Máfìù 10
10
Àpɔ́sɔ̀lɔ̀ vɔ̀ vũ̀ doó wɛ́lɛ́ pèèlɛɛ
(Máà 3.13-19; Lúù 6.12-16)
1Zízɛ̀ e là tòà‐píé‐mìà vũ̀ doó wɛ́lɛ́ pèèlɛ súo kɛ o kíe là. E yíkɛ̀ gáàa nɔ o lɛ̀ɛ kɛ ó pɛ yɔɔ ɓoá mia píé, ɛ̃́ɛ̃́ kɛ ó yáá doò do wà mɛ́‐kpɔ̀nɔ gbɛɛ̀ gbɛɛ ɓoá mia mɔ̀. 2Àpɔ́sɔ̀lɔ̀ vɔ̀ vũ̀ doó wɛ́lɛ́ pèèlɛɛ, tɔ́ gɛ̃̀ e ké. À bèĩzɛ̀ lɛ́ e Sáímɔ̀, lɛ́ ò si Pílɛ̀ɛ káa. E bɛ̀i, à lèe‐gé Áã́dùlù, ɛ̃́ɛ̃́ Zĩ́ĩ̀ wà e lèe‐gé Zɔ̃̀ɔ̃́, lɛ́ o kɛ Zɛ́bɛ́dìì gbe nì káa, 3ɛ̃́ɛ̃́ Félè wà Bàtólómì, e bɛ̀i, Tɔ́mɔ̀ wà Máfìù lɛ́ e kɛ ɓo‐pɛ̀ ɓo‐mì káaò, ɛ̃́ɛ̃́ zeĩ́ Zĩ́ĩ̀ lɛ́ e kɛ Áfìà gbe káa, wà Táádìà, 4wà Sáímɔ̀ lɛ́ e kɛ mia lɛ́ o tò‐o‐dìè‐là wɔ̃̀ e kɛ o zò píéa doó‐mì káa, wà Zúdà Ɛ̀sɛ̀kélìà lɛ́ è lo à lé góòa káa.
Zízɛ̀ e là tòà‐píé‐mìà vũ̀ doó wɛ́lɛ́ pèèlɛɛ vɔ
(Máà 6.7-13; Lúù 9.1-6)
5Zízɛ̀ e gɔ̃à vũ̀ doó wɛ́lɛ́ pèèlɛ o kéa vɔ, áà gèè o lɛ̀ɛ, “Yékɛ̀ ká ló sɛ́lɛ́ gbɛɛ yí‐mìà pà nɔ́ɔ fé dò mɔ̀. Ɛ́ɛ̃́ yékɛ̀ ká ló Sɛ̀mɛ́lìà‐mìà pà‐sɛ̀lɛ̀ nɔ́ɔ fé dò yí. 6Kɛɛ kà lo ɓáá vɔ̀ lɛ́ o gíniì lɛ, lɛ́ o Éézɛ̀lɛ̀‐mìà káa píé. 7Kà lo wɔ̃́ gèeá sí lòũ̀ ká kélɛ̀, ‘Wálà lɛ́ e lɛ̀ía zì tò‐mia‐là nu‐lùò aà ɓɔ kɔ̀ɛ́.’ 8Kà mia kɔ̃́ṹ‐kɔ̃̀ũ̀ la. Ɛ́ɛ̃́ kà mia lɛ́ o gaà lɛɛ, wɛ̀lɛ̀ ga kɛ̀lɛ̀. Kà gbéè‐mìà la, kɛ bɛ̀i é kɛ o mɔ̀ ó dà o ɓɛ́ĩ̀ bà. Kà pɛ yɔɔ ɓo mia píé. Pɛ lɛ́ kaà sɔ̀lɔ̀ ɓoa, kàá sɔ̃̀ɔ̃́ nɔ. À mɔ́ɔ̀ wɔ̃̀ mɔ̀ɔ, kà pɛ nɔ mia lɛ̀ɛ ɓɔ̀ɔ. 9Yékɛ̀ ká góò ɛ̃́ɛ̃́ pɛlèe púlú, e bɛ̀i, félé zóló pɛlèe dà kà bá yí, yé kaà kɛ lópìàa ká. 10Yékɛ̀ ká ló gbòṹ nɔ́ɔ fé dò ká táá e kília mɔ̀. Yékɛ̀ ká sɔ pèèlɛ dà. Ɛ́ɛ̃́ yékɛ̀ ká ló sàkpà wà kpeĩ̀ o ká. Ƃii lɛ mi mɔ̀ é pɛ lɛ́ lɛ yɛɓo‐kɛ‐mì mɔ̀ á sɔ̀lɔ̀ ɓoa, nɔ à lɛ̀ɛ.
11“Yé kaà ɓɔ pɛ́lɛ ɛ̃́ɛ̃́ kpã̀ãã̀ dò mɔ̀ɔ, kà lo yí, ká mi lɛ́ lɛ à naapìà é e kɔ̀ yà ka wìa naa. Kà tó à píé yi é tóá kíli ká gó lɛ̀ e kília mɔ̀. 12Ká kɛ̀á wààpìà ká dò wìa, kà à gèe, ‘Zò‐yà‐gé è kɛ ka kɛ̀lɛ̀.’ 13Míá o ká e kília wìa, ó nàá ó o kɔ̀ yà ka wìa, ka zì zò‐yà‐gé wè e kília, è tó yi. Kɛɛ óò gɔ̃̀á naà ó o kɔ̀ yà ka wìa, ka zì zò‐yà‐gé wè e kília è yɛ́ e zí, é nu ka píé. 14Yé mia lɛ́ o ká dò wì, ɛ̃́ɛ̃́ o yé o pɛ́lɛ dò yía, òó o kɔ̀ yà ka wì, ɛ̃́ɛ̃́ lɛ́ òó o tóó dɔ ka mɔ̀ɔ, kà gó yi, ká ka gã̀ yí zɛ, kɛɛ mùnú lɛ́ e tó à mɔ̀ yia, é gó à mɔ̀. 15Wánà‐wɔ̃̀ lɛ́ m̀ gèe ka lɛ̀ɛ ɓɛ. Lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, Sɔ́dɔ̃̀ wà Gòmálà sɛ̀lɛ̀ zì wɔ̃́ lɛ́ è lo ɓɔɔ̀ o làa, lɛ́ɛ̀ lo kɛɛ̀ fìa, é dieá sɛ́lɛ́ e kília zì là.
Sã̀‐dɔ lɛ́ lɛ nupìàa
(Máà 13.9-13; Lúù 21.12-17)
16“Kà ka tóó dɔ m mɔ̀. Ka vɔ́ m̀ ɓo e kéa, ḿm̀ ɓo lɛ̀ mi lɛ́ è ɓáá gbɛ̃̀ gɔ́ vɔ̀ fĩ̀ã̀. À mɔ́ɔ̀ wɔ̃̀ mɔ̀ɔ, kà kɛ gíkã́ã̀a zɛ̀ lɛ̀ mɛ̀nɛ lɛ́ ɓe. Ɛ́ɛ̃́ kà kɛ kpóló‐kpɔ̀‐mɔ̀ zɛ̀ lɛ̀ tèŋè kpátálá lɛ́ ɓe. 17Kà ka yɛ́lɛ́ kɛ ka dìè píé mia ɓéèe wɛ̃́ĩ̀. Ƃii óò lo ka kṹũ̀, wáà lò ka ká dɔ‐mìà wɛlɛ mɔ̀. Óò lo ka mɛ̀ɛ̀ píé gbàtò ká Zúù‐mìà zì Wálà‐kà gbɛɛ̀ gbɛɛ wì. 18Óò lo nuù ka ká gòmɛ́nɛ̀ ɛ̃́ɛ̃́ sɛ́lɛ́ líé‐sí‐mìà wɛlɛ mɔ̀ m mɔ́ɔ̀ wɔ̃̀ mɔ̀, kɛ ká m̀ kélá‐wè ɓo o wɛlɛ mɔ̀, ɛ̃́ɛ̃́ sɛ́lɛ́ gbɛɛ yí‐mìà wɛlɛ mɔ̀. 19Yé waà ló ka ká mɛ̀ĩ́‐sà ɓo‐kà wìa, yékɛ̀ ka lè é dũ wɔ̃́ lɛ́ kà lo à gèeèa, wà zi lɛ́ kà lo à gèeè à káa mɔ́ɔ̀ wɔ̃̀ ká. Yé à lúó aà ɓɔɔ, wɔ̃́ lɛ́ kà lo à gèeèa, à nɔɔ̀ lɛ́ɛ̀ lo kɛɛ̀á ka lɛ̀ɛ. 20Ƃii wɔ̃́ lɛ́ kà lo à gèeèa, ye wá ka dìè ka wéè ká. Ka Dàa zì Gɛ̀ɛ̀ lɛ́ è lo kpɔ́ɔ̀ ka yí, tó káà mɛ́ĩ́ e kília ɓòa.
21“Mia óò lo o lèe‐gé vɔ̀ nɔɔ̀ mia lɛ̀ɛ ó o zɛ. Mia ye‐dàà nì óò lo wɔ̃́ nɔ́ doóa kɛɛ̀ wà nɔ́ɔ̀ ká. Nɔ́ɔ̀ɓé óò lo o kɔ̀ ɓoò o ye‐mìà wì, tó wáà o nɔ̀ mia lɛ̀ɛ, wáà o zɛ̀. 22Ka lɔ̀ lɛ́ɛ̀ lo nyɛɛ̀ mia séĩ́ mɔ̀ m mɔ́ɔ̀ wɔ̃̀ mɔ̀. Kɛɛ mi lɛ́ è lo e zò dɔɔ̀ gágà é ɓɔ à líé‐nyɛpìàa, lɛ́ɛ̀ lo laà. 23Yé waà ka sã̀ dɔ sɛ́lɛ́ dò yía, kà wàà, ká ló sɛ́lɛ́ gbɛɛ yí. Wánà‐wɔ̃̀ lɛ́ m̀ gèe ka lɛ̀ɛ ɓɛ. Kàá ló nyɛɛ̀ kà yɛɓo lɛ́ lɛ pɛ́lɛ séĩ́ lɛ́ lɛ Éézɛ̀lɛ̀‐sɛ̀lɛ̀ yía, kɛɛ̀ mɔ̀, kɛɛ Mi Gbe é tĩã́ nuù.
24“Pɛ‐dã́‐mì wá kpànazɛ̀, é dieá mí è pɛ zɔ̃̀ɔ̃̀ à lɛ̀ɛ là. Ɛ́ɛ̃́ lùò nɔ́ɔ fé wá kpànazɛ̀ é dieá e dàa‐mì là. 25À mɔ́ɔ̀ wɔ̃̀ mɔ̀ɔ, lɛ pɛ‐dã́‐mì mɔ̀ à zò é dà kɛ é kɛ lɛ̀ pɛ‐zɔ̃̀ɔ̃̀‐à‐lɛ̀ɛ mì lɛ́ ɓe. Ɛ́ɛ̃́ kɛ lùò bɛ̃̀ɛ̃ é kɛ lɛ̀ e dàa‐mì lɛ́ ɓe. Yé waà ká dàa‐mì sí Bìɔ́sébàa, kɛɛ ó à píé‐kɛ́ì‐mìà bɛ̃̀ɛ̃ o tɔ́ yɔɔ lɛ́ lɛ o mɔ̀ɔ sí kpɛ?
Mí lɛ à mɔ̀ ó túó à lɛ̀ɛ
(Lúù 12.2-7)
26“À mɔ́ɔ̀ wɔ̃̀ mɔ̀ɔ, yékɛ̀ ká túó mia lɛ̀ɛ. Pɛ lɛ́ pɛ gbinì lɛ à là dɛɛ káa, pɛ lɛ́ɛ̀ lo ɓoò à là. Ɛ́ɛ̃́ bĩ̀ĩ̀‐wɔ̃̀ séĩ́ lɛ́ɛ̀ lo kɛɛ̀ mia séĩ́ yí‐dɔ‐wɔ̃̀ ká. 27Wɔ̃́ lɛ́ m̀ gèe ka lɛ̀ɛ bĩ́ tii bàa, kà à gèe lɛ̀ fɔ̀nɔɔ̀ɔ bà. Ɛ́ɛ̃́ wɔ̃́ lɛ́ kaà à ma lùe káa, kà dɔ ká to là, ká à gèe lòũ̀ ká. 28Yékɛ̀ ká túó mia lɛ́ ò gbĩ‐kpàla zɛ, lɛ́ òó bɛ̀i à mɔ̀ ó gɛ̀ɛ̀ zɛɛ lɛ̀ɛ. Kɛɛ kà túó Wálà, lɛ́ è bɛ̀i à mɔ̀ é mi gbĩ‐kpàla wà gɛ̀ɛ̀ o yí sìè tíé‐pàa lɛ̀ɛ. 29Ḿ gɔ̃̀, káà sòlòũ̀ pèèlɛ lɔ wã́ã́ sɛ̃́ĩ̀ ká? É kɛ bɛ̃̀ɛ̃ kília, o dò nɔ́ɔ fé lɛ̀ɛ́ dà tã́ã̀ yé ka Dàa lɛ̀ɛ́ wéé à mɔ̀ɔ ká. 30Kɛɛ ka bɛ̃̀ɛ̃, é kɛ bɛ̃̀ɛ̃ wũ lɛ́ e ka wĩĩ́a káa, o séĩ́ o lóníì lɛ. 31À mɔ́ɔ̀ wɔ̃̀ mɔ̀ɔ, yékɛ̀ ká túó. Ka wɔ̃̀ lɛ dóo kpànazɛ̀, é dieá sòlòũ̀ búnù‐búnùzɛ̀ wɔ̃̀ là.
O wéé Kɛ́lɛ̀ì wɔ̃̀ mɔ̀ mia nyìɛ mɔ̀
(Lúù 12.8-9)
32“Mí è lo wéè m mɔ́ɔ̀ wɔ̃̀ mɔ̀ mia séĩ́ nyìɛ mɔ̀ɔ, ḿm̀ lo wɔ̃́ nɔ́ doóa kɛɛ̀ à lɛ̀ɛ m Dàa lɛ́ e lɛ̀ía wɛlɛ mɔ̀. 33Kɛɛ mi lɛ́ è lo m mɔ́ɔ̀ wɔ̃̀ tèé ɓoò mia séĩ́ nyìɛ mɔ̀ɔ, ḿm̀ lo à bɛ̃̀ɛ̃ mɔ́ɔ̀ wɔ̃̀ tèé ɓoò m Dàa lɛ́ e lɛ̀ía wɛlɛ mɔ̀.
Zò‐yà‐gé wá. Kɛɛ gèlè‐gɔ̃‐làà lɛ.
(Lúù 12.51-53; 14.26-27)
34“Yékɛ̀ ká gɛ̃̀ ɓɔ̀ɔ kélɛ̀ m nuù lɛ kɛ ḿ à kɛ zò‐yà‐gé é kɛ mia fĩ̀ã̀ kpóṹ là zèe. M nuù wá kɛ ḿ à kɛ kɛ zò‐yà‐gé é kɛ mia fĩ̀ã̀. Kɛɛ m nuù lɛ zèe gèlè‐gɔ̃‐làà ká. 35M nu, kɛɛ ḿ mia gbe nì kɛ ó gèlè gɔ̃ o dàa nì ká, ɛ̃́ɛ̃́ kɛ ḿ kɛ loà nɛ̀ĩ́ bɛ̃̀ɛ̃ ó gèlè gɔ̃ o ye‐lèè ká, ɛ̃́ɛ̃́ kɛ ḿ à kɛ mi gbe na é gèlè gɔ̃ e dɛ̃ lèe ká. 36Mi dàa‐gbe lɛ́ è lo kɛɛ̀ à dìè píé‐kɛ́ì‐mìà káa.
37“Mi lɛ́ à dàa ɛ̃́ɛ̃́ à lèe lɔ̀ kpɔ́ɔ̀ lɛ à mɔ̀, é dieá m mɔ́ɔ̀ wɔ̃̀ làa, à kɛ̀ m̀ mi ká làá mɛ́ kṹ. Ɛ́ɛ̃́ mi lɛ́ à gbe ɛ̃́ɛ̃́ à lú lɔ̀ kpɔ́ɔ̀ lɛ à mɔ̀, é dieá m mɔ́ɔ̀ wɔ̃̀ làa, à kɛ̀ m̀ mi ká làá mɛ́ kṹ. 38Mi nɔ́ɔ fé lɛ́ lɛ̀ɛ́ là kɔ́lɔ́sì sí, kɛ é tó à ká m píéa, à kɛ̀ m̀ mi ká làá mɛ́ kṹ. 39Mi lɛ́ à nàà é e dìè zì kɛ̀ɓe sɔ̀lɔ̀ ɓoa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Mí è e dìè wɔ̃̀ dà tã́ã̀ m mɔ́ɔ̀ wɔ̃̀ mɔ̀ɔ, lɛ́ɛ̀ lo e zì kɛ̀ɓe sɔ̀lɔ̀ ɓoò.
Mi fɔ́nɔ́
(Máà 9.41)
40“Mi lɛ́ è lo e kɔ̀ yàà ka wìa, kɛɛ aà e kɔ̀ yà m wì. Ɛ́ɛ̃́ mi lɛ́ è lo e kɔ̀ yàà m wìa, kɛɛ aà e kɔ̀ yà mi lɛ́ e m vɔɔ wì. 41Mi lɛ́ è e kɔ̀ yà dɔ̀‐Wálà‐lé‐là‐mì wì, à kɛ̀ dɔ̀‐Wálà‐lé‐là‐mì káa mɔ́ɔ̀ wɔ̃̀ mɔ̀ɔ, wà dɔ̀‐Wálà‐lé‐là‐mì e kília óò lo dɔɔ̀ à zì fɔ́nɔ́ yí. Ɛ́ɛ̃́ mi lɛ́ è e kɔ̀ yà mi kpeĩ wì, ɓii lɛ mi kpeĩ káa mɔ́ɔ̀ wɔ̃̀ mɔ̀ɔ, wà mi kpeĩ e kília óò lo dɔɔ̀ à zì fɔ́nɔ́ yí. 42Ɛ́ɛ̃́ mi lɛ́ è lo yíí dɔ́ɔ́lɔ́ kɔ̀ɛ̀ doó fèle nɔɔ̀ m̀ mia nì o kéa à yé ye wá kpànazɛ̀ɛ lɛ̀ɛ à kɛ̀ tò‐m‐píé mì káa wɛ̃́ĩ̀a, wánà‐wɔ̃̀ lɛ́ m̀ gèe ka lɛ̀ɛ ɓɛ, lɛ́ɛ̀ lo e fɔ́nɔ́ gɛ̃̀ɛ̃̀ tékélé‐tèkèlè.”
Kasalukuyang Napili:
Máfìù 10: MNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Mann New Testament © Bible Society in Liberia, 1978.
