NAANAA 20
20
Ibrahĩ kũ Abimɛlɛkio
1Akũ Ibrahĩ fùtɛ gwe à gɛ̀ɛ Nɛgɛvi bùsun Kadɛsi kũ Suruo dagura. Kũ à gɛ̀ɛ à vùtɛ Gera, 2à pì a nanɔ Sara bi a dãremɛ, akũ Gera kína Abimɛlɛki gbɛ̃ zĩ̀ à a sɛ̀ à sù kãao. 3Akũ Luda bò à sù Abimɛlɛkia nana gũn gwãani à pìnɛ: Ĩni ga nɔ kũ n sɛ̀ɛ pì yãi, zaakũ nɔzãremɛ. 4À sù à lè Abimɛlɛki dí wútɛ kãao kɔ̀ro, akũ à pì: Dikiri, ĩni buri kũ odi yãke kɛronɔ dɛdɛn yá? 5Àkũ mɛ́ à pìmɛnɛ a dãrenloo? Nɔgbɛ̃ pì sɔ̃ à pì a dãgɔ̃mɛ. Ma yã kɛ̀ a zɛ́amɛ, má taari vĩro. 6Akũ Luda pìnɛ nana pìi gũn: Ee, má dɔ̃ kũ n yã kɛ̀ a zɛ́amɛ. A yã mɛ́ à tò, ma kpannɛ ǹ durunna kɛmɛnɛ, mádi we n ɔ nà nɔgbɛ̃ pìiaro. 7Tera sà, à gɔ̃gbɛ̃ pì nɔ kpáa, zaakũ annabiimɛ. Ani adua kɛnnɛ de ǹ gɔ̃ aafia. Tó ńdi a nɔ pì kpáa sɔ̃ro, ǹgɔ̃ dɔ̃ kũ n gamɛ, mɔkɔ̃n kũ n gbɛ̃nɔ á pínki.
8Akũ Abimɛlɛki fùtɛ kɔnkɔkɔnkɔ, à a gbɛ̃nɔ sìsi à yã pì bàbańnɛ ń pínki, akũ vĩna ń kũ manamana. 9Akũ Abimɛlɛki Ibrahĩ sìsi à pìnɛ: Bɔ́yãi n kɛ̀wɛrɛ lɛɛ? Bɔ́ taarin ma kɛ̀nnɛ gbasa n tò ma gɔ̃ durunnade ũ kũ ma bùsuuo? N yã kũ à de ò kɛro kɛ̀mɛnɛ. 10Bɔ́ laasun n lɛ̀ gbasa n yã pìi kɛ̀ɛ? 11Ibrahĩ wèa à pì: Matɛn da yã gbɛ̃ke Luda vĩna vĩ bùsu díkĩna gũnlo, oni ma dɛ ma nanɔ yãimɛ. 12Abire gbɛra nɔgbɛ̃ pì bi ma dãremɛ yãpura. Ó de dokɔ̃nɔmɛ, baadi kũ a dao, akũ à gɔ̃̀ ma nɔ ũ. 13Kũ Luda ma bo ma de bɛa yã, matɛn likara, akũ ma pì ma nɔ pìinɛ gu kũ óni gɛ́n pínki, à gbɛ̃kɛ kɛmɛnɛ àgɔ̃ pi a dãgɔ̃n ma ũ. 14Akũ Abimɛlɛki sù kũ sãnɔ kũ zùnɔ kũ gɔ̃gbɛ̃ zĩkɛrinɔ kũ nɔgbɛ̃ zĩkɛrinɔ à kpà Ibrahĩa, akũ à a nanɔ ɛ̀ranɛ. 15Akũ Abimɛlɛki pì: Ma bùsun dí, ǹ vutɛ gu kũ ń yein. 16Akũ à pì Saranɛ: Ma andurufu ɔgɔ wàa sɔɔro kpà n dãgɔ̃a kútɛkɛbɔ ũ, de gbɛ̃ kũ ò kú kũnwonɔ dɔ̃ ń pínki kũ ńdi taari kɛro. 17Akũ Ibrahĩ wɛ́ kɛ̀ Ludaa, akũ Luda Abimɛlɛki gbà aafia kũ a nanɔo kũ a nɔ yìgisaridenɔ, de ò nɛ́ i, 18zaakũ Dikiri tò Abimɛlɛki bɛ nɔgbɛ̃nɔ para kũ̀ yã Ibrahĩ nanɔ yã musu.
ที่ได้เลือกล่าสุด:
NAANAA 20: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
