Máfìù 8
8
Zízɛ̀ là gbéè‐mì lapìà
(Máà 1.40-45; Lúù 5.12-16)
1Zízɛ̀ e gó gbaa tɔ̃̀ũ̀ wĩĩ́. Mia kù gbùò zɛ̀ o tó à píé. 2Lɛ̀ e kɛ kília, mi lɛ́ gbéè e kɛ à mɔ̀ɔ, e nu à wɛlɛ mɔ̀. E káá e kpuò là, áà gèè à lɛ̀ɛ, “M dàa‐mì, é kɛ̀á ɓáà nàà í m la, kɛ ḿ dà m ɓɛ́ĩ̀ bàã gbaa, íì bɛ̀i à mɔ̀ ɓá kɛ kíli.”
3Zízɛ̀ e e kɔ̀ fóló, a pá à mɔ̀, áà gèè à lɛ̀ɛ, “Ḿm̀ nàà ḿ kɛ kíli. I laà lɛ gbaa.” Yé e kɛ nɔ́ kília, gbéèa e gó gbaa gɔ̃́ɛɛ mɔ̀. Bɛ̀i e kɛ gbaa à mɔ̀ é dà e ɓɛ́ĩ̀ bà. 4Lɛ̀ e kɛ kília, Zízɛ̀ a gèe à lɛ̀ɛ, “Ì i tóó dɔ m mɔ̀. Yékɛ̀ ɓá wɔ̃̀ dɔ̀ɔ̀ dɔ mi nɔ́ɔ fé lɛ̀ɛ. Kɛɛ lo í i dìè zɔ̃̀ɔ̃̀ sálà‐ɓò‐Wálà‐mɔ̀‐mìa lɛ̀ɛ. Ɛ́ɛ̃́ sálà‐ɓo‐pɛ̀ lɛ́ Móózè a zɔ̃̀ɔ̃̀ɔ, kóná ɓo Wálà mɔ̀, kɛ é kɛ lá ɓa ɓoa kélá ká mia lɛ̀ɛ.”
Zízɛ̀ e sóyà doó là yɛɓo‐kɛ‐mì la
(Lúù 7.1-10)
5Lɛ̀ Zízɛ̀ e ɓɔ Kàpɛ́nìɛ̀a, sóyà vɔ̀ líé‐sí‐mì doó e ɓɔ à là, áà kpé kã̀ Zízɛ̀ lɛ̀ɛ 6kélɛ̀, “M dàa‐mì, m̀ yɛɓo‐kɛ‐mì lɛ́ e m píé kɛ́ìa, à wɔɔ̀ lɛ tã́ã̀, e dɔ‐pɛ gà e mɔ̀ zɛ̀ ká. Lɛ wàa ɓèlèpìà nyɔ́ɔ̀ɔ kpó‐kpó ɓo.”
7Zízɛ̀ a gèe à lɛ̀ɛ, “Ḿm̀ lo nuù kɛɛ ḿ à la.”
8Kɛɛ sóyà vɔ̀ líé‐sí‐mìa a là nìɛ̀ weeá kélɛ̀, “M dàa‐mì, ma wá bɛ̃̀ɛ̃ kpeĩ kɛ í nu m píé kɛ́ì. Ì wéé ɓɔ̀ɔ yee ɓo. Ƃá kɛ̀á kília, m̀ yɛɓo‐kɛ‐mìa lɛ́ɛ̀ lo laà. 9Má m kéa, m gɔ̃ lɛ́ lɛ mia gbɛɛ zì yíkɛ̀ gáàa wìa ká. Ɛ́ɛ̃́ sóyà vɔ̀ o ma bɛ̃̀ɛ̃ m wì nɔ́ kíli. Maà gèe mí e kéa lɛ̀ɛ, loa, lɛ́ɛ̀ lo. Ḿ gèèá mi doó‐mì lɛ̀ɛ, nua, tó e nu. Ɛ́ɛ̃́ ḿm̀ gèe m̀ lùò lɛ̀ɛ, à kɛ ké, tó áà kɛ̀.”
10Zízɛ̀ lé paà e kɛá lɛ̀ e wɔ̃́ sùua maa ká. Lɛ̀ e kɛ kília, a gèe mia lɛ́ ò to à píéa lɛ̀ɛ, “Wánà‐wɔ̃̀ lɛ́ m̀ gèe ka lɛ̀ɛ ɓɛ. M̀ḿ zò‐dɔ̀à‐mɔ̀ sùua gɛ̃̀ do. É kɛ bɛ̃̀ɛ̃ Éézɛ̀lɛ̀‐mìà fĩ̀ã̀ káa, m̀ḿ à gɛ̃̀ do yí. 11Ḿm̀ gèe ka lɛ̀ɛ, mia búnùzɛ̀ óò lo góò nyɛ́nɛ́ wɛ̀lɛ̀pìà ɛ̃́ɛ̃́ nyɛ́nɛ́ dàpìà, tó wà Éɓɔ́lɔ́hã́ã̀, Áázè, e bɛ̀i Zékɔ̀ nì o pɛ ɓèlè e kíe bà lɛ̀ lɛ́ Wálà lɛ́ e lɛ̀ía tóò lɛ mia là yia mɔ̀. 12Kɛɛ mia lɛ́ lɛ o mɔ̀ ó kɛ lɛ̀ lɛ́ Wálà tóò lɛ mia là yia mɔ̀ɔ, óò lo o ɓoò lɛ̀ e kília mɔ̀, tó o o dùò bĩ́ bà. Óò lo gbóó ɓoò, wáà o sɔ̃́ɔ̃́ là ɓèlè lɛ̀ e kília mɔ̀.” 13Zízɛ̀ a gèe sóyà vɔ̀ líé‐sí‐mìa lɛ̀ɛ, “Ì ɓà ló ɓo. Wɔ̃́ lɛ́ zò‐dɔ̀à‐mɔ̀ lɛ i yí à mɔ́ɔ̀ wɔ̃̀ mɔ̀ɔ, lɛ́ɛ̀ lo kɛɛ̀ i lɛ̀ɛ.”
Lɛ̀ e kɛ kília, gɔ̃́ɛɛ là yɛɓo‐kɛ‐mìa laà e kɛá lúó kpó‐kpó e kília ká.
Zízɛ̀ là mia búnùzɛ̀ lapìà
(Máà 1.29-34; Lúù 4.38-41)
14Zízɛ̀ e ló Pílɛ̀ píé kɛ́ì. Lɛ̀ e ɓɔ yía, e Pílɛ̀ na lòóò gɛ̃̀ wɔ̀ɔ̀á tã́ã̀. À kpóló kṹũ̀ e kɛá à mɔ̀. 15Zízɛ̀ e pá à kɔ̀ mɔ̀. Yé e kɛ nɔ́ kília, lééa e kɛ kéléŋ‐kèlèŋ. E wɛ̀lɛ̀ gbaa, áà Zízɛ̀ là léɓèlè wɔ̃̀ wũ kɛ̀ à mɔ̀.
16Lɛ̀ nyɛ́ŋɛ̀ĩpíé e kɛɛ, mia o nu mia búnùzɛ̀ lɛ́ pɛ yɔɔ e kɛ o píéa ká Zízɛ̀ píé. Zízɛ̀ e pɛ yɔɔ vɔ̀ɔ ɓo o píé e lé‐wè ɓɔ̀ɔ ká. E mia séĩ́ lɛ́ o kɛ kɔ̃́ṹ‐kɔ̃̀ũ̀a la. 17E à kɛ kíli, kɛɛ wɔ̃́ lɛ́ dɔ̀‐Wálà‐lé‐là‐mì Ààzáyà a gèea é kɛ wánà zɛ̀. Wɔ̃́ a gèea lɛ́ e kélɛ̀, “À dìè‐tĩ́ e ko zì mɛ́‐kpɔ̀nɔ nì sí, a kpɔ́ ko kɛ‐yàà mɔ̀, e ló o ká.”
Mia lɛ́ wa gèe óò nàà ó tó Zízɛ̀ píéa
(Lúù 9.57-62)
18Lɛ̀ lɛ́ Zízɛ̀ e mia kù gbùò zɛ̀ lɛ́ o kɛ à sɔ́nɔ́ píéa gɛ̃̀ɛ, a gèe là tòà‐píé‐mìàa lɛ̀ɛ, “Kɔ̀à lo yíía mɛ̀ĩ́.” 19Wálà kii‐dɔ‐mì doó e nu à píé, áà gèè à lɛ̀ɛ, “Tísɛ̀, ḿm̀ lo tóò i píé lɛ̀ nɔ́ɔ fé ì lo lóò yia mɔ̀.”
20Zízɛ̀ a gèe à lɛ̀ɛ, “Wɛ̃̀ɛ̃́ bũ lɛ ɓe. Ɛ́ɛ̃́ mɔ̀ɔ̀ bɛ̃̀ɛ̃ kéĩ́ lɛ ɓe. Kɛɛ Mi Gbe yee, lɛ̀ gbɛɛ wá ɓe à lɛ̀ɛ, kɛ é wɔɔ yí.”
21Lɛ̀ e kɛ kília, là tòà‐píé‐mìàa doó‐mì a gèe à lɛ̀ɛ, “M dàa‐mì, ì à tó ḿ ló ḿ m dàa bĩ̀ĩ̀ nɛ́.”
22Zízɛ̀ a là nìɛ̀ weeá kélɛ̀, “Ì tó m píé. Ɛ́ɛ̃́ ì à tó mia lɛ́ o gaà lɛɛ, ó o zì mi gaàa bĩ̀ĩ̀.”
Zízɛ̀ e fã̀ã̀ wà yíí o tèá
(Máà 4.35-41; Lúù 8.22-25)
23Zízɛ̀ e yà gɔ́ɔ́ɔ yí, wà là tòà‐píé‐mìàa o ló gbaa. 24Nɔ́ zá lea, fã̀ã̀ mɛ́ gágà zɛ̀ e gbɛ̃̀, áà dìè yíía là. Lɛ̀ e kɛ kɛpìà kília, yíí e gbɛ̃̀ gbaa áà kàà gɔ́ɔ́ɔ yí. Kɛɛ Zízɛ̀ e kɛ yi bà. 25Tòà‐píé‐mìàa o ló Zízɛ̀ píé, wáà à vùò weeá kélɛ̀, “Ko Dàa‐mì, ko la. Ko gapìà.”
26Zízɛ̀ a gèe o lɛ̀ɛ, “Mɛ́ e kɛ lɛ́ kà tùò ké ɓe? Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo.” Zízɛ̀ e wɛ̀lɛ̀ gbaa, e mɛ́ĩ́ ɓo fã̀ã̀ wà yíía o lɛ̀ɛ. Ɛ́ɛ̃́ yíía e dɔ tã́ã̀ gbaa dĩĩ le.
27Lɛ̀ e kɛ kília, gɔ̃àa lé e pa gbaa, wáà gèè, “Gɔ̃ sùu kpɛɛ̀ lɛ́ e ké, lɛ́ fã̀ã̀ wà yíí bɛ̃̀ɛ̃ ò à wè kɛ̀ ɓɛ?”
Zízɛ̀ e gɔ̃à lɛ́ pɛ yɔɔ e kɛ o píéa la
(Máà 5.1-20; Lúù 8.26-39)
28Zízɛ̀ e yíía kã́, e nu gbaa Gádàlĩ́ĩ̀‐mìà pà. Mia pèèlɛ lɛ́ pɛ yɔɔ e kɛ o píéa, wà Zízɛ̀ nì o o kíe gɛ̃̀. O kɛ gópìà ɓɔ́à kɔ́ɛ́í. O kɛ nyaapìà kpó‐kpó ɓo, tó wáà kɛ̀, tó mia òó die zí e kília píé. 29Nɔ́ zá lea, o gbɛ́ɛ́ weeá kélɛ̀, “Ƃí i Wálà Gbe ká ɓɛ. Mɛ́ ɓà nàà ko píé? Ƃaà nu zèe kɛɛ í ko sã̀ dɔ kɛɛ lúó é tĩã́ ɓɔɔ̀?”
30Ƃɔ̀ vɔ̀ kù gbùò zɛ̀ o kɛ o lé ɓèlèpìà lɛ̀ e kília ká ɓéĩ́ ɓo gbèĩ. 31Pɛ yɔɔ vɔ̀ɔ o kpé kã́ Zízɛ̀ lɛ̀ɛ wáà gèè kélɛ̀, “É kɛ̀á íì lo ko ɓoò míáa píéa, ì ko vɔ ɓɔ̀ vɔ̀ o dĩ̀ĩa píé, kó dà o bà.”
32Zízɛ̀ a gèe o lɛ̀ɛ, “Kà lo.” Lɛ̀ e kɛ kília, o gó gbaa míáa píé, o ló gbaa, o dà ɓɔ̀ vɔ̀ɔ bà. Ƃɔ̀ vɔ̀ɔ séĩ́ o gbĩ̀ĩ bàlà ká goo gbèkènia là, wáà dùò yíía bà, ɛ̃́ɛ̃́ o tó gbaa yíía bà.
33Gɔ̃à lɛ́ o kɛ o nyìɛ kɛpìà ɓɔ̀ vɔ̀ o kília mɔ̀ɔ, o wàà, o ló pɛlɛí. O wɔ̃́ séĩ́ lɛ́ à kɛɛ̀ e kɛá, ɛ̃́ɛ̃́ wɔ̃́ lɛ́ e kɛ gɔ̃à lɛ́ pɛ yɔɔ vɔ̀ e kɛ o píéa káa, gèe mia lɛ̀ɛ. 34Lɛ̀ e kɛ kília, mia séĩ́ lɛ́ o kɛ pɛ́lɛ e kília yía, o ló dɔɔ̀ Zízɛ̀ gɛ̀nɛ̀. Lɛ̀ o ɓɔ à mɔ̀ɔ, o séĩ́ o kpé kã́ à lɛ̀ɛ é gó o pàa mɔ̀.
Kasalukuyang Napili:
Máfìù 8: MNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Mann New Testament © Bible Society in Liberia, 1978.
