اِنجیل مَتّی 16
16
فریسییِن و صَدوقییِن علامت و معجزه پیستِشونَه
1فریسیی فِرقه عُلما و صدوقی فِرقه عُلما، اومینَه عیسی وَر تا اَیی اِمتحان بِکَرِن. اِمی واسی عیسی کا پیستِشونَه كه آسِمونی یَه نیشونَه ای اَوون نیشون بِدَه. 2عیسی چوون جَواوی کا واتِشه: «مَغریب دَم، بَواتیرون: ”چوم آسِمون سِرَه، هوا چاک بَبی،“ 3و صِبی سَر، بَواتیرون: ”چوم آسِمون سِرَه و هوا گِتَه، اوری هوا طوفانی بَبی.“ شِمَه چاک بَزنیرون چِنتَه آسِمونی وضعیتی تعبیر بِکَرَه، امّا نیمَشایَه زمانون نیشونَه اون تعبیر بِکَرَه! 4اِم زِناکار و شَریرَه نسل، ایلَه نیشونَه ای پیستِشونَه. امّا نیشونَه ای اَوون آدوعَه نییَب، یونس پیغمبری نیشونَه غِیراز.» بَس عیسی اَوون ترک کَردِشه و اِشتَن راه شَه.
صدوقیون و فریسیون خمیره مایَه
5وختی آرَستینَه دریاچه اَ طَرفی را، شاگِردِن ویندِشونَه که ویر بَرکَردَشونَه اِشتَن نَه نون پِگِرِن. 6عیسی اَوون نَه واتِشه: «ویرا بِبییَه و فریسیون و صدوقیون خَمیره مایَه کا دوری بِکَرَه.» 7شاگِردِن یَندی نَه بحث بَکَردین و بَواتین: «چوم اَمَه نون وَردَه نیمونَه عیسی اِنتَه بَواتی.» 8امّا عیسی اِمی زونِستِشه و اَوون نَه واتِشه: «اِی كم ایمانِن، چیرا اِمی واسی که نون نیرونَه یَندی نَه بحث بَکَردیرون؟ 9حَلا نی درک نِکَرَه؟ ویرِرون بَرکَردَه اَ پینج گِله نون و اَ پینج هَزار نفر و اَ چَن گِله زنبیلی که غذا تیکه خورده اون کا جمع آکَردِرونَه؟ 10یا اَ هفت گِله نون و اَ چار هَزار نفر و اَ چَن گِله زنبیل که غذا تیکه خورده اون کا جمع آکَردِرونه؟ 11بَس چیرا نیمَشایَه درک بِکَرَه که نونی درباره شِمَه نَه گف نِژَنم؟ فریسیون و صدوقیون خَمیره مایَه کا دوری بِکَرَه.» 12اَموقع شاگِردِن زونِستِشونَه که عیسی اَوون نَه بَواتی فریسیون و صدوقیون تعلیمی کا دوری بِکَرِن نِه نونی خَمیره مایَه کا.
پطرسی اِعتراف درباره عیسی
13وختی عیسی آرَستَه قیصریه فیلیپی نواحی را، اِشتَن شاگِردون کا دَفَرسِشه: «مردم بَواتین اِنسانی زوعَه کییَه؟» 14شاگِردِن جَواو دوشونَه: «بعضی بَواتین یحیی تعمید دَهَنده یَه. بعضی نی بَواتین ایلیای پیغمبرَه، و بعضی نی بَواتین اِرمیای پیغمبر، و یا ایلَه پیغمبرون کایَه.» 15عیسی دَفَرسِشه: «شِمَه چِه بَواتیرون؟ شِمَه بَواتیرون اَز کی ایمَه؟» 16شَمعون پطرس جَواو دوشَه: «تِه مسیح موعود، خِدای زِنده زوعَه ایش!» 17عیسی واتِشه: «اِی شَمعون، یونا زوعَه! خَسَه تِه بِبو! چوم اِنسان، اِمی بَه تِرا آشکار آکَردَه نیشَه، بَلکَم چِمِن آسِمونی یَه دَده اِمی بَه تِرا آشکار آکَردِشه. 18اَز نی تِنَه بَواتیم که تِه پطرس اِستیش، یَعنی صَخره سِنگ و اَز اِم صخره سِنگی سَری کا چِمِن كلیسا بینا بَکَردیم و مرگی قدرت هرگز نیمَشا کلیسا نابود بِکَرِه. 19اَز آسِمونی پاُتشایی اَچَرون بَه تِن بَدایم و تِه هَر چیی که زَمینی کا دَوَسی، آسِمونی کا نی دَوَسَته بَبی و هَر چیی که زمینی کا آکَری آسِمونی کا نی آبو». 20دومله عیسی اِشتَن شاگِردون قَدغَن کَردِشه که هیچکَسی نَه مَواجِن كه اَ، هَ مسیح موعود اِستَه.
عیسی پیشگویی، اِشتَنِش مرگ و زِنده آبییِه درباره
21چَیی پَش عیسی اِشتَن شاگِردون را اِم حقیقتی آشکار آکَردِشه که بَسی بِشو اورشلیمی شهری را و اوآ کا یهودی شیخِن و سَران کاهنِن و توراتی معلِمِن اَیی وِر عذاب بِدَن و اَ کِشته بِبو و سومین روزی کا زِنده آبو. 22پطرس، عیسی بَردِشه کناری را و اَییرا زِرَه گِتِشه و واتِشه: «بَه تِه کا بِه دور بِبو آقا! هرگز اِنتَه رَه چیی اِشتِه سَر ما.» 23امّا عیسی آگَردَه پطرسی نَه واتِشه: «بَه مِن کا دور آبو اِی شیطان! تِه چِمِن راه مانع ایش تا مَشام چِمِن کارون اَنجام بِدَم، چوم اِشتِه فیکرِن اِنسانی اینَه، نِه خِدایی یَه فیکر.»
24دومله عیسی اِشتَن شاگِردون نَه واتِشه: «اَگم کسی پیستِشَه چِمِن پِیرو بِبو، بَسی اِشتَن جانی کا دَس پِگِرِه و اِشتَن عذاب و مرگی صلیبی پِگِرِه چِمِن دومله با. 25چوم هَر کسی پیستِشَه اِشتَن جانی نجات بِدَه، اَیی اَز دَس بَدای؛ امّا هَر کسی چِمِن واسی اِشتَن جانی فیدا بِکَرِه اَیی حفظ بَکَردی. 26اِنسانی را چِه فایده هِستِشه که گِرد دنیا بِدارِه، امّا اِشتَن جانی اَز دَس بِدَه؟ یا اِنسان اِشتَن جانی پس ویگِتِه را چِه بَشای آدَه؟
27چوم اِنسانی زوعَه، اِشتَن دَده شکوه و جَلالی کا اِشتَن ملائیکه اون نَه بومَی و اَ موقع هَر کسی طبق چَیی اَعمال، عوض بَدای. 28حقیقتن شِمَه نَه بَواتیم، بعضی اِن اییا کا مَندینَه که تا اِنسانی زوعَه مَوینِن که اِشتَن پاُتشایی کا بومَی، نِمِرِن.»
Айни замон обунашуда:
اِنجیل مَتّی 16: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company