Mathliyu 21

Yesu Ku Ləkwa Urushalima

(Mar 11:1-11; Luk 19:28-40; Yah 12:12-19)

1Sakatə Yesu ka mjirthlipərni ku hara kudzəhə ka Urushalima, ka si ahar Bethfaji adzə Gar Zaitun, antə Yesu thlentə suɗa akwa nca mjirthlipərni, 2ka pəla ala ɗa, “Mwar giri, akwa di na akəma giri ni, təkəma giri ata wutə kwara laga mbwimbwiyari ka ɓzərni adzə ni. Mpəli giri ɗa ka giri səntə ɗa ali. 3Kəlara mdə na ku ndəra ala giri, ka giri pəla alari, ‘Mthlaku an akwa bara ɗa’, antə tsa ata zhar ɗa ka giri təra ka da.”

4Su ngəni hara ni an kamnyar ka su tə naɓi pəla ka tsa nghyaɓəladzi abbər,

5“Pəla giri aka mjir Sihiyona,

‘Nggədza kuthlir giri akwa si adzə giri!

Tsa an mdə na ka kanaɗi,

tsa akwa si ata kwara,

ata ɓzər kwara antə tsa akwa si ni.’ ”

6Antə mjirthlipərni ku mwari ka hara tsu apatə Yesu pəla ala ɗa ka da hara. 7Da səntə kwara ni ka ɓzərari ni, ka putə ləptayeri arɗa ata hila ɗa, antə Yesu fəltə kwara ni ka ndzəndzi ata kər. 8Antə bwar ola mji ni pshari ləptayeri arɗa akwa laku, antə bwadukwa mji nthləgəi tsiya nfwayeri ka pwi akwa laku. 9Antə dlamar mji na akwa mwa akəmari ka na aghəlari haptə kuraka ɗa akwa pəla,

“Hu gir Ɓzər Dauda!

Ka Hyel vədzə barka aka mdə

na akwa si akwa thləma Mthlaku!

Hu gir Hyel na akwa vəi na amta ta shang!”

10Sakatə Yesu ku ləvəi akwa Urushalima, antə shanga mjir kuta di ni ndatədzi, tə mji ləkwa yu su abbər, “Wa ngəni ri?”

11Antə mji na akwa nu Yesu ni pəla, “Ai ngəni an naɓi Yesu na thlata ahar Nazareth akwa tsəɗi Galili ni.”

Yesu Ku Ləkwa Mbwar Hyel

(Mar 11:15-19; Luk 19:45-48; Yah 2:13-22)

12Antə Yesu ku ləkwa mbwar vəngkər səli ka kədləɓəla shanga mji na akwa ɗəl su, kəga mji na akwa masə su akwa mbwar vəngkər səli ni. Tsa shinamta tebərayeri ar mjir canji kwaba, kəga vəi ndzəndziyir mjir ɗəl kataparayeri. 13Tsa pəla ala ɗa, “Mdə ku rəbuta abbər,

“ ‘Mda ata kəga mbwarna abbər mbwar adduwa,’

amma giri ku namtə ni vəi ɗuwar mjir thla laku.”

14Antə mji na mdlyang kəga mji na nggurdəkəi ku si adzə ni akwa mbwar vəngkər səli ni, antə tsa ku mbantə ɗa. 15Amma sakatə pristayeri na ol'ola, kəga maləmayeri ar thlipə tsawur Musa, wutə surndatayeri tə tsa hara ni, har ka maɗankyar akwa hara kuraku akwa mbwar vəngkər səli, akwa pəla, “Hu gir Ɓzər Dauda,” antə ɗəffa ɗa ɓza. 16Antə da pəla aka Yesu, “Ga akwa nggatə su tə mji ngəni akwa pəla ri nggye?” Antə Yesu pəla ala ɗa, “I. Giri aɗi ɗar karatari wa ya abbər,

“ ‘Akwa mnya maɗankyar

ka maɗankyar na ata uwa,

antə ga ku ɗəmha aka kər nga

abbər ka huwa səɓəla.’ ”

17Antə tsa ku təra kazhar ɗa, ka ləɓəla akwa bərni ni, ka mwari ahar Bethlani, ka pi anda.

Yesu Ku Shiwumta Nfur Kamnda Laga

(Mar 11:12-14,20-24)

18Səɓəla ɗəpari ɗəɗəpa, sakatə Yesu akwa ngka akwa Urushalima, təng tsa nggatə mi akwa kətə ni. 19Sakatə tsa wutə nfur kamndə laga ata mnya laku, antə tsa mwari adzə nfu ni, amma tsa aɗi wutə ya ata wa, təng thlali daci. Antə tsa pəla aka nfu ni, “Ga aɗiya ata jaktə ya akəmazi kəra wa!” Təkəma antə nfu ni ku uli. 20Sakatə mjirthlipərni wuta apani antə da ndatədzi, ka pəla, “Apa madi tə nfur kamndə ni ul kasha nə ri?”

21Antə Yesu shinau ala ɗa ka pəla, “I akwa pəla ala giri jirkur, abbər ma giri ka hamta jiri, ka ndzi ka kula nuhum, giri ata mzhi hara su na təramta su tə I hara aka nfur kamndə ni. Kamnyar giri ata pəla aka gar ngəni abbər, ‘Thlata, ka gə ra pwa akwa manda,’ ka suari hara. 22Ma giri ka hamta jiri, kəlara su tə giri ku kiɗa akwa adduwa, giri ata wutari.”

Mji Ku Ndatədzi Ata Kəra Dunar Yesu

(Mar 11:27-33; Luk 20:1-8)

23Sakatə Yesu ku jaktə ngka akwa kuta bəbal ar mbwar vəngkər səli, akwa thlipa aka mji, antə pristayeri na ol'ola kəga mji na ol'ola ata kəra mji, ku si adzə ni, ka yu ni abbər, “Ka duna madi antə ga akwa hara suayeri ngəni ri? Tsuwa wan na gə izniyir hara su ngəni ri?”

24Antə Yesu shinau ka pəla, “I ma I ata yu giri su pal. Antə ma giri ku ni amsari, I ata pəla ala giri mdə na ni dunar hara suayeri ngəni ni. 25Ama antə Yahwana wutə dunar hara baptizma nə ri? Akəla Hyel nənga akəla mda ri?”

Antə da kamtadzi ka ɗar wul su ata kər akwa daɓwa ɗa, akwa pəla, “Ma mburu pəla, ‘Thlata akəla Hyel,’ tsa ata pəla, ‘To, kamnyar mi tə giri aɗi hamta jiri alari wa ri?’ 26Tsuwa ma mburu pəla, ‘Thlata akəla mda,’ Mburu akwa thlivər dlamar mji ngəni. Kamnyar shanga mji ku hamta jiri abbər Yahwana ni naɓi.” 27Antə da pəla aka Yesu abbər, “Yeru asəndə wa.”

Antə Yesu pəla ala ɗa, “I ma I aɗi ata pəla ala giri vəi tə I wutə dunar hara suayeri ngəni ni akwa wa.

Karapu Ata Kəra Mdə Laga Ka Maɗa'ni Suɗa

28 “Man su tə giri ata pəlari ata kəra su ngəni ri? Mdə laga aɗi ka maɗashilərni suɗa, antə tsa ku mwari adzə mdə na olari, ka pəla alari, ‘Ɓzərna, mwari ka gə ra hara kəthlər akwa fakər anap ashina.’ 29Antə tsa pəla, ‘I aɗi ata mwari wa.’ Amma aghəla nda tsa ku sə pali dzamərni ka mwari. 30Antə baba' ɗa ni mwari adzə ɓzər na suɗkurari tsuwa, ka pəla alari tsu apani. Antə ɓzər ni pəla, ‘I ata mwari, zanuwa.’ Amma aghəla nda tsa aɗi sə mwari wa. 31Na madi akwa nca ɗa suɗə ni an ku hara su tə baba'ni akwa barari ri?”

Antə da pəla, “Tsu ɓzər na ntangkəma ni.”

Antə Yesu pəla ala ɗa, “I akwa pəla ala giri jirkur, mjir dlu tsəma kəga karwayeri ata sə ləkwa kuthlikurər Hyel kəmata giri. 32Kamnyar Yahwana na Mdər hara Baptizma ku si ka ncanta ala giri lakur jirkur, giri aɗi hamta jiri alari wa. Amma mjir dlu tsəma kəga karwayeri ku hamta jiri alari. Amma wala tə giri wutə su ngəni akwa harari ni, giri aɗi tubi ka hamta jiri alari wa.” #Luk 3:12; 7:29-30

Karapu Ata Kəra Mjir Tsuhwa Na Dlu Hayar Faku

(Mar 12:1-12; Luk 20:9-19)

33 “Nggədza giri karapu damwa. Waci mthlakər fakə laga aɗi na ku ncimta nfur anap akwa fakərni, ka kalaktə fakə ni ka kadaka, ka namtə vəi ntsarɓəla yimər anap ni akwa, ka latə mbwar səka.”

“Antə tsa hamta fakə ni aka mjir hayari, ka təra mwari akwa tsəɗi damwa. 34Sakatə anap ni ku hara, antə tsa thlentə mafayeri arni aka mjir haya fakə ni, ka da dlu alari bwarni ar yar nfu ni. 35Amma mjir haya fakə ni ku ngkəgəi mafayeri ni, ka dlaɓu na palari, ka tsi palari, ka ndzəndzəhtə na palari ni ka pela. 36Antə mdə ni jaktə thlentə mafayeri damwa hangta na ntangkəma ni, amma mjir haya fakə ni ku hara ala ɗa tsu apatə da hara aka mdə na ntangkəma nda. 37Aghəla nda antə tsa thlenta ala ɗa ɓzərni, ka pəla, ‘I ka hamta jiri abbər da ata wutə səliyir ɓzərna.’ 38Amma sakatə mjir haya fakə ni wutə ɓzərni ni, antə da pəla aka nvwa ɗa, ‘Yauwa! Nggədza mdə na ata sə fa kifər fakə ni ja! Asər giri ka mburu tsi ni, ka mburu dlutsə kifərni ni!’ 39Antə da kətə ni, ka ndzəhəɓəla ni kazhar fakə ni, ka tsi ni.”

40 “To, ma sakatə mthlakər fakə ni ku si, giri tamatə man tə tsa ata harari aka mjir haya fakə nə ri?”

41Antə da pəla alari, “Ai, tsa ata tsəgəi kəmanggarayeri ni akwa laku na ata kətadzə mda, ka hamta hayar fakə ni aka mji damwa na ata sə na alari yar nfwayeri ni akwa sakari.”

42Antə Yesu pəla ala ɗa, “Giri aɗi ɗar karatə su tə mdə rəbuta akwa kakaɗər Hyel wa ya?

“ ‘Pela natə mjir hən mbwa ku nggəlari,

an sə ndzi pelar həna na ɓɗakta shang.

Ngəni an harar Mthlaku,

tsa surndata natə mda abara ka wula!’ ”

43 “Kamnyar ngəni antə I akwa pəla ala giri abbər mda ata sə dlutsə kuthlikurər Hyel akəla giri, ka hamta aka mji na ata sə hara su tə tsa ata barari.” # 21:43 Bwadukwa kakaɗayeri ni ka vəras 44 na akwa pəla, “Mdə na ku təri ata kəra pela ngəni, tsa ata ɓəgəlwadzi pal pal, tsuwa mdə tə pela ngəni ku təri ata kərari, tsa ata hadləmtadzi apa bərbər.”

45Sakatə Pristayeri na ol'ola kəga mjir Farisi ku nggatə karapu ngəni, antə da nggaɓəla abbər Yesu akwa gari ni ata kəra ɗa. 46Antə da ku bara lakur ngkəi ni, amma da akwa thlivər dlamar mji, kamnyar da ku hamta jiri abbər Yesu ni naɓi.

Seçili Olanlar:

Mathliyu 21: KNB

Vurgu

Paylaş

Kopyala