Etûm ágbán~í jisos, echî 3
3
Mbə́né nnyo á yími yê a sôn
1Ofú bhə́t, ka ńkánínká ésá na nchên, Pita na Jon á jak ka ókʉ́rí achot Obhasi sê á góre yê. 2Ka ebhú njí fə́ne, á kən nne etat nnyo á jíi yê mbə́né, á kí ji á jí kí ka nnyo-mbá ókʉ́rí mbí. Á bhíŋa nnyo-mbá mmí sê Énoê Nnyo-mbá. Á kîk mbə́né nnyó chénchén ofú ka eji njí a gyéŋá ntí mbâ ane mba á gyêk ka ókʉ́rí mbí. 3Nji nne nnyó a yéne Pita na Jon á kí gye, a gyéŋe ábho se á káre yê mô ejûm. 4Mba Pita á kêp yê nyamḿ ka ochî, Pita a sə́re yê se, “Kép êt ka ochî.” 5Nne nnyó a yûŋ fə́ne amə̂t a kí kep ábho a kérá se tîk á káre yê ejûm.
6Kən Pita a sə́re yê se, “Ń ka fon ntí, kən tîk n káre wâ nji m fonê. Ka mbiŋ i Jisos Krayis nnyo nne Nasaret, duî ngyím jen ejen.” 7A jî fî nne nnyó a yûŋ na obhô-orûm. Ka ngyím ányi, ásábhé-akát amê na ameghé-akát á sôn. 8A jût a kíri, a róghe ejeném a gyék ókʉ́rí mbí na ábho. A jurá a kirá, a kará nkat mbâ Obhasi. 9Ane chénchén ka ókʉ́rí mbí, á yên nne nnyó noŋ á jená a kará nkat mbâ Obhasi. 10Á mə́ŋe sê nâ nne nchane nnyo á kumá nná ka Énoê Nnyo-mbá ókʉ́rí, a gyéŋá egyéŋé. É kpô ábho biji kpe-eji na ejûm nji é fábhe.
Ḿfa nâ otîp mbi Pita a kí karé ka ókʉ́rí achot Obhasi
11Nne nnyo á yími nná a sôn, a kə̂t yághé-yághé ka mkpe biji Pita na Jon. Kən ane chénchén á yéna yê, biji í kpô ábho. Á bhéne á jí kpúghí ábho ka agbá-njû mma á bhíŋa sê Agbá-njû Soromon. 12Pita a yên ábho á kə́ bha a sə́re ábho se, “Atem-ane Isrel, etûm njí é kpôk ên biji jen? Ó kebha ên êt jen noŋ kpe e yimî nne nnyó a jên ka ikom ifə́ré? Á ka jen fə́ne ka obhô sê é fon ekpin ka ekpak nji Obhasi a wóme. 13A ri Obhasi Abraham na Isak na Jakop, Obhasi ásé abhə́ré nâ a yimî etûm njí a jíghi ḿgbán owe Jisos. Ḿgbán nnyó nâ o gbîp ên nná o káre ên sê á yúí. O táŋe ên yê kpe ka ebhú Piratus a wóme a nyaŋé yê obhô.#Ane 3.15. 14O táŋe ên yê nnyo a ri Obhô-orûm Obhasi, yê nnyo ekpin ejê é rî ka nnyen-i-mbá, o sə́re ên sê á nyáŋe nyúa-nne abhô.#Mat 27.15-23; Mak 15.6-14; Luk 23.13-23; Jon 19.12-15. 15Ka ekpak njí, ó yui ên nkara-ekpin, kən Obhasi a yîm yê a nyə́me ka ekʉ̂. Êt a ri atî-isê abhê. 16Mbə́né nnyó nnyo o kí yen ên o mə́ŋe ên, a sôn ka obhô mbiŋ i Jisos nnyó na ḿbə́ŋé nnyi e kíi na yê. Ka etʉri, a ri mbiŋ i Jisos na ḿbə́ŋé nnyi e kíi na yê nâ a yimî áno nne nnyó a sôn nnyen esonóm. Ên chénchén, nne nnyo a rô yén cháŋ.
17“Atem-abhon-í-nnyen, ḿ məŋe bəre o yimî ên, ó ka məŋé. Kpe ane-echî abhə́né á ká məŋé eróŋ. 18Éməné Obhasi a chôt ka nnyo akará-otîp abhê chénchén se Krayis, nne nnyó nnyo yê a túmi a bhá yim ngun á sém, a ri a yén oseŋe. Ḿbə́ne nâ a yéne áno fə́ne. 19Taŋê ên mân obhí obhə́né, tôp ên Obhasi a su ḿbə́ne a yighí, ó fôn ên onará-ḿbə́ŋé ka ochî obhê. 20Tîk a kpô túm ên fə́ne Jisos nnyo yê a sáŋe a káre ên. Yê nâ Krayis. 21Jisos nchane a ri a kə́t ka ósô ta ebhú é bhîk nji Obhasi a kí yim achot chénchén á chə́bhe njəm á gyímí ekan-ékân noŋ a sə́re ta ka éməné. Akará-otîp abhê mba a sáŋe nâ á sə́re nchot nnyí.
22“Nâ ńjə́ne Mosis a chorê ebhú áji se, ‘Ńtâ Obhasi tîk a yîm nne owəné yót nkara-otîp noŋ a yimî ə̂m áno. O ri ó yúk ên kpe jen nji a sə́re ên.#Otira 18.15,18. 23Kən kpe énê nnyo á ka yúk nkara-otîp nnyó, ekam ane Obhasi a rô kpó chəm.’#Otira 18.19.
24“Chénchén akará-otîp mba Obhasi a túmi, é róghé ta ka Samuwel ta é si égyé, á chot á kpe na ebhú njí jə́t. 25Iyîm mbi Obhasi a chimî ka nnyo akará-otîp abhê, a ri ibhə́né. Ên fə́ne o ri ên ka ńgyímí nnyi Obhasi a fonê na ane-atəm abhə́né. É rî ka ekpak a chorê na Abraham se, ‘Ka obhô biyábhé-abhon abhâ, n kí karé enare mbâ ngun ndə́m.’#Eróghá 22.18. 26Nji Obhasi a kóe ḿgbán nnyó a bhák ka ngun, a túmi yê kpá mbâ eyəné se yê a karé ên enare ka eyimím ên ó mághe ndibhí.”
Kasalukuyang Napili:
Etûm ágbán~í jisos, echî 3: ETUNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Ejagham New Testament © Bible Society of Nigeria and Bible Society of Cameroon, 1996.