Mathliyu 20
20
Mjir Kəthlər Akwa Fakər Anap
1 “Kuthlikur na amtazi ni ndzi tsu apa mdərkəi laga na ləɓəla ɗəɗəpə mbing kamnyar bara mji ka da ra kəthlər alari akwa fakərni. 2Sakatə da ku thlamta kəga mjir kəthlər ni abbər tsa ata ntə ɗa ata kəra kwabar ɓukcir pci, antə tsa ku thlentə ɗa akwa fakərni ni. 3Ata saka əmdla tsuwa antə tsa jaktə ləɓəla ka mwari akwa mnya kasəku, ka wutə mji laga andzəndzi kula kəthlər. 4Antə tsa pəla ala ɗa, ‘Wala giri ma, mwar giri akwa fakə ni, tsuwa kəlara su na ku ndzi kalkal, I ata hamta ala giri.’ Antə da ku mwari. 5Sakatə tsa jaktə ləɓəla apa saka kumnya suɗa ka apa saka makər, antə tsa jaktə fatə mjir kəthlər. 6Antə tsa jaktə ləɓəla apa saka ntəfu, ka wutə mji laga akwa kuta di kula kəthlər, antə tsa pəla ala ɗa, ‘Kamnyar mi tə giri akwa ɓukci azi gapani kula kəthlər nə ri?’ 7Antə da pəla alari, ‘Kamnyar mda aɗi na ku bara yeru akwa kəthlər wa.’ Antə tsa pəla ala ɗa, ‘To, mwar giri akwa fakərna.’
8 “Saka tə tahaku ku hara, antə mthlakər fakə ni pəla aka mdər wula alari fakə ni, ‘Kəga mjir kəthlər ni, ka gə ntəmta ɗa. Ka gə baɗitə ka mji na si aghəli ni, ka gə sə tsikərari ata kəra mji na ntangkəma ni.’ 9Sakatə mji na baɗitə kəthlər apa saka ntəfu ni si, kəlara pal akwa nca ɗa dlu kwabar ɓukcir pci swakti. 10Sakatə mji na baɗitə kəthlər ntangkəma ni ku si, da tamata abbər da ata wutari hangta ta shanga mji. Amma wala da, waskəi dlu kwabar ɓukcir pci. 11Sakatə da dlu ntər ɗa, antə da baɗitə nggungguni ata kəra mthlakər fakə ni, 12akwa pəla, ‘Mji na si aghəli ni hara kəthlər ar awur pal daci, amma ga ku namtə kəthlərər ɗa kalkal ka ar yeru, yeru na ɓukci akwa kəthlər ata pci ngəni bwarbwar akwa mba mdə ni!’
13 “Amma tsa pəla aka mdə pal akwa nca ɗa abbər, ‘Pazhi, I aɗi fəi ngə wa. Mwa aɗi thlamta abbər ga ata hara kəthlər ata kəra kwabar ɓukcir pci pal wa ya? 14Dlu su natə ar nga, ka gə təra ləha. I ku carɓəla kəi hamta aka mji na si aghəli ni kalkal apatə I ku hamta ala ga. 15Nənga I amzhi hara su tə I hir ka kwabarna wa ri? Nənga ga akwa səlka ata kəra ɓɗakkur tə I hara nə ri?’
16 “Tsu apani antə mji na akwa tsikərari kulini ata sə ndzi ntangkəma, ka mji na ntangkəma kulini sə ndzi akwa tsikərari.” #Mat 19:30; Mar 10:31; Luk 13:30
Yesu Ku Jaktə Ngkər Su Ata Kəra Mtərni
(Mar 10:32-34; Luk 18:31-34)
17Sakatə Yesu akwa ləmta ahar Urushalima, antə tsa kəgamta mjirthlipərni na kumnya suɗə ni ata mnya laku shiɗa, ka pəla ala ɗa, 18“Nggədza mburu akwa mwari ahar Urushalima. Antə mda ata sə hamta Ɓzər Mda aka pristayeri na ol'ola ka maləmayeri ar thlipə tsawur Musa, antə da ata sə thlamta shariyar mta alari. 19Aghəla nda ka da hamta ni aka mjir Rom, ka da mnya ɗimi alari, ka dlaɓu ni ka kwandeng, ka da kukwamta ni. Amma akwa vir na makərkurari, tsa ata thlata.”
Su Tə Mama' Yakub Ka Yahwana Kiɗa Akəla Yesu
(Mar 10:35-45)
20Antə mwalar Zabadi ku si adzə Yesu ka maɗashilərni suɗa, tə tsa zuzuri akəmari, ka kiɗə su akəlari.
21Antə Yesu pəla alari, “Man tə ga akwa barari ri?” Antə mwala ni pəla alari, “Ka gə hara ka maɗashilərna na suɗə ni ndzi abwa mazəma ga ka matsəkara ga, ma sakatə ga ləkwa kuthlikur nga.”
22Amma Yesu shinau ka pəla, “Giri aɗi səndə su tə giri akwa kiɗari wa. Giri ata nggitə sa jili bwani tə I ata sari ni ya?” Antə da pəla alari, “Yeru ata nggitari.”
23Antə tsa pəla ala ɗa, “Jiri, giri ata ɗar bwani apatə I ata ɗar bwani, amma ata kəra ndzi abwa mazəmi wala abwa matsəkari ni, aɗi I an ka dunar hamtari wa. Vəyayeri ngəni an kamnyar mji tə Təddarna na amtazi ku ɗəmha ala ɗa.”
24Sakatə mjirthlipərni na kum ni nggatə su ngəni, antə ɗəffa ɗa ɓzi ata kəra mdə ka ɓzərma'ni na suɗə ni. 25Amma Yesu ku kəga ɗa shang ka pəla, “Giri asənda abbər kuthlyayeri ar mji na aɗi səndə Hyel wa ana nca kuthlikur ata kəra mji na akira ɗa, tsuwa mji ol'olər ɗa ana nca kuthlikur ata kəra ɗa. #Luk 22:25-26 26Amma aɗiya ndzi apani akwa nca giri wa. Aviya ndaga, kəlara mdə na ata bara ndzi ola akwa nca giri, tar ka tsa ndzi buɗar giri. #Mat 23:11; Mar 9:35; Luk 22:26 27Tsuwa kəlara mdə na ata bara ka tsa ndzi olər giri, tar ka tsa ndzi mafar giri. 28Tsuwa Ɓzər Mda aɗi si kamnyar ka mdə hara mafakur alari wa, amma ka tsa an hara mafakur aka mji, ka hamta mpikari kamnyar mbantə mji hang.”
Yesu Ku Mbantə Mji Na Mdlyang Suɗa
(Mar 10:46-52; Luk 18:35-43)
29Sakatə Yesu ka mjirthlipərni akwa ləɓəla akwa Yariko, antə dlamar mji hang ku nu ni. 30Təng tsa wutə mji laga suɗa na mdlyang andzəndzi ata mnya laku. Sakatə da nggata abbər Yesu an akwa təramta ni, antə da haptə kuraku akwa pəla, “Mdərkəi, Ɓzər Dauda! Kətadzə yeru!”
31Amma dlamar mji mpəmpatə ɗa akwa pəla ala ɗa ka da ndzi ɗiɗi. Amma da jaktə haptə kuraka ɗa ka duna ta na hwatu, ka pəla, “Mdərkəi, Ɓzər Dauda! Kətadzə yeru!”
32Antə Yesu thləthlata, ka pəla ala ɗa, “Man tə giri akwa bara kəi hara ala giri ri?”
33Antə da pəla alari, “Mdərkəi, yeru akwa bara ka nca yeru kəlardzi.”
34Antə Yesu ku kətadzə ɗa, ka tsəkwar nca ɗa. Təkəma antə nca ɗa ku kəlardzi, antə da ku nutə ni.
Seçili Olanlar:
Mathliyu 20: KNB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
