اِنجیل مَتّی 15
15
دَبِن و حُکمِن
1دومله ایی گروه فریسی فِرقه عُلما و توراتی معلِمِن، اورشلیمی شهری کا اومینَه عیسی وَر و واتِشونَه: 2«چیرا اِشتِه شاگِردِن، مشایخی دَبون رعایت نِکَرِن؟ اَوِن غَذا هَردِه پیش اِشتَن دَسون نِشورن.» 3عیسی جَواو دوشَه: «شِمَه اِشتَن چیرا شِمَه دَبی واسی، خِدا حُکمی رعایت نِکَرَه؟ 4چوم خِدا حُکم کَردَشه: ”اِشتِه دَده و نَنه حُرمت بِکَه“ و هِنتَه نی ”هَر کسی اِشتَن دَده یا نَنه فَش بِدَه، بَسی کِشتَه بِبو.“ 5امّا شِمَه بَواتیرون اَگم کسی اِشتَن دَده نَنه نَه بوآجِه: ”هَر کمکی که بَسی شِمَه بِکَرِم، خِدا وقف اِستَه،“ 6اِنتَه، دِ اَ آدَمی را واجب نییَه اِشتَن دَده نَنه کمک کَردِه نَه اَوون حُرمت بِکَرِه. اِنتَه، شِمَه دَبی واسی، خِدا کلامی باطل آکَرَه. 7اِی دِ دیمِن! اِشعَیای پیغمبر شِمَه درباره چِه چاک پیشگویی کَردِشه، اَ موقع که واتِشه:
8«”اِم قوم اِشتَن زَوونی نَه مِن حُرمت بَناین،
امّا چَوون دیل بَه مِن کا دورَه.
9اَوِن بیخودی مِن پرستش بَکَردین،
اَوِن اِنسانی یَه حُکمون، خِدا اَحکامی عوض مردمی یاد بَداین.“»
چِه چی آدَمی نِجِس بَکَردی
10دومله عیسی اَ جماعتی دَخوندِشه اِشتَن وَر و اَوون نَه واتِشه: «گوش بِدییَه و بِفَهمَه. 11اَ چیی که آدَم بَردی آدَمی نِجِس آنِکَرِه. بَلکَم اَ چیی که چَیی گَ کا بِرون بومَی، اَ اِستَه که آدَمی نِجِس بَکَردی.» 12اِم موقع، شاگِردِن اومینَه عیسی وَر و واتِشونَه: «بَزنیش که فریسییِن اِشتِه اِم گفی کا ناراحت آبَیینَه؟» 13عیسی جَواو دوشَه: «هَر نَهالی كه چِمِن آسِمونی یَه دَده کاشتَش مَبو، بِنَه نَه بِرون بومَی. 14اَوون وِل آکَرَه. اَوِن راه بَلدونی اِستینَه که اِشتَن کوری نَه. اَگم ایلَه کور ایلَه دییَر کوری راه بَلد بِبو هَر دِ نفر چا دیلَه کا دَلَکِن.» 15پطرس عیسی نَه واتِشه: «اِم مَثَّلی مَعنی اَمَه را بوآج.» 16عیسی واتِشه: «مَگم شِمَه نی حَلا درک نِکَرَه؟ 17مَگم نیمَزنَه آدَم هَر چیی که بَردی، بَشی اِشکمی دیلَه و چَیی پَش دَفع بَبی؟ 18امّا اَ چیی که گَ کا بِرون بومَی دیلی کا بِرون بومَی. و اِمَه، اَ چیی که آدَمی نِجِس بَکَردی. 19چوم دیلی کا، پلیده فیکرِن، قَتل، زِنا، بی عفتی، دِزدی، دورعَه شهادتی و بُختون بِرون بومَی. 20امِ چییِنی نَه که آدَمی نِجِس بَکَردین. اَنشوره دَسون نَه غَذا هَردِه هیچکسی نِجِس آنِکَرِه.»
کنعانی یَه ژِنی ایمان
21عیسی اوآنَه راه دَلَکه شَه صور و صیدونی منطقه اون طرفی را. 22ایلَه ژِن کنعانی که اَ منطقه اَهالی کا بَه، اومَه عیسی وَر و بِلندَه سَسی نَه واتِشه: «اِی آقا، اِی داوود پاُتشا زوعَه، بَه مِن رَحم بِکَه! ایلَه دیوی چِمِن کِلَه بَرک گیریفتار کَردَشه.» 23امّا عیسی ایی کلمه نی چَیی جَواوی نِدوشَه. عیسی شاگِردِن اومینَه عیسی وَر و اَیی کا خواهیشت کَردِشونَه و واتِشونَه: «اَ ژِنَکی ویسا آکَه بِدا بِشو، چوم خِلِع خِلِع نَه چَمَه دومله بومَی.» 24عیسی جواو دوشَه: «اَز فقط قوم اِسرائیلی ژون آبَه گوسَندون را ویسا آبَییمَه.» 25امّا اَ ژِن اومَه و عیسی ناری کا زِنگ ژَندِشَه و واتِشه: «اِی آقا، بَه مِن کمک بِکَه!» 26عیسی جَواو دوشَه: «درست نییَه خِردَنون نونی ویگِری و اِسبَه اون ناری کا ویکَری.» 27اَ ژِن واتِشه: «بله، آقا، امّا اِسبَه اِن نی اِشتَن صاحیبی سِفره کا پَس مَندَه غذایی که ویبو، بَردین!» 28اَ موقع عیسی واتِشه: «اِی ژن، اِشتِه ایمان وِرَه! اِشتِه پیستَه اَنجام بَبی!» هَ لحظه اَ ژِنی کِلَه شفا گِتِشه.
عیسی وِر کسون شفا بَدای
29عیسی اَوآ کا راه دَلَکه شَه جلیلی دریاچه طرفی را. جلیلی دریاچه وَری کا تِلی راه شَه، دومله پِشَه ایلَه کویی کَفا و اوآکا نِشته. 30وِرَه جماعتی اومینَه عیسی وَر. اَوِن اِشتَن نَه شِلون، کورون، اِفلیجون و لالون و دییَر وِرَه مریضون نی وَردِشونَه، عیسی پا ناری کا نوشونَه و عیسی اَوون شفا دوشَه. 31مردم وختی ویندِشونَه لالِن گَف ژَنِن، اِفلیجِن سالِم آبون، شِلِن راه بَشین و کورِن بَویندین، تعجب کَردِشونَه و اِسرائیلی خِدا ستایش کَردِشونَه.
چهار هَزار نفری غذا دوعِه
32عیسی اِشتَن شاگِردون دَخوندِشه اَوون نَه واتِشه: «اِم مردمی را چِمِن دیل سوجه، چوم اوری سِه روزه اَوِن مِنَه ایینَه و چیی هَردِه را نیشونَه. اَز نِپیستِمَه اَوون وِشی ویسا آکَرِم، مَبادا راه کا ضعف بِکَرِن.» 33شاگِردِن جَواو دوشونَه: «اِم دور افتاده جِگا کا، کییاکا بَشایمون اِم وِرَه جماعتی سیر آکَردِه را نون فراهم بِکَرَم؟» 34عیسی دَفَرسِشه: «چَن گِله نون هِستِرونَه؟» اَوِن جَواو دوشونَه: «هفت گِله نون و چَن گِله روکَه مایی.» 35عیسی مردمی نَه واتِشه زمینی سَری کا بِنِشِن. 36اَ موقع هفت گِله نون و چَن گِله ماییون پِگِتِشه و شُكور کَردِه پَش اَوون پَله کَردِشه، اِشتَن شاگِردون آدوشَه و شاگِردِن نی آدوشونَه مردمی. 37گِرد هَردِشونَه و سیر آبینَه، اَوِن نون و مایی تیکه خوردَه اون کا که مَنده بَه، هفت گِله سَبد پُور جمع آکَردِشونَه. 38کسونی تعداد که غذا هَردِشونَه، ژِنَکون و خِردَنون غِیراز، چار هَزار گِله مِرد بَه. 39بعد اَز اِم که عیسی مردمی ویسا آکَردِشه شینَه، لوتکا دَنِشته و شَه مَجَدانی ناحیه را.
Айни замон обунашуда:
اِنجیل مَتّی 15: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company