लूको 21
21
कंगाल रंणीऊ दान
(मरकु 12:41-44)
1अपेहल यीशु यहुदी मंदिरंङ तोहई, दोहपल दोई साहुकारातिंङ दानपात्रंङ दान केहट्री तंङातो। 2दंङ दोई इच्च़ा कंगाल गरीब रंणी मेच़िमी अति दंङ दोई दानपात्रो अंद्रेग त्रामो झुह्ट टंगा केहच़ी केहरी। (अतु लस महस थोड़े तोहई) 3दंङ यीशु ज़ि कुंई, “गेह केतंङ साते हेले कुट्रातग दि रंणी मेच़िमी दिह भत्त्ते बे बढ़कर दान चड़ाएकतो। 4छना कुचे भत्ते ज़ि एनोह महसे दोरच़ी थोड़े रंदोर दंङ दिह गरीब रंणी मेच़िमी एनोह भत्ते कमाई परमेश्वरो थल्जी रें चरच़तो।”
मंदिरो बिनाशो बारे भविष्यबाणी
(मत्ती 24:1-25; मरकु 13:1-23)
5रेह मीहरे यहुदी मंदिरो पाहठी कुट्री लेहकी तोईरे कि दिह छि ठ्रोह सलठे रघटे ए भेंटो चीज़र सज़ासी तोह, दंङ यीशु ज़ि कुहतो। 6दुह ध्याड़ारे अपोर, “अपेहल दिह भत्ते अंऊ केहच़ी खंड्रातंई दोतु बिचंङज़ि देर रघटु टोईच़ी रघला माह केषोतो अंऊ माह ठ्रव्लषा योतो।”
मुसीबत ए क्लेश
7चेलाज़ि यीशु हखा रुहकातोर, “हे गुरू दिह भत्ते अपेहल शोतो?” दंङ दिह गप्पारे पूरे शुहबिमी शुई ताह छि निशानी शोतो? 8यीशु ज़ि कुहतो, “खबरदार तोहई कि केरे भरमासी मेस, महस मीहच़ी गिऊ अधिकारो दावा लहच़ी अपोर दंङ कोहर, गेह मसीह शुगाह, दंङ दोतु थले था ईलांई। 9अपेहल केहच़ी लड़ाई, ए लड़ाई तु गप्पा थक्पोंई, दंङ था बेंईन, छना कुचे दिह शुहबी ज़रूरी शुह, दंङ दुह टेमा रिंङ संसारो अंत माह शोतो।”
10“दंङ यीशु ज़ि कुंई, इच्च़ा जातिऊ मीहरे ऊई जातिऊ मीहतु खिलाप शोर दंङ इच्च़ा देश ऊई देशो खिलाप शोर, 11दंङ अकाल शोतो ए भुयंल अपोतो ए महामारी शोतो, दंङ सर्गंङच़ि भयानक गप्पारे ए निशानी तंङफोर।” 12पर दिह गप्पा बे तुहई दोच़ी गिऊ मिन्दु बजाहच़ि केतिंङ चुमोर, बरदो रमोर ए यहुदी सभा घरबारंङ रेंज़ा शोर, जेलंङ केओर, दंङ रज्ज़ातु ए हाकिमो तुईज़ी शोर। 13पर दिह केहतु थल्जी गवाही रंड्रीमी मौका शोतो।
14दिऊ थल्जी केहरे जुबाब रंड्रीमी थल्जी तुईबे केनातु सेहमरिंङ चिंद थालांई। 15छना कुचे गेह केतिंङ झांह ठ्रोह गप्पा ए समझ रमोर कि केहतु भत्ते बैरीर केहतु सामना लेह मरपोर। 16केहतु याह बाहरे, न्वारे, टबरारे ए साथिरे लाह केतिंङ च़ुमज़ि लोहर; देहर तचेक कि केहतु बिचंङज़ि रेहईतिंङ सच़ी लाह लोहर। 17दंङ गिऊ टोहकठे विशवास लहज़िमी रंङ साते भत्ते मीहच़ी केतंङ साते बैर लोहर। 18पर केहतु पुंज़ो इच्च़ा क्राह लाह हुंपी मरपोर। 19“केन्दु ज़कसिमी बजाहज़ि केहच़ी केनातु जहानो बचाके तोहई।”
यरूशलेमो बिनाशो भविष्यबाणी
20“अपेहल केहच़ी यरूशलेम शहराबि सेनिकातु दोरच़ी घेरेकसी तंङमोन, दंङ ञेंहऐ केहई कि दोऊ अंत कछंङ तोह।” 21दंङ अंऊ मीहरे यहुदा प्रदेशंङ तोर दोरे बचेक्पिमी थल्जी गोह टोहकठे अच़ा ईलांई; दंङ अरी यरूशलेम शहरो अंद्रेग तोतोंई धह्तेका हुंज़ा अतंई; दंङ अरी नगरारिंङ तोहतोंई दोरे दोहर था ईलांई। 22छना कुचे दिहरे बदला लेहप्च़िमी झांह ठ्रोह ध्याड़ारे शोर, अपेहल पवित्र शास्त्रारिंङ च़ेहसी भत्ते गप्पारे पूरे शोर। 23दुह ध्याड़ारिंङ अंऊ खोकटुंङ शोतो दंङ अंऊ पानू रंड्रा शोतो, दोतु टोईच़ी धिक्कार! छना कुचे देशंङ मोह्ड़े झगड़ा शोतो दंङ दोतु टोईच़ी मोह्ड़े बरदो अपोतो। 24दोतिंङ तलवार रंङ साते सचे च़रपोर दंङ महसे देशो मीहतु बिचंङ केदीतु ठ्रोह छ़ुचे रेंज़ा शोर; अपेहल तचेक ऊई जातितु ध्याड़ा पूरे मशोतो, दोहपल तचेक यरूशलेम शहर ऊई जातितु दोरच़ी बर्बाद शोतो।
मीहू योहू यह्च़ा आगमन
25“एकेरिंङ ए लचंङरिंङ दंङ कर रिंङ निशानी तंङफोर; दंङ धरती रिंङ भत्ते जाति मीहतु टोईच़ी बरदो अपतो। छना कुचे दोरे समुंद्रो छ्वली ए तिऊ चालज़ि बेऐ योर। 26धरती रिंङ अंजा मुसीबतो पाहठी सोचेक्सा मीहतु सेहम बेवा योर। दंङ सर्गो मोह्ड़े शक्ति त्रुलज़ा योर। 27दंङ दोरे मीहरे गेह मीहू योह बि सामर्थ ए मोह्ड़े महिमारंङ बद्ड़ातु टोईच़ी अपि तंङमोर। 28अपेहल दिहरे गप्पारे शुहबी लेहपोर, दंङ हिम्मत रंङ साते खड़े शुहचे; अंजा मुसीबता बि रुमज़ा तोहई, छना कुचे केहतु छुटकारा कछंङ शोतो।”
अंजीरो बुटो उदाहरण
29यीशु ज़ि दोतंङ इच्च़ा कथा ला कुंई; “अंजीरो बुह्ट ए ऊई बुटाहरे खांई। 30अपेहल दुह बुटातिंङ कोपंले हुन्ज़ी, दंङ केतिंङ पता लेहकी इबि कि ष्रेल अपिमी तोह। 31झांह अपेहल केहच़ी दी गप्पा रेह शुहबी खमोंई दंङ ञेंहई च़रतेंई कि परमेश्वरो राज कछंङ तोह।” 32गेह केतंङ साते हेले कुट्रातग, अपेहल तचेक दिहरे गप्पा पूरा माह शोहर दोहथर तचेक दिह पीढ़ीऊ अंत बिल्कुल मशोतो। 33सर्ग ए धरती योह्सा योतो, दंङ गिऊ गप्पारे अपेहल योह्सोतो माह।
चेहकी बंङज़ु
34“दिऊ थल्जी खबरदार तोहई, झांह शुहबी माह जूंस कि केहतु सेहम मस्त ए मतवाला, दंङ दिह ज़िन्दगीऊ चिंदे सुस्त शुहचे योतो। दंङ दुह ध्याड़ा फन्दा ओ ठ्रोह अचानक केहतु तुईज़ी अपतो। 35छना कुचे दुह भत्ते धरती रिंङ बंङज़ातु टोईच़ी झांह ए ठ्रोह अच़ा अपतो। 36दिऊ थल्जी चेहके तोहई दंङ हमेशा प्रार्थना लोहवा लांई कि केरे दिह अंजा मुसीबतो दोरच़ी बचेक्पी गेह मीहू योहू तुईज़ी खड़े शुहबिमी जोहगे शुई।” 37दंङ यीशु नीरा यहुदी मंदिरंङ शिक्षा रंड्राते, रातारिंङ इलजे जैतून मिन्दु गोह रिंङ बंङज़ते; 38दंङ मुंजे सरके भत्ते मीहरेर दोबि रेड्रीमी थल्जी यहुदी मंदिरंङ दोऊ कछंङ अपा लाहतेर।
Айни замон обунашуда:
लूको 21: LBFNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.