NAANAA 22
22
Isaaku kpana sa'opɔ ũ
1Abire gbɛra Luda Ibrahĩ yɔ̃̀ à gwà à pìnɛ: Ibrahĩ! Akũ à wèa à pì: Makũ di! 2Akũ Luda pìnɛ: Ǹ n nɛ́ mɛ̀n do kũ ń yei Isaaku sɛ́ ǹ gɛ́o Mɔria bùsun, ǹ sa'opɔ kũ òdi ká tɛ́n à tɛ́ kũ o kãao kpi kũ mani onnɛa. 3Kũ à fùtɛ kɔnkɔkɔnkɔ, à gàarii yĩ̀ a zaakinɛ, akũ à a zĩkɛrinɔ sɛ̀ gbɛ̃nɔn pla kũ a nɛ́ Isaaku pìio. À sa'oyakaa pàra, akũ à dà zɛ́n, àtɛn gɛ́ gu kũ Luda ònɛn. 4A gɔrɔ aakɔ̃de zĩ kũ à wɛ́ sɛ̀, à gu pìi è zãa. 5Akũ à pì a zĩkɛri pìnɔnɛ: À gɔ̃ kũ zaakio la. Makũ kũ kɛfɛnna dio óni gɛ́ arɛ ò donyĩ kɛ Ludanɛ, óni ɛra ò su ò á le la. 6Ibrahĩ sa'oyakaa sɛ̀ à dì a nɛ́ pìinɛ, akũ à tɛ́ kũna kũ fɛ̃nɛo, òtɛn gɛ́ lɛɛlɛ. 7Akũ Isaaku yã ò a denɛ à pì: Baa! À wèa à pì: Bɔ́mɛ nɛ́? Akũ à pìnɛ: Ó tɛ́ kũna kũ yàkaao, sãnɛ bɔ̀rɔ kũ óni ká tɛ́n à tɛ́ kũ kú mámɛɛ? 8Akũ Ibrahĩ pì: Ma nɛ́, Luda mɛ́ ani sa'osã kpá. Akũ ò tɛ́kɔ̃i òtɛn gɛ́. 9Kũ ò kà gu kũ Luda ònɛn, à sa'oki bò gwe à yàkaa kpàkpaala, akũ à a nɛ́ pìi yĩ̀ à dì yàkaa pìia sa'oki musu. 10Kũ à fɛ̃nɛ sɛ̀ à ɔ bò de à a nɛ́ pìi kùtu kpá, 11akũ Dikiri Malaika lɛ́ zùi zaa musu à pì: Ibrahĩ! Ibrahĩ! À wèa à pì: Makũ di! 12Akũ à pì: Ǹsun ɔ na nɛ́ pìiaro ǹsun yãke kɛnɛro. Má dɔ̃ sà kũ ń ma vĩna vĩ, ńdi gímɛnɛ kũ n nɛ́ mɛ̀n dooro. 13Ibrahĩ wɛ́ sɛ̀, akũ à sãkaroo è líwaka kà a bɛ̃nɛi. Akũ à gɛ̀ɛ à a kũ̀ à sa'opɔ kũ òdi ká tɛ́n à tɛ́ kũ òo a nɛ́ gɛ̃nɛ ũ. 14Akũ à tɔ́ kpà gu pìinɛ Dikirinikpa, akũ òdigɔ̃ o ari kũ a gbãrao òdi pi: Dikiri ni kpá a kpi musu.
15Dikiri Malaikaa ɛ̀ra à lɛ́ zù Ibrahĩi zaa musu dɔ 16à pì: Makũ Dikiri ma la dà kũ ma kunnaao ma pì, lákũ n yã pìi kɛ̀ nà, ńdi gí kũ n nɛ́ mɛ̀n dooro, 17mani arubarika dangu mà n buri karannɛ lán susunɛnɔ bà, onigɔ̃ dasi lán ísiralɛ bùsu'atɛ̃ bà. N burinɔ nigɔ̃ gbãna vĩ n ibɛrɛnɔa. 18Mani arubarika da andunia buri sĩnda pínkigu n buri gãi, kũ n ma yã mà yãi.
19Kũ Ibrahĩ ɛ̀ra à sù a zĩkɛrinɔ kĩnaa, ò fùtɛ ò tà Bɛsɛba, akũ à gɔrɔ pla kɛ̀ gwe.
20Abire gbɛra ò ò Ibrahĩnɛ ò pì: N vĩ̀ni Nao nanɔ Milika nɛ́gɔ̃gbɛ̃nɔ ì. 21A daudu tɔ́n Uzu. A dakũnanɔ tɔ́n dí: Buzu, Aramu de Kɛmuɛli, 22Kɛsɛdi, Azo, Pilidasa, Yidilafa kũ Bɛtuɛlio. 23Bɛtuɛli pì mɛ́ à Rɛbɛka ì. Nɛ́gɔ̃gbɛ̃ gbɛ̃nɔn sɔraakɔ̃ kũ Milika ì kũ Ibrahĩ vĩ̀ni Naon gwe. 24A nɔ danyĩ Ruma nɛ́nɔ tɔ́n dí: Teba, Gaamu, Tasa kũ Maakao.
ที่ได้เลือกล่าสุด:
NAANAA 22: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
