YOHANES 2
2
Pinonikaan kon Kana
1Doyowa nosinggai noiduduimai kon tua oyúon in pinonikaan kon kotá in Kana kon Galilea, bo ki iná i Yesus in kon tua doman. 2Ki Yesus bo murí-Nea mita in inoiní doman kon pesta tatua. 3Bo naonda in kinodaitan in anggur, ki iná-Nea in noguman kon i Yesus, “Mosia in kinodaitan in anggur.”
4Ki Yesus in notubag, “Iná, donaaipa mokiaid in onu bo onu kon i-Nakó, sin deemanpa wakutunea Akuoi mopoontong intua.”
5Táe ki iná i Yesus in noguman kon simpaḷ mita kon pinonikaan tatua: “Aidaidon in onu in pokiaid-Nea kon i monimu.”
6Kon tua oyúon in tampayang onom inta sinadia sin pakéon pondaritan podudui in adat in Yahudi. Tampayang tobatú bonunea degá mogatut noliter. 7Dá ki Yesus in noguman kon simpaḷ mita kon tua, “Bonuaidon tubig in tampayang mita tatua.” Dá binonuandon doman mita monia kinopuḻing. 8Onda intua ki Yesus noguman kon i monia, “Tanaa ponayukaika kon topiḻik nongkon tampayang tatua bo dia kon itoi in pesta bo pokinanam.” 9Bo itoi in pesta tatua nonanamdon kon tubig inta ain nobaḻí anggur tatua. (Táe diábí kinotaauannea mongo nongkon onda in anggur tatua, tongábí simpaḷ mita in nonotaau kon soaḷ mita tatua.) Dá itoi in pesta tatua in minayá dinimiug kon nonikaan ḷoḷaki, 10bo noguman: “Biasamai intau in munabí mopoinum in anggur inta mopia totok, bo aka tamu mita mooropdon monginum, bain tua bo poḷuaiondon in anggur inta diá totok mopia. Táe ki utat in umuranbí notagú kon anggur mopia umaai in tanaa mako!”
11Tuata in soaḷ mokoherang inta dungkuḷ totok inta pinomia i Yesus. Tua in pinomia-Nea kon Kana inta kon Galilea. Takin tanda tatua Sia in nopoontongdon in kawasa-Nea. Dá murí-Nea mita in nopirisayadon kon i-Nia.
12 #
Mat. 4:13
Nopaḷut mako kon tua ki Yesus minayá in Kapernaum noyotakin i iná-Nea, i utat-Nea bo in murí-Nea mita. Mosia in nogutunpa kon tua tongonupamai degá nosinggai.
Ki Yesus Sinumuot kon Baḷoi Tuhan
(Mat. 21:12-13; Mrk. 11:15-17; Luk. 19:45-46)
13 #
Iḷn. 12:1-27
Naonda in Singgai Moḷoben Paska in Intau Yahudi nodiugdon, ki Yesus minayá in Yerusalem. 14Kon palas in Baḷoi Tuhan inta kon Yerusalem, oyúon in intau inta mopopotaḷui mita in sapi, domba, bo paḷoma, bo oyúon doman in intau inta mopoponoḻiu in doit in ḻimitú mako kon tua. 15Ki Yesus in nonuḷapid kon tali bo pinomia sambok bodongka noguntun kon bayongan mahaḷuk kon tua, pinomayá domba, sapi pinoḷuai-Nea nongkon Baḷoi Tuhan. Bo meja mita inta tampat poponoḻiuanmai in doit sinoko baḻintuang-Nea, sahingga in doit nongoirangkap. 16Bo Sia in noguman kon intau mita mopopotaḷui in paḷoma, “Tokodiadon komintan nongkon naa. Dikabí baḻíon monimu pasar in Baḷoi Amá-Ku!” 17#Mzm. 69:10 Dá kinotoropandon in murí-Nea mita kon oyúon in pinais kon bonu in Buk Motusi nanaa: “Tabi-Ku kon Baḷoi-Mu, o Allah, tumaga-tagab in kon gina-Ku.”
18Tongá itoi mita in Yahudi moḷawang kon i-Nia, mosia in noguman kon i Yesus, “Onu in motaau poontong-Mu kon inami saḷaku tanda kon oyúon in hak-Mu in mogaid kon ná tanaa.”
19 #
Mat. 26:61, 27:40; Mrk. 14:58, 15:29 Tubag i Yesus, “Rumbundon in Baḷoi Tuhan tanaa, bo tongábí kon daḷom in toḷu nosinggai in poposindogan-Ku bui.”
20Itoi mita in Yahudi tatua in noguman kon i Yesus, “Opat nopuḷú bo onom notaong pinoposindogan in Baḷoi Tuhan tanaa, bo Iko in mongaku kon mokoposindog kon tua tongá kon daḷom in toḷu nosinggai?”
21Táe makusud i Yesus Baḷoi Tuhan tua in awak-Neabí tontaní. 22Dá tuamai naonda in ki Yesus nobiag nongkon kinopatoian-Nea, buidon kinotoropan in murí-Nea mita, kon soaḷ tatua pernadon pinoguman i Yesus. Dá mosia in nopirisayadon kon onu inta pinais kon bonu in Buk Motusi bo bayongan inta siningog i Yesus.
Kinotaauanbí i Yesus in Bayongan Intau
23Kon tungkuḷ in ki Yesus kon Yerusalempa dodai in Singgai Moḷoben Paska, nobayong intau in nopirisaya sin nokoontong kon soaḷ mita inta mokoherang pinomia-Nea. 24Táe diábí pirisayaan i Yesus in mosia, sin kinotaauan-Neabí in gina in bayongan intau. 25Tuamai diá bidon paraḷu mokodongog kon tosingogon in intau ibanea, sin kinotaauan-Nea onu in kon bonu in gina intau.
Kasalukuyang Napili:
YOHANES 2: INOMOG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Alkitab Singog In Mongondow Masa In Tanaa © Indonesian Bible Society, 2016.
