لوکا 23

ایسّا پیلاتوسئے دێما

(مَتّا 27‏:1‏–2، 11‏–14؛ مَرکاس 15‏:1‏–5؛ یوهَنّا 18‏:28‏–37)

1دیوانئے سجّهێن مردم پاد آتکنت و ایسّااِش پیلاتوسئے دێما برت و 2آییئے سرا بُهتام جنَگِش بندات کرت. گوَشتِش: ”ما دیستگ که اے مرد مئے کئوما گُمراهَ کنت، رومئے کئیسَرئے سُنگ و مالیات دئیگا مَنَه و مَکَنَ کنت و گوَشیت: ’من مَسیه آن، بادشاهے آن.‘“ 3پیلاتوسا جُست کرت: ”تئو یَهودیانی بادشاه ائے؟“ ایسّایا پَسّئو دات: ”تئو وت گوَشگا ائے.“

4پیلاتوسا گۆن مزنێن دینی پێشوایان و گۆن مردمانی مُچّیا گوَشت: ”من په اے مردا هچّ مئیارَ نگندان.“ 5بله مردم وتی هبرئے سرا اۆشتاتنت و گوَشتِش: ”اے مرد گۆن وتی تالیمان یَهودیَهئے سجّهێن دَمگئے مردمانَ شۆرێنیت. چه جَلیلا بُنگێجی کرتگ و انّون اِدا رَستگ.“ 6پیلاتوسا که اِشکت، لۆٹتی بزانت که بارێن آ جَلیلیے یا نه. 7وهدے سَهیگ بوت که ایسّا جَلیلیے، گڑا جَلیلئے هاکم هیرودیسئے نێمگا راهی دات، چێا که هیرودیس آ وهدا اورشَلیما اَت.

ایسّا و هیرودیس

8هیرودیسا ایسّا که دیست، سکّ گل بوت، چێا که دێر اَت که آییئے گِندگئے واهگدار#23‏:8 واهگدار، بزان لۆٹۆک، دلمانگ، هُدۆناک. اَت. آییا ایسّائے کرتگێن کارانی بارئوا اِشکتگ‌اَت و اُمێتوار اَت که اَجَبَّتێن نشانیے بگندان. 9گڑا چه ایسّایا بازێن جُست و پُرسے کرتی، بله ایسّایا هچّ پَسّئو ندات. 10مزنێن دینی پێشوا و شَریَتئے زانۆگر که همۆدا اۆشتاتگ‌اَتنت، ایسّائے سرا بازێن بُهتامے جنَگا اَتنت. 11هیرودیسا هم گۆن وتی سپاهیگان ایسّا بےاِزّت کرت و کَلاگ گپت. ڈئولدارێن کباهے گوَرا داتِش و پدا پیلاتوسئے کِرّا رئوانِش دات. 12چه هما رۆچا هیرودیس و پیلاتوس سَنگت بوتنت، پێسرا دژمن اَتنت.

ایسّائے مَرکئے هُکم

(مَتّا 27‏:15‏–26؛ مَرکاس 15‏:6‏–15؛ یوهَنّا 18‏:39‏—19‏:16)

13پیلاتوسا مزنێن دینی پێشوا و یَهودیانی سرۆک و مهلوک لۆٹاێنتنت و 14گوَشتی: ”شما اے مرد منی گوَرا آورتگ و بُهتام جتگ که مردمانَ شۆرێنیت، بله چه آ جُستان که من شمئے دێما کرتگ‌اَنت، آییئے سرا شمئے جتگێن بُهتامان من هچّ راستیے ندیست. 15هیرودیسا هم مئیارے ندیستگ، پمێشکا پدا مئے گوَرا راهی داتگ. اے مردا چُشێن کارے نکرتگ که سِزایی مَرک ببیت. 16گڑا من اشیا رِدے لَٹَّ گِران و یلهَ کنان.“ 17#23‏:17 لهتێن دَزنبشتا اے بَند نێست، بله لهتێنا چۆ آتکگ: پیلاتوسا هر سَرگوَزئے ائییدا، چه وتی بندیگان یکّے، اَلّما آزات کنگی اَت. 18بله سجّهێن مردمان کوکّار کرت و گوَشت: ”ایسّایا بکُش! بَرَبّاسا آزات کن و مارا بدئے!“ 19بَرَبّاس اورشَلیمئے شهرا آشۆپ و هۆنئے بُهتاما بندیگ کنگ بوتگ‌اَت.

20پیلاتوس ایسّائے یله دئیگا دلمانگ اَت، پمێشکا گۆن مردمان پدا هبری کرت. 21بله مردم سکّ کوکّار کنگا اَتنت، گوَشتِش: ”سَلیبی کَشّ! سَلیبی کَشّ!“

22پیلاتوسا سئیمی رَندا چه آیان جُست کرت: ”چێا بارێن؟ اے مردا چِه بدێن کارے کرتگ؟ من هِچّ بُنیادے نگندان که اِشیئے کۆشئے هُکما بدئیان، پمێشکا رِدے لَٹّیَ گِران و یلهیَ کنان.“ 23بله مردم کوکّارا اَتنت و وتی هبرئے سرا اۆشتاتگ‌اَتنت. گوَشتِش: ”سَلیبی کَشّ!“ و آیانی کوکّاران کار کرت. 24پیلاتوسا آیانی واهگئے سرا هُکم دات. 25اے ڈئولا آییا هما مرد که آشۆپ و هۆنئے بُهتاما بندیگ اَت و مردمان لۆٹت که یله دئیگ ببیت، آزات کرت و مردمانی واهگئے سرا ایسّا سپاهیگانی دستا دات.

ایسّایا سَلیبَ کشّنت

(مَتّا 27‏:32‏–44؛ مَرکاس 15‏:21‏–32؛ یوهَنّا 19‏:17‏–24)

26وهدے ایسّایا برگا اَتنت، شَمون نامێن مردے دیستِش که کِرینیئے شهرئے مردمے اَت و دێم په اورشلیما پێداک اَت. سپاهیگان آ مرد گپت، سَلیب آییئے بَڈّا دات و هُجِّش کرت که ایسّائے رندا برئوت. 27ایسّائے رندا بازێن مردمے رئوگا اَت و گۆن آیان رُمبے جنێن هم گۆن اَت که په ایسّایا گرێوَگ و زاریا اَتنت. 28ایسّایا چَکّ جَت و گۆن آیان گوَشت: ”او اورشَلیمئے جنکّان! په من مگرێوێت، په وت و په وتی چُکّان بگرێوێت، 29پرچا که اَنچێن وهدے کئیت که گوَشنت: ’بَهتاور اَنت آ جنێن که سَنٹ و بێرَند اَنت، هما جنێن که چُکِّش نبوتگ و چه وتی گْوَران چُکِّش نمێچێنتگ.‘ 30هما وهدا مردم کۆهان تئوارَ کننت که مئے سرا بکپێت، و جُمپانَ گوَشنت که مارا چێر بترّێنێت. 31اگن گۆن سبزێن درچکا چُشَ کننت، گڑا گۆن هُشکێنا چے چے نکننت؟“

32آیان دو رَدکار آورت که گۆن ایسّایا هۆر کُشگی اَتنت. 33وهدے هما ”کامپۆل“ نامێن جاگها رَستنت، ایسّااِش سَلیب کشّت. آییئے راستێن کشا یکّ رَدکارے سَلیبِش کَشّت و چپّێن کشا دومی رَدکار. 34ایسّایا گوَشت: ”او پت! اِشان پَهِلّ کن، چێا که نزاننت چے کنگا اَنت.“ گڑا سپاهیگان په لاٹری و کُرَه‌کشّی#23‏:34 لاٹری و کُرَه‌کشّی بزان چِک و پُشت، تَرّ و هُشک. ایسّائے پُچّ و پۆشاک وت‌مان‌وتا بهر کرتنت.

35مردم په سئیل و نِدارگا#23‏:35 نِدارگ، بزان سئیل، تماشه. اۆشتاتگ‌اَتنت و سرۆک په کَلاگ و ریشکند گوَشگا اَتنت: ”اِشیا آ دگه رَکّێنتنت، بله اگن مَسیه بزان هُدائے هما گچێن کرتگێن اِنت، گڑا وتا برَکّێنیت.“

36سپاهیگ هم آییئے نزّیکّا شتنت و کَلاگِش گپت، تْرُپشێن شرابِش دات و گوَشتِش: 37”اگن تئو یَهودیانی بادشاه ائے، گڑا وتا برَکّێن.“ 38ایسّائے سربُرا مئیارنامگے#23‏:38 مئیارنامگ، بزان نبشته کرتگێن مئیار. دْرتکگ‌اَتِش که اۆدا نبشته اَت: ”اے یَهودیانی بادشاه اِنت.“

39چه دوێن دْرَتکگێن رَدکاران یکّێا ایسّا کلاگ زرت و گوَشت: ”تئو مَسیه نه‌ائے؟ گڑا، بیا وتا و مارا برَکّێن!“ 40بله دومی رَدکارا آ هکّل کرت و گوَشت: ”تئو مَرکئے سِزایا ائے و انگت ترا هُدائے تُرس نێست؟ 41مئے وَه دئوا همِش اِنت. اے مئے کرتگێن کارانی آسر اِنت. بله اے مردا هچّ ردێن کارے نکرتگ.“ 42گڑا گوَشتی: ”او ایسّا! وهدے تئو وتی بادشاهیا سر بوتئے، منی هئیالا هم بکپ.“ 43ایسّایا پَسّئو دات: ”ترا راستێنَ گوَشان که تئو مرۆچی منی همراهیا بهشتا رئوئے.“

ایسّائے مَرک

(مَتّا 27‏:45‏–56؛ مَرکاس 15‏:33‏–41؛ یوهَنّا 19‏:28‏–30)

44نێمرۆچئے وهدا#23‏:44 اَسلیگێن نبشتانکَ گوَشیت: ”ششمی ساهت“. یَهودیانی رۆچئے هساب، ساهت سُهبئے شَشا بُنگێجَ بوت. سجّهێن مُلکا تهاریا مان شانت و اے تهاریا تان بێگاها داشت،#23‏:44 اَسلیگێن یونانی نبشتانکَ گوَشیت: ”ششمی ساهتا بگر تان نُهمی ساهتا“، بزان مرۆچیگێن ساهتانی هسابا، دوازدها بگر تان سئیا. 45چێا که رۆچئے رژن شتگ‌اَت. مزنێن پرستشگاهئے پرده چه نیاما دِرت و دو نێم بوت. 46ایسّایا کوکّار کرت و گوَشت: ”او پت! من وتی اَرواها تئیی دستا دئیان.“#23‏:46 بچار: زَبور 31‏:5. گۆن همے هبرا ساهی دات.

47پئوجیانی اَپسرێا اے نِدارگ که دیست، هُدایی سَتا کرت و گوَشتی: ”بێشکّ اے بێگُناهے اَت.“ 48آ دگه سجّهێن مردم که په سئیلا آتکگ‌اَتنت، گۆن اے نِدارگئے گِندگا سر و سێنگا جنانا وتی لۆگان پِر ترّتنت. 49ایسّائے سجّهێن پَجّارۆک و هما جنێن که چه جَلیلا آییئے همراهیا آتکگ‌اَتنت، دور اۆشتاتگ و چارگا اَتنت.

ایسّائے کَبر کنگ

(مَتّا 27‏:57‏–61؛ مَرکاس 15‏:42‏–47؛ یوهَنّا 19‏:38‏–42)

50همۆدا ایسُّپ نامێن مردے هم گۆن اَت که تچکێن و پهرێزکارێن مردے اَت. سرۆکانی دیوانئے باسکے#23‏:50 23‏:35 باسک، بزان اُزْو، مِمبر. اَت، 51بله په ایسّائے مئیاریگ کنگا گۆن آیانی شئور و کاران رزامند نه‌اَت. یَهودیانی شهر اَریماتیائے مردمے اَت و هُدائے بادشاهیئے رَهچار و وداریگ#23‏:51 وداریگ، بزان رهچار، انتزار کنۆک. اَت. 52آ پیلاتوسئے کِرّا شت و ایسّائے جۆنئے برگئے اجازتی لۆٹت. 53ایسّائے جۆنی چه سَلیبئے سرا اێر گێتک، لیلُمێن#23‏:53 لیلُم، گُدئے تَهرے که اَنگرێزیا ”linen“ گوَشگَ بیت. گُدێئے تها پتاتی و سِنگێن کۆهێئے تها جتگێن کَبرێئے تۆکا اێری کرت که پێسرا اۆدا هچکَس کبر کنگ نبوتگ‌اَت. 54آ رۆچ تئیاریئے رۆچ#23‏:54 تئیاریئے رۆچ، بزان په شَبّتا تئیاری کنگئے رۆچ که جُمه اِنت. اَت و شَبَّت بُنگێج بئیگی اَت.

55هما جنێن که چه جَلیلا ایسّائے همراهیا آتکگ‌اَتنت، ایسُّپئے رَندا رئوان بوتنت و هما کبرِش دیست. آیان اے هم دیست که ایسّائے جۆن چِه پئیما کَبرا اێر کنگ بوت. 56رَندا وتی لۆگان شتنت و وشبۆِش تئیار کرت. شَبَّتئے رۆچا اَنچۆ که شَریَتئے پرمان اِنت، آیان آرام کرت.

Seçili Olanlar:

لوکا 23: HPKB

Vurgu

Paylaş

Kopyala