NAANAA 28
28
Yakubu tana Labã kĩnaa
1Akũ Isaaku Yakubu sìsi à sa'olɛ kɛ̀nɛ à yã dànɛ à pì: Ǹsun nɔ sɛ́ Kanaa nɔgbɛ̃nɔ tɛ́ro. 2Ǹ futɛ ǹ gɛ́ Mɛsɔpɔtamia bùsun n da de Bɛtuɛli bɛa, ǹ nɔ sɛ́ gwe n disɛ̃ Labã nɛ́nɔ tɛ́. 3Luda Gbãnasĩndapinkide arubarika dangu à tó ǹ nɛ́ i manamana, ògɔ̃ kara de ǹ gɔ̃ burinɔ dizi ũ. 4Luda arubarika kũ à dà Ibrahĩn dangu kũ n burinɔ, de bùsu kũ ntɛn nibɔ blen gɔ̃nnɛ, bùsu kũ à kpà Ibrahĩaa. 5Akũ Isaaku Yakubu gbàrɛ à gɛ́ Labã kĩnaa Mɛsɔpɔtamia bùsun. Labã bi Siria bùsu gbɛ̃ Bɛtuɛli nɛ́mɛ, Yakubu kũ Isauo disɛ̃mɛ.
6Isau mà Isaaku sa'olɛ kɛ̀ Yakubunɛ à a gbàrɛ Mɛsɔpɔtamia de à nɔ sɛ́ gwe. Kũ à sa'olɛ pìi kɛ̀nɛ, à pì àsun nɔ sɛ́ Kanaa nɔgbɛ̃nɔ tɛ́ro. 7À tàasii kà kũ Yakubu a de kũ a dao yã mà à dà Mɛsɔpɔtamia zɛ́n. 8Akũ à dɔ̃̀ sà kũ a de pɔ nna kũ Kanaanɔ bùsu nɔgbɛ̃nɔro. 9Akũ à gɛ̀ɛ Ibrahĩ nɛ́ Sumaila kĩnaa à a nɛ́ Maala sɛ̀ à nà a nɔ káakunɔa. Maala bi Nɛbayo dãremɛ.
Yakubu nana'ona Bɛtɛli
10Yakubu bò Bɛsɛba à dà Arana zɛ́n. 11Kũ à kà gukea, à ye à i gwe kũ ifãntɛ̃ gɛ̃̀ kpɛ́n yãi. Akũ à gbɛ̀ɛ sɛ̀ gu pìn a mìdibɔ ũ à wùtɛ gwe. 12Akũ à nana ò à gára è pɛtɛna zĩtɛ ari à gɛ̀ɛ à zɔ̃̀ ludambɛa, Luda malaikanɔ tɛn didia òtɛn kipa. 13À Dikiri è zɛnaala à pì: Makũmɛ Dikiri n dizi Ibrahĩ kũ n de Isaakuoo Luda ũ. Mani bùsu kũ ń wútɛa díkĩna kpámma, mɔkɔ̃n kũ n burinɔ. 14N burinɔ nigɔ̃ dasi lán bùsutiti bà, oni dagula ifãboki kpa kũ ifãlɛtɛo kũ gugbãnduru kũ gɛ̀nɔmidɔkio. Andunia buri sĩnda pínki ni arubarika le mɔkɔ̃n kũ n burio gãi. 15Manigɔ̃ kú kũnwo, manigɔ̃ n dãkpã gu kũ ntɛn gɛ́n pínki, mani ɛra mà su kũnwo bùsu díkĩnan, zaakũ mani n tónlo mani yã kũ ma ònnɛ kɛ.
16Kũ Yakubu vù kũ io à pì: Dikiri kú gu dí, akũ mádi dɔ̃ro! 17Vĩna a kũ̀ à pì: Gu dí ma kã fùtɛ. Luda bɛmɛ, ludambɛ zɛ́mɛ.
18Yakubu fùtɛ kɔnkɔ à gbɛ̀ kũ à kɛ̀ mìdibɔ ũ pìi sɛ̀ à pɛ̀tɛ dɔngupɔ ũ, akũ à nísi kùa. 19Akũ à tɔ́ kpà gu pìinɛ Bɛtɛli, ama wɛ̃tɛ kũ ò kàtɛ gwe tɔ́ káakun Luzu. 20Yakubu lɛ́ kɛ̀ Dikiria à pì: Tó ń kú kũmao, tó ĩni ma dãkpã ma wɛ̃tɛ díkĩna gɛnaa gũn, tó ĩni ma gba pɔ́ble kũ pɔ́kasanɔ 21ari ma gɛ ma su ma de bɛa aafia, ĩnigɔ̃ de ma Luda ũ, 22gbɛ̀ kũ ma pɛ̀tɛ dɔngupɔ ũ pì ni gɔ̃ n gbagbaki ũ, pɔ́ kũ n ma gba pínki mani a kuride kpámma.
ที่ได้เลือกล่าสุด:
NAANAA 28: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
