मत्ति 15
15
रितिथिति ले़ःॽमे टुम्बेॽ सिक्छे
(मरकुस ७:१-१३)
1यरुसलेमबाङ लेम्बॽआ फरिसिजिनुङ यहुदि धारमिक नियम इःॽखुबाजि येसुबेॽ लेन्नुङ सिप्सुजि, 2“हे़ने़हा चोङ्साजिडे़ॽ टुबा लाबाजिबाङ ले़ःॽपॽआ रितिथिति इन्ढोङ ले़टुजिने ? इन्ढोङ खोजिडे़ॽ चामा याक्लो हुक वासोगुजिने ?” 3येसुडे़ॽ माहाजि लुसुजि, “हे़निङे़ॽसो इन्ढोङ टाङ्बामि रितिथिति ले़ःॽमे निहुबेॽ निवाहाङ्मि आग्या पालना चाहिँ ले़टानुम्ने ? 4निवाहाङ्डे़ॽ इडोॽ लुटे़, खेप्सानुमे, ‘टाङ्बामि पाबा, मामामि आदर ले़टानुमे, पाबा मामामि बिरोधबेॽ असे़ॽ मङे़ॽमा खा इःन्डुए मो चाहिँ सेॽनेमानोॽ खे़ये।’ 5तर हे़निङ असे़ॽसो टाङ्बामि पाबा मामाजि लुन्डानुमे, ‘खेप्सानुमे, के़ॽ हे़निङ्मि लागि इमाङ इमाङ ले़ःॽमा खडे़, पिमा खडे़, माहा चोपगो के़ॽ निवाहाङ पिबेटुङे’ लुन्डानुमहोङ, 6खोसे़ॽ चाहिँ टाङ्बामि पाबा मामामि आदर ले़ःॽमा पाप्निबा। इडोॽ हे़निङे़ॽ टाङ्बामि रितिथिति ले़ःॽमाबेॽ निवाहाङ्मि बचन योम्बोक मे़ॽनिङ्मा टोङ्इटानुमे। 7होउ मङे़ॽमा निवा खिघुबाजि! यसैया अगमबक्ताडे़ॽ हे़निङ्मि टुम्बेॽ ठिकैनोॽ लुटुए।
8 ‘इघा जातिजिडे़ॽ का याबुगे़ॽ चाहिँ सारो आदर ले़ङामे,
तर खोजिमि निवा चाहिँ काबाङ बेॽलो ओः टुहा,
9 इघाजिडे़ॽ मे़ॽनोक्सो काङ्मि ओहाङ ले़ःॽखाङ्इन्डुजे,
इन्ढोङ्होङ याॽमिजिडे़ॽ टोङ्बॽआ नियमरेॽ इघाजिडे़ॽ इःन्डुजे #
यसैया २९:१३
।’”
याॽमिजि असुद्ध टोङ्घुबा खा
(मरकुस ७:१४-२३)
10येसुडे़ॽ मोबेॽहा बेॽलो याॽमिजि वोःप्नुङ लुसुजि, “के़हा खा नुरोॽ निवा टिनुङ खेप्सानुमेनुङ लेसानुमे। 11याबुकबाङ होङ्सिॽयु खे़ॽपॽआ थोकडे़ॽ याॽमि असुद्ध टोक्सुनिबा। तर याबुकबाङ पाखे़ॽयु आप्मिहा मङे़हा थोकडे़ॽ चाहिँ याॽमि असुद्ध टोङ्इये।”
12मोबा ए़क्साङ चोङ्साजि लेन्नुङ येसु लुसुजि, “हे़ने़ॽ लुबॽआ खा खेम्नुङ फरिसिजि सुरके़टामे लुनुङ हे़ने़ॽ लेसुए ?” 13तर येसुडे़ॽ लुसु, “थाङ्सिरिबेॽ पेङ्घुबा के़ए़ पाबाडे़ॽ मे़रिॽपॽआ चोप सिङ्बु डाङ साम्नुङ्नोॽ साक्पेमा खे़हा। 14अक्खाजिमि ले़ख्खोनोॽ ए़ले़टानुमे, अक्खाजिगो मिक मे़ए़ॽखुजिमि मिक मे़ए़ॽखुबा डायोङ्बा ले़म्मे। मिक मे़ए़ॽखुबा याॽमिडे़ॽ हाइको मिक मे़ए़ॽखुबा याॽमि कोघे़ॽटुहोङ, मोजि निप्पाङ्नोॽ खदोलोम्बाबेॽ सिॽइन्जे।”
15पत्रुसडे़ॽ येसु लुसु, “इगो खानवाडे़ॽ लुमायोक्पॽआ खा कानिङ इःबेॽमाना।” 16येसुडे़ॽ लुसु, “इमा हे़निङे़ॽ हागोरोसो मे़लेसानुमे ? 17इमा हे़निङे़ॽ लेसानुम्ने ? याॽमिमि याबुकबाङ होङ्सिॽयु खे़ॽपॽआ खागो रुङ्माबेॽ रुॽइन्डुए मोबा ए़क्साङ पाखे़ॽयु खे़ॽपेहा। 18तर याॽमिमि याबुकबाङ पाखे़ॽयु लेङ्इहा खा चाहिँ निवाबाङ आप्मिहा मोसे़ॽ याॽमि असुद्ध टोङ्इये। 19इन्ढोङ्होङ दुस्ट निवा खिमा, याॽमि सेॽमा, बेभिचार ले़ःॽमा, खाल खालहा बेभिचारि पाप ले़ःॽमा, खुजामा, मे़ॽनोक्हा साक्छि पिमानुङ याॽमिजि इःजामा इघा चोप मङे़हा खा याॽमिमि निवाबाङ्नोॽ लेङ्इहा। 20इडोक्हा खाडे़ॽ चाहिँ याॽमिजि असुद्ध टोङ्इये। तर हुक मे़वासोक्लेॽ चामाबेॽ याॽमि असुद्ध लिनिबा।”
कनानि मेॽनामिॽमि बिस्वास
(मरकुस ७:२४-३०)
21येसु मो ठाउँबाङ राम्बुगा, मोबा टुरोसनुङ सिदोनमि ठाउँराजि खडा। 22मो ठाउँबेॽए कनानि जातिमि इक्को मेॽनामिॽ येसुबेॽ लेन्नुङ बेॽए सेम्लाडे़ॽ लुसु, “हे परभु, दाउदमि पसा, का नम्नावा ले़ःॽमाना, के़ए़ सम्समा पसा मङे़ॽमा चाबे़ॽ सारोनोॽ दुःख पिटुए।” 23तर येसुडे़ॽ मो इमाङ्सो मे़लुसु, खोमि चोङ्साजिडे़ॽ खो बिन्ति ले़टुजि, “इगो बिदा पिबेसे, इन्ढोङ्होङ आक्को कासाङ कानिङ टिङ्मे़ॽनिङ्सिये।” 24येसुडे़ॽ लुसु, “कागो मे़खे़ॽपॽआ सामुजिडोॽहा इस्राएलि जातिजिमि लागि पाङ्इटे़।” 25तर मो मेॽनामिॽ येसुमि पोम्बेॽ लेन्नुङ टुम्रुक ठोःक्नुङ लुसु, “हे परभु, का सहायता ले़ःॽमा।” 26येसुडे़ॽ लुसु, “ओङे़कजिमि चामा नाप्नुङ हुःॽवाजि पिमा नुबा लिनिबा।” 27मेॽनामिॽडे़ॽ लुसु, “ऐ परभु, तर हुःॽवाजिडे़ॽसो खोजिमि मायोङ्बाजिडे़ॽ टेबलबाङ सुकखे़ॽपॽआ चामासिॽवा कुःप्चोन्डुजे।” 28मोबा येसुडे़ॽ मेॽनामिॽ लुसु, “होउ नानि, हे़ने़ए़ बिस्वास बेॽए ले़येले़। हे़ने़ॽ लुबॽआडोक्नोॽ हे़न लिरो।” खोमि सम्समा पसा मोडोक्पेॽनोॽ नुबोगा।
येसुडे़ॽ रिउम हजार याॽमिजि हिङ्बॽआ
(मरकुस ७:३१–८:१०)
29येसु मो ठाउँबाङ गालिल टोम्लिॽवामि के़क्बाङ खे़ॽनुङ टोक्टोक्मे़ॽटु साङ्नुङ पेना। 30मोबा बेॽलो बेॽलो याॽमिजि येसुबेॽ सुम्जासामि। माहा याॽमिजिडे़ॽ चिक्चे़ॽपॽआ सोगुबा, मिक मे़ए़खुबा, सोक्लोङ्गे़नुङ कुबाजि मोबा हाइखासो बेॽलो खालहा टुक्खुबाजि येसुमि पोम्बेॽ युङ्बेॽटुजि, मोबा येसुडे़ॽ माहा चोपजि नुबोगुजि। 31इडोॽ कुबाजि यामुबॽआ, सोॽलोङ्गे़जि नुबोक्पॽआ, साप्याजि राम्बॽआनुङ मिक मे़ए़ॽखुबाजिमि मिक ए़ॽपुक्पॽआ खाङ्नुङ याॽमिजि खरि मिनामि। मोबा माहाजिडे़ॽ इस्राएलिजिमि निवाहाङ्मि ओहाङ ले़टुजि।
32मोबा येसुडे़ॽ खोमि चोङ्साजि के़ःॽनुङ लुसुजि, “इघा याॽमिजि खाङ्माबेॽ नम्नम मिॽइनुङ्हाजि। इघाजि कानुङ पेम्बॽआ आयु सुम याक याक्खे़टामे। हागो इघाजिमि चासकसो रुक्खे़टाहा। इघाजि के़ॽ साक्मेन्जा पाङ्मा मिॽटुङ्जिनि इन्ढोङ्होङ इघाजि रामबेॽनोॽ सागे़ॽ टेन्डिॽ खे़म्मे ना।”
33चोङ्साजिडे़ॽ येसु लुसुजि, “इढे़ॽलो याॽमिजि हिङ्मामि लागि चासक इगो सङ्गासुमा ठाउँबेॽ हाम्बाङ कानिङे़ॽ लाजे़ॽमे ?” 34येसुडे़ॽ माहाजि लुसुजि, “हे़निङ्नुङ इन्डोक गोटा चरेपा टुहा ?” माहाजिडे़ॽ लुसुजि, “एच्चि गोटा चरेपानुङ ए़द्रिहा ङा ए़डिॽवारेॽ टुहा।”
35येसुडे़ॽ माहा बेॽलो याॽमिजि भुइबेॽ पेम्मेॽटुजि। 36येसुडे़ॽ माहा एच्चि गोटा चरेपानुङ ङा हुकपेॽ याङ्नुङ निवाहाङ ओहाक पिसु। मोबा चरेपा एॽनुङ खोम चोङ्साजि लुसुजि इघा चरेपानुङ ङा याॽमिजि हाबेॽटानुमे लुनुङ पिसुजि। 37माहा चोप याॽमिजिडे़ॽ उक्खारो चोसेॽनुङ एम्बॽआ चरेपा सुम्माबेॽ एच्चि ओक्खे़ङ इॽठुप टुसा। 38मोबेॽ चाघुबा याॽमिजि पिच्छानुङ मेॽनामिॽचि मे़नेॽलेॽ वडाङ्पसाजिरेॽनोॽ रिउम हजार टुसामे। 39मोबा माहा याॽमिजि बिदा पिसेॽनुङ येसु चाहिँ नाउबाङ मगादानमि छेत्राबेॽ खडा।
Kasalukuyang Napili:
मत्ति 15: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
