لوکا 21

جنۆزامێئے داتگێن شُگرانه

(مَرکاس 12‏:41‏–44)

1ایسّایا سر چِست کرت و دیستی که لهتێن سێر و هَزگار وتی شُگرانهان مزنێن پرستشگاهئے پێتیا#21‏:1 پێتی، بزان سندوک. مان کنگا اِنت. 2آییا نێزگارێن جنۆزامے هم دیست که پێتیئے تها دو پئیسه‌ای#21‏:2 اَسلیگێن یونانی نبشتانکَ گوَشیت: ”دو لِپتُن“، بزان آ زمانگئے گوَنڈترێن زرّ. دئور دات. 3گڑا ایسّایا گوَشت: ”شمارا راستێنَ گوَشان، اے گریبێن جنۆزاما چه سجّهێنان گێشتر دات. 4چێا که آ دگران چه وتی بازێن مالا شُگرانه دات، بله اے جنۆزاما گۆن وتی گریبیا هرچے که آییا په وتی گُزرانا هست‌اَت، داتی.“

آیۆکێن زمانگئے بارئوا ایسّائے پێشگۆیی

(مَتّا 24‏:1‏–14؛ مَرکاس 13‏:1‏–13)

5لهتێن مردم مزنێن پرستشگاهئے بارئوا گوَشگا اَت که اے گۆن چۆنێن ڈئولدارێن سِنگ و هئیرات کرتگێن چیزّان سینگارَگ بوتگ. ایسّایا گوَشت: 6”اے چیزّان که شما مرۆچی گِندگا اێت، رۆچے کئیت که سجّهێن پرۆشگ و دئور دئیگَ بنت. یکّ سِنگے هم دومی سِنگئے سرا نمانیت.“ 7جُستِش گپت: ”او استاد! بارێن، اے چیزّ کدێنَ بنت و اِشانی نزّیکّ بئیگئے نشانی چے اِنت؟“ 8ایسّایا گوَشت: ”هُژّار بێت، کَسے شمارا گُمراه مکنت. چێا که بازێنے منی ناما کئیت و گوَشیت: ’من هما آن#21‏:8 هُدا وتا گۆن موسّایا همے ناما پَجّارێنیت. بچار دَرگوَز 3‏:14.‘ و ’وهد آتکگ و نزّیکّ اِنت،‘ بله شما آیانی رندا مکپێت. 9وهدے شما جنْگ و آشۆپئے هالانَ اِشکنێت، دلا تُرس مئیارێت. چێا که ائولا باید اِنت اے چیزّ ببنت، بله هلاسیئے وهد هما دمانا نئیئیت و نرسیت.“

10پدا گۆن آیان گوَشتی: ”یکّ کئومے دگه کئومێئے هلاپا و یکّ مُلکے دگه مُلکێئے هلاپا پادَ کئیت. 11مزنێن زمین‌چَنڈَ#21‏:11 زمین‌چَنڈ، بزان زمین‌جُمب، زلزله. بنت و باز جاگه ڈُکّال و وَبا کپیت. چه آسمانا تُرسناکێن نِدارگ و اَجَبَّتێن نشانی زاهرَ بنت.

12بله چه اے سجّهێنان و پێسر، شمارا گِرّانَ کننت و کَنیسَه و زندانانَ برنت. منی نامئے سئوَبا شمارا گِرنت و بادشاه و هاکمانی دێما پێشَ کننت. 13گڑا شمارا په گواهی دئیگا شَرّێن مۆهے رسیت. 14وتی دلا اراده کنێت و په وتی دێمپانیا چه وهدا پێسر پرێشان مبێت. 15چێا که من شمارا اَنچێن زبان و زانتے دئیان که هچّ دژمنے شمئے هبرانی دێما اۆشتاتَ نکنت و آیان رد کرتَ نکنت. 16شمئے مات و پت و برات و سیاد و دۆست هم شمارا گراێننت و لهتێنا کۆشارێننت. 17سجّهێن مردم منی نامئے سئوَبا چه شما نپْرتَ کننت، 18بله شمئے مودی ٹالے هم نکپیت. 19اگن شما برداشتَ کنێت، وتی ساها رَکّێنێت.

اورشَلیمئے تباهیئے پێشگۆیی

(مَتّا 24‏:15‏–21؛ مَرکاس 13‏:14‏–19)

20وهدے شما گندێت که لشکران اورشَلیم اَنگِرّ کرتگ، گڑا بزانێت که اِشیئے وئیرانیئے وهد نزّیکّ اِنت. 21آ وهدا هما که یَهودیَها اَنت، کۆهان بتچنت. آ که اورشَلیما اَنت، ڈنّا در بکپنت و آ که چه شهرا ڈنّ اَنت، شهرا مرئونت. 22چێا که آ وهد سِزائے وهدَ بیت و سجّهێن نبشتانکانی هبر پوره و سَرجمَ بنت. 23آ رۆچان لاپ‌پُرّێن جنێن و هما که چُکَّ مێچێننت، سکّ بَزّگَ بنت، چێا که مُلکئے سرا مزنێن مُسیبتے کئیت و اے کئومئے سرا کَهر و گَزبَ کپیت. 24مردم زهمئے دپارَ بنت و گِرگ و اے دگه کئومانی کرّا برگَ بنت. درکئوم اورشلیما تان هما وهدا لگتمالَ کننت که درکئومانی دئور و باریگ هلاسَ بنت.

ایسّائے پِر تَرّگ

(مَتّا 24‏:29‏–31؛ مَرکاس 13‏:24‏–27)

25چه رۆچ و ماه و اِستاران نشانی زاهرَ بنت و دنیائے سجّهێن کئوم چه دریائے چئول و مئوجانی شۆرا هئیران و پرێشانَ بنت. 26مردم دنیائے سرا آیۆکێن مُسیبتانی تُرسا بێهۆشَ بنت، چێا که آسمانئے زۆر و واک لَرزێنگَ بنت. 27آ وهدا، انسانئے چُکّا گندنت که گۆن مزنێن واک و توان و شان و شئوکتے جمبرێئے تها اِنت و کئیت. 28وهدے اے جاوَرَ#21‏:28 جاوَر، بزان هالَت. کاینت و رسنت، گڑا تچکا تچک بۆشتێت و وتی سرا بُرز کنێت که شمئے نِجاتئے وهد نزّیکّ اِنت.“

اِنجیرئے درچک

(مَتّا 24‏:32‏–35؛ مَرکاس 12‏:28‏–31)

29ایسّایا آیانا اے مِسال هم دات: ”اِنجیر و اے دگه درچکان بچارێت، 30اَنچُش که تاکِش جت، شما وتَ زانێت که نون گرماگ نزّیکّ اِنت. 31همے پئیما، وهدے اے چیزّانَ گندێت، شما وتَ زانێت که هُدائے بادشاهی نزّیکّ اِنت. 32شمارا راستێنَ گوَشان، تان اے سجّهێن جاور مئیاینت، اے نَسل و پَدرێچ هلاسَ نبیت. 33آسمان و زمین گارَ بنت، بله منی هبر هچبر گارَ نبنت.

34هُژّار بێت، چۆ مبیت که شمئے دل چه نشه و ملار و زندئے پگر و پرێشانیان چێر بترّیت و آ رۆچ اَناگت شمئے گُٹّا لۆپ ببیت. 35چێا که آ رۆچ دنیائے سجّهێن مردمانی سرا کئیت. 36پمێشکا هروهد هُژّار بێت و دْوا بکنێت، تانکه چه سجّهێن آیۆکێن مسیبتان برکّێت و انسانئے چُکّئے بارگاها اۆشتات بکنێت.“

37ایسّایا هر رۆچ، مزنێن پرستشگاها سَبکّ و تالیمَ دات. هر شپ شهرا ڈَنّ زئیتون نامێن کۆهێئے سرا شت و وتی شپیَ گْوازێنت. 38هر سَباها ماهَلّه سجّهێن مردم په آییئے هبرانی گۆش دارگا مزنێن پرستشگاها آتکنت.

Seçili Olanlar:

لوکا 21: HPKB

Vurgu

Paylaş

Kopyala