Ang Tagpo sa KapanganakanHalimbawa

Noong sinaunang panahon kapag ang Roma ay nagdiriwang ng kanilang tagumpay sa digmaan, o bagong kasunduang pangkapayapaan, o ang pagsilang ng bagong emperador, nagpapadala sila ng mga mensahero upang ipahayag ang mabuting balita sa lahat ng kanilang makakasalubong. Ang mga mensaherong ito ay may mahalagang trabaho dahil wala pang social media o paraan ng pangmalawakang komunikasyon noong panahong iyon.

Sa pamamagitan ng berbalang pakikipag-usap ay naipapalaganap ang mabuting balita sa panahon ng Roma. Tingnan ang bansang Israel na nasasakop ng mga Romano. Sa isang maliit na nayon sa kalagitnaan ng parang isang hatinggabi, isang grupo ng mga pastol ang nagpapainit habang binabantayan ang kawan ng mga tupa. Biglang-bigla, isang kahanga-hangang liwanag ang nakita sa kalangitan na tila kasing liwanag ng bukang-liwayway at isang hukbo ng mga anghel ang nagpakita na ipinapahayag ang mabuting balita na isang bagong hari ang isinilang.

Hindi isang Romanong emperador, kundi ang Tagapagligtas para sa buong mundo. 

Nang marinig nila ang balitang ito, agad silang nagtungo upang makita ang sanggol. Pagkatapos nilang makatagpo si Jesus, umikot sila sa buong nayon upang ipamalita ang kanilang narinig. 

Natanggap din natin ang mabuting balita na natanggap ng mga pastol, at tayo rin ay nararapat mahikayat ng kahanga-hangang balita na ang Tagapagligtas ng mundo ay narito na. Ang mga pastol ay hindi nahiyang kumatok sa mga pinto sa gitna ng gabi upang ipahayag sa lahat ang mabuting balita tungkol sa kapanganakan ni Jesus. May pagkakataon tayong ipahayag sa mundo hindi lamang ang kapanganakan ni Jesus, kundi ang tungkol sa Kanyang kamatayan at muling pagkabuhay. Katulad ng mga Romanong mensahero at ng mga pastol, hinihingi ng Diyos na ipagkalat natin ang mabuting balita ng Kanyang Anak sa lahat ng ating mga kakilala. 

Mga Tanong na Pagninilayan:

Ano ang mga kalamangan natin sa mga pastol patungkol sa ating kakayahang ipabatid ang mabuting balita tungkol kay Jesus sa mga tao ngayon?

Sino ang tatlong taong malalapit sa iyo na maipapanalangin mo upang makahanap ng pagkakataong maibahagi ang Mabuting Balita tungkol kay Jesus? Ipanalangin ito ngayon.