لوکا 22

ایسّائے کُشگئے پندل

(مَتّا 26‏:2‏–5‏؛ مَرکاس 14‏:1‏–2)

1بێهُمیرێن نگنئے ائیید، هما که سَرگوَزئے ائیید هم گوَشگَ بیت، نزّیکّ اَت. 2مزنێن دینی پێشوا و شَریَتئے زانۆگر په ایسّائے کُشگا راه و دَرے شۆهاز کنگا اَتنت، بله چه مردمانَ تُرستِش. 3شئیتان یهودائے، بزان یَهودا اِسْکَریوتیئے دلا پترت. یهودا چه ایسّائے دوازدهێن کاسدان یکّے اَت. 4آ، مزنێن دینی پێشوا و مزنێن پرستشگاهئے نِگهپانێن سپاهیگانی مسترانی کِرّا شت و گۆن آیان شئور و سَلاهی کرت که چِه پئیما ایسّایا آیانی دستا بدنت. 5آ گل بوتنت و چیزّے زَرِّش مَنّت. 6یَهودایا مَنِّت و نون شَرّێن مۆهێئے شۆهازا اَت که چه مُچّیئے چمّان دور ایسّایا آیانی دستا بدنت.

سَرگوَزئے شامئے تئیاری

(مَتّا 26‏:17‏–19؛ مَرکاس 14‏:12‏–16)

7گڑا بێهُمیرێن نگنئے ائییدئے هما رۆچ آتک که په سرگوَزئے ائیدئے شاما گوَرانڈ کُربانیگ کنگَ بیت. 8ایسّایا پِتْرُس و یوهَنّا دێم داتنت و گوَشتی: ”بِرئوێت و په ما سَرگوَزئے ائییدئے شامئے تئیاریا بکنێت.“ 9آیان جُست کرت: ”تئو چے لۆٹئے، ما اے تئیاریا کجا بکنێن؟“ 10پَسّئوی دات: ”شما شهرا که رسێت، مردے گندێت که آپی کونزگے گۆن اِنتی،#22‏:10 اے اَجَبێن هبرے. آپ کَشّگ جنێنانی کار اَت. آییئے رَندا بێت و هما لۆگا برئوێت که آ رئوت. 11لۆگئے واهندا بگوَشێت: ’استاد جُستا اِنت که مهمانجاه کجا اِنت تانکه من گۆن وتی مُریدان سَرگوَزئے شاما همۆدا بکنان؟‘ 12آ مرد شمارا وتی لۆگئے بُرزی تَبَکّا مزنێن بانے پێشَ داریت که هر چیزّی مان. شامئے تئیاریا همۆدا بکنێت.“ 13آ شتنت و هر چیزِّش هما پئیما دیست که ایسّایا گوَشتگ‌اَت. سَرگوَزئے شامِش همۆدا تئیار کرت.

گُڈّی شام

(مَتّا 26‏:24، 26‏–29؛ مَرکاس 14‏:22‏–25)

14هما ساهت که رَست، ایسّا گۆن کاسدان پَرزۆنَگئے سرا نِشت. 15گۆن آیان گوَشتی: ”منا باز اَرمان بوتگ که سکّی و سۆریئے سگّگا پێسر اے سَرگوَزئے شاما گۆن شما هۆریگا بوَران. 16شمارا گوَشان، تان هُدائے بادشاهی برجاه کنگ مبیت، دگه برے اے شاما نئوَران.“

17گڑا پیالهے چستی کرت، هُدائے شُگری گپت و گوَشتی: ”اشیا بزورێت و وت‌مان‌وتا بهر کنێت. 18شمارا گوَشان که چه اِد و رَند تان هُدائے بادشاهی مئیئیت، من انگورئے آپا نئوران.“ 19نگنی هم زرت، هُدائے شُگری گپت، نگنی چُنڈ چُنڈ کرت و کاسدانا داتی. گوَشتی: ”اے منی بدن اِنت که په شما کُربانیگ کنگَ بیت. اے کارا په منی یادگاریا بکنێت.“

20همے ڈئولا، چه ورگا رَند پیالهے زرت و گوَشتی: ”اے پیاله نۆکێن اَهد و پئیمان اِنت، گۆن منی هۆنا بندۆک اِنت که په شما رێچگَ بیت. 21بله هما که منا درۆهیت، آییئے دست گۆن منی دستا یکّێن پَرزۆنَگا اِنت. 22چێا که هما ڈئولا که پێشا شئور بُرّگ#22‏:22 شئور بُرّگ، بزان پئیسله کنگ. بوتگ، انسانئے چُکَّ رئوت، بله بَژن و اَپسۆز په هما مردما که آییا درۆهیت.“ 23گڑا کاسد یکدومیا جُست کنگا لگّتنت: ”بارێن، چه ما کئے چُشێن کارے کنت؟“

مزنی و مستریئے بارئوا

(مَتّا 20‏:25‏–27؛ مَرکاس 10‏:42‏–44)

24کاسدانی نیاما اَڑ و کُڑ پاد آتک که مئے تها کئے مسترێن مردم زانگ ببیت؟ 25ایسّایا گۆن آیان گوَشت: ”درکئومانی بادشاه وتی مردمانی سرا واجهیَ کننت و آیانی هاکمانی مکسد و مُراد اِش اِنت که مردم آیان هئیر و برکت دئیۆک بزاننت. 26بله شما چۆ مکنێت، بِلّێت که شمئے مسترێن، کَسترێنئے ڈئولا ببیت و شمئے هاکم، هِزمتکارئے ڈئولا. 27بارێن کئے مستر اِنت؟ هما که نِشتگ و ورگا اِنت یا هما که هِزمت کنگا اِنت؟ هما که نِشتگ و ورگا اِنت. بله من شمئے نیاما هِزمتکارێئے ڈئولا آن. 28شما هما اێت که منی آزمائِش و چَکّاسان گۆن من همراه و همکۆپگ بوتگێت. 29هما ڈئولا که پتا منا بادشاهی بَکشتگ، من هم شمارا بکْشانی 30تانکه منی بادشاهیئے تها چه منی پَرزۆنَگا بوَرێت، بنۆشێت، شاهی تَهتانی سرا بنندێت و بنی اِسراییلئے دوازدهێن کَبیلهانی کَزاوتا#22‏:30 کَزاوت، بزان هَکّێن پئیسله، هما شئور که چه دادگاهانَ کئیت، داوَری. بکنێت.

پِتْرُسئے اِنکارئے پێشگۆیی

(مَتّا 26‏:31‏–35؛ مَرکاس 14‏:27‏–31؛ یوهَنّا 13‏:36‏–38)

31شَمون، او شَمون! شئیتانا اجازت لۆٹت که شمارا گندمئے ڈئولا کَمَک بکنت و بگێچیت. 32بله من په تئو دْوا کرتگ که تئیی ایمان زئوال مبیت. گڑا وهدے تئو پدا منی نێمگا آتکئے، وتی براتانی دلا ڈَڈّ کن.“ 33بله پِتْرُسا پَسّئو تَرّێنت: ”او هُداوند! من گۆن تئو هۆریگا په کئید و بَند و مَرکا هم تئیار آن.“ 34ایسّایا گوَشت: ”او پِتْرُس! من ترا گوَشان که مرۆچی تئو چه کرۆسئے بانگا پێسر منی پَجّاه آرگا سئے رَندا اِنکارَ کنئے.“

35چه آیان جُستی کرت: ”بارێن هما وهدا که من شمارا بے زَرتورَگ و پێلک و بے چئوَٹّا دێم دات، شما په چیزّێا گَٹّ بوتێت؟“ آیان پَسّئو دات: ”نه، په هچّ چیزّا.“ 36گڑا گوَشتی: ”بله نون چه شما اگن کَسێئے کِرّا زَرتورَگ و پێلک هست، گۆن وت بزوریت و آییئے کِرّا که زَهم نێست، وتی کباها بها بکنت و زَهمے بگیپت، 37چێا که اے نبشته منی بارئوا باید اِنت راست و سَرجم ببیت که گوَشیت: آ چه گُنهکاران یکّے هساب کنگ بوت.#22‏:37 اِشئیا نبیئے کتاب 53‏:12. هئو! آ چیزّ که منی بارئوا نبیسگ بوتگ، نون سَرجم بئیگی اِنت.“ 38کاسدان گوَشت: ”او هُداوند! بچار، مارا دو زَهم گۆن اِنت.“ گوَشتی: ”بَسّ اَنت.“

جِتْسیمانیئے باگا ایسّائے دْوا

(مَتّا 26‏:36‏–46؛ مَرکاس 14‏:32‏–42)

39ایسّا در آتک و اَنچُش که آییئے هێل و آدت اَت، دێم په زئیتونئے کۆها شت. مُرید هم آییئے رَندا بوتنت. 40اۆدا که سر بوت، گوَشتی: ”دْوا کنێت که آزمائِش و چَکّاسا مکپێت.“ 41چَگلێئے راها چه مُریدان دور شت، کۆنڈانی سرا نِشت و چۆ دْوایی کرت: 42”او منی پت! اگن تئیی رزا اِنت گڑا سکّیانی اے پیالها چه من دور کن، بله منی واهگئے سرا نه، هما پئیما که تئیی رَزا اِنت.“ 43چه آسمانا پرێشتگے زاهر بوت و ایسّائے دلی ڈَڈّ کُرت. 44ایسّا گرانێن رنجێا دُچار اَت، پمێشکا گێشتر دْوایی کرت و آییئے هێد هۆنئے ترَمپانی ڈئولا زمینئے سرا پِٹِّتنت.

45چه دْوایا که پاد آتک، مُریدانی نێمگا پِر ترّت، دیستی که بازێن گَمان ژند و پند کرتگ‌انت و نون واب اَنت. 46گوَشتی: ”پرچا وپتگێت؟ پاد آێت و دْوا کنێت که چَکّاسا مکپێت.“

ایسّائے دَزگیر بئیگ

(مَتّا 26‏:47‏–56؛ مَرکاس 14‏:43‏–50؛ یوهَنّا 18‏:3‏–11)

47ایسّا اَنگت هبرا اَت که رُمبے مردم آتک و رَست. چه ایسّائے دوازدهێن کاسدان یکّے، بزان یَهودا آیانی رهشۆن اَت. آ، ایسّائے نزّیکّا آتک که بچُکّیتی. 48ایسّایا گوَشت: ”او یَهودا! تئو گۆن چُکّگے انسانئے چُکّا دژمنانی دستا دئیئے؟“

49وهدے ایسّائے همراهان دیست که چے بئیگا اِنت، جُستِش کرت: ”او هُداوند! وتی زَهمان بکَشّێن؟“ 50چه مُریدان یکّێا وتی زَهم کَشّت و مسترێن دینی پێشوائے نئوکرئے راستێن گۆشی سِست. 51بله ایسّایا گوَشت: ”بَسّ کنێت!“ آییئے گۆشا دستی پِر مُشت و دْراهی کرت.

52ایسّایا گۆن مزنێن دینی پێشوا و مزنێن پرستشگاهئے نِگهپانێن سپاهیگانی مستر و کئومئے کماشان که په آییئے دَزگیر کنگا آتکگ‌اَتنت، گوَشت: ”زانا، من دُزّ و ڈُنگے آن که شما گۆن زَهم و لَٹّان منی دَزگیر کنگا آتکگێت؟ 53من هر رۆچ مزنێن پرستشگاها گۆن شما یکجاه بوتگان، اۆدا شما منا دست نجتگ. بله هئو! نون وهد شمئیگ اِنت و تهاری هاکم اِنت.“

پِتْرُسئے اِنکار

(مَتّا 26‏:57‏–58‏، 69‏–75؛ مَرکاس 14‏:53‏–54‏، 66‏–72؛ یوهَنّا 18‏:12‏–18‏، 25‏–27)

54گڑا ایسّااِش دَزگیر کرت و مسترێن دینی پێشوائے لۆگا برت. پِتْرُس دور دورا آیانی پُشتا گۆن اَت. 55لۆگئے پێشگاها#22‏:55 پێشگاه، بزان پێشگاه، لۆگئے چاردیوال، سَهن. آسے رۆکِش کرتگ‌اَت و آسئے چاگردا نِشتگ‌اَتنت. پِتْرُس هم گۆن آیان نِشت. 56مۆلدێا آسئے رُژناییا پِتْرُس دیست، رۆک رۆکا چارت و گوَشتی: ”اے مرد هم ایسّائے همراه بوتگ.“ 57بله پِتْرُسا انکار کرت و گوَشتی: ”او جنێن! من آییا نزانان.“

58کمّکێا رَند دگرێا پِتْرُس دیست و گوَشتی: ”تئو هم چه همایان ائے.“ پِتْرُسا درّاێنت: ”او مرد! من چه آیان نه‌آن.“

59کِساس ساهتێا رَند دگه یکّێا پِتْرُسئے نێمگا چارت و په دلجمی گوَشت: ”اے مرد اَلّما ایسّائے همراه بوتگ، چێا که اے هم جَلیلیے.“ 60پِتْرُسا درّاێنت: ”او مرد! من سرپدَ نبان تئو چے گوَشگا ائے.“ پِتْرُسا هبر دپا اَت که کرۆسا بانگ دات. 61هُداوندێن ایسّایا چَکّ تَرّێنت و پِتْرُسئے نێمگا چارت. گڑا پِتْرُس هُداوندئے هبرئے یاتا کپت که گوَشتگ‌اَتی: ”تئو مرۆچی کرۆسئے بانگا پێسر سئے رَندا منی پَجّاه آرگا اِنکارَ کنئے.“ 62نون ڈنّا در آتک و زار زارا گْرێتی.

ایسّایا کَلاگَ بندنت

(مَتّا 26‏:67‏–68؛ مَرکاس 14‏:65)

63هما سپاهیگان که ایسّا داشتگ‌اَت، آییئے کَلاگ بندگ و جنَگِش بُنگێج کرت. 64ایسّائے چمِّش بستنت و گوَشتِش: ”وتی گئیبی زانتا کار بَند و بگوَش که ترا کئیا جت؟“ 65دگه بازێن بد و رَدے هم کرتِش.

سرۆکانی دیوانا ایسّائے پێش کنگ

(مَتّا 26‏:59‏، 63‏–66؛ مَرکاس 14‏:61‏–63؛ یوهَنّا 18‏:19‏–21)

66وهدے رۆچ بوت، کئومئے کماشانی دیوان بزان مزنێن دینی پێشوا و شَریَتئے زانۆگر یکجاه بوتنت، ایسّااِش آیانی دیوانا بُرت. 67جُستِش کرت: ”اگن تئو مَسیه ائے، بگوَش.“ ایسّایا پَسّئو دات: ”اگن من بگوَشان هم شما باوَرَ نکنێت. 68و اگن جُستے بکنان، شما پَسّئوَ ندئیێت. 69بله چه انّوگا رَند انسانئے چُکّ پُرواکێن هُدائے راستێن کشا نندیت.“ 70آ وهدا سجّهێنان گوَشت: ”گڑا تئو هُدائے چُکّ ائے؟“ پَسّئوی دات: ”شما وت گوَشگا اێت که من هما آن.“ 71آیان گوَشت: ”نون دگه چۆنێن شاهدیے لۆٹێن؟ ما وت چه آییئے جندئے دپا اے هبر اِشکت.“

Seçili Olanlar:

لوکا 22: HPKB

Vurgu

Paylaş

Kopyala