NAANAA 23
23
Sara ganaa
1Sara kɛ̀ wɛ̃̀ basuddo awɛɛsuppla, 2gbasa à gà zaa Kiriataba kũ òdi pi tera Ɛblɔnu, Kanaanɔ bùsun. Akũ Ibrahĩ a wɛ̃nda kɛ̀ à ɔ́ɔ dɔ̀ a gana yã musu. 3Kũ à gò a nanɔ gɛ̀ kĩnaa, à gɛ̀ɛ à pì Iti burinɔnɛ: 4Nibɔ kũ gbɛ̃ zĩ̀tɔɔon ma ũ á tɛ́. À zĩtɛ yíama ma gɛ̀vĩki ũ mà gɛ̀ vĩn. 5Akũ Iti burinɔ pìnɛ: 6Mare, ǹ ó yã ma. Luda gbɛ̃ arubarikademɛ n ũ ó tɛ́. Ǹ n gɛ̀ vĩ gbɛ̀wɛɛ kũ à kɛ̀nnɛ mana gũn. Ó gbɛ̃ke ni n tɛ̃ gbɛ̀wɛɛ kũ ĩni n gɛ̀ vĩ a gũnlo. 7Akũ Ibrahĩ fùtɛ à kùtɛ bùsupidenɔnɛ 8à pìńnɛ: À ma yã ma, tó a we mà a gɛ̀ vĩ la. À wɛ́ kɛmɛnɛ Zoa nɛ́ Ɛflɔnua 9à Makpɛla gbɛ̀wɛɛ kũ à kú a bú lɛ́i yíama a ɔgɔa, ani gɔ̃ ma gɛ̀vĩki ũ á bùsun.
10Ɛflɔnu vutɛna ń tɛ́ a wɛ̃tɛ bĩnilɛa gwe, akũ à ò Ibrahĩnɛ Itinɔ wára ń pínki à pì: 11Oi mare, ǹ ma yã ma. Ma n gba bura pì kũ gbɛ̀wɛɛ kũ à kú gweo. Ma n gba ma gbɛ̃nɔ wára. Ma n gbamɛ, de ǹ n gɛ̀ vĩn. 12Ibrahĩ kùtɛ bùsupidenɔnɛ, 13akũ à pì Ɛflɔnunɛ ń pínki wára: Ǹ sã kpá ǹ ma yã ma. Mani bura pì fĩna bonnɛ. Ǹ ma ɔgɔ sí, mani ma gɛ̀ vĩn. 14Akũ Ɛflɔnu pìnɛ: 15Mare, ǹ ma yã ma. Zĩtɛ kũ a ɔgɔ kà andurufu wàa plamɛ, bɔ́n abire ũ ó daguraa? Ǹ n gɛ̀ vĩn. 16Ibrahĩ a yã mà, akũ à andurufu kũ à òo yɔ̃̀nɛ gbɛ̃nɔ wára lagatarinɔ zakaaa. 17Lɛmɛ Ɛflɔnu bú kũ à kú Makpɛla, Mamare sarɛ, gɔ̃̀ Ibrahĩ pɔ́ ũ lɛ kũ gbɛ̀wɛɛ kũ à kú gweo kũ lí kũ ò kú gwenɔ zaa bú pì lɛ́i pínki. 18À gɔ̃̀ Ibrahĩ pɔ́ ũ Iti kũ ò sù wɛ̃tɛ bĩnilɛanɔ pínki wára.
19Abire gbɛra Ibrahĩ a nanɔ vĩ̀ Makpɛla bura gbɛ̀wɛɛ pìi gũn Mamare kũ òdi pi tera Ɛblɔnu sarɛ, Kanaanɔ bùsun. 20Lɛn bú kũ gbɛ̀wɛɛ kũ à de Itinɔ pɔ́ ũ yãoo gɔ̃̀ Ibrahĩnɛ gɛ̀vĩki ũ lɛ.
ที่ได้เลือกล่าสุด:
NAANAA 23: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
