Máfìù 9
9
Zízɛ̀ là gɔ̃ lɛ́ à lɛ̀ dò gaà e kɛá à mɔ̀ɔ lapìà
(Máà 2.1-12; Lúù 5.17-26)
1Zízɛ̀ e yà gɔ́ɔ́ɔ yí zeĩ́, e yíía kã́, e ló e dìè pà gbaa. 2Mia dò o nu mi lɛ́ à lɛ̀ dò gaà e kɛá à mɔ̀, lɛ́ e kɛ wɔ̀ɔ̀á e wɔ̀ɔ̀à‐là‐pɛ̀ làa ká Zízɛ̀ píé. Lɛ̀ Zízɛ̀ e zi lɛ́ o o zò dɔá à mɔ̀ɔ gɛ̃̀ɛ, a gèe gɔ̃ lɛ́ à lɛ̀ dò gaà e kɛá à mɔ̀ɔ lɛ̀ɛ, “M gbe, yékɛ̀ i zò é dà zízàá. I zì kɛ‐wɔ̃̀ yɔɔ aà ɓo i wũ mɔ̀.”
3Lɛ̀ e kɛ kília, Wálà kii‐dɔ‐mìàa dò wa gèe o dìè zò píé kélɛ̀, “Gɔ̃́ e kéa lɛ Wálà tɔ́ sìèpìà.”
4Zízɛ̀ e wɔ̃́ lɛ́ o kɛ o yɛ́lɛ́ táápìà à yía dɔ, áà gèè o lɛ̀ɛ, “Mɛ́ e kɛ lɛ́ kà ka zò tàà e yɔɔ ká ké? 5Yé maà gèe, ‘I zì kɛ‐wɔ̃̀ yɔɔ aà ɓo i wũ mɔ̀,’ ɛ̃́ɛ̃́ maà gèe, ‘Wɛ̀lɛ̀ í tááa,’ à ye kpɛɛ̀ zɛ̀ lɛ́ lɛ lɔ́ɔ́‐lɔ̀ɔ̀ kɛ ḿ gèe? 6Ḿm̀ lo à zɔ̃̀ɔ̃̀ ka lɛ̀ɛ kélɛ̀ yíkɛ̀ gáàa lɛ Mi Gbe kɛ̀lɛ̀ kpóṹ là zèe, kɛ é kɛ‐wɔ̃̀ yɔɔ ɓo mi ɓéèe wũ mɔ̀.” Yé e kɛ kília, a gèe gɔ̃ lɛ́ à lɛ̀ dò gaà e kɛá à mɔ̀ɔ lɛ̀ɛ, “Wɛ̀lɛ̀ í ɓà wɔ̀ɔ̀à‐là‐pɛ̀ɛ sí, í ló à ká i píé kɛ́ì.”
7Lɛ̀ e kɛ kília, gɔ̃́ɔ e wɛ̀lɛ̀, e ló e píé kɛ́ì. 8Lɛ̀ míáa o à gɛ̃̀ɛ, o kɛ túópìà wɔ̃̀ lɛ́ à kɛɛ̀ e kɛáa wɛ̃́ĩ̀. O Wálà tɔ́ kɛ gbùò zi lɛ́ aà yíkɛ̀ gáàa sùua nɔá mia lɛ̀ɛ mɔ́ɔ̀ wɔ̃̀ mɔ̀.
Zízɛ̀ là Máfìù súo kɛpìà
(Máà 2.13-17; Lúù 5.27-32)
9Zízɛ̀ e gó gbaa yí, áà lò e líé. E gɔ̃ lɛ́ ò si Máfìùa, gɛ̃̀ yàá e zì yɛɓo‐kɛ‐kàa wì. E kɛ ɓo‐pɛ̀ ɓo‐mì ká. Zízɛ̀ a gèe à lɛ̀ɛ, “Ì tó m píé.”
Máfìù e wɛ̀lɛ̀, áà tò à píé.
10Lɛ̀ Zízɛ̀ e kɛ e lé ɓèlèpìà kɛ́ìa, ɓo‐pɛ̀ ɓo‐mìà wà kɛ‐wɔ̃̀ yɔɔ kɛ‐mìà búnùzɛ̀ o nu, o dà Zízɛ̀ wà là tòà‐píé‐mìà o bà. 11Fálásíì‐mìà dò o wɔ̃́ nì e kéa gɛ̃̀, wáà gèè Zízɛ̀ là tòà‐píé‐mìà lɛ̀ɛ, “Mɛ́ e kɛ lɛ́ kà pɛ‐zɔ̃̀ɔ̃̀‐mì wà ɓo‐pɛ̀ ɓo‐mìà, ɛ̃́ɛ̃́ kɛ‐wɔ̃̀ yɔɔ kɛ‐mìà ò pɛ ɓèlè lɛ̀ doó mɔ̀ ɓɛ?”
12Lɛ̀ Zízɛ̀ e o wéè maa, a gèe o lɛ̀ɛ, “Mia lɛ́ o kéléŋ‐kèlèŋa, òó naa nyìɛ̀‐kɛ‐mì ká. Kɛɛ mia kɔ̃́ṹ‐kɔ̃̀ũ̀ lɛ́ ò nàà à káa. 13Kà lo ká Wálà‐kii lɛ̀ à yé e kéa yí naa. Ye lɛ́ e kélɛ̀, ‘M̀ḿ naa sálà lɛ́ ò ɓo pɛ ɓéèe káa ká. Kɛɛ pɛ́ m̀ nàáa, lɛ́ e mi yéĩ̀ kṹũ̀ káa.’ M̀ḿ gbaa nu mia lɛ́ o kpeĩa súo kɛɛ̀. Kɛɛ m nu kɛ‐wɔ̃̀ yɔɔ kɛ‐mìà súo kɛɛ̀.”
O wɛ̃́ĩ́‐lɔ̀ɔ kɛ lò sṹũ yí mɔ́ɔ̀ wɔ̃̀ mɔ̀
(Máà 2.18-22; Lúù 5.33-39)
14Lɛ̀ e kɛ kília, Zɔ̃̀ɔ̃́ là tòà‐píé‐mìàa o nu Zízɛ̀ píé, wáà gèè kélɛ̀, “Mɛ́ e kɛ lɛ́ kò Fálásíì‐mìà nì kò lo ko sṹũ yí teele, lɛ́ i zì tòà‐píé‐mìàa òó ló doó fèle ɓo o sṹũ yí ɓɛ?”
15Zízɛ̀ a gèe o lɛ̀ɛ, “Yé lee‐sí‐gɔ̃̀ aà kɛ lɔ̀ɔ̀‐mìà vɔ̀ píé lee‐sí‐kpìlì làa, óò bɛ̀i à mɔ̀ ó yà yéĩ̀zɛ̀? Kɛɛ lúó dò lɛ́ɛ̀ lo kɛɛ̀ɛ, óò lo lee‐sí‐gɔ̃̀ɔ ɓoò o píé. Yé aà kɛ kília, kɛɛ aà ɓɔ o lò o sṹũ yí lùò mɔ̀.
16“Mi gbɛɛ lɛ̀ɛ́ sɔ dɛɛ pɛ̃́ɛ̃́ sí, kɛ é sɔ zii bũ taa à ká. Ƃii sɔ́ ò sɔ bũ tàá kília, lɛ́ɛ̀ lo pɛ́ɛ̀ sɔ ziia mɔ̀. Tó à bũ là e kpɔ́ gbaa. 17Ɛ́ɛ̃́ zeĩ́, mi lɛ̀ɛ́ yɔ́ lɛ tĩã́ tɛ́lɛ́pìàa, gbɛ̃̀ wìì‐kii‐kpòò zii yí. Ƃá kɛ̀á kília, kpòò e kília lɛ́ɛ̀ lo pɛ́ɛ̀, tó yɔ́ɔ e káá. Tó wìì‐kiia e sìè. Kɛɛ óò yɔ dɛɛ gbɛ̃̀ wìì‐kii‐kpòò dɛɛ yí. Yé aà kɛ kília, o pèèlɛɛ óò lo wéè o kíe nì wéè mɔ̀.”
Mia wũ‐là‐mì lú wà lee lɛ́ e pá Zízɛ̀ mɔ̀‐sɔ̀ mɔ̀ɔ
(Máà 5.21-43; Lúù 8.40-56)
18Lɛ̀ Zízɛ̀ e kɛ tĩã́ wɔ̃́ e kéa gèepìà o lɛ̀ɛ, mia wũ‐là‐mì dò e nu, e káá e kpuò là à wɛlɛ mɔ̀, áà gèè, “M lú e ga nɔ́ dɛɛ ká. Kɛɛ ì nu, í i kɔ̀ kpɔ́ à là. Ƃá kɛ̀á kília, lɛ́ɛ̀ lo kɛɛ̀ ɓe.”
19Kɛɛ Zízɛ̀ e wɛ̀lɛ̀, wà là tòà‐píé‐mìà wáà tò à píé.
20Lɛ̀ e kɛ kília, lee lɛ́ léà‐yàà aà kɛ kɛ̀ɛ̀ vũ̀ doó wɛ́lɛ́ pèèlɛ píéa, e nu Zízɛ̀ mɛ̀ĩ́, e pá Zízɛ̀ mɔ̀‐sɔ̀ léĩ́ mɔ̀. 21Lééa a gèe e dìè píé kélɛ̀, “Zi é kɛ̀á ɓe ḿ pá ɓɔ̀ɔ ɓo à mɔ̀‐sɔ̀ mɔ̀ɔ, ḿm̀ lo laà.”
22Zízɛ̀ e nìɛ̀. E lééa gɛ̃̀, áà gèè, “M lú, yékɛ̀ i zò é dà zízàá. I zì zò‐dɔ̀à‐mɔ̀ aà i la.” Nɔ́ zá lea, lééa laà e kɛá gbaa.
23Lɛ̀ e kɛ kília, Zízɛ̀ e ló mia wũ‐là‐mìa píé kɛ́ì. Lɛ̀ lɛ́ e ɓɔ yí, lɛ́ e wéé‐pɛ̀ kɛ‐mìà wà mia yé o kɛ wéépìàa gɛ̃̀ ga gbũ e kília yía, 24a gèe, “Kà ɓɔ pɛlɛí. Lee‐nɛ̀fúa gaà wá. Yi lɛ́ lɛ à bàa.”
Míáa wáà yéí sì Zízɛ̀ mɔ̀. 25Lɛ̀ lɛ́ o mia séĩ́ gbɛ̃̀ pɛlɛía, Zízɛ̀ e wàà nɛ́fúa píé kɛ́ì, a kṹ e kɔ̀ mɔ̀. Lee‐nɛ̀fúa e wɛ̀lɛ̀ gbaa. 26Wɔ̃́ e kéa làṹ e wɛ̃̀ĩ sɛ́lɛ́ɛ yí lɛ̀ séĩ́ mɔ̀.
Zízɛ̀ e gɔ̃à nyìɛ káàa zɛ̀ pèèlɛ la
27Zízɛ̀ e gó gbaa yí, áà lò e líé. Gɔ̃à nyìɛ káàa zɛ̀ pèèlɛ o gbɛ̃̀ wáà tò à píé, wáà gbɛ̀ɛ̀ weeá kélɛ̀, “Dèɓé Gbe, ì ko yéĩ̀ kṹ.”
28Lɛ̀ lɛ́ Zízɛ̀ e wàà kɛ́ìa, gɔ̃à nyìɛ káàa zɛ̀ pèèlɛɛ o wàà à píé. Zízɛ̀ a gèe o lɛ̀ɛ, “Káà à gɛ̃̀ wánà ká kélɛ̀ ḿm̀ bɛ̀i à mɔ̀ ḿ wɔ̃́ sùua kɛ?”
Wa gèe, “M̀m̀, ko dàa‐mì.”
29Lɛ̀ e kɛ kília, Zízɛ̀ e pá o nyìɛ mɔ̀, áà gèè, “Wɔ̃́ lɛ́ à mɔ́ɔ̀ zò‐dɔ̀à‐mɔ̀ lɛ ka yía, è kɛ ka lɛ̀ɛ.” 30Lɛ̀ e kɛ kília, o nyìɛ e fóló gbaa. Zízɛ̀ e lìè‐wè dɔ o lɛ̀ɛ mɛ́ gágà zɛ̀ weeá kélɛ̀, “Yékɛ̀ ká wɔ̃́ e kéa gèe mi nɔ̀ɔ fé lɛ̀ɛ.”
31Kɛɛ o ló, o gbɛ̃̀ gbaa, wáà Zízɛ̀ wɔ̃̀ gèè sɛ́lɛ́ e kília yí lɛ̀ séĩ́ mɔ̀.
Zízɛ̀ e gɔ̃ lɛ́ lɛ̀ɛ́ bɛ̀i wéèa la
32Lɛ̀ gɔ̃àa o kɛ lópìàa, mia dò o nu gɔ̃ dò ká Zízɛ̀ píé. Bɛ̀i lɛ̀ɛ́ gbaa kɛ à mɔ̀ kɛ é wéé, ɓii pɛ yɔɔ e kɛ à píé. 33Lɛ̀ lɛ́ pɛ yɔɔ ɓoò e kɛá gɔ̃́ɛɛ píéa, gɔ̃́ɔ e gbɛ̃̀ gbaa, áà wèè. Mia kù lɛ́ o kɛ yía, o lé e pa gbaa, wáà gèè, “Kòó wɔ̃́ sùu e kéa gɛ̃̀ do Éézɛ̀lɛ̀ zèe.”
34Kɛɛ Fálásíì‐mìàa wa gèe kélɛ̀, “Pɛ yɔɔ vɔ̀ zì dɔ‐mì lɛ́ è yíkɛ̀ gáàa nɔ à lɛ̀ɛ, lɛ́ è pɛ yɔɔ ɓoá mia píéa.”
Mia yéĩ́ e Zízɛ̀ kɛ
35Zízɛ̀ e ló píé sɛ́lɛ́ɛ yí, áà lò ɓɔ̀á sí pɛ́lɛ kélé kélé wà à gbùò gbùò nì yí píé, áà pɛ zɔ̃̀ɔ̃̀ Zúù‐mìà zì Wálà‐kà wì píé. E wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì tò‐mia‐là wɔ̃̀ mɔ̀ɔ gèe lòũ̀ ká, ɛ̃́ɛ̃́ e mia lɛ́ yáá doò do wà mɛ́‐kpɔ̀nɔ gbɛɛ̀ gbɛɛ e kɛ o kɛpìàa la. 36Lɛ̀ e mia kù gbùò zɛ̀ɛ gɛ̃̀ɛ, o yéĩ́ e à kɛ, ɓii o lè dũũ̀ e kɛá, ɛ̃́ɛ̃́ o kɛ zò‐dà‐zízàá zɛ̀ɛ mɔ́ɔ̀ wɔ̃̀ mɔ̀. Míáa o kɛ lɛ̀ ɓáá lɛ́ nyìɛ‐kɛ̀à‐mɔ̀ mì wá ɓea lɛ́ ɓe. 37Lɛ̀ e kɛ kília, Zízɛ̀ a gèe là tòà‐píé‐mìà lɛ̀ɛ kélɛ̀, “Ƃu gaàa lɛ gbùò, kɛɛ à kã́‐mìà wá kpã́‐kpã̀. 38Kà sɛ̀nɛ ɓo mɔṹ ɓúa dàa‐mì lɛ̀ɛ, kɛ é ɓu kã́‐mìà vɔ, kɛ ó là ɓúa kã́.”
Kasalukuyang Napili:
Máfìù 9: MNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Mann New Testament © Bible Society in Liberia, 1978.
