Luke 18
18
1အင်(မ်)ပါလ်နောလ် ကိုယ်တော်ယေရှုနား အတပည့်လှီ့အောလ် စိတ်အားလျှော့ယကော ကွလ်မှန် ဆုတောင်းလောဒ့်ဟိုင် ပုံဥပမာ(ခွီး)ပိုဒ်တောလ် အမိန့်ဟိလ့်။ 2"ဟမယ် လုလုဟှတ်တောလ် ဖုလော်ရှင်ခါ ကိယတိ၊ ခေါင်လှီ့အပေါ်ဝေါလ်ခါ လေးစားမှု မယ်ယတိ တရားသူကြီး ပွလ်ဟှတ်အမယ်။ 3အင်(မ်)လုအောလ် မယ်တိ မှလ်နူးပွလ်ဟှတ်နား အင်(မ်)လာဘ်စားတိတရားသူကြီးစငေါလ် " တရားနည်းလမ်းကျဟနောလ် ဆုံးဖြတ်ပက်မိုဝြား" တိရို အကြိမ်ကြိမ်ဈာတ်ထေ့နား အဟောင်ဝေဆိုလ်။ 4အင်(မ်)ဘော်နားခါ တလာဆာတိနား မှလ်နူးလျှောက်ခေါမ် အငြင်းပယ်ဟိလ့်။ နောက်ဆုံးငေါလ်စေ့ အင်(မ်)တလာဆာတိနား "ကေးနား ဖုလော် ကေကိယဘော် ခေါင်လှီ့အပေါ်ဝေါလ်ခါ လေးစားထေ့ဟီ(င်)။" 5အင်(မ်)ဘော်နားခါ နီမှလ်နူးနား ကေး အဆက်မပြတ် အနှောက်ယှက်ဆော်ခန်းနောလ် နီကူညီလောဒ့်အိုက်။ အင်(မ်)ဟိုဝေါလ်ယောင် နီမှလ်နူးနား ကေးစငေါလ် အမြဲမပြတ် လူးထေ့လား နှောင့်ယှက်ခေါမ် အရပ်တန့်ငိုက်၊ တိရို အဟောင်" တိရို အမိန့်။ 6အင်(မ်)ပါလ်နောလ် ကိုယ်တော်ယေရှုနား "အင်(မ်)လာဘ်စားတိ တရားသူကြီးအဟောင်ခေါမ် စဉ်းစားစင်မယ်" တိရို အမိန့်။ 7လာဘ်စားတိတရားသူကြီးကုံးနားခါ အထပ်ထပ်အခါခါ တောင်းလျှောက်တိခေါင် အသက်ညှာပက်နောက်ဟိုဝေါလ်စေ့ ဖုလော်ရှင်စငေါလ် ဆုတောင်းဟိုဝေါလ်စေ့ ဧကန်မုချ ကောင်းကျိုးချမ်းသာလောဒ့်ခေါမ် စုတ်(င်)ခွတ်။ ဖုလော်ရှင်နား အပုန်းဟို့ ရွေးချယ်ထေ့နား အပုန်းစငေါလ် အနှိုပ်အမီ ဆုတောင်းတိ အင်(မ်)လှီ့အပေါ်ဝေါလ် အကာကွယ်ပက်ဟိုင်ဆီးယော်ဝြာ။ အင်(မ်)လှီ့တွက် စိတ်ပူပန်ပက်ဟိုင်ဆီးယော်ဝြာ။ 8နာ(င်)မီးရိုး ဟောင်ဟိုင် ကေလီခေါမ်စေ့၊ ဖုလော်ရှင်နား အင်(မ်)လှီ့အောလ် တရားသဖြင့် အစီရင်ပက်တိုက်။ အင်(မ်)ဘော်နားခါ 'ခေါင်စိုး' နီဆုမ်သပ်ခုံးငေါလ် အကြွလူးဟိုဝေါလ် ကေး ယုံကြည်မှုမယ်ယတိခေါင်လှီ့ပူနူး အာမ်မယ်ရိုက်" တိရို အမိန့်။ 9အင်(မ်)ပါလ်နောလ် ကိုယ်တော်ယေရှုနား ပုန်းဟို့နားပုန်းဟို့ အစွာခေါင်လှီ့ထက်ကာလ် အသာတိရိုခိလ်နောလ်ထေ့နား ခေါင်တိုင်နိမ့်ချထေ့တိ အချို့လှီ့အောလ် ပုံဥပမာ(ခွီး)ပုသ်ဟှတ် အမိန့်။ 10"ခေါင်ပွလ်နှို ဆုတောင်းဟိုင်ရိုး ဗိမာန်တော်ဝေါလ် အဈာတ်။ ပွလ်ဟှတ်စေ့ ဖာရိရှဲ အထာပွလ်ဟှတ်စေ့ အခွန်ကောက်တိ။ 11ဖာရိရှဲနား အာပွတ်စောတုလ်ထေ့နား "ဖုလော်ရှင်၊ ကေးနောက်ခေါမ် အစွာခေါင်လှီ့ဘော် လောဘတောဝေဟီ(င်)၊ မရိုးမသားကေစိုင်းခေါမ်ခါ မယ်ယော်။ အိမ်ထောင်ရေး ဖောက်ယခေါမ်အပြင် နီအခွန်ကောက်ဘော်ခါ မယ်ယခန်းနောလ် ဖုလော်ရှင်ငေါလ် ကေဆိအယ်နောက်။ 12ကေး ပတ်ဟှတ်တောလ် နိပ်နှိ အေအောတ် ရှောင်ထေ့နား ဆုကေတောင်း။ ကေးနား ကေလောဒ့်ခေါမ် ဒေါင်းဂို ပုံဟြာဝေါလ်ကိ ပုံဟှတ် ဖုလော်ရှင်ငေါလ် ကေလှူဒါန်းဟိလ့်။" 13အင်(မ်)ဘော်နားခါ အခွန်ကောက်စေ့ အလှမ်းမယ်ကထု တုလ်ထေ့နား နေဟြှလ်ကုံးခါ ဓေါ်ဝေဝိုက်(မ်)တိယော်။ အင်(မ်)နား နောင်တလောဒ့်ဘွာလ်ထေ့နား ကာင်စာန်ထုအယ်ဗာန် "ဖုလော်ရှင် တပည့်တော် ငဲ့ညှာပက်မော်ဝြား။ တပည့်တော်စေ့ အကုသိုလ် အဆိလုပ်တိယောင်" တိရို အခို့အယ်။ 14အင်(မ်)ခေါင်ပွလ်နှို အိမ်မယ်ခိုက်ဘွာလ်ဟိုဝေါလ် ဖုလော်ရှင်ခွင့်လွှတ်ခေါမ် ခါမ်လောဒ့်တိစေ့ ဖာရိရှဲဆီးကော အခွန်ကောက်တိအောလ် အထောလ်။ ပုန်းဟို့နားပုန်းဟို အထင်ကြီးယေတိစေ့ နိမ့်ချခေါမ် ခါမ်လောဒ့်ထေ့နား ပုန်းဟို့နားပုန်းဟို့ နိမ်ချအယ်တိနားစေ့ ချီးမြှောက်ခေါမ်ခါမ်လောဒ့်အိုက်" တိရို အဆုံးမ။ 15နှိုပ်ဟှတ်တောလ် ခေါင်အချို့လှီ့နား အာမ်စိုးနောင်(င်)လှီ့ ယေရှုစငေါလ် ကောင်းချီးလောဒ့်ဟိုင်ရို အာမ်လူးပူနောက်။ အင်(မ်)ဘော်နားခါ အတပည့်လှီ့နား အမုဟိုဝေါလ် ကိုယ်တော်ယေရှု နှောက်ယှက်ယဟိုင် အင်(မ်)လှီ့ အာမ်ငိုင်းယေ။ 16အင်(မ်)ဘော်နားခါ ကိုယ်တော်ယေရှုနား အင်(မ်)ဒိပ်စောလှီ့ ပိုင်(င်)နောလ်ထေ့လား "ဒိပ်စောလှီ့ ကေးစငေါလ် လူးဆပ်ဟ။ အင်(မ်)လှီ့ ငိုင်းယေကော့စူး။ အကြောင်းစေ့ နီဒိပ်စောလှီ့ဘော် ခေါင်လှီ့ခါ ဖုလော်ရှင် သာသနာတော်ဓေါလ် အာမ်ဆိုင်။ 17နာ(င်)မီးရိုး ကေးနားဟောင်ဟိုင်ကေလီခေါမ်စေ့ ဒိပ်စောပွလ်ဟှတ်ဘော် ကုံးငေါလ်ခါ ပြုမှုခေါမ်မယ်ယလားစေ့ နာ(င်)နောက်ခေါမ် ဖုလော်ရှင် သာသနာတော်ဒုလ်ကာလ် အီဟိုဝေါလ်ခါ ဝင်ခွင့်လောဒ့်ဟိုင် ဆီးယော်" တိရို အမိန့်။ 18ဟမယ် ဂျူးခေါင်းဆောင်ပွာလ်ဟှတ်နား ကိုယ်တော်ဝေါလ် "ကောင်းမြတ်တိ ဖုလော်ရှင်၊ နိစ္စထာဝါရဆောက် လောဒ်ဟိုင် ကေးနား ဟအီကေစိုင်းလောဒ့်အိုက်" တိရို အဟိ့။ 19ကိုယ်တော်ယေရှုနား "ကေး ဟိဘော်ဟိုင်ရိုး ကောင်းမြတ်တိ တိရို နာဟောင်။ ဖုလော်ရှင်ပါးဟှတ်တောလ်ကိ လွဲထေ့နား ကောင်းမြတ်တိ အူခါမယ်ယော်။ 20ပညတ်တော်လှီ့ နာ(င်)နား နာစုတ်(င်)ပါလ်။ အိမ်ထောင်ရေးရိုး ဆတ်ဇော်မယ်ဘွတ်။ ခေါင်ဆောက်ဓုတ်လောဒ့်ယော်၊ ခေါင်လှီ့ကိ မူးဝေလောဒ့်ယော်၊ ခေါင်လှီ့အကြောင်း လှိက်ယေထေ့နား ဟောင်လောဒ့်ယော်၊ နူးပေါလ်လှီ့ ရိုသေဘွတ်" တိရို အမိန့်။ 21အင်(မ်)နား "ကေဒိပ်စောဟိုဝေါလ်ကထု နီပညတ်တော် ကိမ်ကိမ် လိုက်နာကေကျင့်ကြံဟိတ်" တိရို အလျှောက်။ 22ကိုယ်တော်ယေရှုနား အင်(မ်)ခေခေါ အယှောက်ဟိုဝေါလ် အင်(မ်)ခေါင်ငေါလ် "နာ(င်)နား နာဆောင်ရွက်ဟိုင် ကိစ္စပွလ်ဟှတ် အမယ်ဟာမ်း။ နာ(င်)နား နာပိုင်ခေါမ်လှီ့ကိမ်ကိမ်ရီထေ့နား စက်ကာလ်တိလှီ့အောလ် လှူဒါန်းဘွတ်။ အင်(မ်)ဘော်နာစိုင်းဟိုဝေါလ်စေ့ နာ(င်)နောက်ခေါမ် ဟြားလုအောလ် ဥစ္စာစည်းစိမ်လှီ့ နာလောဒ့်အိုက်။ အင်(မ်)ပါလ်နောလ်စေ့ ကေးတပည့်အဖြစ် ကေးနူရုန်းနား" တိရို အမိန့်။ 23အင်(မ်)ဘော်နားခါ အင်(မ်)ဂျူးခေါင်းဆောင်ခါ ဆထီးပွလ်ဟှတ်ဓေါလ် အထောလ်ခန်းနောလ် အင်(မ်)ခေါင်နား အင်(မ်)ခေခေါလှီ့ အယှောက်ဟိုဝေါလ်အလွန်အဝမ်းနည်း။ 24အင်(မ်)ခေါင်ဝမ်းအနည်းခေါမ် ကိုယ်တော်ယေရှုနား အမုဟိုဝေါလ် အလုန်ပွန်ယအောလ် ထောလ်ထေ့နား "ဘိုးတိလှီ့စေ့ ဖုလော်ရှင်သာသနာတော်ဝေါလ် ဝင်ဟိုင်အခက်ခဲ့။ 25ထီဖင်(င်)ပေါက်ကာလ် ကုလာအုတ်လူဟှတ် ဝင်ဟိုင်စေ့ အလွယ်ဟာမ်းမိုက်။ ဖုလော်ရှင် သာသနာတော်ဝေါလ် ဘိုးတိပွလ်ဟှတ်အဝင်ဟိုင် အခက်" တိရို အမိန့်။ 26ပရိတ်သတ်လှီ့နား အင်(မ်)ခေခေါ အာမ်ယှောက်ဟိုဝေါလ် "နီဘော်နောက်ဟိုဝေါလ်စေ့ ဟိဘောင်ခေါင် ကယ်တင်ခြင်းခ့လောဒ့်အိုက်" တိရို အာမ်ဟိ့။ 27ကိုယ်တော်ယေရှုနား "ခေါင်လှီ့တွက် ဖြစ်ခွတ်ယတိအရာလှီ့ ဖုလော်ရှင်တွက်အဖြစ်ခွတ်" တိရို အမိန့်။ 28အင်(မ်)ဟိုဝေါလ် ပေတရုနား "အရှင်၊ ကေးမီးနား အီယေ့ကိမ်ကိမ်လှီ့ စွန့်လွတ်ဟိလ်ထေ့နား နာ(င်)နှုကေရုရ်းလူး" တိရို အလျှောက်။ 29ကိုယ်တော်ယေရှုနား အတပည့်လှီ့အာလ်"နာ(င်)မီးရို ကေးနား အမှန်ကေဟောင်လောဒ့်အိုက်နောက်ဟိုဝေါလ်စေ့ နာ(င်)မီးနား ဖုလော်ရှင် သာသနာတော်တွက် နာမ်အိမ် ၊ပီးဟာ၊သာနောင်(င်)လှီ့ နူးပေါလ် ၊စိုးနောင်(င်)လှီ့ စွန့်လွတ်တိလှီ့စေ့ 30နီဘဝအောလ် ကောင်းကျိုးခါမ်လောဒ့်အိုက် ဟိုင်ထက်တင်ယော် အနာဂတ်ဝေါလ်ခါ နိစ္စထာဝရအဆောက် နာမ်လောဒ့်ဟိုင် အသေချာယောင်" တိရို အမိန့်။ 31အင်(မ်)ပါလ်နောလ် ကိုယ်တော်ယေရှုနား သာဝကကုလာနှိရို အကာဝေါလ် ဆောင်(င်)ထေ့နား ငေရိုး။ တုအောလ် နာ(င်)မီးနောက်ခေါမ် ဂျေရုရှုလင် ဈာတ်နောက်လာမ်းမယ် နာမ်ခိုက်။ ပရောဖက်လှီ့နား ခေါင်စိုးအကြောင်းလှီ့ ရေးဟိလ့်ဘော် ကိမ်ကိမ် အင်(မ်)ဘော်တိုင် အထောလ်လူးဝိုက်။ 32အင်(မ်)ခေါင် တိုင်းတပါးကွတ်ဒုလ်ကာလ် အာမ်အပ်ပိုက်။ အာမ်နုနောက်ကိုက်။ အာမ်လှောင်ပြောင်ငိုက်။ အကြမ်းအာမ်ဖက်အိုက်။ မွမ်ဒိလ် စာသွီ အာမ်ဆွီနောက်ကိုက်။ 33အင်(မ်)ပါလ်နောလ် အင်(မ်)လှီ့လား ကိုယ်တော်ခေါမ် မွထေ့လား အာမ်ဓုတ်ကိုက်။ အင်(မ်)ဘော်နားခါ အထုမ်နှိုပ်ပါလ် ယေရှု ရှင်ပြန် အထမြောက်လူးဘွာလ်ဝိုက်" တိရို အမိန့်။ 34အင်(မ်)ဘော်နားခါ အတပည့်လှီ့နား ကိုယ်တော်ယေရှု ဟောင်ခေါမ် ခေခေါ ရိုးစူးခွတ်ယော်ဟ။ အင်(မ်)ခေခေါ အဓိပ္ပါယ် အကွယ်ဝှက်ယေခန်းနောလ် ကိုယ်တော် ဆိုလိုခေါမ်အဓိပ္ပါယ် ရောစူးခွတ်ယော်ဟ။ 35ကိုယ်တော်ယေရှုလား အတပည့်လှီ့ ယေရိခေါလုကာ အာမ်ခိုက်လူးဟိုဝေါလ် မိတ်မုယတိပွလ်ဟှတ် လာမ်းကာဝေါလ် ငွာထေ့နား အတောင်ငယ်။ 36အင်(မ်)နား ခေါင်လှီ့အာမ်ဈာတ်ခေါမ် အထိုင်း(င်)ယှောက်ဟိုဝေါလ် ဟိဘော်လှီ့ရိုး ထောလ်တိရို အဟိ့။ 37ခေါင်တချို့လှီ့နား နာဇရက်လုအောလ်ကိ ကိုယ်တော်ယရှု အကြွလူးတိရို အာမ်ဟောင်။ 38အင်(မ်)ဟိုဝေါလ် အင်(င်)ခေါင်နား "ဒါဝိဒ်စိုး ယေရှု ကေး မာနယ်ပက်မို့ဝြား" တိရို အဗိုင်။ 39ကိုယ်တော်ဓေါလ် ဈာတ်ဟတိလှီ့နား ဒပ်ကာလ်မယ်ဟိုင် သတိအာမ်ပက်ဟိလ့်။ အင်(မ်)ဘော်နားခါ "ဒါဝိဒ်စိုး ယေရှု ကေးမယ်နယ်ပက်မိုဝြား" တိရို ဗိုင်ငေနား အဟောင်။ 40အင်(မ်)ဟိုဝေါလ် ကိုယ်တော်ယေရှုခေါမ် ရပ်တန့်ထေ့နား အင်(မ်)ခေါင် အပုန်းဟိုစငေါလ်လူးပူလ်နောက်ဟိုင် ခေါင်အချို့အောလ် အမိန့်အပက်။ အင်(မ်)ခေါင် အကာဝေါလ် အခိုက်လူးဟိုဝေါလ် 41ကိုယ်တော်ယေရှုနား "ကေးနား နာ(င်)တွက် ဟအီလှီ့ ကေစိုင်းပက်လောဒ့်အိုက်" တိရို အဟိ့။ အင်(မ်)နား "အရှင်၊ မိမုဘွာလ်ဟိုင် ကေလီ" တိရို အဟောင်ဘွာလ်။ 42အင်(မ်)ဟိုဝေါလ် ကိုယ်တော်နား "မိမုဘွာလ်ဆသ်။ နာ(င်)ယုံကြည်မှုနား နာ(င်) အကုသပက်ပါလ်" တိရို အမိန့်။ 43အင်(မ်)ခေါင် ချက်ချင်းကုံး အမိအမုဘွာလ်ထေ့လား ဖုလော်ရှင်ဂုဏ်တော် ချီးမွမ်းဗာန် ကိုယ်တော်ယေရှုနူဝေါလ် အရုရ်နောလ်လှာယ်။ အင်(မ်) အဖြစ်ပျက်လှီ့မုတိ ခေါင်လှီ့နားခါ ဖုလော်ရှင်ဂုဏ်တော် အာမ်ချီးမွမ်းကြ။
Айни замон обунашуда:
Luke 18: ctpv-rv
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.