मत्ति 16
16
खरिहा योम्बोक खाङ्मा योक्पॽआ
(मरकुस ८:११-१३; लुका १२:५४-५६)
1येसु रेम्एम्मामि फरिसिनुङ सदुकिजिडे़ॽ येसुबेॽ लेन्नुङ लुसुजि, “हे़न निवाहाङ्बाङ्नोॽ लेङ्इटे़होङ, थाङ्सिरिबाङ्ए इक्को खरिमा योम्बोक ले़ःॽनुङ खाङ्मुघै।” 2तर येसुडे़ॽ माहाजि लुसुजि, “नम टे़ःॽसिॽ पोरोक्माबेॽ नान्द्रुङ्मा हररा ले़ःॽहोङ हे़निङे़ॽ लुन्डानुमे, ‘वागिया नम निये।’ 3तर माक्मिॽ चाहिँ ‘नान्द्रुङ्मा हररा ले़नुङ खिम्मिॽवाडे़ॽ टे़गुहोङ हे़निङे़ॽ लुन्डानुमे, आयु फुइक्सुमा लेङ्इये चारा।’ हे़निङे़ॽ नान्द्रुङ्मा खाङ्नुङ याक इन्डोॽ लिये लुनुङ लुहेन्डानुमे, तर लिसिॽपोरोक्पॽआ खामि चिङ्गा खाङ्नुङ्सो लेसानुम्ने। 4आयुहा दुस्टनुङ निवाहाङ्बेॽ भरोसा मे़ॽनिङ्हा पुस्ताजिडे़ॽ खरिहा चिङ्गा खाङ्मा योॽइन्डुजे, तर योनामि हिङ्मवाबेॽ लिबॽआ खरिमा चिङ्गाबाङ हाइखा चिङ्गा खाङ्डोक्टुजिनिबा।” मोबा मोबेॽ माहाजि याःॽयानुङ येसु खे़प्पेसा।
फरिसिनुङ सदुकिजिमि सिक्छेमि टुम्बेॽहा खा
(मरकुस ८:१४-२१)
5येसुमि चोङ्साजि टोम्लिॽवामि मे़ॽए़रेङ रुक्नुङ लेडोक्टुजि, खोजिडे़ॽ चरेपा लाःप्मा मिन्डेटुजि। 6येसुडे़ॽ चोङ्साजि लुसुजि, “हे़निङ फरिसिनुङ सदुकिजिमि खमिरबाङ होसियार ले़टानिङे।” 7येसुमि चोङ्साजि खोजिदाङ्बा काबोगामि, “कानिङे़ॽ चरेपा मे़ङ्खिबॽआसे़ॽ होला इडोॽ लुये।” 8येसुडे़ॽ खोमि चोङ्साजि इडोॽ कामे़ॽनिङ्सिबॽआ लेडोक्नुङ लुसुजि, “खोइ हे़निङ्मि बिस्वास! हे़निङ्नुङ चरेपा माॽआ लुनुङ हे़निङ टाङ्बा इन्ढोङ कान्डानिङे ? 9इमा हे़निङे़ॽ हागोरोसो मे़लेडिॽटानुमे ? ङाउम चरेपा ङाउम हजार याॽमिजिडे़ॽ उक्खारो चासेॽनुङ एम्बॽआ चरेपा सुम्माबेॽ इन्डोक ओखे़ङ इःगानुमे मिन्डेॽपेसानुमे ? 10मोबा रिउम हजार याॽमिजि एच्चि गोटा चरेपा हिङ्माबेॽ हे़निङे़ॽ इन्डोक ओखे़ङ इःगानुमे ? माहासो मिन्डेडानुमे ? 11इन्ढोङ हे़निङे़ॽ लेसानुम्ने, के़ॽ हे़निङ्नुङ चरेपामि टुम्बेॽ इःबॽआ ने़ॽनि। के़ॽको फरिसिनुङ सदुकिजिमि खमिरडोक्मा खाबाङ होसियार ले़टानिङे लुबॽआगोरे।” 12मोबारेॽ चोङ्साजिडे़ॽ लेसुजि, येसुडे़ॽ चरेपाबेॽ ए़म्मे खमिरबाङ होसियार ले़ःॽमे लुबॽआ ने़ॽनिले़, तर फरिसिनुङ सदुकिजिमि सिक्छेबाङ चाहिँ होसियार पेम्मे खा लुबॽआ ले़येले़।
येसु असाडे ?
(मरकुस ८:२७-३०; लुका ९:१८-२१)
13येसु कैसरिया, फिलिप्पिमि मुलुकबेॽ रुक्नुङ खोमि चोङ्साजि सिप्सुजि, “याॽमिजिडे़ॽ का याॽमिमि पसा असा लुनुङ लेम्मे ?” 14माहाजिडे़ॽ लुसुजि, “आढाजिडे़ॽ बप्तिस्मा पिघुबा युहन्ना, आढाजिडे़ॽ एलिया, आढाजिडे़ॽ चाहिँ यरमिया अगमबक्ता अथबा अगमबक्ताजिबेॽए इक्को अगमबक्ता ले़ये लुम्मे।”
15येसुडे़ॽ माहाजि सिप्सुजि, “हे़निङे़ॽ चाहिँ का असा लुन्डानिङे ?” 16सिमोन पत्रुसडे़ॽ लुसु, “हे़न हिङ्रिक निवाहाङ्मि पसा मुक्ति पिघुबा खिरिस्ट ले़ये।” 17येसुडे़ॽ खो लुसु, “योनामि पसा सिमोन, हे़ने़ॽ आसिस चुप्मिन्टुए! इन्ढोङ्होङ इगो खा याॽमिबाङ ने़ॽनि, थाङ्सिरिबेॽ टुघुबा के़ए़ निवाहाङ पाबाडे़ॽ हे़न लेमेटे़। 18के़ॽ हे़न लुन्ने़, हे़न पत्रुस ले़ये (पत्रुस लुबॽआ रुङ्गोॽवा ले़ये)। के़ॽ काङ्मि मन्डलि इगो रुङ्गोॽवासोक्पेॽ टोङ्इनुङे। मोबा के़ए़ मन्डलि सिमवामि सक्तिडे़ॽ हेजोसुनिबा। 19के़ॽ हे़न थाङ्सिरिमि राज्य हेन्ढाम साचो पिन्ने़। हे़ने़ॽ इगो मक्खाम्डेमबेॽ इमाङ हिःक्इन्डुए मो थाङ्सिरिॽटुसो हिःक्इये, मोबा इमाङ इमाङ इगो मक्खाम्डेमबेॽ हेङ्इन्डुए, मो थाङ्सिरिॽटुसो हेङ्इये।” 20मोबा येसुडे़ॽ चोङ्साजि लुसुजि, “का मुक्ति पिघुबा खिरिस्ट ले़ङे लुमे खा असासो ए़ॽलुमे” लुनुङ बेॽए आग्या पिसुजि।
येसुडे़ॽ टाङ्बामि सिमे खा इःबॽआ
(मरकुस ८:३१-३३; लुका ९:२२)
21मो बेलाबाङ्नोॽ येसुडे़ॽ टाङ्बामि सिमवामि टुम्बेॽ टाङ्बामि चोङ्साजि इडोॽ लुसुजि, “का यरुसलेमबेॽ खे़ॽमानोॽ खे़ये, मोबेॽ डायोङ्बाजि, यहुदि धारमिक नियम इःॽखुबाजिनुङ एप्पा याडाङ्बाजिबाङ बेॽलो खेः आङ्मा खे़ये, मोबा ए़क्साङ का सेॽनेम्मे, तर सुम याकपेॽ का सिबॽआबाङ हिङ्बोॽइङे।”
22पत्रुसडे़ॽ येसु ए़डेॽ मेॽयोङ चिक्खे़ॽनुङ वोःप्साङ लुसु, “निवाहाङ्डे़ॽ इडोॽ ए़ले़टुरो, परभु, हे़न सोक्पेॽ इडोक्मा इन्डोक्पेॽसो लिनिबा।” 23मोबा येसु पत्रुसलाम हिङ्घे़ॽनुङ लुसु, “हे़न सैतान, काङ्मि के़क्बाङ खे़प्पेसे, हे़ने़ॽ का से़क्मा योॽइये! हे़ने़ए़ इगो निवा निवाहाङ्बाङ्ए ने़ॽनि तर याॽमिबाङ्ए ले़ये।”
चोङ्साडे़ॽ ले़ःॽमा खे़ये योम्बोक
(मरकुस ८:३४–९:१; लुका ९:२३-२७)
24मोबा ए़क्साङ येसुडे़ॽ टाङ्बामि चोङ्साजि लुसुजि, “काङ्मि चोङ्सा लिमा मिॽखुबे़ॽ टाङ्बा मिन्डेॽमा खे़येनुङ टाङ्बामि काप्सिङ खिमानुङ कानुङ राम्म खे़ये। 25असे़ॽ खोमि हिङ्मवा जोगाबा ले़ःॽमा योॽइन्डुए, मोसे़ॽ मे़चोबेन्डुए। तर असे़ॽ खोमि हिङ्मवा काङ्मि लागि पिन्डुए, मोसे़ॽ मो चुप्मिन्डुए। 26याॽमिडे़ॽ मक्खाम्डेमनोॽ टाङ्बामि टोक्सुहोङ्सो खोमि हिङ्मवा मे़चोबेसुहोङ, खो इमाङ फाइदा लिये ? खोसे़ॽ मे़पेबॽआ हिङ्मवा इमाङेॽटे टेजे़ॽमे। 27इन्ढोङ्होङ याॽमिमि पसा टाङ्बामि पाबामि महिमानुङ टाङ्बामि थाङ्सिरिदुतजिनुङ लेङ्इये। मोडोक्पेॽ खोसे़ॽ चोप याॽमिजि खोजिडे़ॽ ले़ःॽपॽआ योम्बोकडोॽमा इनाम पिन्डुजे। 28चइबानोॽ के़ॽ हे़निङ लुनिम्ने़, इगोबेॽ टुघुबाजिबेॽ इन्डोक याॽमिजिडे़ॽ याॽमिमि पसा खोमि राज्यबेॽ उङ्मे़ॽसिबॽआ मे़ङ्खाङ्डोक्लो सिघे़ॽमिने।”
Kasalukuyang Napili:
मत्ति 16: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
