Etûm ágbán~í jisos, echî 2
2
Obhasi Ebhare Ntʉgantʉ a kə́ bha
1Ka mfín erom efʉ ane Jus nji á bhíŋa sê Pentekos, ane chénchén mba á kíi ḿbə́ŋé na Jisos á chə́me eji jə́t.#Mbín 23.15-21; Otira 16.9-11. 2Ka ebhú jə́t, ejok é bhak nnyi ósô noŋ ekpatə́m í mfêp nâ á noghá. Ejok njí é súi njû ndə́m nnyi ábho á kûn. 3Á yéna ejûm noŋ ngûn ń kí ru, ń chât, ń kúmi kpe nnyón nne ábho ka echî. 4Obhasi Ebhare Ntʉgantʉ a súi ábho ka biji, á róghe echoróm nyum i nték etat nnyi á ká məŋé. É dʉ̂ ka ikom mfi Ntʉgantʉ a karê ábho.
5Ane Jus etî-etî mba á fîk nchot Obhasi nono á rî ka Jerusarem mfín ányi. Á rʉ̂ ka nték i ngun chénchén. 6Ebhú ane á yúghi ejok njí, á fâp á bhâ chə́me ka ekpatə́m ekam. É kpô ábho biji kpe-eji nji kpe énê a chə́bhe á yugha nchot atóbhá Jisos ka ejê eyum eték. 7Ka okpógha-biji mbí, á kí bhəp sê, “Ane Gariri asík á chóra nná a? 8É yími nan e kí yuk ábho, kpe énê ka ejê eyum eték? 9E rʉ ka nték ka nték mba Patiya na Mit na Eramayit na Mesopotamiya na Judiya na Kapadosiya na Pontus na Esiya, na 10Frijiya na Pamfiriya na Ijip na ebhat í Sarin ka Libiya. Mba tat á rʉ̂ Rom, 11etʉ̂ ane Jus, etʉ̂ ajéné mba á chəbhe noŋ ane Jus. Mba tat á rʉ̂ Krit na Arabiya. Êt chénchén, e kí yuk oyúk ane mbá á səra êt ekpatə́m í ntûm Obhasi ka nyum i nték eyəré.” 12Kpe énê biji í kpô yê. É chíŋi ábho á chə́bhe á chorá na atem sê, “Ḿfa nâ jen?”
13Kən etʉ̂ ane ka okagha-ntuŋ á kí chot sê, “Á gwo aməm á sui ábho biji nâ ńjə́ne á chóra áno.”
Pita a kí səre echî mbâ ekam ane njí
14Kən Pita a fâp mân a gyími na ágbán mba ngá ófó na yót, a kí gyʉí a sə́rá ekam ane njí se, “Atem-ane Jus na chénchén ane mba á kúma ka Jerusarem, kî ên atûŋ yûk ên nchot nnyi n kí chot. Məŋê ên sê, 15ane mbá á bhó gbo aməm noŋ ó kera ên, ka ńkánínká érôn-énî na ofú a nyə́ne á ka chíŋ. 16Kən yûk ên ejûm nji nkara-otîp Obhasi éməné nnyo á kamá se Jowel a chorê a kpê na iyîm mbi í chíŋa mfá égyé. 17Obhasi a chorê se,
‘Ka nsígha-njəm ebhú
n kí karé Ntʉgantʉ omé a súi a fûk
mbâ ane chénchén.
Abhon abhə́né mba ane-arûm na ane-akáé
tîk á kará otîp obhámé.
Ên abhon aguŋi, tîk n chôt mbâ eyəné ka ndem,
ên ane-akúí, tîk n káre ên fə́ne arem.
18Kpe a ri asʉ́ŋ abhámé, ane-akáé, ane-arûm,
tîk n káre ábho Ntʉgantʉ omé a súi a fûk.
Ń karé ábho ńnyə́ne, tîk á kará otîp obhámé.
19Tîk n yîm achot okpógha-biji ka ósô na biriŋ ka nsi.
Agyʉ́ŋ na ngûn na átʉ́k tîk í fâp.
20Njúí a rô kpó fon ebhát ejê,
nnyam-ósô tîk a bhík noŋ agyʉ́ŋ,
kən ekpatə́m ofú ejík mbi Ntûfâm ó sí.
21Ka ofú ábhi mân,
kpe énê nnyo á bhiŋ mbiŋ i Ntûfâm
tîk a sêm.’ ”#Jow 2.28-32.
22Pita a kpô chot se, “Ane Isrel, yûk ên nchot nnyi n kí chot. Obhasi a tóŋe se yê nâ a túmi Jisos nnyo nne Nasaret. A tóŋe ka ikom mfi a karê yê se a yîm ntûm okpógha-biji na biriŋ ka étíŋanti ejə́né. Ên áfoné o yên. 23Jisos nnyó yót, á gbîp á káre ên ka ekpak Obhasi a râŋ mbá a mə́ŋe, a yîm fə́ne se é jóe áno. O kâm ên sê ane abhí á kúm yê ka ego, a kpó.#Mat 27.35; Mak 15.24; Luk 23.33; Jon 19.18. 24Kən Obhasi a yîm yê a nyə́me ka ekʉ̂, a kpât yê a yíghi ka oseŋe ekʉ̂, ka ekʉ̂ é ká kpo bhik yê efiím.#Mat 28.5-6; Mak 16.6; Luk 24.5. 25Debhit a chorê a kpê na Jisos nchane se,
‘N yéne Ńtâ Obhasi mbá-ochî amé chénchén ebhú.
Yê a ri ə̂m ka mkpe biji, kpe ejûm nji é kí kpo nyiŋí ə̂m cháŋ.
26Nâ echî ḿbə́ŋé a kí gyebhé ə̂m kpe-eji,
n chorá na ogyebhá-ḿbə́ŋé.
Kpe n di áno nne, ń yuŋ ḿbə́ŋé ń ki na yê,
27ka we, Obhasi, tîk ó bhó maghé ńtʉgântʉ amé ka ekʉ̂,
ó bhó kam fə́ne se mme, nnyo a ri Obhô-orûm obhâ, a kpó a chá.
28Ó yim ə̂m ḿ məŋe ekpak n kí fon ekpin.
Nji o ri mfá na mme,
tîk o káre ə̂m ogyebhá-ḿbə́ŋé ó súi ó fûk.’ ”#Nkôn 16.8-11.
29Pita a kpô chot se, “Atem-abhon-í-nnyen kə́n n sə́re ên, efup ḿ bó fon, bəre Debhit nnyo a ri ńsé owəré yót ka éməné, a kpô, á kə̂n yê, oyəm obhê ó rî mfá na êt na égyé-égyê. 30Ebhú áji yê a ri nkara-otîp Obhasi, a mə́ŋe se Obhasi a chími se yê a kí yim eyábhé-mmon i Debhit yót a kó otúi obhê.#Nkôn 132.11; 2 Sam 7.12-13. 31Debhit a yên nji Obhasi a kí yim mbá-ochî, a chôt a kpê na enyəmə́m ka ekʉ̂ nji Krayis, nne nnyo Obhasi a kí tum se a yim ngun á sém, se
á ka maghé yê ka ekʉ̂,
á ka kam se a kpó a chá.
32Jisos nnyó, Obhasi a yîm yê a nyə́me ka ekʉ̂, êt chénchén a ri atî-isê. 33Nji Obhasi a kô yê a jî ka ósô, a káre yê ekumi ejík mkpe obhô-orûm eye. A káre yê fə́ne Ebhare Ntʉgantʉ nnyo a chimî êt. Jisos Krayis a káre êt mân Ntʉgantʉ nnyó a súi a fûk. A ri etûm Ebhare Ntʉgantʉ nnyó nâ ó yugha ên áno na atûŋ, o yéná ên na amə̂t. 34Debhit yê ḿfoné á ka ji nnyi ósô ka ekpak í Jisos a jiî, kən a chôt ka imê nnyo se,
‘Ńtâ Obhasi a sə́re ntûfâm omé se,
“Kumî ə̂m mfá ka ekumi ejík mkpe obhô-orûm,
35ta n yîm ane-ebhan abhâ á chə́bhe ekíghá-akát ejâ.” ’#Nkôn 110.1.
36“Deê mân ane Isrel ndə́m á mə́ŋe sê Obhasi a yîm Jisos nnyo o kúmi ên ka ego, Ntûfâm. A yîm yê fə́ne Krayis, nne nnyo a túmi se a bhá yim ngun á sém.”
37Ane á kpó yuk nchot nnyí, efup é gyê ábho, á bhə̂p Pita na ágbán mba ngá sê, “Atem-abhon-í-nnyen, e kí yim mân nan?”
38Pita a sə́re ábho se, “Deê nne owəné kpe nnyón a yóŋé ḿbə́ŋé a maghé obhí obhê, a fúk ayép ka mbiŋ i Jisos Krayis. Tîk Obhasi a rî nsôn a sû obhí obhê. Tîk a káre ntʉ́ghi nne ányo Obhasi Ebhare Ntʉgantʉ noŋ ekəp. 39Echî aŋ? Obhasi nâ a chimî a káre ên na abhon abhə́né, na chénchén ane mba á rî ka nték nnyi ehʉʉ́t, mba Ntûfâm owəré Obhasi a bhîŋ se á bhá yê mbá biji.”
40Pita a sə́re ábho achot etî-etî, a chóá ábho se, “Nyáŋe ên biji ibhə́né o kâ jóe ên ka ekam ane ndibhí mbá mba Obhasi a kí kpəré.”
41Etî-etî ábho á yûk nchot i Pita, á fûk ayép. Ane á sî kpe ntem-esam ntə̂m-ntə̂m enígisá na ejûm (3,000) mba á chə́me ekam ane mba á káme na mbiŋ i Jisos ofú ábhi. 42Á káre biji á kpik achot mma ágbán í Jisos á kpik ábho. Á chəmá biji, á dik Édî Obhasi á gorá yê.
Ekpin nji ane mba á kíi ḿbə́ŋé na Obhasi á fíi
43É chíŋi ane na ntûm okpógha-biji etî-etî na biriŋ mbi ágbán í Jisos á yíma. 44Chénchén ane mba á kíi ḿbə́ŋé na Jisos, á kə̂t ka ochəma-biji, á kirá iyîm ábho na atem.#Etûm 4.32-35. 45Á gurá iyîm ábho, á kirá ntí na atem mba é fóghe ábho. 46Chénchén ofú á kí chəmé ka ekam jə́t ka ókʉ́rí achot Obhasi, kən á chəmá fə́ne ka ojû atem, á dik édî ábho na nji Obhasi. Á dik na ogyebhá-ḿbə́ŋé na ḿbə́ŋé ábho jáé. 47Á kará nkat mbâ Obhasi, ane chénchén á gyebhá ḿbə́ŋé na ábho. Ńtâ Jisos a kpek ka ekam ábho ane mba á kí ki ḿbə́ŋé na yê ka ofú ka ofú.
Kasalukuyang Napili:
Etûm ágbán~í jisos, echî 2: ETUNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Ejagham New Testament © Bible Society of Nigeria and Bible Society of Cameroon, 1996.