Matyiu 14
14
1O egombe těně ndi ya Hěrod ya titrark e yokakidi kuma ya Jisus. 2Ka mâ‐a vâ na bato baju, na, Ekaně ndi Jân Baptist; a pumbuwendi; ovaně ndi o behavu tě beněně ekabe be levakudwě a mâ‐a jadi. 3Ikabojana Hěrod a bweyakindi Jân, ka mâ‐a kata mâ, na vamě mâ o meboka na tina ya Herodias, mwad‘ ’a mwana nyangwě Filip. 4Ikabojana Jân a vâki na ju, na, E ibě hohonganěngo na nâvě o baka mâ. 5A bangakindi ebimba ya bato, o mâ‐a ’mbakidi o weya mâ, ’kabojana ba ma langaki mâ k‘ usâki. 6Ndi, o buhwa boa Hěrod bo jakudwě bo tatakudwě, mwana ua Hěrodias ua mwajo a yembakindi o boho boabu, ka yâ‐ya tândidi Hěrod. 7Ovaně ndi o mâ‐a yohanakidě mâ na ikana, na, a ka vi mâ eaju e ka uwě yehěpi. 8A diyakindi a ta kelevudwě na nyangwě, ka mâ‐a vâ, na, Věkě ’mba okava molo mua Jân Baptist o epěle bwalo. 9Ka upolo mâ‐a yěně ngěbě; ndi o nyanga ya ikana, na ba diyaki na ju o ija, a sombyakiděndi na u věkwě mâ. 10Ka mâ‐a loma ka lenidě mua Jân o ndabo ya meboka. 11Ka molo muaju mua vanwě o ’pěle bwalo, ka muâ mua věwě itângâ; ka viâ via valana muâ nyangwě. 12Ka beyokwedi beaju bea viya ka nângâ ukuku, na tongaka muâ, ka bâ‐ba vala ka languwa Jisus.
13O Jisus a yokaki yâ, a věngěměkindi omě na elende ikutakuta; nandi bebimba ba yokakidi nonaně ka bâ‐ba viya o viya mamboka ba vitanakě mâ ja he. 14Ka Jisus a jabuwa, ka Mâ a yěně ebimba ya bato eněně, ka Mâ‐a ’muwa yěněyě bâ ngebě, ka Mâ‐a yongě mebědi meabu. 15Ka beyokwedi beaju bea viya o Mâ‐a jadi, o yâ diyakidi ya bě kolo, na, Ekavi vi ndi ’boko via nginga, na egombe e tombi tepě; valakidě ebimba ya bato, ba vale o mbok‘ ihâlě ka hamba beja beabu. 16Jisus a vâki na bâ, na, Ba, ibě na mala ba kěkě; inyěni, věki bâni beja. 17Ka bâ‐ba vâ na ju, na, Ho te okava paniyango membunda mea pěmbě metano, na bejaka bebale. 18A vâki na bâ, na, Vanaki beâni okava Umba‐mbi jadi. 19Ka Mâ‐a sombiya ebimba ya bato na ba diyake o mbusanga, ka Mâ‐a nângâ membunda mea pěmbě metano, na bejaka bebale, ka Mâ‐a umbuwa oba, ka Mâ‐a vambiya ibâtâ, o Mâ‐a bukakidi, ka Mâ‐a vě membunda mea pěmbě o beyokwedi beaju be jadi ka beyokwedi bea vě ebimba ya bato. 20Běhěpi ba janakiděndi, ka bâ‐ba vula; ka bâ‐ba tâlidě nguhu i dikanakidi jomu na belinga bebale ti. 21Ba jakidi ba diyakindi ba tâjen ja bamo itano, tepě na bajo na bana.
22Elěngiaha tepě ka Jisus a tundudě beyokwedi beaju na ba vamake o elende, na bâ‐ba ta vala o mwidi upâkwě, o ulingo muaju u valakidě bebimba bea bato. 23O Mâ‐a běki bebimba validěngo, ka Mâ‐a beta ukodi o pěpěkě ka kaliya; a diyakite omě dipâ, o kolo e pâkidi. 24Ndi elende e diyaki ya bě o etima o hanganě, e bolonganaka na mekeba; ’kabojana upupě u diyaki bokolo. 25O ’lahe ya benai na bulu ndi ya Jisus e kěkidi o bâ‐ba jadi, a tamwaka o etima. 26O bâ‐ba yěněki Mâ‐a tamwaka o etima, ka beyokwedi beaju bea juka ipikiliya, na bâ‐ba yamaka na jângâ, na, U ndi ukuku! 27Ndi Jisus a hunganakindi o kala na bâ, na, Yâdâkâni; a t‘ Umba; o bangakeni. 28Ka Pitě a yavwana Mâ, na, Upangiyi, ipě a nd‘ Âvě, langwakiya ’mba, mbi viye o Âvě‐o jadi o miba. 29Ka Mâ‐a vâ, na, Vaka. Ka Pitě a huba oviya elende ka tamuwa o miba, na vala o Jisus a jadi. 30Ndi a bangakindi, o mâ‐a yěněkidi upupě ukolo; na mâ‐a ka yalakě igilindândâ, ka mâ‐a yama, na, Upangiyi, hunginaka ’mba. 31Elěngiaha tepě Jisus a hambakid‘ enâ, ka Mâ‐a bweya mâ, ka Mâ‐a vâ na ju, na, Âvě, u‘ ikamidě ihâlě, e lě nd‘ eâvě e ma boma penda? 32K‘ upupě mua wa, o bâ‐ba vamakidi o elende. 33Jâ ndi ja ba diyakidi o elende ja viya ka kaliya Mâ, na, E! pâkwěpâkwě, O Mwana Anyambě.
34Ka bâ ba pâ o ehe ya Jěněsarět, o bâ ba běkidi jabuwango. 35O bamo b‘ iboko těvině ba yowakidě Mâ, ba lomakiděndi magende o etěbě těyeně yěhěpi uluaniděngo, ka bâ‐ba vana ba diyakidi ba běkě běhěpi o Mâ‐a jadi; 36ka bâ‐ba hâhâlidě Mâ na ba kupanake tombekete ugunde mua ngâi ’aju pa: ndi tango e kupanakidě e yongakudwěndi.
ที่ได้เลือกล่าสุด:
Matyiu 14: BNG1895
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the American Bible Society in 1895.
