اِنجیل مَتّی 14
14
یحیی تعمید دَهَنده مرگ
1اَ زمانی کا عیسی شور و شُورَت هیرودیس حاکمی گوش آرَستَه. 2هیرودیس اِشتَن آدَم نَفرون نَه که چَیی نوکَری بَکَردین، واتِشه: «اِم یحیی تعمید دَهَنده یَه. مَرده پَش زِنده آبَه، و اِمی واسی یَه که بَشای اِم معجزه اون اَنجام بِده.»
3چوم که هیرودیس، هیرودیا واسی كه چَیی بِرا، فیلیپُسی ژِن بَه، یحیی گِتَش بَه اَیی دَوستَش بَه و دَرَفَندَش بَه زِندانی کا. 4چوم یحیی، هیرودیسی نَه بَواتی: «حلال نییَه تِه ام ژِنَکی نَه بِبی.» 5هیرودیس پیستِشَه یحیی بِکِشه، امّا مردمی کا تَرسی، چوم یحیی، مردمی نظری کا ایلَه پیغمبر بَه.
6امّا هیرودیسی جَشن تَوَلدی کا، هیرودیا کِلَه مِجلسی کا دوش کَردِشه. هیرودیس چَیی دوشی کا خِشِش اومَه، 7جوری كه قَسَّم هَردِشه که اَ کِلَه هَر چِه که پیستِشَه بَیی آدَه. 8اَ کِلَه نی که چَیی نَنه اَیی آموتَش بَه، واتِشه: «یحیی تعمید دَهَنده سَری، ایلَه سینی دیلَه کا بَه مِن آدَه.» 9هیرودیس ناراحت آبَه، ولی چوم قَسَّم هَردَش بَه و مهمونون واسی دستور دوشَه که کِلَه پیستَه چی بَیی آدَن. 10هیرودیس آدَم ویسا آکَردِشه و زِندونی کا یحیی سَر آبِردِشونَه، 11و یحیی سَری که سینی دیلَه کا نوعَشون بَه، وَردِشونَه اَ کِلَه آدوشونَه و اَ کِلَه نی اَ سَری بَردِشه اِشتَن نَنه وَر. 12یحیی شاگِردِن اومینَه چَیی بَدَنی بَردِشونَه، دَفن کَردِشونَه دومله شینَه و عیسی را خَوَر دوشونَه.
پینج هَزار نفری غَذا دوعِه
13وختی عیسی اِم خَوری دَرَسِشَه، تنخا لوتکا نَه شَه دور افتاده جِگایی را. امّا وختی مردم خَوَر دار بینَه، اِشتَن شهرون نَه پای پیاده چَیی دومله راه دَلَکینَه. 14وختی عیسی لوتکا کا جیر اومَه، وِرَه جَماعتی ویندِشه و اَوون را دیلِش سیستَه و چَوون مریضون شفا دوشَه.
15مَغریب دَم، شاگِردِن اومینَه عیسی وَر و واتِشونَه: «اییا دور افتاده جِگاییَه، و شَو نی نِزدیکَه. مردمی ویسا آکَه تا بِشون اَطرافی دِه اون را و اِشتَن را غذا بِخِرِن.» 16امّا عیسی اَوون نَه واتِشه: «لازم نییَه که مَردم بِشون. شِمَه اِشتَن اَوون غَذا آدییَه که بَرِن.» 17شاگِردِن عیسی نَه واتِشونَه: «اَمَه اییاکا پینج گِله نون و دِ گِله مایی غِیراز چیی نیمونَه.» 18عیسی واتِشه: «اَوون بواَره اییا چِمِن وَر.» 19دومله مردمی نَه واتِشه سَوزَه اون سَری کا بِنِشِن. عیسی پینج گِله نون و دِ گِله مایی پِگِتِشه، آسِمونی دَیشتَه، خِدا شُكور کَردِشه. دومله نونون پَله کَردِشه و آدوشَه شاگِردون و شاگِردِن نی اَوون آدوشونَه مردمی. 20گِرد هَردِشونَه، سیر آبینَه و اَوِن نون و مایی تیکه خورده اون کا که مَندَه بَه، دونزَه گِله سَبد پُور جمع آکَردِشونَه. 21کسونی تعداد که نون و مایی هَردِشونَه، ژِنَکون و خِردَنون غِیراز، پینج هَزار گِله مِرد بَه.
را شییِه آوی سَری کا
22اَلبَحَل عیسی اِشتَن شاگِردون نَه واتِشه تا هَتَه که اَ، مردمی ویسا آکَرِه، اَوِن لوتکا دَنِشِن و پیش از عیسی بِشون دَریاچه اَ طَرفی را. 23مردمی ویسا آکَردِه پَش عیسی تنخا پِشَه کویی سَر تا دعا بِکَرِه. شَو آرَستَه، عیسی اوآ کا تنخا بَه. 24اِم موقع، لوتکا ساحِلی کا وِر دور آبَه بَه و کِلاکی نَه موجون گیرفتار بَه چوم وا بَرعکس جَهتی وَزی که اَوِن کارا بَشین. 25تقریبا ساعَت سِه شَو بَه، عیسی هَتَه که دریاچه سَری کا راه بَشی، شَه چَوون طرفی را. 26وختی شاگِردِن عیسی ویندِشونَه، دریاچه سَری کا راه بَشی، وِر تَرسی نَه و تَرسی کا خَرا خِلِع بَکَردین و بَواتین: «اِم ایلَه روح اِستَه». 27ولی عیسی اَلبَحَل اَوون نَه واتِشه: «شِمَه دیل قُرص بِبو. اَزیمَه، مَتَرسَه!»
28پطرس واتِشه: «اِی آقا، اَگم تِییش، دستور بِدَه که اَز نی آوی سَری نَه بام اِشتِه وَر.» 29عیسی واتِشه: «بِری.» اَ موقع پطرس لوتکا کا بِرون اومَه و آوی سَری کا راه شَه و شَه عیسی وَر. 30امّا وختی وا ویندِشه، تَرسَه و هَتَه که آوی کا کارا ویشی خِلِع ژَندِشَه: «آقا، مِن نِجات بِده!» 31عیسی اَلبَحَل اِشتَن دَسی دراز آکَردِشه و اَیی گِتِشه و واتِشه: «اِی كم ایمان، چیرا شک کَردِرَه؟» 32وختی اَوِن لوتکا دَنشتینَه، وا آنِشتَه. 33دومله کسونی که لوتکا کا بینَه عیسی پرستش کَردِشونَه و واتِشونَه: «واقعا که تِه خِدا زوعَه ایش.»
مریضون شفا جِنیسارِتی کا
34وختی اَوِن آرَستینَه دریاچه اَ وَر، جِنیسارِتی منطقه کا لوتکا کا ویرمینَه. 35وختی اوآ مردم عیسی آزونِستِشونَه، کَسونی ویسا آکَردِشونَه گِرد اَ منطقه را، و گِرد مریضون وَردِشونَه عیسی وَر. 36اَوِن عیسی مِنَّت کَردِشونَه كه اِجازه بِدَه تا فقط چَیی اَبا پَره دَس آسان، و هَر کسی که دَس آسای، شفا بَگتی.
Айни замон обунашуда:
اِنجیل مَتّی 14: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company