Matyiu 15
15
1Jâ ndi ja Balěndi na Farisi ba vakiyedi oviya Jěrusalěm o Jisus a jadi, 2na, E lě nde ya beyokwedi beâvě e pulakě epepa ya batodu? ’kabojana baa tukaka benâ beabu o bâ ba jakě beja. 3Nd‘ a yavwakindi, ka Mâ‐a vâ na bâ, na, E lě nd‘ eanyu tepě e pulakě elakanako y‘ Anyambě na bepepa beanyu? 4Ikabojana Anyambě a sombiyakidi, na, Hekakidě nyângwě na hângwě; nd‘ a ka hâkě hangwě na ba nyangwě, a wake bowaka. 5Ndi ’nyeni mâ, na, Uěhěpi a ka vâyě na hangwě na ba nyangwě na, Eavě e didi e kovaka n‘ umba e vewengo Anyambě; 6na mâ‐a hekidě hangwě na ba nyangwě. Nonaně nd‘ inyěni o hadivakiděni elekanako y‘ Anyambě na bepepa beanyu. 7Inyěni menoki, Iseas â huwakite o sâkâ inyěni, na,
8Bato těkaba ba bengakiyate Umb‘ i jadi na medumbu meabu, na bâ ba hekakidě ’Mba na belěbu beabu; ndi melema meabu me ndi yavaniděngo n‘ Umba.
9Ndi, ba kalakiyate ’Mba o naně, ba yokwakidě iyokwanidi ja belekanako bea bato.
10Ka Mâ‐a ndiya ebimba, ka Mâ‐a vâ na bâ, na, Yokakani, n‘ inyěni wa bweyiděni; 11e ibě e kěkě o udumbu e bevakě moto; ndi e pumakě udumbu, yâ nd‘ e bevakě moto. 12Jâ ndi ja beyokwedi beaju bea viya ka vâ na ju, na, O yowuděte na Farisi ba ma numbandi, o bâ‐ba ma yoka ndaga těkaně? 13Ndi A yavwakindi, na, Iliya jěhěpi ja Paia ya oba i ha liyakidi, i ka kuwěndi. 14Dikaki bâni mbwe, ba ndi batumbwani ba pâgu na pâgu. Ndi oningě pâgu na pâgu i tumbwanaka jâ jěhěpi i ka kwand‘ o epupudu. 15Jâ ndi ja Pitě ja yavwana, ka mâ‐a vâ na ju, na, Pakwakiya hwě ukanakâdi těkamu. 16Ka Jisus a vâ, na, Inyěni o ibě tepěni n‘ ibweyidě? 17O ha bweyiděteni na e ngakiyě o udumbu yěhěpi e kěkěndi o ihuhu, na yâ ya pumwě o pěpěkě? 18Ndi belombo be pumakě o udumbu be vakiyandi o ebumulema; beâ ndi be bevakě moto. 19Ikabojana oviya ebumulema be pumakiyandi mapikiliya mabe, iweyana, inanganiya, na ihonde, iyiba, ilanguwa ja ’vela, ikila j‘ Anyambě: 20be bevakě moto nd‘ ekabe: ndi ija na benâ be tukwě ya bevakě moto.
21Jâ ndi ja Jisus ja věngěmě omě, ka Mâ‐a vala o betěbě bea Tair na Saidon. 22Umbwakiyate, mwajo ua Kenan a vakiyed‘ o betěbě tě, a yamakindi o Mâ‐a jadi, na, Upangiyi, Mwana ua Devid, yokakiya ’mba ngěbě; mwan‘ ’amě ua mwajo a na mehiyo mětě mea děvil. 23Ndi au yavwanaka mâ ndaga. Ka beyokwedi beaju bea viya ka hâhâlidě Mâ, na, Valakidě mâ; ’kabojana a yamakiyi hwě. 24Ndi A yavwanakindi ka Mâ‐a vâ, na Mbu lomakwě kabo o medâmbě me nyangango mea ndabo ya Israěl. 25Jâ nd‘ ijaju ja viya ka hâhâlidě Mâ, na, Upangiyi, hanaka ’mba. 26Ndi A yavwanakindi ka Mâ‐a vâ, na, E ibě lukango na o nângâ beja bea bana, na o ’hwa beâ mbwa. 27Ka mâ‐a vâ, na, E! Upangiyi, ndi mbwa i jakandi nguhu i kwakě o tagulu ya hangw‘ ’abu. 28Jâ ndi ja Jisus ja yavwana, ka Mâ‐a vâ na ju, na, Mwajo! ikamidě jâvě i ndi ’něně; e diyake o âvě o jadi nyanga ’vě e di vahango. Ka mwan‘ ’aju ua mwajo a yonga oviya iwěla tědině.
29Ka Jisus a věngěmě omě, na kěkě pyělě na etima ya Galili; o Mâ‐a betakidi ukodi oba, ka Mâ‐a diya omě. 30Ka bebimba beněně bea viya o Mâ‐a jadi ba diyaki na bebokě, na pâgu, na mambuke, na bekěhě, na bapâkwě baitě, ka bâ‐ba nangidě bâ o beko bea Jisus; ka Mâ‐a yongě bâ; 31ka ebimba ya mama, o bâ‐ba yěněki mambuke ma kalaka, bekěhě be yongaka, bebokě be tamwaka, pâgu i yěněkě: ka bâ‐ba bendě Anyambě ya Israěl.
32Jâ ndi ja Jisus ja ndiya beyokwedi beaju o Mâ‐a jadi, ka Mâ‐a vâ, na, Mbi yěnindi ebimba ngâtâ, ’kabojana ba bi n‘ Umba hwi ’lalo okava, ba diye na ’lombo e jakě: n‘ Umba Mba vahaka o validě bâ tepě baa je, obanga ba hoviya na nja o njeya. 33Ka beyokwedi beaju bea vâ na ju, na, Ho lě ho pahakiya beja beitě o nja pělě on‘ okava o nginga, be ka vulě ebimba tě ’něně ’kae? 34Ka Jisus a vâ na bâ na, O lěni membunda meningě? Ka bâ‐ba vâ, na, Hěmbwědi, na lojajaka lohâlě. 35Ka Mâ‐a sombiyě bebimba na be diyake o he. 36Ka Mâ‐a nângâ membunda tě hěmbwědi na bejaka, ka Mâ‐a vě akeva, ka Mâ‐a buka bea, ka Mâ‐a vě beyokwedi beaju, ka beyokwedi bea vě ebimba. 37Na bâ běhěpi na jaka, ka bâ‐ba vula: ka bâ‐ba tâlidě belinga hěmbwědi ti bea nguhu i dikanakidi. 38Ba jakidi ba diyakindi tâjen ja bamo inai, tepě na bajo na bana. 39Na Mâ na valakidě ebimba, ka Mâ‐a vama o elende, na pâkâ o betěbě bea Magdala.
ที่ได้เลือกล่าสุด:
Matyiu 15: BNG1895
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the American Bible Society in 1895.
