yɩ'ɩɛ ɔ ‑li a ‑li 'mö ‑kä. 37'Saa nɩkpɛ 'kää 'wäla ɔ 'kä 'ɔ 'pɩwʋʋ zetii, wʋ'ʋä'ɛ ‑bhölɩ. 38‑Sɩkaa a nɩkpaa ‑waa 'zʋä Lagɔ 'klʋkpamö, ‑wa panɔɔ ‑gömöö, wa jijo'wʋ ‑mä a ‑wʋä. A gla'mö a nɩkpɛ ‑mɔ n ‑kä zʋ 'wʋ ‑bhö, 'n ‑mɔ 'na wɛlɩɩ ‑kä zʋ 'wʋ ‑bhöö, Nɩkpɛ a 'Yu, ‑zlɩ ɔ ‑kä ‑mä ɔ dɩba 'a 'ghïlinɔɔ 'mö yinɩ ɔ ‑nyɛ Lagɔzuzukuu 'sɔɔ, nɩkpɛ 'la yo'ɛ ɔbhlɩ zʋ 'wʋ ‑bhömö.»

Seçili Olanlar:

Maakö 8: bet

Vurgu

Paylaş

Kopyala