NAANAA 19
19
Sɔdɔmu kũ Gɔmɔrao kakatɛnaa
1Kũ malaika gbɛ̃nɔn pla pìnɔ kà Sɔdɔmu ɔkɔsi, Lutu vutɛna Sɔdɔmu bĩni kpɛ́lɛlɛa. Kũ à ń é, à fùtɛ à gɛ̀ɛ à dàńlɛ à kùtɛńnɛ à wùtɛ a nɛ̀sɛlɛ kutɛna 2à pì: Ma dikirinɔ, á yã nna! À mɔ́ à gɛ́ kipa makũ á zɔ̀bleri bɛa. À zú o à i la, zia kɔnkɔ káakukaaku á da zɛ́n. Ò pì: Oi, óni i gãnulɛamɛ. 3Lutu nàkaraḿma manamana, akũ ò gɛ̃̀ a kpɛ́n. À ń yàrii kɛ̀ manamana à masaa kɛ̀ńnɛ, akũ ò sò.
4Ari ògɔ̃ gɛ́ wútɛ, Sɔdɔmudenɔ lìka Lutu kpɛ́i. Wɛ̃tɛ pì gɔ̃gbɛ̃nɔ kàkara gwe mámmam, kɛfɛnnanɔ kũ gbɛ̃ zɔ̃kɔ̃nɔ ń pínki. 5Ò lɛ́ zù Lutui ò pì: Gɔ̃gbɛ̃ kũ ò kìpa n bɛa ɔkɔsialanɔn kú máa? Ǹ bɔtɛ kũńwowɛrɛ, ò pãpã kɛ kũńwo. 6Lutu bò à zɛ̀ kpɛ́lɛlɛa ń kĩnaa, à gbàa tàta kũ kpɛo 7à pì: Á'a ma gbɛ̃nɔ, àsun yã bɛ̃̀nɛ kɛro. 8Má nɛ́nɔgbɛ̃nɔ vĩ gbɛ̃nɔn pla kũ ò gɔ̃gbɛ̃ dɔ̃ro, mani ń bɔtɛárɛ. Lákũ á yei nà à kɛ kũńwo, ama àsun yãke kɛ gɔ̃gbɛ̃ díkĩnanɔnɛro, zaakũ ò kìpa ma bɛamɛ. 9Ò pìnɛ: Ǹ gowɛrɛ gwe! Akũ ò pì dɔ: Gbɛ̃ dí bi gbɛ̃ zĩ̀tɔɔmɛ, akũ à ye à kɛ ó yãkpatɛkɛri ũ. Óni yã vãni kɛnnɛ de ń pɔ́la. Akũ ò kùsia kũ gbãnao, òtɛn su kpɛ́ gbàa gboro. 10Akũ gbɛ̃nɔn pla pìnɔ ɔ bò ò Lutu kũ̀ ò gɛ̃̀ kãao kpɛ́n, akũ ò zɛ́ tàta. 11Ò tò vĩ̀na gbɛ̃ kũ ò kú kpɛ arɛnɔ kũ̀ ń pínki nɛ́ fíti gbɛ̃ zɔ̃kɔ̃, akũ òtɛn kpɛ́ gbà wɛtɛ ari ò kpàsa. 12Gbɛ̃nɔn pla pìnɔ pì Lutunɛ: Dí ń vĩ la dɔɔ? Nɛ́gɔ̃gbɛ̃nɔ, nɛ́nɔgbɛ̃nɔ, n nɛ́ anzurenɔ kũ gbɛ̃ kũ ò de n gbɛ̃ ũnɔ wɛ̃tɛ gũn ń pínki. Ǹ bɔtɛ kũńwo, 13zaakũ o su ò gu dí kakatɛmɛ. Yã vãni kũ òtɛn o wɛ̃tɛpidenɔ musu gɛ̃̀ Dikiri sãn, akũ à ó zĩ ò wɛ̃tɛ pì kakatɛ. 14Lutu bò à gɛ̀ɛ à ò a nɛ́nɔ anzurenɔnɛ à pì: À futɛ ò bɔtɛ, zaakũ Dikiri ni wɛ̃tɛ dí pì kakatɛ teramɛ. Akũ òtɛn da àtɛn fàai bomɛ.
15Kũ gu dɔ̀ malaikaa pìnɔ nàkara Lutua ò pì: Ǹ futɛ ǹ n nanɔ kũ n nɛ́nɔgbɛ̃ gbɛ̃nɔn pla dínɔ sɛ́tɛ ǹ bɔtɛ kũńwo la, de ǹsun ga wɛ̃tɛ pì kakatɛnaa gũnlo yãi. 16Kũ Lutu tɛn sika kɛ, Dikiri a wɛ̃nda bò, akũ gbɛ̃nɔn pla pìnɔ a kũ̀ a ɔa kũ a nanɔo kũ a nɛ́nɔgbɛ̃ gbɛ̃nɔn planɔ, ò bɔ̀tɛ kũńwo wɛ̃tɛ kpɛ. 17Kũ ò bɔ̀tɛ kũńwo lɛ, akũ malaikaa pìnɔ do pì Lutunɛ: Ǹ bàa lɛ́ ǹ n zĩda mì sí. Ǹsun kpɛ gwaro. Ǹsun zɛ guvutɛ pìi gũnlo. Ǹ bàa lɛ́ ǹ mì pɛ́ kpinɔa de ǹsun garo yãi. 18Akũ à pìńnɛ: Oi ma dikiri! N yã nna! 19Makũ n zɔ̀bleri ma n pɔnna lè, n gbɛ̃kɛ kɛ̀mɛnɛ manamana n ma mìi sì. Ama mani fɔ̃ mà bàa lɛ́ mà kpi pìnɔ kĩnaa lero. Ari màgɔ̃ gɛ́ ká gwe, kakatɛnaa pì ni ma le mà ga. 20Ǹ lakutu ke gwa zã̀ dire. Lákũ à kãni nà, mani fɔ̃ mà bàa lɛ́ mà gɛ́ gwe. Lakutu fítimɛ sɔ̃. Ǹ tó mà bàa sí mà tá gwe, manigɔ̃ aafia. Asa à fítiroo? 21Akũ à pìnɛ: Ma n gba zɛ́, mani lakutu kũ ntɛn o pì kakatɛro. 22Ǹ bàa lɛ́ ǹ tá gwe likalika, zaakũ mani yãke kɛ gĩaro ari ǹ gɛ́ káo gwe. A yã mɛ́ à tò, ò tɔ́ kpà lakutu pìinɛ Zoa.
23Kũ Lutu Zoa lè, ifãntɛ̃ tɛn bo, 24akũ Dikiri tò tɛ́ kũ ifãntɛ̃gbɔ̃ɔo bò musu à kà Sɔdɔmu kũ Gɔmɔraola. 25À wɛ̃tɛ pìnɔ kàkatɛ kũ gbɛ̃nɔ kũ guvutɛ pìio kũ línɔ kũ sɛ̃̀nɔ pínki. 26Kũ Lutu nanɔ a kpɛ gwà, akũ à lì à gɔ̃̀ zɛna wisi gbɛ̀ ũ.
27Kũ gu dɔ̀, Ibrahĩ fùtɛ kɔnkɔkɔnkɔ, à gɛ̀ɛ gu kũ à kun yã kũ Dikirioo pìn. 28Kũ à Sɔdɔmu kũ Gɔmɔrao kpa gwà kũ guvutɛ pìio pínki, à è túsukpɛ tɛn futɛ zĩtɛ lán tãmatɛ túsukpɛ bà. 29Lɛmɛ kũ Luda guvutɛ kũ Lutu kunwa wɛ̃tɛnɔ kàkatɛ lɛ, Ibrahĩ yã dɔ̀n, akũ à Lutu bò wɛ̃tɛ kũ à kàkatɛ pìnɔ gũn.
Lutu burinɔ
30Kũ Lutu bò Zoa, à gɛ̀ɛ à vùtɛ kpinɔ tɛ́ kũ a nɛ́nɔgbɛ̃ gbɛ̃nɔn planɔ, kũ à kunna Zoa vĩna vĩ yãi. Akũ à gɔ̃̀ kú gbɛ̀wɛɛn kũ a nɛ́nɔgbɛ̃ pìnɔ. 31Akũ Yɔ̃ɔ pì Bãnanɛ: Ó de zĩ kũ̀, akũ gɔ̃gbɛ̃ ke kú bùsun à wútɛ kũoo lákũ òdi kɛ nàro. 32Ǹ mɔ́ ò sèwɛ̃ kákanɛ ó wútɛ kãao, de ògɔ̃ ó buri le a gãi. 33Gwãani birea ò wɛ̃ kàkanɛ, akũ Yɔ̃ɔ gɛ̀ɛ à wùtɛ kãao. Lutu dí dɔ̃ gɔrɔ kũ à wùtɛ kãao ke gɔrɔ kũ à fùtɛro.
34Kũ gu dɔ̀ Yɔ̃ɔ pì Bãnanɛ: Ma wutɛ kũ ma deo gĩa. Ò wɛ̃ kákanɛ ɔkɔsiala dɔ, ĩni gɛ́ ǹ wútɛ kãao, de ògɔ̃ ó buri le a gãi. 35Gwãani birea dɔ ò wɛ̃ kàkanɛ, akũ Bãna gɛ̀ɛ à wùtɛ kãao. Lutu dí dɔ̃ gɔrɔ kũ à wùtɛ kãao ke gɔrɔ kũ à fùtɛro. 36Lɛmɛ Lutu nɛ́nɔgbɛ̃ gbɛ̃nɔn pla pìnɔ kɛ̀ lɛ ò nɔ̀ɔ sì kãao. 37Yɔ̃ɔ nɛ́ ì gɔ̃gbɛ̃ ũ, akũ à tɔ́ kpànɛ Mɔabu. Àkũmɛ Mɔabu buri kũ ò kun ari gbãranɔ dizi káaku ũ. 38Bãna nɛ́ ì gɔ̃gbɛ̃ ũ se, akũ à tɔ́ kpànɛ Aminɛ. Àkũmɛ Amɔni buri kũ ò kun ari gbãranɔ dizi káaku ũ.
ที่ได้เลือกล่าสุด:
NAANAA 19: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
