NAANAA 21
21
Isaaku inaa
1Dikiri arubarikaa dà Saragu lákũ à ò nà, à kɛ̀nɛ lákũ à lɛ́ sɛ̀nɛ nà. 2Akũ à nɔ̀ɔ sì à nɛ́ ì kũ Ibrahĩo gɔ̃gbɛ̃ ũ a zĩkũnaa gũn gɔrɔ kũ Luda dìtɛnɛɛa. 3Ibrahĩ tɔ́ kpà nɛ́ pìinɛ Isaaku. 4À tɔ̃̀ɔ zɔ̃̀nɛ a gɔrɔ sɔraakɔ̃de zĩ lákũ Luda dìtɛnɛ nà. 5À kà wɛ̃̀ basɔɔro a nɛ́ pì igɔrɔa. 6Akũ Sara pì: Luda yáadɔyã kɛ̀mɛnɛ, gbɛ̃ kũ à mà pínki ni yáa dɔ kũmao. 7À pì dɔ: Oni we ò pi Ibrahĩnɛ yã mani gɔ̃ nɛ́rande ũ yá? Akũ ma nɛ́gɔ̃gbɛ̃ ì kãao a zĩkũnaa gũn.
8Kũ nɛ́ pì zɔ̃kɔ̃ kũ̀ à kɛ̃̀ yɔ̃a, akũ Ibrahĩ a kɛ̃na yɔ̃a pɔnna kɛ̀. 9Sara è nɛ́ kũ Misila nɔgbɛ̃ Hazara ì kũ Ibrahĩo dìgɔ̃ Isaaku yáa dɔmɛ, 10akũ à pì Ibrahĩnɛ: Ǹ pɛ́ zɔ̀ɔ pìia kũ a nɛ́o, zaakũ zɔ̀ nɛ́ pì ni túbi ble kũ ma nɛ́ Isaakuoro. 11Yã pìi Ibrahĩ pɔ yàka manamana, zaakũ a nɛ́mɛ, 12akũ Luda pìnɛ: Ǹsun tó n pɔ yaka n nɛ́ kũ n zɔ̀nɔgbɛ̃ pìio yã musuro. Yã kũ Sara tɛn onnɛ pínki ǹ ma, zaakũ Isaaku burinɔn onigɔ̃ pińnɛ n burinɔ ũ. 13Mani tó zɔ̀ nɛ́ pìi buri kɛ se, zaakũ n nɛ́mɛ. 14Akũ Ibrahĩ fùtɛ kɔnkɔkɔnkɔ, à pɔ́ble sɛ̀ kũ í tùruuo à kpà Hazaraa. À dìnɛ, akũ à a nɛ́ kpàa dɔ. À a gbàrɛ, akũ à gɛ̀ɛ àtɛn likara zɔ̃ Bɛsɛba gbárannan. 15Kũ í làkaḿma, à kɛfɛnna pìi tò lí gbáru, 16akũ à gɛ̀ɛ à vùtɛ arɛ kàzulɛtɛki zã̀ lɛ́n, zaakũ à pì á ye à a nɛ́ gana ero. Kũ à gɛ̀ɛ à vùtɛ zã̀ lɛ, akũ à nà ɔ́ɔdɔnaaa.
17Luda kɛfɛnna pì ɔ́ɔ dɔ mà, akũ Luda Malaika lɛ́ zù Hazarai zaa musu à pì: Bɔ́ mɛ́ à n lee Hazara? Ǹsun vĩna kɛro, zaakũ Luda nɛ́ pì ɔ́ɔ dɔ mà gu kũ à kunwa. 18Ǹ futɛ ǹ n nɛ́ pì sɛ́ ǹ a kũ a ɔa, zaakũ mani tó à gɔ̃ buri zɔ̃kɔ̃ ũ. 19Luda nɔgbɛ̃ pì wɛ́ kɛ̃̀nɛ, akũ à lɔ̀gɔɔ è. À gɛ̀ɛ à í tɔ̀ a tùru pa, akũ à sù à kpà a nɛ́ pìia à mì.
20Luda kú kũ nɛ́ pìio ari à zɔ̃kɔ̃ kũ̀. Àdigɔ̃ kú gbárannan, akũ à gɔ̃̀ tofekari ũ. 21Gɔrɔ kũ à kú Parani gbáranna pìi gũnn a da Misila bùsu nɔ sɛ̀nɛ.
Ibrahĩ kũ Abimɛlɛkio lɛ́dokɔ̃nɔkɛnaa
22Gɔrɔ birea Abimɛlɛki kũ a zĩ̀karinɔ gbɛ̃ zɔ̃kɔ̃ Fikɔluo gɛ̀ɛ Ibrahĩ kĩnaa ò pìnɛ: Luda kú kũnwo yã kũ ntɛn kɛ gũn pínki. 23Ǹ la damɛnɛ la gɔ̃̀nɔ ǹ sì kũ Ludao kũ ĩni bo ma kpɛro ke ma nɛ́nɔ ke ma burinɔ. Lákũ ma gbɛ̃kɛ kɛ̀nnɛ nà, ǹ kɛmɛnɛ lɛ kũ bùsu kũ ń kú a gũn gbɛ̃ zĩ̀tɔ ũo. 24Akũ Ibrahĩ pìnɛ: Ma la dànnɛ. 25Akũ Ibrahĩ lɔ̀gɔ kũ Abimɛlɛki gbɛ̃nɔ sìa yã sɛ̀tɛ à ònɛ. 26Abimɛlɛki pì: Má gbɛ̃ kũ ò yã bire kɛ̀nɔ dɔ̃ro, ńdi omɛnɛ yãro, gbãran ma mà. 27Akũ Ibrahĩ sãnɔ kũ zùnɔ kũ̀ à kpà Abimɛlɛkia, akũ ò lɛ́dokɔ̃nɔ kɛ̀ kũ kɔ̃o. 28Akũ Ibrahĩ sãnunu mɛ̀n supplanɔ bò à kàtɛ ńdona. 29Abimɛlɛki a là à pì: Sã mɛ̀n suppla kũ n ń kátɛ ńdona pìnɔ yã de deramɛɛ? 30Akũ à wèa à pì: Ǹ sã mɛ̀n suppla pìnɔ sí sèeda ũ kũ makũ mɛ́ ma lɔ̀gɔɔ pìi yɔ̃̀. 31A yã mɛ́ à tò ò tɔ́ kpà gu pìinɛ Bɛsɛba, zaakũ gwen ò la dànkɔ̃nɛ. 32Lɛn ò lɛ́dokɔ̃nɔ kɛ̀ Bɛsɛba lɛ, akũ Abimɛlɛki kũ a zĩ̀karinɔ gbɛ̃ zɔ̃kɔ̃ Fikɔluo ɛ̀ra ò tà Filisitini bùsun. 33Ibrahĩ sãma lí tɔ̃̀ Bɛsɛba, akũ à Dikiri Luda Gɔrɔsĩndapinkide sìsi gwe. 34Akũ à gɔrɔ pla kɛ̀ Filisitini bùsuu pìi gũn.
ที่ได้เลือกล่าสุด:
NAANAA 21: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
