Maakö 10

Sɛ'ɛ Zezwii gbää 'nglɔ ‑nyɛ 'luwli 'sɔ a dɛ

(Matie 19.1-12; Lwiikö 16.18)

1Zezwii 'nyʋää sa'a 'dɩ 'wëë, Zwidee‑bhölɩɩ a pɩɔ ‑wʋ ‑wʋnɩɛ ‑mä Zludɛɛ ‑gömöö, 'n ɔ yiɛ ‑mä mö. 'N nɩkpa 'kɔkɔmlɛ yo'ɛɛ yɔwʋ 'wlu 'titanɩ, 'n ɔ yuëë Lagɔwɛlɩɩ 'cɩa 'ɔ 'kwädlɩ a saa. 2'N Falizɩɛwaa a gla'mö a ‑mumuë yoo ‑mä ghlɩ, wa 'kɔ ‑mä 'pä zaa, 'n wa yoo nimï 'yɩbhä nɩɩ: «Nɩkpɛ bhɛnɩ bhä ɔ 'kä ɔ 'lɛnglɛ 'suë 'mö ‑sɛ ‑a?» 3'N Zezwii yuëë 'dɩ 'nyɛ nɩɩ: «Sɛɛ Moyizɩ gbä bhä kïbhë 'la a dɔ'wʋ?» 4Wa lɛ naa: «Moyizɩ lɛ nɩkpɛ ‑kä ɔ 'lɛnglɛ 'suë 'mö ‑sɛɛ, ɔ nɩ 'nyɔ 'suëmösɛbɔgʋ.#10.4 Detlenɔɔmö 24.1.» 5'N Zezwii yuëë 'dɩ 'nyɛ ɔ lɛ naa: «'A dilaa 'mö yɩ 'tuuä nza Moyizɩ 'cɛlɩɛ a za kïbhë 'laa. 6‑Maa tɛɛtɛɛdɔ'wʋ dɛɛ Lagɔ ‑bhɛɛ 'pɩwʋ a ‑lii 'wuë, ɔ ‑bhɛ nyɩbhɛlʋ 'n ɔ yiɛ 'nglɔ ‑bhɛ.#10.6 Zenɛɛzɩ 1.27; 5.2. 7Nza nɩkpɛ kää ɔ 'kä ɔ dɩba ‑nyɛ ɔ ‑da 'sɔ yɔwʋ 'bhöö, 8ɔ ‑nyɛ ɔ 'lɛnglɛ 'sɔ wa 'kä nɩkpɛ ‑bhlʋ 'zʋ,#10.7-8 Zenɛɛzɩ 2.24. ‑lɛ a dɔ'wʋ wa'aa'a 'sɔ ‑bhli ‑maa nɩkpɛ ‑bhlʋ wa glɩnɩɛ. 9Zaa, Lagɔ ‑kä nyɩbhɛlʋ ‑nyɛ 'nglɔ 'sɔ nɩkpɛ ‑bhlʋ 'wʋ 'zʋa 'wëë, ‑bɛ 'nɩɛ ‑kä ɔ 'kʋä 'ylimö ‑sɛnɩ.»

10Zezwii ‑nyɛ 'ɔ ‑gänɩwaa 'sɔ wa ghlɛɛ ‑mä 'ligbë 'mö 'n wa yoo wɛlɩ ‑bhʋlʋ ‑kpɔ 'la 'wʋ 'yɩbhänɩ. 11'N ɔ yuëë 'dɩ 'nyɛ nɩɩ: «Nɩkpɛ ‑kä ɔ 'lɛnglɛ 'suë 'mö ‑sɛ 'n ɔ ‑kä käbönɔ kwää, tɛkänɔɔ a dɛ, 'nyinyloli ɔ ‑nʋä. 12Sɛ ‑bhʋlʋ ‑kpɔ 'la, 'nglɔ ‑kä ɔ 'luwli yɔwʋ 'bhöö, 'n ɔ ‑kä käbönɔ kwää möö, gbɩ ɔ tɛlɩɛ sɛ.»

Zezwii yɛ 'yuë 'tikïyiea 'nyu 'pä

(Matie 19.13-15; Lwiikö 18.15-17)

13Nɩkpa ‑mumuë mʋa ‑lɛmöä Zezwii 'wa 'yuë 'tikïyiea ɔ 'kʋa kɛ zɩ, ‑maa 'ɔ ‑gänɩwaa lɛ nɩkpa 'la nɩ tɩ ‑sɩbhä zʋ. 14Zezwii 'yɩɛ 'wa nʋnʋlii 'ylɩmöö, ɔ'ɔɔ ‑wa. N ɔ 'yuëë 'dɩ 'nyɛ nɩɩ: «A 'tatinɩ yuëa 'yi wa ‑kaa yɔwʋ yi, a nɩ tuë 'yio 'wʋ ‑sɛ, ‑maa nɩkpa a ‑muëë ‑wʋä yuë nɩ a saa, 'pɩwʋ mää Lagɔ 'kämanɩɛ, mʋa 'kää ‑mä 'bhle ghlɩ. 15‑Tiamö n nyanyɩɛ dɛ'ɛ 'dɩ nɩɩ, ‑ɔnyɩ dlɩɩ 'nɩ 'yu a ‑nɛ a sɛ 'zʋ, 'pɩwʋ mää Lagɔ 'kämanɩɛ, ɔ 'naa 'kä ‑mä 'bhle ghlɩ 'lɩlɩlɩ.» 16Zezwii gbää sa'a 'wëë, 'n ɔ yiɛ yuëa dlɩ gbönɩ 'n ɔ yuëë kätɩkpö 'wlu zʋ, 'n ɔ yuëë 'nyu 'pä.

Lɩkänyɔ ‑bhlʋ yɛ Zezwii nimï 'yɩbhä

(Matie 19.16-30; Lwiikö 18.18-20)

17Zezwii ‑wʋ mö dɔ'wʋ, 'n nɩkpɛ ‑bhlʋ yoo yinɩ ɔ ‑wʋ guë dɔ'wʋ. Ɔ ghlɛɛ ‑lɛ ɔ dlɩ 'möö, 'n ɔ yiɛ ‑kokomïladigbï glu 'pä, ɔ lɛ naa: «‑Atʋ ‑ɔ ‑gä kɛ, 'pɩwʋ mää 'naa 'kää 'yli bhɩɛ, sɛ n 'kä bhä zʋ 'n n 'kä bhä ‑mä ghlɩ?» 18Zezwii lɛ naa: «'Saa ɔ n laa ‑ɔ ‑gä kɛ? ‑Ɔ 'kää kɛ ‑gää, ɔ'ɔɔ ‑bhölɩ 'n ɛ 'nɩ ‑bhö Lagɔ a 'yize mɔɔ. 19‑N ‑yi Lagɔ 'a Gböö. Lagɔ lɛ naa: Tɩ 'ku 'lɩbhä. Tɩ ‑na 'li a 'nglɔ sɛ tɛlɩ, tɩ ‑na 'li a 'luwli sɛ tɛlɩ. Tɩ ‑na 'li a ‑lu 'wi ghli. Tɩ ‑na 'lilɛ gbʋ ‑gömö 'pä. Tɩ ‑na 'li dula. 'Zʋ ‑na dɩba ‑nyɛ ‑na ‑da 'sɔ 'klʋkpamö.#10.19 Ɛzoodɩ 20.12-16; Detlenɔɔmö 5.16-20; 24.14.»

20Nɩkpɛ lɛ naa: «‑Atʋ, tɛɛnɩ ‑mä 'na 'yuëda 'wʋ ‑këë zɩ'ɛ, ‑mi'la 'wuë 'klʋkpamö n zwiɛ.» 21'N Zezwii yoo 'wʋ yɩlɩ 'n ɔ 'mäna yoo 'lɩbhä. 'N ɔ yoo 'dɩ 'nyɛ, ɔ lɛ naa: «‑Lu ‑bhlʋ mʋʋ tʋʋmöä ‑mä. Mö, 'pä 'saa ‑n kää 'wuë 'pɛlʋ, ‑n 'kä yɩ monii 'pʋawa dilanɩ, ‑maa ‑mä Lagɔ yɔwʋ ‑n yi ‑mä wʋlʋnɔ ghlɩ. ‑N ‑kɩɩ 'pɛlʋ 'pä 'wëë, yi ‑n ‑kaa ‑gänɩ.» 22Zezwii 'nyɔɔ sa'a 'dɩɩ, 'ɔ lɩɩ ɔ kää, ‑zu yɩ ‑zuä zaa, 'n ɔ yiɛ 'klʋ 'mö nyimanyimanɩ, ɔ sʋ‑ʋ 'n ɔ yiɛ mö. 23'N Zezwii yiɛ nɩkpaa ‑wa ‑binɔɔ 'yi gö, 'n ɔ yuëë 'dɩ 'nyɛ, ɔ lɛ naa: «Nɩkpa a ‑muëë wʋlʋä, 'pɩwʋ mää Lagɔ 'kämanɩɛ wa 'kä ‑mä 'bhle ghlɩ a dɔ'wʋ, 'nyɩɛ yɩ 'tɛɛ 'mö!» 24Zezwii gbää sa'aa, 'n 'ɔ ‑gänɩwaa ngli yuëë mla. 'N ɔ yiɛ 'sɔ bhïlanɩ. Ɔ lɛ naa: Nn, na yuënyɩ, 'pɩwʋ mää Lagɔ 'kämanɩɛ, nɩkpɛ 'kä ‑mä 'bhle ghlɩ a dɔ'wʋ 'mö yɩ 'tɛɛ tenyii. 25N nɩmɛgwli ‑kä bhɛnɩ ɛ 'kä 'sayi a ‑dʋ 'mö ghlɛnɩɩ, 'pɩwʋ mää Lagɔ 'kämanɩɛ, wʋlʋnɩnyɔ yi ‑mä 'bhle ghlɩ. 26Zezwii gbää sa'aa, 'ɔ ‑gänɩwaa, zuzu yɩ ‑sʋää ‑gömö, 'n wa 'yɩbhäyɩbhänɩɛ nimï nɩɩ: «Zaa, ‑ɔ 'kä yɩ 'pʋ 'nɩ?» 27'N Zezwii yuëë 'wʋ yɩlɩ, 'n ɔ yuëë 'dɩ 'nyɛ, ɔ lɛ naa: «Nɩkpɛɛ a dɔ'wʋ, yɩ 'tɛɛ 'mö, ‑maa Lagɔ a dɔ'wʋ, yɩ'ɩɛ 'mö tɛɛ. ‑Lu a ‑muu kää Lagɔ kɛ'mö 'tɛɛnɩ wʋ'ʋä ‑bhölɩ.»

28'N Piɛlɩ yiɛ gbʋ ‑dɩ, ɔ lɛ naa: «‑Atʋ, yɩɛ, ‑na za ‑a 'tatinɩɛ ‑a'a ‑lii 'wuë 'yi, a‑a ‑gänɩmöä.» 29Zezwii lɛ naa: «‑Tiamö n nyanyɩɛ 'dɩ nɩɩ nɩkpɛ a ‑mɔɔ ‑kä 'na ‑wawʋ a za, 'n ɔ 'käa'ɛ 'na 'Mänatɩtɩ bia a za, 'ɔ 'ligbëa yɔwʋ bhöö, ɛ yi ɔ nyɩbhɛlʋdaayuë ‑nyɛ ɔ nglʋdaayuë 'sɔ muë oo, ɛ yi ɔ ‑da ‑nyɛ ɔ dɩba 'sɔ muë oo, ɛ yi 'ɔ yuëa muë oo, ɛ ‑kä'ɛ 'ɔ 'lagbïlea mi oo, 30ɔ yi 'wʋ a gwlɩ ngbï nyɩbhɛlʋdaayuë, nglʋdaayuë, ‑dawa, 'n 'lagbïle mä'ä dʋdʋ 'wʋ ghlɩ ‑mä 'klɩyɩyɛ 'mö. 'N ‑mä 'yuku, Lagɔ yo'ɛ 'pɩwʋ mää 'naa 'kää 'yli bhɩɛ 'nyɛ. 31Nɩkpaa a ‑bɛ ‑wa ‑gää zɩ'ɛ 'yukuu, wa yi nimï 'plɩ, 'n ‑wa ‑gää zɩ'ɛ nimïï, wa yi 'yuku 'plɩ.»

Zezwii yɛ 'wʋtanadɔ'wʋ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla

(Matie 20.17-19; Lwiikö 18.31-34)

32Zezwii ‑nyɛ 'ɔ ‑gänɩwaa kʋgbä'sɔ ‑kpɔ 'sɔ, 'n wa yia'aa Zeluzalɛɛmö a 'yioo plɛnɩ, ɔ'bhë ɔ ‑gënuëë 'yuku. 'Ɔ ‑gänɩwaa ‑kɔnɩ, nɩkpaa 'wuë ‑wa ‑gänɔɔ, nganɔ lɩbhʋä. 'N Zezwii yi'ɛɛ wa kʋgbä'sɔ ‑kpɔ 'wʋ 'libhï, 'n ɔ ‑nyʋä yiɛ cɩɔnɩ, 'n ɔ yuëë 'saa 'kɔ ghlɩ a 'dɩ 'nyɛ, ɔ lɛ naa: 33«A yɩɛ, Zeluzalɛɛmö mä ‑a ‑wʋä dɛ'ɛ mö dɔ'wʋʋ, Nɩkpɛ a 'Yu, wa yo Zwiiföwaa a Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ kä'mö plɩnɩ, gbʋ a ‑muu 'kää 'nglɩ ‑kä ɔ 'kä 'kuu, mʋa 'kɔnyɩɛ 'wlumö 'pä. Mʋa 'kɔ'ɛɛ lɛgäwaa ‑waaa Lagɔ ‑yi kä'mö plɩnɩ. 34Nɩkpa 'la mʋa 'kɔɔ nɛpɔ, wa 'kɔ 'dɔ 'klʋ ngwla, wa 'kɔ 'sɛlɩ. Wa yo 'lɩbhä ɔ yi 'ku. ‑Maa ɔ ‑kä 'ku 'wë 'ylɩ ta ‑kä 'plɩɩ, ɔ yi glu 'wlʋ.»

Zaakö ‑nyɛ Zaa 'sɔ lɛ Zezwii nɩ 'zuë 'kämanɩwa 'kädɩɩ ‑wʋ

(Matie 20.20-28)

35Zezwii 'nyʋä sa'a 'dɩ 'wëë, Zebedee ‑yowluwaa Zaakö ‑nyɛ Zaa 'sɔ, 'n wa yoo yɔwʋ 'dio. Wa lɛ naa: «‑Atʋ, ‑a yɩbhä ‑a ‑kamö ‑lu ‑bhlʋ 'yɩbhänɩ, ‑maa tɩa nimï sɛ.» 36Zezwii lɛ naa: «'Saa a ‑kaa bhä 'yɩbhänɩ 'nɩ?» 37Wa lɛ naa: «‑A yɩbhä nɩɩ, ‑na'a 'kämanɔɔ ‑kä 'yli 'wlʋnɩ 'wëë, ‑mɔ ‑kä ‑mä ‑na luukɛ 'wʋ glɩ, ‑mɔ 'kä ‑mä ‑na kɔpɛ 'wʋ glɩ.» 38Zezwii lɛ naa: «A'aa 'saa a yɩbhää ‑yi. 'Klɩyɩyɛ a ‑dɔkɔɔ n 'kää 'nɩmää, a bhɛnɩ bhä a 'kʋ 'nɩmä ‑a? Nyuu wa ‑kaa 'wlu wɔlʋnɩɩ, a bhɛnɩ bhä a 'kä 'wʋ nglu wa 'kanyu 'wlu wɔlʋnɩ ‑a?» 39Wa lɛ: «‑A bhɛnɩ.» 'N ɔ yuëë 'dɩ 'nyɛ nɩɩ: «‑Tiamö a yi 'klɩyɩyɛɛ a ‑dɔkɔɔ 'nɩmä. Nyuu wa ‑kaa 'wlu wɔlʋnɩɩ, wa yeanyu 'wlu wɔlʋnɩ. 40‑Maa ‑ɔ 'kää ‑mä na luukɛ 'wʋ glɩ, 'n ‑ɔ 'kää ‑mä na kɔpɛ 'wʋ glɩ a dɔ'wʋ, ‑amöö 'nɩɛ ‑lɛ a wɛlɩ ‑kä. ‑Maa ‑wanyɩɩ za Lagɔ gïganɩɛ 'bhli 'la 'wluu, mʋa 'kɩɛ 'mö glɩ.»

41‑Maa 'ɔ ‑gänɩwa ‑muë'la kʋgbä ‑kpɔ 'nʋä Zaakö ‑nyɛ Zaa 'sɔ a wɛlɩ 'laa, wa'aa ‑wa 'n wa yuëë 'klɛ yɔwʋ 'pänɩ. 42'N Zezwii yuëë wäzɩ, 'n ɔ yuëë 'dɩ 'nyɛ nɩɩ: «A ‑yi sɛ, 'bhlɩlowluwa 'kädɩɩ, gasɛ wa 'kämanɩɛ nɩkpa ‑gömö. 'Kädɩɩ 'wuë, nɩkpaa 'mö wa 'wälanɩɛ 'wa 'kämanɔɔ ‑gömö 'yli. 43‑Maa abhʋa na ‑nʋa abhlɩ, yɩ tɩ ‑sɩbhä ‑mä a gla'mö ‑wʋ. A gla'mö a nɩkpɛ a ‑mɔɔ ‑kä nɩɩ ɔ 'kä 'kɔdɔ glɩnɩ nʋʋ, ɔ nɩ nglu 'wʋ ɔ 'kanyɩ 'yli ‑wʋ. 44‑Ɔ ‑kä 'yɩbhä ɔ 'kanyɩ 'yuku ‑gänɩɩ, ɔ nɩ ‑bhɩɔ 'mö ɔ 'kanyɩ gïyi a sɛ 'yli ‑wʋ. 45Nɩkpɛ a 'Yu, wa 'kɔ 'yli ‑wʋ a za, ɔ'ɔɔ mä'ä dʋdʋ 'wʋ yi. ‑Maa ɔ'bhë ɔ 'kä nɩkpaa 'wuë 'yli ‑wʋ, ɔ 'kä wa 'wlumö 'ku nzɩɩ ɔ 'kä bäbätɛ galɛ 'mö ‑sɛ, nza ɔ yiɛ.»

Zezwii yɛ 'kukwlekänyɔ yɛmanɩ

(Matie 20.29-34; Lwiikö 18.35-43)

46Zezwii ‑nyɛ 'ɔ ‑gänɩwaa 'sɔ, 'n wa yiɛ ‑mä Zeliko plɛ. Nɩkpa 'kɔkɔmlɛ ‑gënuë. Wa lɛ 'kää ‑glɔɔ 'mö bhɩɛ yii, ‑lɛ 'yio yɔwʋ, 'kukwlekänyɔ ‑bhlʋ glɩ ‑lɛ, 'plɩplɩwaa 'mö ɔ zɛlaa moni. Ɔ nglɩɛ Batimee. Nɩkpɛ ‑bhlʋ wa laa Timee a yuä. 47Ɔ 'nʋä nɩɩ, Nazalɛɛtɩ a Zezwii mɔɔ ‑wʋää 'plɩ dɔ'wʋʋ, 'n ɔ yiɛ 'mö 'kpa, ɔ lɛ: «Daviidɩ a 'yu a 'yu Zezwii aa, yɩlɩ na ngäzɩklʋ 'mö aa!» 48Ɔ 'kpaa sa'a 'möö, ‑wa ‑wʋmö a‑a ‑lɛ, wa ‑mumuë a ‑bɛ, 'n wa yoo 'wʋ nylanɩ, wa lɛ: «'Zʋ ‑gëbëa sɛ!» ‑Maa ‑sɩbhä ɔ kpaa 'mö 'yize. 'N ɔ nʋä: «Daviidɩ a 'yu a 'yu aa, yɩlɩ yɩ na ngäzɩklʋ 'mö aa!» 49'N Zezwii yiɛ 'nɩgbö, ɔ lɛ: «A wäzɩ'mɔ 'wʋ!» 'N wa yoo 'dɩ 'nyɛ, wa lɛ: «'Tɛmanɩ 'yli yɔwʋ, ‑sɔ 'wʋ ‑n 'kä yi, ‑maa ɔ wäzɩmö.» 50'N Batimee yiɛ 'ɔ ‑bäna 'kädaa 'mö 'wlʋ 'n ɔ yiɛ 'wʋ ‑sɔ ‑va, 'n 'ɔ yiɛ ‑mä Zezwii ghlɩ. 51'N Zezwii yoo nimï 'yɩbhä nɩɩ: «'Saa ‑n yɩbhä bhä n nɩ nʋ ‑na dɛ?» Ɔ lɛ naa: «‑Atʋ, n bhiamö yɔwʋ, gbä 'na yilaa 'kä do.» 52Zezwii lɛ naa: «Mö ‑maa ‑na'a dlɩ'wʋkänɔɔ ‑kamö puë.» Zezwii gbää sa'a cuu, n nɩkpɛ 'la a yilaa yiɛ do. Zezwii ‑wʋ mö dɔ'wʋ, 'n ɔ yoo 'bɩwʋ bhlinɩ.

Seçili Olanlar:

Maakö 10: bet

Vurgu

Paylaş

Kopyala