NAANAA 27
27
Isaaku sa'olɛkɛna Yakubunɛ
1Isaaku zĩ kũ̀ a wɛ́ gbãna doro, àtɛn gu e manaro. Akũ à a dauduu sìsi à pì: Nɛ́! Akũ à wèa à pì: Makũ dí. 2Isaaku pì: Ma zĩ kũ̀ má a gagɔrɔ dɔ̃ro. 3Ǹ n sá sɛ́ kũ n gbàtaao ǹ gɛ́ ǹ nɔ̀bɔsɛ̃ntɛ wɛtɛmɛnɛ. 4Ǹ ma pɔyeina dòo kuku ǹ mɔ́omɛnɛ mà ble, mani sa'olɛ kɛnnɛ de mà kpɛ́ mà ga.
5Rɛbɛka yã kũ Isaaku ò Isaunɛ pìi mà. Kũ Isau fùtɛ à gɛ̀ɛ tofe ká, 6akũ à gɛ̀ɛ à ò Yakubunɛ à pì: Ma mà n de yã ò n vĩ̀ninɛ à pì 7à gɛ́ à nɔ̀bɔ dɛarɛ à a pɔyeina dòo kukuoarɛ à ble, áni sa'olɛ kɛnɛ kũ Dikiri tɔ́o de á kpɛ́ à ga. 8Akũ Rɛbɛka ɛ̀ra à pìnɛ: Ǹ ma yã ma ǹ yã kũ ma dànnɛ kɛ. 9Ǹ gɛ́ blè kpàsaa gũn ǹ blènɛ mana kũ mɛ̀n pla ǹ suo. Mani n de pɔyeina dòo kukunɛ, 10ń gɛ́onɛ à ble, ani sa'olɛ kɛnnɛ de à kpɛ́ à ga. 11Akũ Yakubu pì a danɛ: Ma vĩ̀ni mɛ̀kã vĩ, akũ ma mɛ̀ pɔ́rɔpɔrɔ. 12Tó ma de ɔ kɛ̀ma, tó à ma dɔ̃, ani pi matɛni a kɛ pãpãmɛ, ani lɛ́ kɛmɛnɛ sa'olɛ gɛ̃nɛ ũ. 13Akũ a da pìnɛ: Luda tó lɛ́kɛnnɛnaa pì gɔ̃mɛnɛ. Ǹ ma yã ma dé! Ǹ gɛ́ ǹ dɛ ǹ suomɛnɛ.
14Akũ Yakubu gɛ̀ɛ à blèe pìnɔ dɛ̀ à sùo a danɛ, akũ à a de pɔyeina dòo kùkunɛ. 15Akũ à a daudu pɔ́kasa mana kũ à kú a kpɛ́ gũnnɔ sɛ̀ à dà a nɛ́ sabidenɛ. 16À blènɛ bára pìnɔ fĩ̀fĩ a ɔnɔa kũ a waka pɔ́rɔpɔrɔo. 17Akũ à dò kũ burodi kũ à kɛ̀ɛoo kpàa.
18Yakubu gɛ̀ɛ a de kĩnaa à pì: Baa! Akũ a de pì: Makũ di! Ma nɛ́ kpatemɛɛ? 19Yakubu wèa à pì: Makũmɛ Isau n dauduu. Lákũ n òmɛnɛ nà, ma kɛ̀ lɛ. Ǹ futɛ ǹ vutɛ ǹ ma ɔ'i ble de ǹ sa'olɛ kɛmɛnɛ. 20Akũ Isaaku pì a nɛ́nɛ: O'o! N lè kɔ̀ yá? À wèa à pì: Dikiri n Luda mɛ́ à ma tá kɛ̀ nna. 21Akũ Isaaku pìnɛ: Ǹ namai mà ɔ kɛmma de mà dɔ̃ tó ma nɛ́ Isaumɛ yãpura. 22Yakubu nà a dei, akũ à ɔ kɛ̀a à pì: Kòto díkĩna bi Yakubu kòtoomɛ, ɔ díkĩna sɔ̃ Isau ɔmɛ. 23Akũ adi a dɔ̃ro, kũ a ɔnɔ kã vĩ lán Isau pɔ́ bà yãi. À ye à sa'olɛ kɛnɛ, 24akũ à a la gĩa: Ma nɛ́ Isaumɛ n ũ yãpura yá? À wèa à pì: Makũmɛ! 25Akũ à pì: Ǹ pɔ́ kpáma mà n ɔ'i ble, mani sa'olɛ kɛnnɛ. Kũ à dìtɛnɛ, akũ à blè. À sùnɛ kũ wɛ̃o, à mì dɔ. 26Akũ a de pìi pìnɛ: Ǹ namai ǹ lɛ́ pɛ́ma. 27Akũ à nài à lɛ́ pɛ̀a. Kũ Isaaku a pɔ́kasanɔ gbĩ mà, akũ à sa'olɛ kɛ̀nɛ à pì:
Ma nɛ́ gbĩ de
lán bura kũ Dikiri arubarikaa dàn bà.
28Luda n gba mɔtɔ bona musu,
à n gba zĩtɛ mana.
Pɔ́blewɛ kũ sèwɛ̃o nigɔ̃ dinyĩ.
29Gbɛ̃nɔ ni zɔ̀ blennɛ,
burinɔ ni kútɛ n arɛ,
ĩnigɔ̃ de n gbɛ̃nɔ dikiri ũ,
n da nɛ́nɔ ni kútɛnnɛ.
Luda ni lɛ́ kɛ gbɛ̃ kũ ò lɛ́ kɛ̀nnɛnɔnɛ,
ani arubarika da gbɛ̃ kũ ò sa mana ònnɛnɔgu.
30Kũ Isaaku sa'olɛ kɛ̀ Yakubunɛ à làka, akũ Yakubu gò a kĩnaa. Kũ a vĩ̀ni sù kũ tofekao gɔ̃̀nɔ, 31akũ à pɔ́ble kɛ̀ a denɛ dɔ à gɛ̀ɛonɛ, akũ à pìnɛ: Baa! Ǹ futɛ ǹ ma ɔ'i ble ǹ sa'olɛ kɛmɛnɛ. 32Akũ a de a la à pì: Mɔkɔ̃mmɛ dí ũu? À wèa à pì: Makũmɛ n daudu Isau. 33Yã pì Isaaku swɛ̃̀ɛ zɔ̃̀ àtɛn lukaluka à pì: Dí mɛ́ à nɔ̀bɔɔ dɛ̀ à sùomɛnɛ yã ari ǹgɔ̃ gɛ́ su ma sòo? Ma sa'olɛ kɛ̀nɛ kɔ̀, àkũ mɛ́ ani arubarika le. 34Kũ Isau a de yã pìi mà, à pũ̀tã à ɔ́ gbãna dɔ̀ à kɛ̀ wɛ̃nda, akũ à pì: Baa! Ǹ sa'olɛ kɛmɛnɛ dɔ. 35Akũ à pì: N dakũna sù kũ ɔ̃ndɔ̃o à n sa'olɛ sì kɔ̀. 36Akũ Isau pì: A tɔ́n Yakuburoo? À ma kɛkɛ à kɛ̀ gɛ̃̀n plan gwe sà. À ma daudukɛzɛ sìma yã, akũ à ma sa'olɛ sìma tera dɔ. Mani sa'olɛ e doro yá? 37Isaaku wèa à pì: Ma a dìtɛ n dikiri ũ, ma a danɛnɔ kɛ̀ a zĩkɛrinɔ ũ ń pínki, ma pɔ́blewɛ kũ sèwɛ̃o kpàa. Bɔ́n mani le mà kɛnnɛ dɔɔ? 38Isau pì a denɛ: Baa, sa'olɛ biren ń vĩ ado yá? Ǹ sa'olɛ pãnde kɛmɛnɛ dɔ Baa. Akũ Isau wiki gbãna lɛ̀. 39Akũ a de wèa à pì:
Zĩtɛ kũ ĩnigɔ̃ kun nigɔ̃ manaro,
mɔtɔ ni bonnɛ zaa musuro.
40Ĩnigɔ̃ fɛ̃nɛda kũna,
ĩni zɔ̀ ble n dakũnanɛ.
Lɛmɛ dɔ n laakari ni gɔ̃ kpatɛnaro,
ĩni a gbãngo gonla.
41Isau ibɛrɛɛ sɛ̀ kũ Yakubuo sa'olɛ kũ a de kɛ̀nɛ yãi, akũ à pì a nɛ̀sɛɛ gũn: Ma de ga zã̀ro, gbasa mani ma dakũna dɛ. 42Ò yã kũ Isau ò kɔrɔmɔtɔɔ kɛ̀ Rɛbɛkanɛ, akũ à Yakubu sìsi à pì: Isau ye à fĩna bomma à n dɛ. 43Ǹ ma yã ma sà. Ǹ futɛ ǹ bàa lɛ́ ǹ gɛ́ ma dãgɔ̃ Labã bɛa zaa Arana 44ǹgɔ̃ kú kãao gwe gĩa ari n vĩ̀ni pì pɔfɛ̃ kpátɛ. 45Tó a nɛ̀sɛɛ kpàtɛ, tó yã kũ n kɛ̀nɛɛ sã̀agu, mani gbɛ̃ zĩ ò n gbɛsɛ. Má ye mà kura á gbɛ̃nɔn planɔi pínki gɔrɔ doro.
46Akũ Rɛbɛka pì Isaakunɛ: Iti nɔgbɛ̃nɔ ni bòmagu. Tó Yakubu Iti nɔ sɛ̀ bùsu díkĩnan lán Isau nɔgbɛ̃ birenɔ bà, ma kunna nigɔ̃ nnamɛnɛ doro.
ที่ได้เลือกล่าสุด:
NAANAA 27: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
