Etûm ágbán~í jisos, echî 1
1
Eróghá-ndə́p
1Ntem omé, Tiyofirus, ka nwet nnyi ndaŋa-mbá amé n séŋe m kpê na chénchén iyîm mbi Jisos a yimî na achot mma a kpíi, é róghé ta ka ebhú a róghe etûm ejê#Luk 1.1-4. 2ta é sî ebhú nji á kóe yê a jak ka ósô. Kən á bhá kô yê, ka ikom Obhasi Ebhare Ntʉgantʉ a sə́re ágbán abhê mba a sáŋe, etûm nji á kí yim ka ngun. 3Nji a kpóe a nyə́me, a fâp ka ochî ágbán abhê ntə̂m etî-etî a tóŋe jáé se yê a nyə́me ka ekʉ̂. Ka nsam i mfín ébháe, a ri ori a fábhá ábho ka ochî, a kpík ábho nchot otúi Obhasi. 4Ofú etat nji á kpúghi atem, a sə́re ábho se, “Ka mághe ên Jerusarem. Kumî ên chik ekəp nji Ńsé omé a chimî ên ka ekpak nji n sə́re ên.#Luk 24.49. 5Jon a kóe ayép a fûk ane ayép, kən kpe mfín á bhó rap, tîk á fûk ên ayép a ri na Obhasi Ebhare Ntʉgantʉ.”#Mat 3.11; Mak 1.8; Luk 13.16; Jon 1.33.
Jisos a jak nnyi ósô
6Kən á bhá kó Jisos á jî nnyi ósô, ágbán í Jisos á rî eji jə́t na yê á bhə̂p yê sê, “Ntûfâm, to mfá-mfá o kí chəbhé njəm ó kó ikom otúi Isrel mbâ ane Rom ó fé ane Isrel?”
7Jisos a táme se, “Ó ka fon ên eməŋə́m ebhú nchane nji Ńsé omé yê ḿfoné ka ikom ifê a kíi. 8Kən tîk o fôn ên ikom, ebhú Obhasi Ebhare Ntʉgantʉ á bha ên ka biji, o chə́bhe ên mân atî-isê abhámé ka Jerusarem na ebhat í Judiya ndə́m na ebhat í Samariya, ta o sî ên ntə̂m i ngun.”#Mat 28.19; Mak 16.15; Luk 24.47-48.
9Nji a chorê áno, á kô yê fə́ne a kí ji nnyi ósô, ágbán abhê á rî áfo á kebha. Átʉ́k í ngurobhú á bhúi yê, ábho á ká kpo yen yê.#Mak 16.19; Luk 24.50-51.
10Ágbán í Jisos á nyə́ne á kebha ósô nji ane-arûm ábháe na ábháré ḿfô, á fábhe ábho áfo ntə̂m yə́t. 11Á bhə̂p ágbán mbá sê, “Ane-arûm í Gariri, o gyím ên jen o kébhá ósô? Jisos nnyó yót nnyo á kóe áno á jak nnyi ósô, a kí kpo chəbhé njəm a bhá ka ekpak nji o yéne ên yê áno a jak.”
Ntóbhá Jisos nnyo a kóe eji Juda Iskariyot
12Ágbán í Jisos á mághe mân Egui Orif, á chə́bhe njəm nnyi Jerusarem. Kən ó yə̂p Jerusarem ó sí egúí njí é ká si ntáé yə́t. 13Nji á síi njû nnyi á kúma, á gyʉ̂t á jak ka ábho mmon-i-njû ka ósô enyóŋ. Á rî ábho ófó na yót, Pita na Jon na Jems na Andru na Firip na Tomas na Batromiyu na Matiyu na Jems nnyo mmon Afiyus na Simun nnyo á chóra sê kpe ekʉ̂ kə́n a kâm ka okot eték ejê na Juda nnyo mmon i Jems etat.#Mat 10.2-4; Mak 3.16-19; Luk 6.14-16. 14Ábho mbá chénchén é kpê na mba ane-akáé na Meri nnyo nnyen i Jisos na abhon-í-nnyen abhê mba ane-arûm, á chə́ma chénchén ebhú, á gorá Obhasi.
15Mfín kpe ńnô á ka sí, chénchén ane mba á kíi ḿbə́ŋé na Jisos á chə́me. Ane á sî kpe nsam eságasá. Pita a rúi ngyím a sə́re ábho se, 16“Atem-abhon-í-nnyen, nji á séŋe ka nwet Obhasi é kpê na Juda é rî é fáp ka ekpak nji Debhit a chorê éməné ka ikom Obhasi Ebhare Ntʉgantʉ. A ri Juda nâ a kóe ane á bhâ fî Jisos, 17kpe nji yê a joê nná ka ekam ejə́ré, á káre eye ngyímí-etûm ka etûm ejə́ré.”
18Kən a jî gúri Jisos, á káre yê ntí. Na ntí ndibhí mmí, a nâm eji-nsi, a gbô nkə́p, oya ó yə̂m, aya á róme ka éré, a kpô. 19Ane chénchén ka Jerusarem á yûk nchot nnyí. Ka eyum eték ábho á kâk mân mbiŋ eji-nsi njí sê Akedama, nâ se Eji-nsi Agyʉ́ŋ.#Mat 27.3-8.
20Pita se, “Debhit a séŋe ka Nwet i Nkôn Obhasi sê,
‘Deê njû eye a kə́t mbít,
kpe nne a kâ kúmi ka etím.’
“A kpô séŋ se,
‘Deê nne etat a kó otúi obhê.’#Nkôn 69.25; 109.8.
21Nâ mân e ri é sáŋ nne etat ka ane mba á joe na êt chénchén ebhú nji é jená e fará na Ńtâ Jisos. 22É róghé nná ta ka ebhú Jon a fúghi yê ayép ta é sî ebhú á kóe yê á jak nnyi ósô. Nne ntʉ́ghi nnyó a ri a chəm êt noŋ ntî-isê ekʉ̂ enyəmə́m nji Ńtâ Jisos a nyəmê.”#Mat 3.16; Mak 1.9; 16.19; Luk 3.21; 24.51.
23Á bhîŋ mân ane ábháe, á sáŋ yót ka ábho ábháe. Nne yót ka ane mbá ábháe a ri Jusep nnyo á bhíŋa sê Basabas. Á bhiŋá yê fə́ne sê Justus. Nnyo tat a ri Matiyas. 24Á góre Obhasi sê, “Ntûfâm, we nnyo o məŋê ḿbə́ŋé ane chénchén, tóŋe êt nnyo we o sáŋe ka mbá ábháe, 25se a kó eji ka etûm ejâ noŋ ḿgbán owa nji Juda a yimî chík, a mághe, a jak mbá oseŋe nnyi a bhighî na yê.” 26Á tûp ebháŋé, é gbô é káre Matiyas. Á kô yê fə́ne a chə̂m ágbán mba ngá ófó na yót.
Kasalukuyang Napili:
Etûm ágbán~í jisos, echî 1: ETUNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Ejagham New Testament © Bible Society of Nigeria and Bible Society of Cameroon, 1996.