لوکا 20

ایسّائے اِهتیار

(مَتّا 21‏:23‏–27؛ مَرکاس 11‏:27‏–33)

1یکّ رۆچے که ایسّا مزنێن پرستشگاها مردمان تالیم دئیگا اَت و وشّێن مِستاگئے جارا جنَگا اَت، مزنێن دینی پێشوا و شَریَتئے زانۆگر گۆن کئومئے کماشان آییئے کِرّا آتکنت و 2گوَشتِش: ”مارا بگوَش که تئو گۆن کجام هَکّ و اِهتیارا اے کارانَ کنئے؟ اے کئے اِنت که ترا اے اِهتیاری داتگ؟“ 3ایسّایا پَسّئو دات: ”منا هم چه شما یکّ جُستے هست. منا بگوَشێت، 4یَهیایا پاکشۆدی دئیگئے اِهتیار چه آسمانا رَستگ‌اَت یا چه انسانئے نێمگا؟“ 5آیان وت‌مان‌وتا شئور و سَلاه کرت و گوَشتِش: ”اگن بگوَشێن چه آسمانا، گوَشیت: ’شما په چے ایمان نئیاورت؟‘ 6و اگن بگوَشێن که چه انسانئے نێمگا، گڑا سجّهێن مردم مارا سِنگسارَ کننت، چێا که آیان یکین اِنت که یَهیا نبیے بوتگ.“ 7پمێشکا پَسّئوِش دات: ”ما نزانێن چه کجا اَت.“ 8ایسّایا گوَشت: ”گڑا من هم شمارا نگوَشان که گۆن کجام هَکّ و اِهتیارا اے کارانَ کنان.“

بدێن باگپانانی مِسال

(مَتّا 21‏:33‏–46؛ مَرکاس 12‏:1‏–12)

9رَندا ایسّایا په مردمان اے مِسال دات: ”مردێا انگوری باگے اَڈّ کرت و په کُننده‌کاری #20‏:9 کُننده‌کاری، بزان پئیمانکاری، ٹێکه. لهتێن باگپانئے دستا دات و وت دْراجێن سپرێا شت. 10وهدے انگورئے مۆسم بوت، باگئے هُدابُندا په وتی بهرئے گِرگا هِزمتکارے باگپانانی کرّا راه دات، بله باگپانان آ هِزمتکار لَٹّ و کُٹّ کرت و گۆن هۆرک و هالیگێن دستان پِر تَرّێنت. 11پدا باگئے هُدابُندا دگه هِزمتکارے دێم دات، بله باگپانان آ هم جت و بےاِزّت کرت و گۆن هۆرک و هالیگێن دستان پِر تَرّێنت. 12گڑا سئیمی رَندا، دگه هِزمتکارے راهی دات، بله آیان آ هم جت و ٹَپّیگ کرت و گلّێنت#20‏:12 گلّێنَگ، بزان تاچێنَگ، دَر کنگ، دور راه دئیگ..

13نون باگئے هُدابندا وتی دلا پِگر کرت که چۆن بکنان؟ اے رندی وتی دۆستیگێن چُکّا راهَ دئیان، بلکێن آییئے اِزّتا بکننت. 14بله وهدے باگپانان آییئے چُکّ دیست، وت‌مان‌وتا شئور کرت و گوَشتِش: ’باگئے میراسدار#20‏:14 میراسدار، بزان میراس بَرۆک، میراسا شریکدار، وارِس. و پُشپَد همِش اِنت، اِشیا کُشێن که باگ مئے میراس ببیت.‘ 15گڑا چه باگا در کرت و کُشتش. نون باگئے هُدابُند گۆن اے باگپانان چے کنت؟ 16آ کئیت، اے باگپانانَ کُشیت و باگا دگه باگپانانی دستا دنت.“ وهدے مردمان ایسّائے اے هبر اِشکت، گوَشتِش: ”چُش مبات!“

17ایسّایا آ رۆک رۆکا چارتنت و گوَشتی: ”گڑا آ نبشتهئے مانا چے اِنت که گوَشیت: ’هما سِنگ که بان‌بَندان ناپسند کرت و نزُرت، هما سِنگ بُنهِشت#20‏:17 بُنهِشت، بزان لۆگئے ائولی هِشت یا سِنگ. بوت.‘#20‏:17 زَبور 118‏:22. 18هرکَس که آ سِنگئے سرا کپیت، آ کس ٹُکّر ٹُکّرَ بیت و سِنگ که کسێئے سرا کپیت، آییا هورتَ کنت.“

19شَریَتئے زانۆگر و مزنێن دینی پێشوایان زانت که ایسّایا اے مِسال مئے بارئوا داتگ. پمێشکا، شئورِش کرت که همے دمانا ایسّایا گرێن، بله چه مردمان تُرستِش.

شریَتئے زانۆگِرانی جُست

(مَتّا 22‏:15‏–22؛ مَرکاس 12‏:13‏–17)

20گڑا ایسّائے سرا بوتنت، وتی چاریگ و جاسوسِش رئوان داتنت. چاریگان وتا تچک و راستێن مردم پێش داشت که ایسّایا چه آییئے جندئے هبران مان بگیشّێننت و رومئے والیئے دستا بدئینت. 21آیان جُست کرت: ”او استاد! ما زانێن تئو هرچے گوَشئے، هر تالیمے که دئیئے، آ سجّهێن راست اَنت و هچکَسئے نێمگا نگرئے و هُدائے راهئے سۆجا په راستیَ دئیئے. 22نون مارا بگوَش، رومئے بادشاه کئیسَرا سُنگ و مالیات دئیگ رئوا اِنت یا نه؟“ 23بله ایسّایا آیانی اے مکّاری زانت و گوَشتی: 24”منا یکّ دینارے پێش بدارێت، اِشیئے سرا کئیی نام و نَکش پِر اِنت؟“ آیان پَسّئو دات: ”کئیسَرئے.“ 25ایسّایا گوَشت: ”گڑا کئیسَرئیگا کئیسَرا بدئیێت و هُدائیگا هُدایا.“ 26اے ڈئولا، آیان مردمانی دێما ایسّا چه آییئے جندئے هبران داما دئور دات نکرت و چه آییئے پَسّئوان بَه مَنت و بێتئوار بوتنت.

آهِرت و سانگ و سور

(مَتّا 22‏:23‏–33؛ مَرکاس 12‏:18‏–27)

27رَندا لهتێن سَدوکی ایسّائے کِرّا آتک. سَدوکیَ نمنّنت که مُردگ پدا زندگَ بنت. 28جُستِش کرت: ”او استاد! موسّایا په ما نبشتگ: اگن کَسێئے سور کرتگێن براتے بے ائولادا بمریت و جنۆزامی زندگ ببیت، گڑا آییئے برات باید اِنت گۆن آ جنۆزاما سور بکنت تانکه چُکّ و ائولادے په وتی براتا پێدا بکنت.#20‏:28 موسّائے واز 25‏:5 و رند. 29هپت برات اَتنت، ائولی براتا جَنے گپت، چُکّی نبوت و مُرت. 30دومی براتا و 31پدا سئیمی براتا گۆن آ جنێنا سور کرت. همے پئیما هپتێن براتان گۆن هما جنێنا سور کرت و بے ائولادا چه دنیایا شتنت. 32سجّهێنان و رند آ جنێن هم مُرت. 33نون آهرتئے رۆچا اے جنێن کجام براتئیگَ بیت؟ چێا که هپتێن براتانی جَن بوتگ.“

34ایسّایا پَسّئو دات: ”مردم اے جهانا سانگ و سورَ کننت، 35بله هما مردم که اَبدمانێن زِندا کرزنت و دوبر زندگ بئیگئے لاهک اَنت، آ نه سورَ کننت و نه سور دئیگَ بنت. 36آ هچبر پدا نمرنت، پرێشتگانی ڈئولا بنت. هُدائے چُکّ اَنت، چێا که اَبدمانێن زِندئے چُکّ اَنت. 37بله مُردگانی زندگ بئیگئے هبرئے راستی موسّایا بُن گپتگێن ڈۆلُکئے سرگوَستا پێش داشتگ. اۆدا موسّا هُداوندا اِبراهێمئے هُدا و اِساکئے هُدا و آکوبئے هُدا#20‏:37 دَررئو 3‏:6. گوَشیت. 38آ مُردگانی هُدا نه‌اِنت، زندگێنانی هُدا اِنت، چێا که آییئے گوَرا سجّهێن زندگ اَنت.“

39چه شَریَتئے زانۆگران لهتێنا گوَشت: ”او استاد! تئو شَرّ گوَشت.“ 40چه اِد و رند کَسّا دل نکرت که چه آییا جُستے بکنت.

مَسیه کئیی چُکّ اِنت؟

(مَتّا 22‏:41‏–46؛ مَرکاس 12‏:35‏–37)

41ایسّایا گۆن شریَتئے زانۆگران گوَشت: ”چێا گوَشنت که مَسیه، داوود بادشاهئے چُکّ اِنت؟ 42چێا که داوود وت زَبورئے کتابا گوَشیت:

هُداوندا گۆن منی هُداوندا گوَشت

منی راستێن کَشا تان هما وهد بنند

43 که من تئیی دژمنان تئیی پادانی چێرا دئورَ دئیان. # 20‏:43 اسلیگێن یونانی نبشتانکَ گوَشیت: ”تئیی پادانی چێرئے تهتُکے بکنان“. # 20‏:43 زَبور 110‏:1.

44نون اگن داوود مَسیها وتی هُداوندَ گوَشیت، گڑا مَسیه چۆن آییئے چُکّ بوتَ کنت؟“

ایسّا شَریَتئے زانۆگران پاشکَ کنت

(مَتّا 23‏:1‏–7؛ مَرکاس 12‏:38‏–40)

45هما وهدا که سجّهێن مردم گۆش دارگا اَتنت، ایسّایا گۆن مُریدان گوَشت: 46”چه شَریَتئے زانۆگران هُژّار بێت که آیان دْراجێن جامگ و کباه گوَرا کنگ دۆستَ بیت و بازارانی تَرّ و گردا چه مردمان وشّاتک و دْرَهباتَ لۆٹنت. کَنیسَهانی ائولی رِد و داوَتانی شَرتِرێن جاگهِش دۆستَ بیت. 47جنۆزامان رَدَ دئینت و پُلنت و په پێش دارگا وتی دْوایان دْراجکَشَّ کننت. اِشان گنترێن سِزا رسیت.“

Seçili Olanlar:

لوکا 20: HPKB

Vurgu

Paylaş

Kopyala