लूको 22
22
यीशु थल्जी योजना
(मत्ती 26:1-5; मरकु 14:1,2)
1सुहम माह केहषी रोटीऊ त्याहर अतिंङ फसह कुट्री, कछंङ तोहई; 2दंङ यहुदी शास्त्री ए यहुदी मोह्ड़े पुरोहित यीशुबि च़ुमज़िमी तोईरे दंङ सच़िमी तातेर, पर दोरे मीहतंङ साते बेवातेर।
यहूदा ओ विशवास घात
3दंङ शेतान यहूदा ओ अंद्रेग अंजा अरी करियोत नगरो तोहई दंङ सनी चेला तु बिचंङज़ि तोहई। 4यहूदा ज़ि इलजे यहुदी मोह्ड़े पुरोहितो ए पहरेदारातु मुख्या रंङ साते गप्पा लहज़ी लेहती कि यीशु बि छना दोतु गुहड़च़ि च़ुमज़ि लोहतो। 5दोरे खुश शुहचे इलिर दंङ यहूदा बि ढबाह रंड्रीमी वाईदा लहरिर। 6दंङ यहूदा दिह गप्पा मनेके इलि, दंङ मौका खंड्री लेहती कि अपेहल महस मीहरे माह शोर दोहपल यीशु बि च़ुमज़ि लोहग।
चेला तु साते फसहो अंतिम भोज
(मत्ती 26:17-19; मरकु 14:12-16)
7दंङ सुहम माह केहषी रोटीऊ त्याहर अति, अंऊर त्याहरो कुरच़ो बलि रंड्री ज़रूरी तोहई। 8यीशु ज़ि पतरस ए यूहन्ना दिह हुकुम रें च़रतिर; “इलजे कें ञेंहतु थल्जी फसह त्याहरो बगत तेयार लांई।” 9दोच़ी यीशु रुहकातोर, “केई अंऊर जुंज़ातन, कि ञेंहच़ी अंऊर दुह बगत तेयार लोहनी?” 10यीशु ज़ि दोतिंङ जुबाब रेंई, “खांई नगरारिंङ पितहरे इच्च़ा मीह केतिंङ तिऊ राग्ज़ंन उठाके खोकसोतो” दंङ दुह अंऊ घरबारंङ योतो, 11दंङ दुह घरबारो मालिक रंङ साते कुड़ु गुरु कुट्री लेहकी तोह कि, “गिऊ थल्जी तेयार लहसी कमरा अंऊ शुह, अंऊर गेह घेंङौ चेला तंङ साते बंङज़ा फसह ओ बगत ज़ोओग?” 12“दुह चुंङो मालिक केतिंङ तोरिखी तेयार लहसी कमरा कम्बोतो; दोहर ज़ेइमी इंतज़ाम लेह च़रतुंई।” 13चेलाज़ि इलजे छना यीशु ज़ि दोतंङ साते कुहते ध्वांए खोक्शतेर, दंङ फसह त्याहोरो बगतो इंतज़ाम लेह च़रतिर।
प्रभु-भोज
14अपेहल दुह ध्याड़ा अति, दंङ यीशु सनी चेलारंङ साते बगत ज़ेई बंङज़िरी। 15दंङ यीशु ज़ि दोतंङ साते कुंई, “गिऊ महस हिटी तोहई कि गिऊ दुख उठाएच़िमी तुहई गेह केतंङ साते फसह त्याहरो बगत ज़ोअग। 16छना कुचे गेह केतंङ कुट्रातग अपेहल तचेक दिह परमेश्वरो राज्य रिंङ पूरे मशोतो दोहपल तचेक गेह फसह त्याहरो बगत यच़ाह माह ज़ोऊग।” 17दंङ दोई दाखो रसो कोली लेहपच़े परमेश्वरो धन्यवाद लेह कुंई, “दिह लेहप्तुंई दंङ केनातु बिचंङ फाए च़रतुंई। 18छना कुचे गेह केतंङ साते कुट्रातग अपेहल तचेक परमेश्वरो राज्य माह अपतो दोहपल तचेक गेह दाखो रस तोग बेहच़ी अपेहल लाह मा तुंङमोग।”
19दंङ यीशुज़ि रोटी लेहप्ती दंङ परमेश्वरो धन्यवाद लहच़ी रोटी खंणी लहरी दंङ एनोह चेला तिंङ रें कुट्री लेहती, “हाँ ज़ि, दि रोटी गिऊ फुक शुह अंऊ केहतु थल्जी रमोतो; गिऊ हिदारिंङ दिहे लोहा लांई।” 20ध्वांए दोई बगतो थल दाखो रसो कोली लाह दिह कुचे रन्दो, “दिह कोली (कटोरा) गिऊ शुहई रिंङ खरकोई वाईदा शुह अंऊ केहतु पापो सज़ाओ दोहरची बचाएकसिमी थल्जी बहाएकचिमी तोत।” 21पर खांई गिह्बी च़ुमज़ि लहज़ा ञेंतंङ साते बगत ज़ेई लेहकी तोह। 22गेह मीहू योह सिए योग छना कुचे दि पवित्र शास्त्ररंङ च़ेहसी तोह। दंङ परमेश्वर दुह मीहबी भयानक सज़ा रमतो अच़ि गेह धोखारंङ साते च़ुमज़ि लोहतो। 23दंङ चेलारे एनातु बिचंङ रुहक्च़ी लेहतिरे हेंदु बिचंङ अरी तोह, “अच़ि दिह कम लोहतो।”
महान अरी? दिऊ टोईच़ी बाद बिवाद
24चेला तु बिचंङ दीह बेहस शुई कि दोतु बिचंङ अरी मोह्ड़े तोह। 25दोई दोतंङ कुहतो, “अंऊ ऊई जातितु अधिकारी तोतोर दोरे दोतु टोईच़ी जोररंङ साते राज लहज़ातोर, दोच़ी मीहतु टोईच़ी अधिकार लहज़ातोर, दंङ अंऊ दोरे मोढ़े अधिकारी तोतोर, दोतु टोईच़ी एनोह अधिकार कंड्रातोर।” 26पर केरे झांह थाह शुई; बल्कि अरी केहतु बिचंङ मोह्ड़े तोह, दुह क्वाच़ी दोतु ठ्रोह दंङ अरी प्रधान तोह दुह परगरातु ठ्रोह बंङज़ुंई। 27छना कुचे मोह्ड़े अरी तोह, छि दोई ए अरी बगत जोआ, या दुह अच़ि सेवा लाह? छि दुह माह शुदाह अच़ि बगत जोआ? पर गेह केहतु बिचंङ परगरतु ठ्रोह तोतोग। 28पर केरे दोरे शुई अरी गिऊ परीक्षो मुक्कारिंङ लगातार गेरंङ साते तोहई; 29दंङ छना गिऊ बाह परमेश्वरे ए गिऊ थल्जी राज्य ठेहराएसी ततो ध्वांए गेह लाह केहतु थल्जी ठेहराएपोग, 30ताकि केहच़ी गिऊ राज्यरिंङ गेरंङ साते जोओनी ए तुंङमोंई देर तचेक कि सिहासनंङ बंङज़ा इस्राएलो सनी खानदानो न्याय लोहनी।
पतरसो इंकार लहज़िमी भविष्यबाणी
31शमौन, “हे शमौन, शेताने परमेश्वरो दोरच़ी केतिंङ भत्ते तिंङ परखेक्च़िमी आज्ञा लेहपच़ी ततो कि रुठे तिंङ मदमो दोरच़ी शता लोहतो, छना इच्च़ा ज़िमदारे छ्वा बि भूसो दोरच़ी शता लेह चरच़ि। 32पर गेह केहतु थल्जी प्रार्थना लहज़ातग कि केहतु गिऊ टोहकठे बिशवास लहज़ी ब्याड़ा शुबी मेस; दंङ अपेहल केई पश्चाताप लोहन दोहपल केनातु साथी न्वातिंङ गिऊ टोहकठे बिशवास लहज़िमी थल्जी पक्का लोह।” 33पतरसे यीशु बि कुंई, “हे प्रभु, गेह करंङ साते जेलंङ इबि देहर तचेक कि सीमी लाह तेयार तोतोग।” 34यीशु ज़ि कुहतो, “हे पतरस गेह करंङ साते कुट्रातग कि तोग ए रातारिंङ कुकड़ो झुह्ट फेरा बांग रंड्री बे तुई केई श्रुम फेरा केनोह आहच़ि दिह कोहन कि, केई गिह्बी माह ञेंन।”
बटुआ, झोली, ए तलवार
35दंङ यीशु ज़ि दोतंङ कुहतो, “अपेहल गेह केहरे रुठे खबरो प्रचार लहज़िमी थल्जी बटुआ, झोली ए बुट मेह च़रचातेग, दंङ केतिंङ छिआ चीज़ो कमी शुहतेआ?” दोच़ी कुहतो, “छिला चीज़ो माह शुह” 36दंङ यीशु ज़ि दोतंङ साते कुंई, “पर धह मीहरेर ञेंहतु खिलाप तोतोर झांह लेह अच़ि बटुआ ततो दोई दुह तेह तांई दंङ ध्वांए झोली लाह, दंङ अच़ि तलवार महतंई दोई एनोह धह्कतेकी खमज़े लंह्ङे इच्च़ा तलवार च़ुमने च़रतुंई।” 37छना कुचे गेह केतंङ साते कुट्रातग, कि पवित्रशास्त्रारिंङ गिऊ पाहठी च़ेहसी तोह; दुह अपराधीतंङ साते मिक्सा इलि, “छना कुचे गिऊ टोईच़ी च़ेहसी गप्पारे पूरे शुहबी ज़रूरी तोह”। 38चेलाज़ि कुहतोर, “हे प्रभु, खंणु देहर झुह्ट तलवार तोतोर” यीशु ज़ि दोतंङ कुड़ी, “झोबड़ी शुहरे।”
जैतून ओ गोऊ टोईच़ी यीशु प्रार्थना
(मत्ती 26:36-46)
39दंङ यीशु धकतेखा हुन्ज़ा जैतून गोह हखा अच़ा इलि, अंऊर दुह रोज य्वाते। दंङ चेलारे दोऊ थले शुहचे इलिरे। 40दुह ठाहरीरिंङ पिचे यीशु ज़ि दोतंङ साते कुहतो, “प्रार्थना लहज़ा लोहनी कि केहच़ी परीक्षा रिंङ पड़ेक्ची मेस।” 41दंङ यीशु चेला तु दोरच़ी शता शुहचे पुष्टू भारे बंङज़ा प्रार्थना लहज़ी लेहती, 42“हे बाह, केई जुन्ज़ातन ता दि दुखो घड़ी गिऊ तुईज़ी ऐखा लेह च़रतु। तांला गेह छना जुंज़ातेग ध्वांए मा शुह, दंङ केई छी जुंज़ातन ध्वांए ए शुबी जूंस।” 43दंङ सर्गंङज़ि इच्च़ा दूत अति अच़ि दोबि सामर्थ रंड्राते। 44यीशु दुखा रंङ शुहचे सेहमा रिंङ प्रार्थना लहज़ी लेहती; दोऊ त्रुहस शुईऊ ठ्रोह मोह्ड़े, मोह्ड़े छिटीरंङ षोड़िंङ दह्पी लेहकी तोहई। 45दंङ यीशु प्रार्थनाज़ि अहच़ा एनोह चेला तु कछंङ अंज़े उदासीरंङ दोरे इमरिंङ तंङातो। 46दंङ दोई कुहतो, “छिले इम लाहतंई? आहचूंई प्रार्थना लहज़ा लोहनी कि केहरे परीक्षा रिंङ पड़ेक्ची मेस।”
यीशु बि धोखा रंङ साते चुम्ज़ी
(मत्ती 26:47-56; मरकु 14:43-52; यहून्न 18:1-11)
47यीशु दिह कुट्रीए लेहकी तोहई मीहतु इच्च़ा भीड़ दोर तिंङ अति, दंङ अंङषी चेला तु बिचंङ इच्च़ा अतु मिन यहूदा तोहई, दोतु तुहई, तुहई अपि लेहकी तोहई। दुह यीशु कछंङ अति ताकि दोबि फ्यग लोहतो। 48यीशु ज़ि दोबि कुहतो, “हे यहूदा, छि केई फ्यग लेह गेह मीहू योह बि च़ुमज़ि लोहातन?” 49यीशु चेलाज़ि अपेहल तंङातोर छि शुहबिमी तोह, दंङ कुहतोर, “हे प्रभु, छि ञेंहच़ी तलवार चलाएपोंईआ?” 50दंङ चेला तु बिचंङज़ि इदि यहुदी महापुरोहितो परगरो टोईच़ी खुंखुंरी साते दोऊ सुचंङ रेहट्रा ट्रिके केहरी। 51दिरंङ यीशु ज़ि कुंई, “दाह बस लांई” दंङ दोऊ रेहट्रारिंङ पछ रेंऐ ठीक लेह च़रति। 52दंङ यीशु ज़ि यहुदी मोह्ड़े पुरोहित, यहुदी मंदिरो पहरेदारातु मुख्या ए यहुदी सेंहणारे अरी दोबि च़ुमज़ि अंज़े तोईरे, दोतु हखा कुंई, “छि केहच़ी गेह डाकू चेहके गिह्बी च़ुमज़िमी थल्जी तलवार लठी रेह कुरच़ा अंज़े तोतोंई? 53अपेहल गेह यहुदी मंदिरंङ रोज केतंङ साते तोईगा, दोहपल केहच़ी गिऊ टोईच़ी गुहड़ ला माह केंईन; पर दिह धह केहतु टेम शुह दंङ हंञारो हाकिमो राज तोह।”
पतरसो इंकार
(मत्ती 26:69-75; मरकु 14:66-72; यहून्न 18:25-27)
54दंङ दोरे यीशु बि च़ुमने रेंज़ा शिलिर, दंङ यहुदी महापुरोहितो चुंङ शिलिरे। पतरस ओईतार च़ि दोतु थले-थले जोई लेहकी तोहई; 55दंङ अपेहल मीहरेर ल्वाड़िंङ मेह तुप्चे ठ्रोहका तोईरे, दंङ पतरस लाह दोतु बिचंङ बंङज़ा इलि। 56दंङ इच्च़ा मेच़िमी मेहऊ छंङीरिंङ दोऊ पतरसो खांई कुड़ी, “दिह ला ता दोरंङ साते तोहई।” 57पर दोई दिह कुचे इंकार लहतो कि, “हे मेच़िमी गेह दोबि माह सेहका।” 58“थोड़े टेमो थल अईदि पतरसबि खांई कुहतो, कांह ला दोतु बिचंङज़ि शुनाह।” पतरसे कुहतो, “हे मीह गेह दोतु बिचंङज़ि माह शुगाह।” 59लगभग इच्च़ा घंटा ओ थल इच्च़ा अई मीह ज़ि पक्का शुहचे कुहतो, “पक्का दिह लाह दोरंङ साते तोहई छना कुचे दिह लाह गलील प्रदेशो शुह।” 60पतरसे कुहतो, “हे मीह, गेह माह ञेंहगा केई छि कुट्रातन” दुह कुट्रीए लेहकी तोहई कि दोहथल ए कुकुड़ हाऊष रेंई। 61दंङ प्रभु यीशुज़ि यह्च़ा पतरसो हखा खंणी, दंङ पतरस बि प्रभुऊ गप्पा हिद अति अंऊ दोई कुहषी तहरे; “तोग कुकड़ो झुह्ट फेरा हाऊष बे तुई केई षुमु फेरा गिऊ इंकार लोहन।” 62दंङ धह्तेका इलजे हुक्शा, हुक्शा क्रपि लेहती।
यीशु अपमान
63अरी मीह ज़ि यीशु च़ुमसी ताहरेर, दोच़ी दोऊ मज़ाक लेह तेंङज़ि लेहतिरे; 64दंङ दोऊ टिरारे तिहके दोबि रुहक्तिरे, “भविष्यवाणी लेह कंड्रु कि कांह अच़ि तेंङातोह।” 65दंङ दोच़ी ऊई लाह महस मदम गप्पारे दोऊ खिलाप कुड़िर।
महासभाओ तुईज़ी यीशु
(मत्ती 27:1,2; मरकु 15:1)
66अपेहल नीरा शुई ताह यहुदी मीहतु सेंहणारे यहुदी मोह्ड़े पुरोहितरे, यहुदी शास्त्रीरे ठ्रोहका शुईरे, दंङ एनातु यहुदी सभा रिंङ शिल्ज़े रुहक्तिरे, 67अगर कांह मसीह शुनाह, ता ञेंतंङ साते कंड्रु! यीशु ज़ि दोतंङ कुहतो, “अगर गेह केतंङ साते कोहग ता केहच़ी बिशवास माह लोहन” 68दंङ अगर रूहकतिगा ता केहच़ी जुबाब माह रमोंई। 69“पर दिऊ थलबे गेह मीहू योह सर्वशक्तिमान परमेश्वरो सुचंङ हासी बंङज़ोतो।” 70दिरंङ भत्तेज़ि कुहतोर, “कांह छि परमेश्वरो योह शुनाह?” दोई दोतंङ कुहतो, “केहच़ी केनाह ज़ि कुट्रातंई छना कुचे गेह शुगाह।” 71दंङ दोच़ी कुहतोर, “धह ञेंतिंङ गवाहीऊ छि ज़रूरत तोह; छना कुचे हेंज़ी दोऊ आहच़ि थशातंई।”
Айни замон обунашуда:
लूको 22: LBFNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.