Mathliyu 22
22
Karapu Ata Kəra Mji Tə Mdə Kəga Ɗa Akwa Kəldzi
(Luk 14:15-24)
1Antə Yesu jaktə gari aka mji akwa karapu, ka pəla. 2“Kuthlikur na amtazi ni ndzi apa kuthli laga na ɗəmhə kəldzi aka ɓzərni. 3Tsa thlentə mafayeri arni ka da kəga mji natə mdə ku bara ka da si akwa vəi kəldzə ni. Amma da aɗi hir si wa. 4Antə tsa jaktə thlentə mafayeri damwa, ka pəla ala ɗa abbər, ‘Pəla giri aka mji tə mdə bara ɗa ni abbər, “Nggədza I ku kuri ɗəmhə susəm ni, I ku tsi gyalayeri, kəga kənayeri na təksətəksari. Mdə ku kuri ɗəmhə shanga su, mbil ka giri si ka giri səm susəmər kəldzi ni.” ’ 5Amma mji tə mdə bara ɗa ni namtə su ni ka gyali, tə waskəi təra mwari akwa vəi damwa, mji laga mwari akwa fakər ɗa, mji bwaduku mwari akwa kəthlərayeri damwa. 6Mji damwa tsuwa ku ngkəi mafayeri ni, ka taratə ɗa, ka kəli səliyir ɗa, ka tsi ɗa. 7Antə ɗəffa kuthli ni ku ɓzi, har tə tsa thlentə sojayeri arni, tə da mwari ka kurəmta mjir tsəɗi ni, ka mbamta diyir ɗa. 8Antə tsa pəla aka mafayeri arni ni abbər, ‘Mdə ku kuri ɗəmhə kəldzi ni, amma ɓɗakkur mji tə mdə bara ɗa akwa kəldzi ni aɗi mzhi wa. 9Antə mwari giri akwa matəngndlayeri na akwa kuta di ni, ka giri kəgatə shanga mji tə giri ku wuta, ka da si akwa kəldzi ni.’ 10Antə mafayeri ni ku mwari ka tsaptə shanga mji tə da ku mzhi wutari, mji na ɓɗakɓɗaku kəga mji na ɗimi ɗimi japu. Antə mbwar kəldzi ni ku nghyi ka mji.
11 “Amma sakatə kuthli ni ləmbwa abbər ka tsa wulhə mji tə mdə kəgatə ɗa ni, təng tsa wutə mdə laga na kula ləptər kəldzi. 12Antə tsa pəla alari, ‘Pazhi, apa madi tə gə səmbwa azi kula ləptər kəldzi ri?’ Amma mdə ni aɗi mzhi ndər wa. 13Antə kuthli ni pəla aka mjir kəthlər arni, ‘Mbwahə giri ni, tsiyari ka səlari, ka giri ndzəhəɓəla ni akwa kuthlu na pələku, akwa vəi tə mda ata tuwa ka ɓɗə thlir.’ #Mat 8:12; 25:30; Luk 13:28
14 “Kamnyar mji hang antə mdə kəga, amma mji yiɗauwa daci antə mdə carɓəla.”
Ata Kəra Ntə Tsəma Aka Kaisar
(Mar 12:13-17; Luk 20:20-26)
15Antə mjir Farisi mwari ka hara sauri ata kəra laku tə ka da ngkəi Yesu akwa gariyirni. 16Antə da thlentə mjirthlipər ɗa alari ata kəma duku kəga mjir Hirudus adzə ni, tə da pəla alari, “Maləm, yeru ku sənda abbər gə mdə na ka jirkur, tsuwa ga ana thlipə lakur Hyel ka jirkur, kula damitədzi ata kəra su tə mji ata pəlari, kamnyar ga aɗi ana wul olkurər mdə wa. 17Antə pəla ala yeru, kalkal ka yeru ntə tsəma aka Kaisar, nənga aɗi kalkal wa ri?”
18Amma Yesu ku səndə ɗimikur na akwa ɗəffa ɗa, tsa pəla ala ɗa, “Kamnyar mi tə giri akwa ngkərtə ra ri, shimnyayeri? 19Ncantə giri ali kwabar ntə tsəma ni!” Antə da sənta alari kwaba ni. 20Antə tsa pəla, “Ngəni dludzər kəma wa ri, tsuwa thləma wa an ata nə ri?”
21Antə da pəla, “Dludzər Kaisar.” Antə Yesu pəla ala ɗa, “Hamta giri aka Kaisar su na ar Kaisar, ka aka Hyel su na ar Hyel.”
22Sakatə da nggata apani, antə da ndatədzi, ka zhar ni ka təra.
Ata Kəra Thlata Akwa Mtəmta
(Mar 12:18-27; Luk 20:27-40)
23Tsu vir nda antə mjir Saddukiya laga si adzə Yesu. Da andər pəla thlata akwa mtəmta aɗi wa ni. Antə da yu ni, #Kəth Apos 23:8 24abbər, “Maləm, Musa ku pəla abbər ma mdə na kula maɗankyar ku mti, tar ka ɓzərma'ni kətə mwalankiɗa natə tsa mtə kazhar ni, kamnyar ka tsa yaɓəla maɗa' aka ɓzərma'ni na mtə ni. 25To, mji shili laga aɗi murfa mji ka ɓzərma, na ndzi akwa nca yeru. Antə na ntangkəma ni ku kəl mwala, ka mtə kula ɓzər, ka zhar mwalarni aka ɓzərma'ni. 26Antə ɓzərma'ni na suɗkur ka na makərkur, har ka ləghəi ata kəra na murfəkur ni tsuwa, ku sə mti kazhar mwala ni. 27Aghəla nda antə mwala ni ku mtə tsuwa. 28Ka ma sakatə mji ku thlata akwa mtəmta, tsa ata ndzi mwalar wa akwa nca ɗa na murfə nə ri, təng tə shanga ɗa ku kəl ni ni?”
29Amma Yesu shinau ala ɗa ka pəla, “Giri ku sha, kamnyar giri aɗi səndə su na akwa kakaɗayeri ar Hyel wa, wala səndə dunar Hyel tsuwa wa. 30Kamnyar ma sakatə mji ku thlata akwa mtəmta, mji aɗi ata kəl mwala wa, wala hamta mwala aka sal wa. Amma da ata ndzi apa mjirthlentərhyel amtazi. 31Amma ata kəra thlata akwa mtəmtə ni, giri aɗi ɗar karatə su tə Hyel pəla ala giri wa ya? Tsa pəla, 32‘I an Hyelər Ibrahim, ka Hyelər Ishaku, ka Hyelər Yakub.’ Tsa Hyelər mji na ka mpika, amma aɗi ar mji mtəmtə wa.”
33Sakatə dlamar mji ku nggatə thlipərni ni, antə da ndatədzi.
Tsawa Na Olta Shang
(Mar 12:28-34; Luk 10:25-28)
34Sakatə mjir Farisi nggata abbər Yesu ku daɓwi mjir Saddukiya, antə da tsaptədzi. 35Antə pal akwa nca ɗa na maləmər thlipə tsawur Musa ni ku yu Yesu kamnyar ngkərtə ni, tə tsa pəla, #Luk 10:25-28 36“Maləm, akwa nca tsawayeri ni, tsawu madi an olta shang ri?”
37Antə Yesu pəla alari, “ ‘Ka gə hir Mthlaku na Hyel ar nga ka ɗəffa gə shang, ka mpika gə shang, ka hangkala gə shang.’ 38Ngəni an tsawu na ntangkəma ka na olta shang. 39Na suɗkurari ni tsuwa tsu apa tsa, ‘Ka gə hir ntəwulər nga tsu apatə gə hir kəra ga.’ 40Shanga mambila tsawayeri kəga thlipər naɓiyayeri ni səɓəla akwa tsawayeri ngəni suɗə ni.”
Ata Kəra Ɓzər Dauda
(Mar 12:35-37; Luk 20:41-44)
41Sakatə mjir Farisi laga ku tsaptədzi ata kəma duku, antə Yesu yu ɗa, 42abbər, “Man su tə giri ana pəla akwa ɗəffa giri ata kəra Kristi ri? Tsa an ɓzər wa ri?” Antə da pəla alari, “Tsa ɓzər Dauda.” 43Antə Yesu pəla ala ɗa, “Kaha, apa madi tə mambəl ləkwa ɗəffa Dauda abbər ka tsa kəga ni ‘Mthlaku’ nə ri? Kamnyar Dauda pəla,
44 “ ‘Mthlaku ku pəla aka Mthlakərna,
“Ndzəndzi azi abwa mazəmi,
har tar ma I ku namtə dawayeri ar nga
ka da ndzi akira səla ga.” ’ ”
45 “Ka, ma Dauda akwa kəga ni abbər, ‘Mthlaku’, apa madi tə tsa ata jaktə ndzi ɓzərni tsu ri?”
46Mda aɗi na mzhi hamta alari amsa wa. Tsuwa baɗitə ka vir nda, mda aɗi na mzhi nggitə yu ni kəra wa.
Seçili Olanlar:
Mathliyu 22: KNB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
