NAANAA 24
24
Nɔwɛtɛna Isaakunɛ
1Ibrahĩ zĩ kũ̀ a gɔrɔnɔ kà zã̀, akũ Dikiri arubarikaa dàagu yã sĩnda pínki gũn. 2Akũ à ò a zĩkɛrinɔ gbɛ̃ zɔ̃kɔ̃ kũ à de a pɔ́ sĩnda pínki yãgɔ̃gɔ̃ri ũnɛ à pì: Ǹ ɔ sɔtɔ ma gbáda gbáru, 3mani tó ǹ la da kũ Dikiri, musu kũ zĩtɛo Luda tɔ́o kũ ĩni Kanaa kũ má kú ń tɛ́nɔ nɔ sɛ́ ma nɛ́nɛro. 4Ǹ gɛ́ ma bɛ bùsun ma danɛnɔ gũn, ǹ nɔ sɛ́ ma nɛ́nɛ gwe. 5Akũ a zĩkɛrii pì a là à pì: Tó nɔgbɛ̃ pì dí we à tɛ̀mai à sù kũmao bùsu díkĩnan sɔ̃ro bi? Mani gɛ́ kũ n nɛ́o bùsu kũ n bonn yá? 6Ibrahĩ pìnɛ: Ǹ laakari kɛ! Ǹsun gɛ́ kũ ma nɛ́o gwero. 7Dikiri Luda Musude ma bo ma de bɛa ma danɛnɔ bùsun, akũ à yã òmɛnɛ à la dà à pì, áni bùsu díkĩna kpá ma burinɔamɛ. Àkũ mɛ́ ani a Malaika zĩ à donnɛ arɛ. Gwen ĩni nɔ sɛ́n ma nɛ́nɛ. 8Tó nɔgbɛ̃ pì dí we à tɛ̀nyĩro, n bo ladana kũ n la dàmɛnɛ dí gũn. Ǹsun gɛ́ gwe kũ ma nɛ́oro fá! 9Akũ a zĩkɛrii pì a ɔ sɔ̀tɔ a dikiri gbáda gbáru, à la dànɛ yã pìi musu.
10Zĩkɛrii pì a dikiri lakuminɔ sɛ̀ mɛ̀n kuri kũ a dikiri aruzɛkɛ buri pínkio, akũ à fùtɛ à gɛ̀ɛ Nao bɛ wɛ̃tɛn zaa Siria Mɛsɔpɔtamia bùsun. 11Kũ à kà gwe, à tò lakuminɔ kámma bò lɔ̀gɔɔ sarɛ wɛ̃tɛ kpɛ. Kũ ɔkɔsi kɛ̀, gɔrɔ kũ nɔgbɛ̃nɔ dì bɔtɛ í tɔ́, 12akũ à adua kɛ̀ à pì: Dikiri, ma dikiri Ibrahĩ Luda, ǹ gbɛ̃kɛ kɛ ma dikiriinɛ ǹ tó ma tá kɛ nna ɔkɔsiala. 13Ǹ gwa, má zɛna lɔ̀gɔɔ sarɛ. Tó wɛ̃tɛ nɔkparenɔ bɔ̀tɛ í tɔ́, 14nɔkpare kũ ma ònɛ à a lo kipa à í tɔ́mɛnɛ mà mi, tó à pìmɛnɛ mà mi, akũ à kpà ma lakuminɔa dɔ, de mani dɔ̃ kũ n gbɛ̃kɛ kɛ̀ ma dikiriinɛ, nɔgbɛ̃ kũ n dìtɛ n zɔ̀bleri Isaaku pɔ́ ũn gwe. 15Adi yã pì o à làkaro, akũ Bɛtuɛli nɛ́ Rɛbɛka bò kũ loo dina a gã̀n. Bɛtuɛli bi Ibrahĩ vĩ̀ni Nao nɛ́ kũ à ì kũ a nanɔ Milikaomɛ. 16Nɛ́ pì mana akũsɔ̃ à bũnumɛ, gɔ̃gbɛ̃ ke dí wutɛ kãao zikiro. À sù lɔ̀gɔ kĩnaa, à í tɔ̀ à a lo pà, akũ à ɛ̀ra àtɛn tá. 17Akũ zĩkɛrii pìi bàa lɛ̀ à gɛ̀ɛ à zɛ́ zɔ̃̀nɛ à pì: Ǹ ma gba í mà mi, bee fíti. 18Nɔgbɛ̃ pìi pì: Ǹ mi Baa! Akũ à a lo kìpa gɔ̃̀nɔ, à í kpàa à mì. 19Kũ à í kpàa à mì à làka, à pì: Mani tɔ́ n lakuminɔnɛ dɔ, ò mi ari ò kã. 20Akũ à a lo í kà pɔ́nɔ ímibɔn gɔ̃̀nɔ, à ɛ̀ra à bàa lɛ̀ à gɛ̀ɛ à í tɔ́ lɔ̀gɔn, akũ à í tɔ̀ lakuminɔnɛ pínki. 21Gɔ̃gbɛ̃ pì zɛna àtɛni a gwa tíii, de à le à dɔ̃ tó Dikiri ni tó a tá kɛ nna, ke ani kɛ nnaro. 22Kũ lakuminɔ í mì ò làka, akũ gɔ̃gbɛ̃ pì wura tãnka mana dà nɔ pìinɛ a yĩa, à wura zã dànɛ mɛ̀n pla. Tãnka pìi tìkisii kà giramu sɔɔro, zã pìnɔ sɔ̃ giramu basɔsɔɔro. 23Akũ à a là à pì: Ǹ omɛnɛ, dí nɛ́mɛ n ũu? Óni iki e n de bɛa yá? 24Akũ à wèa à pì: Bɛtuɛli nɛ́n ma ũ, Milika kũ Nao daikore. 25Sɛ̃̀ kũ tàragaao din ó bɛa, akũ iki kun dɔ. 26Akũ gɔ̃gbɛ̃ pìi kùtɛ à donyĩ kɛ̀ Dikirinɛ à pì: 27Dikiri ma dikiri Ibrahĩ Luda arubarika vĩ kũ adi gí gbɛ̃kɛ kũ náanio yã kɛnɛro yãi. Makũ sɔ̃, Dikiri dòmɛnɛ arɛ ma dikiri danɛnɔ bɛa.
28Akũ nɔkpare pìi bàa lɛ̀ à gɛ̀ɛ à yã pì gbã̀ a ɔndenɔnɛ. 29Rɛbɛka pì dãgɔ̃ vĩ kũ òdi pinɛ Labã. À bò wɛ̃tɛ kpɛ kũ bàao à gɛ̀ɛ à gɔ̃gbɛ̃ pìi lè lɔ̀gɔ lɛ́a, 30zaakũ à è a dãre tãnka kũ zão dana, akũ à yã kũ gɔ̃gbɛ̃ pìi ònɛɛ mà. Kũ à gɛ̀ɛ à a lè kũ lakuminɔ lɔ̀gɔ lɛ́a, 31à pì: Ǹ mɔ́ mɔkɔ̃n kũ Dikiri arubarikaa dàngu! À kɛ̀ dera ń zɛna wɛ̃tɛ kpɛɛ? Ma kpɛ́ kɛ̀kɛnnɛ kũ lakuminɔ bàdɔkio. 32Gɔ̃gbɛ̃ pìi gɛ̃̀ ɔnn, akũ Labã lakuminɔ aso pòro à sɛ̃̀la kori kũ tàragaao kpàḿma à í kpà gɔ̃gbɛ̃ pìia à a gbá pípio kũ a gbɛ̃nɔ ń pínki.
33Ò pɔ́ble dìtɛnɛ, akũ à pì: Mani pɔ́ ble gĩaro ari mà yã kũ ma suo o. Akũ Labã pì: Ǹ o. 34Akũ à pì: Ibrahĩ zĩkɛriimɛ ma ũ. 35Dikiri arubarikaa dà ma dikiriinɛ manamana, akũ à gɔ̃̀ aruzɛkɛde ũ. À a gbà sãnɔ kũ zùnɔ kũ andurufuuo kũ wuraao kũ gɔ̃gbɛ̃ zĩkɛrinɔ kũ nɔgbɛ̃ zĩkɛrinɔ kũ lakuminɔ kũ zaakinɔ. 36Ma dikirii pì nanɔ Sara nɛ́ ì gɔ̃gbɛ̃ ũ a zĩkũnaa gũn, akũ ma dikiri pɔ́ kũ à vĩ kpà nɛ́ pìia pínki. 37Ma dikirii tò ma la dà, zaakũ à pì màsun Kanaa kũ à kú ń tɛ́nɔ nɔ sɛ́ a nɛ́nɛro. 38À pì mà gɛ́ a de bɛa a buri gũn mà nɔ sɛ́ a nɛ́nɛ gwe. 39Akũ ma a dikirii là ma pì, tó nɔgbɛ̃ pì dí we à tɛ́mai sɔ̃ro bi? 40À wèma à pì, Dikiri kũ a táa ò kãao mɛ́ ani a Malaika zĩ à gɛ́ zɛmɛnɛ, de ma tá kɛ nna, mani nɔ sɛ́ a nɛ́nɛ a de bɛ danɛnɔ tɛ́. 41À pì tó ma gɛ a buri kĩnaa, tó odi wero, mani bo ladana kũ ma la dàarɛ gũn. 42Kũ ma ka lɔ̀gɔ kĩnaa gbãra ma pì: Dikiri, ma dikiri Ibrahĩ Luda, tó n we, ǹ tó ma tá kɛ nna. 43Má kú lɔ̀gɔ lɛ́a. Nɔkpare kũ à sù í tɔ́, akũ ma pìnɛ à ma gba í fíti mà mi, 44tó à pì mà mi, akũ à tɔ̀ ma lakuminɔnɛ dɔ, mani dɔ̃ kũ nɔkpare kũ n dìtɛ à kɛ ma dikiri nɛ́ pɔ́ ũn gwe. 45Ari màgɔ̃ yã pì o ma nɛ̀sɛɛ gũn mà láka, akũ Rɛbɛka bò kũ loo dina a gã̀n à sù lɔ̀gɔ lɛ́a à í tɔ̀. Akũ ma pìnɛ à ma gba í mà mi. 46À a lo kìpa gɔ̃̀nɔ, à pì mà mi áni kpá ma lakuminɔa dɔ. Kũ ma mì, akũ à kpà ma lakuminɔa. 47Akũ ma a la, dí nɛ́n a ũu? À pì Bɛtuɛli nɛ́n a ũ, Milika kũ Nao daikore. Akũ ma tãnka dànɛ a yĩa, ma zã dànɛ a ɔnɔa. 48Akũ ma kutɛ ma donyĩ kɛ̀ Dikiri ma dikiri Ibrahĩ Ludanɛ ma sáabu kpàa, zaakũ à dòmɛnɛ arɛ zɛ́ súsu gũn, de mà a dikiri vĩ̀ni daikore sɛ́ a nɛ́nɛ. 49Tera sà tó áni we à gbɛ̃kɛ kũ náanio yã kɛ ma dikiriinɛ, à omɛnɛ. Tó ádi we sɔ̃ro, à omɛnɛ, mani gɛ́ gu pãndea. 50Labã kũ Bɛtuɛlio wèa ò pì: Yã pìi bò Dikiri kĩnaamɛ, ó yãke ona vĩro, a mana ke a vãni. 51Rɛbɛkan dí, ǹ a sɛ́ ǹ tá kãao, à gɔ̃ n dikiri nɛ́ nanɔ ũ lákũ Dikiri ò nà. 52Kũ Ibrahĩ zĩkɛrii pì ń yã mà, à wùtɛ zĩtɛ Dikirinɛ. 53Akũ à nɔmanablebɔ kũ ò kɛ̀ kũ andurufuuo kũ wuraao kũ pɔ́kasanɔ bɔ̀tɛ à kpà Rɛbɛkaa. À a vĩ̀ni kũ a daoo gbà pɔ́ ɔgɔdenɔ dɔ. 54Akũ àpii kũ gbɛ̃ kũ ò kú kãaonɔ pɔ́ blè ò í mì, akũ ò ì gwe.
Kũ ò fùtɛ kɔnkɔ à pì: À ma gbarɛ mà tá ma dikiri kĩnaa. 55Nɔ vĩ̀ni kũ a dao pì: Ǹ tó nɛ́ pì gɔ̃ kũoo bee gɔrɔ kuri, á gbasa à tá. 56Akũ gɔ̃gbɛ̃ pìi pìńnɛ: Lákũ Dikiri ma tá kɛ̀ nna nà lán dí bà, àsun ma dãdã doro. À ma gbarɛ mà tá ma dikiri kĩnaa. 57Akũ ò pì: Ò nɛ́ pì sísi ò a la. 58Akũ ò Rɛbɛka sìsi ò a là ò pì: Ĩni tá kũ gbɛ̃ pìio yá? Akũ Rɛbɛka pì: Mani tá kãao. 59Akũ ò Rɛbɛka gbàrɛ kũ a gwàri kũ à a gwà zaa a fítinna zĩo, òtɛn tá kũ Ibrahĩ zĩkɛriio kũ a gbɛ̃nɔ. 60Ò sa mana ò Rɛbɛkanɛ ò pì:
Nɛ́, Luda tó ǹ gɔ̃ gbɛ̃ dasinɔ dai ũ,
n burinɔ gɔ̃ gbãna vĩ ń zãngurinɔa.
61Akũ Rɛbɛka fùtɛ kũ a nɔgbɛ̃ zĩkɛrinɔ, ò dì lakuminɔ kpɛ ò tɛ́ gɔ̃gbɛ̃ pìii, akũ à tà kũńwo.
62A sù à lè Isaaku sù kũ lɔ̀gɔ kũ òdi pi Ludabɛ̃nɛkũadima'eo à vùtɛ Nɛgɛvi bùsun. 63À bò à gɛ̀ɛ à laasun lɛ́ sɛ̃̀n ɔkɔsi, akũ kũ à wɛ́ sɛ̀, à è lakuminɔ tɛn su. 64Rɛbɛka wɛ́ sɛ̀ à Isaaku è se, akũ à kìpa a lakumi kpɛ likalika 65à zĩkɛrii pìi là à pì: Dín gɔ̃gbɛ̃ kũ àtɛn kure sɛ̃̀n àtɛn su daolɛ zã̀ dire ũu? Akũ zĩkɛrii pìi wèa à pì: Ma dikiriimɛ. Akũ Rɛbɛka a pɔ́dangãnn sɛ̀ à kù a ãnnwa. 66Kũ ò kà Isaaku kĩnaa, zĩkɛrii pì yã kũ à kɛ̀ɛ bàbanɛ pínki. 67Isaaku gɛ̃̀ kũ Rɛbɛkao a da Sara bizakutan, akũ à a sɛ̀ à gɔ̃̀ a nɔ ũ. À ye nɔ pìii, akũ a laakari kpatɛna a da ga gbɛra.
ที่ได้เลือกล่าสุด:
NAANAA 24: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
