YOHANES 3
3
Ki Yesus bo ki Nikodemus
1Oyúon in tobatú tokoh agama nongkon golongan intau in Parisi, tangoinea in ki Nikodemus. 2Kon doḷom tobatú, sia in namangoi kon i Yesus bo noguman, “Pak Guru, kinotaauan nami kon ki Amá in pinotabábí i Allah. Sin diábí in tobatúmai intau in motaau mogaid kon soaḷ mita inta mokoherang ná inta pinomia i Pak Guru aka ki Allah diá kotaki-takinnea.”
3Tubag i Yesus, “Totuu, kon diábí in tobatúmai in intau motaau in mobaḻí umat i Allah, aka sia in diá polahiron bui.”#3:3: bui: ande nongkon ḻimonik.
4Dá ki Nikodemus in noguman nanaa kon i Yesus, “Diábí doman intau inta noguyangdon bo polahironbí bui! Motaau degá in sia tumuot bui kon sian i inánea bo polahiron bui?”
5Ki Yesus in notubag, “Totuubí in singog-Ku tanaa: aka intau bo diá polahiron nongkon tubig bo nongkon Roho i Allah, yo intau tatua in diábí motaau in mobaḻí umat i Allah. 6Aka awak naa pinolahirbí in guyanga, táe aka secara rohani yo pinolahirbí in Roho i Allah. 7Dika moherang aka Akuoi in moguman kon moiko komintan in musti polahiron bui.#3:7: bui: ande nongkon ḻimonik. 8Tompot mogirup kon onda in koibognea; kodongogan naton in singognea, táe diábí kotaauan naton mongo nongkon onda in kinoangoiannea bo kon onda in bayáannea. Natua doman in intau inta pinolahir nongkon Roho i Allah.”
9Ki Nikodemus in noḻibó bui, “Dá naondabí in kobobaḻí intua?”
10Tubag i Yesus, “Iko nion guru kon Israel, umpaka yo diá kotaauanmu in soaḷ tatua? 11Pirisayadon: Kami in mosingog kon onu inta kinotaauan nami, bo tongábí doman onu inta ain inontong nami tua in potaau nami; táe moiko in doí motarima kon onu in pinotaau nami. 12Moiko in diá mopirisaya aka Akuoi mongonguman kon inimu in soaḷ mita nongkon dunia, dá naondabí in moiko mopirisaya aka Akuoi in mongonguman kon i monimu kon soaḷ mita inta nongkon soroga? 13Diábí in tobatúmai intau inta nokoimontandon namonik in soroga, koḻikudbí in Sia inta ain noponag kon dunia naa, Sia tuata in ki Adí Intau.
14 #
Pin. 21:9
Bo ná doman ki Musa inta nopoponik in uḷag tambaga kon pangkoi in kayu kon padang gurun, dá natua doman in ki Adí Intau musti poḷantudon, 15sinbá bayongan in intau inta mopirisaya kon i-Nia mokouḻí kon kobiagan mononoi.
16Popisí in ná domai tua in tabi i Allah kon intau kon dunia naa, dá inogoi-Neadon in ki Adí-Nea tuḷong, sinbá bayongan in intau inta mopirisaya kon i-Nia diá in moyoyang, táe mokouḻí kon kobiagan mononoi.” 17Sin ki Allah in nopotabá kon i Adí-Nea namangoi in dunia naa deemanbí mamangoi mohakim kon intau kon dunia naa, táe mamangoibí moposaḷamat kon i monia. 18Intau inta mopirisaya kon i-Nia in diábí hukumon. Táe intau inta diá mopirisaya in hukumondon i Allah, sin diá mopirisaya kon i Adí-Nea inta tuḷong. 19Naa in mobaḻí dodoyonan ponuntutan kon inia: Bayag ain namangoi in dunia naa, táe sindipbí in koibo-ibog in intau, sin moraat in oaid monia. 20Sin intau inta momia kon moraat, moyaat in ginanea kon bayag, sin dikabo koontongan in oaidnea inta moraat tua. 21Táe intau inta nomia kon onu inta kinoibog i Allah, namangoi kon bayag tatua sinbá koontongandon kon onu inta pinomianea tatua in noiduduibí kon inta kinoibog i Allah.
Ki Yesus bo ki Yohanes Mobobaptis
22Nopaḷut mako kon tua ki Yesus bo murí-Nea mita minayá in Yudea. Bo ki Yesus in nogutunpa kon tua noyotakin monia tongonumai nosinggai bo nobaptis. 23-24#Mat. 14:3; Mrk. 6:17; Luk. 3:19-20 Dodai intua ki Yohanes in diápa pinobonu monia kon ponjara dá sia in umuranpa doman nobaptis kon Ainon, ḻipu inta diá noyayú nongkon Salim, sin nobayong in tubig kon tua. Intau mita namangoi kon inia, bo binaptisnea i mosia.
25Tongá tongonumai in murí i Yohanes nomangkoidon mobobayowan takin intau mita in Yahudi#3:25: intau in Yahudi: kon tongonumai in naska dungkuḷmai in pinais intau in Yahudi tobatú. soaḷ atorang pondaritan. 26Mosia minayá kon i Yohanes bo noguman, “Pak guru, kinotoropanpa degá i Pak guru in intau inta noyotakin i Pak guru kon ḷoḷanmai in Ongkag in Yordan tua, inta sinundú i Pak guru wakutu intua? Sia nobaptis doman in tanaa mako bo komintan intau mayá kon i-Nia!”
27Ki Yohanes in notubag, “Diábí in tobatúmai intau in mokouḻí kon onu bo onu sin pakéonnea tontaní, aka deeman ki Allah in nobogoi kon inia. 28#Yoh. 1:20 Dinongog bidon monimu tontaní in singogku, ‘Kon akuoi naa in deemanbí Datu Mopoposaḷamat. Akuoi in tongábí pinotabá umuna kon i-Nia.’ 29Nonikaan bobay tatua in kapunyaanbí in nonikaan ḷoḷaki. Yobayat in nonikaan ḷoḷaki tatua tongábí simindog moyotakinnea bo mokidongog, bo mopia in ginanea aka mokodongog kon singog in nonikaan ḷoḷaki. Natuabí doman in akuoi. Mopiadon totok in ginaku in tanaa. 30Kawasa-Nea in mustidon kodugang-kodugang bo akuoi in kointok-kointokdon.”
Sia Inta namangoi nongkon Soroga
31Inta namangoi nongkon soroga noiḻiubí nongkon bayongan yagi-yagi. Inta namangoi nongkon dunia noibonubí kon dunia naa bo nongonguman doman kon soaḷ in dunia mita naa. Ki ine inta nongkon omonik Sia in noiḻiubí nongkon bayongan yagi-yagi. 32Sia in nongonguman kon soaḷ inta inontong bo dinongog-Neadon, táe diá tobatúmai in intau in mopirisaya kon onu in inouman-Nea. 33Sin intau inta mopirisaya kon onu inta inouman-Nea tatua, akúonneabí kon ki Allah tua in mobanar. 34Sin ki ine in pinotabá i Allah, dá siabí tua in mopoyaput in pirman i Allah, sin sia in kinawasa bidon in Roho i Allah. 35#Mat. 11:27; Luk. 10:22 Ki Amá motabi kon i Adí-Nea, bo pinosarakan-Neadon bayongan in kawasa-Nea kon i-Nia. 36Intau inta mopirisaya kon Adí tatua, mokouḻíbí kon kobiagan mopia bo mononoi, táe intau inta diá motoindudui kon Adí tatua, diábí doman mokouḻí kon kobiagan. Sia in umuran hukumon i Allah.
Kasalukuyang Napili:
YOHANES 3: INOMOG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Alkitab Singog In Mongondow Masa In Tanaa © Indonesian Bible Society, 2016.
