Pag-unawa sa Kalooban ng DiyosHalimbawa

Sa unang araw ng planong ito, nakita natin kung paano ang kalooban ng Diyos para sa ating buhay ay maging mas katulad ni Cristo at kung paano tayo lahat ay tinawag na hanapin muna ang kaharian ng Diyos at ang Kanyang katuwiran, at kung gagawin natin iyon, ang lahat ng iba pang mga bagay sa buhay natin na inaalala natin ay mapapangalagaan.

Sa ikalawang araw, nakita natin kung paanong ang mga apostol ay namuhay ayon sa kalooban ng Diyos sa pamamagitan ng paghahanap muna sa Kanya at pagkatapos ay gumawa ng mga hakbang ng pananampalataya sa pamamagitan ng paggawa ng mga bagay-bagay, at nakita natin kung paanong pinatnubayan sila ng Banal na Espiritu habang sila'y naglalakad.

Nakita rin natin kung paano natin unang hahanapin ang Diyos sa pamamagitan ng paggugol ng higit na panahon sa panalangin, sa pagpapakiusap sa iba na manalangin para sa atin, sa pagtanggap ng payo mula sa iba, at sa paghahanap ng Kaniyang kalooban sa Kaniyang Salita.

Ngayon, madali na maabot ang puntong ito at sabihin, 'Sige, kung nauunawaan ko ang kalooban ng Diyos, sa wakas magagawa ko na ang tama at ang pinakamabuti para sa akin.' Ang problema ay, hindi naman laging ganoon.

Para sa atin, iniisip natin na ang problema ay hindi natin alam o hindi natin nauunawaan ang kalooban ng Diyos, ngunit kadalasan ang problema ay alam natin ang kalooban ng Diyos, at nasusumpungan natin ito, at nauunawaan natin ito, at hindi lang natin ito gusto.

Marami sa atin ang nagbabasa ng Salita ng Diyos o nauunawaan ang Kaniyang tiyak na kalooban para sa ating buhay at nagsasabing, 'Hindi, hindi ito maaaring mangyari, masyado itong mahirap.'

Nagsisimulang magkaroon tayo ng mga kaisipan na nagsasabi, 'Ito'y napakalaki upang isuko,' o marahil, 'Hindi, hindi ito maaaring mula sa Diyos. Hindi ito ibig ng Diyos. Hindi naman talaga iyon ang ibig sabihin ng Diyos, 'di ba?' o 'Ang Biblia ay isang lumang aklat; hindi na ito naaangkop sa kultura ngayon.'

Tinatawag natin ang mga bahaging iyon ng Kasulatan na mga bahaging may suliranin, at sa huli ay higit na nagtitiwala tayo sa ating mga puso kaysa sa Diyos.

Ngayon, maaaring ito'y parang isang magandang bagay, ngunit ito'y talagang hindi. Alam mo ba, walang sinuman sa iyong buhay ang magpapahamak sa iyo gaya ng iyong sariling puso.

Ganito iyon: hangga't ikaw ay buhay, ikaw at ang Diyos ay hindi kailanman magkakaroon ng pagsang-ayon sa lahat ng bagay. Kung ang Diyos ay sumasang-ayon sa iyo sa lahat ng bagay, kung gayon isang uri ng maling ideya ng Diyos ang sinasamba mo.

Pag-isipan mo. Kung binabasa mo ang plano ng Biblia na ito, malamang na ikaw ay mga 20 taong gulang, o 30, o marahil 40, o 50, o marahil 60 taong gulang pa.

Ang Diyos ay walang-hanggan; wala Siyang pasimula; Siya ang simula. At Siya ang matalino-sa-lahat, makapangyarihan-sa-lahat, at nakakaalam-ng-lahat.

Naniniwala ka ba na kung may isang Diyos na makapangyarihan-sa-lahat at matalino-sa-lahat at nakakaalam-ng-lahat na nagpapatakbo ng sansinukob mula pa noong pasimula ng panahon, na hindi na kayo magkakaroon ng mga bagay na hindi pagkakasunduan?

At sa mga kasong ito ng di-pagkakasundo, sino sa palagay mo ang magiging tama?

Maaaring nakakatakot na sundin ang Diyos o sundin ang Kaniyang Salita, lalo na kapag hindi natin Siya nauunawaan. Ngunit dapat nating tandaan na ang Kaniyang mga paraan ay mas mataas, ang Kaniyang mga kaisipan ay mas matalino, at may mga bagay lamang na nalalaman Niya na hindi natin nalalaman. At lahat ng Kaniyang ginagawa, ginagawa Niya ito dahil sa pag-ibig.

Sinabi ito ni Charles Spurgeon sa ganitong paraan:

Ang Diyos ay napakabuti upang maging malupit, at Siya ay napakatalino upang magkamali. At kapag hindi natin matunton ang Kaniyang kamay, dapat tayong magtiwala sa Kaniyang puso.

Kaya marahil panahon na upang magsimula tayong magtiwala sa Diyos higit pa kaysa sa ating pagtitiwala sa ating sarili, magtiwala na talagang nasa puso Niya ang ating pinakamabuting interes, kahit na hindi natin Siya nauunawaan.

Marahil ito na ang panahon na kilalanin natin ang tunay na problema: hindi sa hindi natin nauunawaan ang kalooban ng Diyos, kundi nauunawaan natin ito, at hindi lang natin ito gusto. At sa mga kasong ito, ang problema ay hindi sa Kanya, kundi sa atin.

At maaari nating hilingin sa Kanya na tulungan tayo. Hilingin natin sa Kanya na Siya'y sumama sa atin habang tayo'y nakikipagpunyagi at tulungan tayong maniwala. At tayo'y nagtitiwala na sa Kanyang pag-ibig, gagawin Niya iyon.