Matyiu 13
13
1Buhwa tě te boa Jisus bo pumakidi o ndabo, ka Mâ‐a diya baka na manga. 2Ka bebimba beněne bea yolaně o Mâ‐a jadi, ka Mâ‐a vala ka diya o elende; ka ebimba yěhěpi ya těmě o kindiki. 3Ka Mâ‐a kala na bâ belombo beitě na mekanakâdi, na, Umbwakiyate, uliyi u kěkě ka liya; 4o mâ‐a mwanjidi, jâkâ i kwakindi o pěpěkě ya njeya ka lonâni la viya ka sâsâ jâ. 5Jâkâ i kwakindi o beěngě o mahě ma ha diyakidi maitě; ka jâ‐ja hungana o kěkě, ikabojana ju diyaka na ndiba ya mahě. 6O joba i pumakidě i bâmbâlânâkiyendi; ka jâ‐ja vivilaniya ikabojana ju diyaka na metamba. 7Ka jâkâ ja kwa o mekanda; ka mekanda mea tombuwa ka meâ mea ha jâ kâlu; 8ndi ipâkwě i kwakind‘ o mahě mayamu, ka jâ‐ja yěkěmě bebuma, jâkâ kama, jâkâ mab‘ utoba, jâkâ mabo malalo. 9A di na matâ ma yokakě, a yokake.
10Ka beyokwedi bea viya, ka vâ na ju, na, E lě nd‘ eâvě e kalakě na bâ na mekanakâdi? 11A yavwanaki bâ, na, Ikabojana inyěni ndi o didini věwěngo iyowě ja mahâwě ma ipangiya ja Hěvěn, ndi bâ‐ba bě věwěngo. 12Ikabojana a janidi uěhěpi nd‘ a ka věwě, na mâ‐a ka diyaka na beitě: ndi a ha bě ně uěhěpi, a ka nângânwěndi tombe na eaju a janidi. 13Ovaně nd‘ Umba‐mbi kalakě na bâ na mekanakâdi; ikabojana boyěněkě, baa yěněkě; boyokaka, baa yokaka; na bâ‐baa bandamakidě. 14Isâkâ ja Iseas i hohonganiděndi na bâ i vâkě, na,
N‘ iyoka nd‘ ijanyu i ka yokě, ndi wa bandamiděni; iyěně tepě ijanyu i ka yěně, ndi wa bweyiděni.
15Ikabojana bebumulema bea bato těkaba be vulindi, na matâ mabu ma tuni n‘ iyoka, na bâ‐ba dibi mihâ mabu; na o banga ba yěně na mâ, na bâ‐ba yoka na matâ mabu, na bâ‐ba bandamidě na bebumulema, na bâ‐ba ’luwa, Mba yongě bâ.
16Ndi, ibâtâ na mihâ manyu, ’kabojana ma yěněkěndi; na matâ manyu, ’kabojana ma yokakandi. 17Ikabojana, Mbi vâki n‘ inyěni pâkwěpâkwě, Basâki baitě na bato bayamu ba vahakind‘ o yěně ibeanyu be yěněkě, ndi bu yěněkě beâ; na o yoka ibeanyu be yokakě, ndi bu yokaka beâ. 18Yokakani nandi ukanakâdi mu ’liyi. 19Oningě moto a yoka ndaga ya ipangiya, na mâ‐a bandamidě yâ, vakâna Ube a vakandi ka nângânâ mâ i mwanjakudwě o ebumulem‘ ’aju. Ekaně ndi a pahakiyedi ibângâ o pěpěkě ya njeya. 20Ndi a pahakiyedi ’bângâ o beěngě, nd‘ a běkě ndaga yokango, na mâ‐a hungana o nângâ yâ na mbya; 21a diye na metamba mâ mětě, a diyakate ukili; kwě, o betuniya na njuke be ka pâyě o nyanga ya ndaga, na mâ‐a kâbâ. 22A pahakiyedi ’bângâ o mekanda nd‘ a běkě ndaga yokango; n‘ inaka ja eměnâ těkae, n‘ iyabana ja boněně be ka haka ndaga kâlu, na mâ‐a bě ekomba. 23Ndi a pahakiyedi ibângâ o mahě mayamu, ndi, a běkě ndaga yokango, na mâ yâ bandamiděngo; mâ ndi a yěkěměkě bebuma, umbâkâ kama, upâkwě mab‘ utoba, upakwě mabo malalo.
24A kanakiyi bâ ukanakâdi upâkwě, na, Ipangiya ja Hěvěn i kwanakandi moto a mwanja ibângâ iyam‘ o mwanga muaju: 25o bato ba diyakidi ba yaka, ka uloni muaju a viya ka mwanja ters o hwit; ka mâ‐a vala. 26Ndi o bekai be pumidě, ka jâ‐ja yekěmě bebuma, jâ ndi ja ters ja pumě tepě. 27Ka bahayi ba hangwě ndabo ba viya ka vâ na ju, na, Upangiyi, wu mwanjaka ibângâ iyam‘ o mwanga muâvě? nd‘ u pahiye lě ters na nja pělě? 28Ka mâ‐a vâ na bâ, na, Moto a lonakě nd‘ a had‘ ekae. Ka bahayi ba vâ na ju, na, O ka bâbate ho kěkě ka kuwa jâ? 29A vâki, na, Nyawě; o banga inyěni o ka kuwěni ters, wa hoduwa tepěni hwit. 30Dikakani beěhěpi be tombwake ta kwanga na pâ o juma: mbi ka vândi na babenji o ’gombe ya juma, na, Ta ka yolěni ters, na inyěni wa kati jâni o mebâmbâ ovaně ndi o jâ i ka tumbwě: ndi o ka yolakěni hwit o kundu ’amě.
31A kanakiyi bâ ukanakâdi upâkwě, na, Ipangiya ja Hěvěn i kwanakandi utonga mua ebuma ya mustard, mua momo u nângâkidi, na mâ‐a liya o mwanga muaju. 32E di mětě yěviyěngo o bolo bebuma beěhěpi; yâ ndi e diyakě ya bě eněně wa o bolo bele behâlě, oningě ya tombuwa, na lonani la oba lo ka vaka ka diya o melabe meaju.
33A kanakiyi bâ ukanakâdi upâkwě, na, Ipangiya ja Hěvěn i kwanakandi lěvěn ya mwajo e nângâkidi, na mâ‐a hâbě yâ o beyějâ bea pěmbě belalo, kabo yěhěpi ya landa.
34Jisus a kalaki na bebimba belombo těkabe beěhěpi na mekanakâdi; Au kalaka na bâ A kaniye bâ ukanakâdi. 35Ovaně ndi o ya usâki e kalakidi e ka timwě, na,
Mbi ka bumuděndi udumbu muamě na mekanakâdi, Mbi ka puměndi belombo be di kutwěngo oviya jali ja he.
36Jâ ndi ja Jisus ja validě bebimba, ka Mâ‐a vala o ndabo: ka beyokwedi beaju bea viya o Mâ‐a jadi, na, Pakwakiya hwě ukanakâdi mua ters ja mwanga. 37A yavwakindi ka Mâ‐a vâ na bâ, na, Mwana moto ndi a mwanjakě ibângâ iyamu; 38mwanga ndi he; bebuma beyamu ndi bana ba ipangiya; ndi ters ndi bana ba Ube; 39uloni u mwanjaki jâ ndi děvil; juma ndi ’huku ja he; babenji ndi enjěl. 40Pani te ka ters i yolakwě na jâ‐ja tumbwě o veya; nonaně tepě o ihuku ja he těkaně e ka diyě. 41Mwana moto a ka lomandi enjěl jaju ka věngidě belombo beěhěpi be kâbânâkě, na be hakě bobe, oviya ipangiya jaju. 42Be ka ’hwěndi o ebekě ya veya; omě o ka diyandi mbembe na ikalidě ja mahonga. 43Běngě bato bayamu ba panyake panika joba o ipangiya ja Hangw‘ ’abu. A di na matâ ma yokakě, a yokake.
44Ipangiya ja Hěvěn i kwanaki pě hika e di kutwěngo o ’hiki, ya moto a běkě duwango, na mâ yâ kutango, na mâ‐a ’la ka hambidě belombo beaju be janidi beěhěpi, na mâ‐a hamba ehiki těyeně.
45Ipangiya jâ Hěvěn i kwanaki pě maseni ma vahaka perls iyamu: 46ma běkě oningě mâ duwango perl pâkâ y‘ ihambe iněně, na mâ‐a ’la ka hambidě belombo beaju be diyanakě beěhěpi, na mâ‐a hamba yâ.
47Ipangiya ja Hěvěn i kwanaki i pě elâba, e ’hwakwě o manga, na yâ‐ya yolě mangâ měhěpi: 48e dulakwendi o he, oningě yâ londango, na bâ diya iyola ja beyamu o melega, ndi ba uhwaka bebe. 49Nonaně tepě o yâ e ka diya o ihuku ja he: enjěl i ka viyandi ka paludě babe oviya bayamu ba jadi, 50na jâ i ka uhwi bâ o ebeke ya veya: omě o ka diyandi mbembe na ikalidě ja mahonga.
51Jisus a vâki na bâ, na, O bandamakiděteni belombo těkabe beěhěpi? Ba vâki na ju, na, E, Upangiyi. 52Jâ nd‘ ijaju ja vâ na bâ, na, Ulěndi muěhěpi u yokwakudwě o ipangiya ja Hěvěn u kwanakandi moto a di hangwě ndabo, a běkěkidě o ngumb‘ ’aju belombo bea kya na belombo bea vyo.
53E diyakindi, o Jisus a běkidi hânjâbiděngo mekanakâdi těkame, ka Mâ‐a věngěmě omě.
54A yokwanakiděndi o ndabo ’abu y‘ Anyambě, o Mâ‐a pâkidi o wabu mětě, ka bâ‐ba mama, na, Momo těkaně a vaniye lě iyowě těkadi na behavu tě beněně ekabe o nja pělě? 55A ibě mwana ukěkěngě ekaně? A ibě nyangwě a tubakwě na Meri? ba ibě bana ba nyangwě Jems, na Josěs, na Saimân, na Judas? 56Maluku maju měhěpi ma ibě na hwě? Ndi ekaně a vaniye lě belombo těkabe beěhěpi o nja pělě? 57Ka bâ‐ba numba na ju. Ndi Jisus a vâki na bâ, na, Usâki aa hekakudwě o wabu, na o ndabo ’aju mětě. 58A haka omě behavu beněně beitě, ikabojana bu kamakidě.
ที่ได้เลือกล่าสุด:
Matyiu 13: BNG1895
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the American Bible Society in 1895.
