लूको 23
23
पिलातुसो तुईज़ी यीशु
(मत्ती 27:11-14; मरकु 15:2-5; यहून्न 18:28-37)
1दंङ भत्ते यहुदी सभाओ मीहरे अच्च़ा यीशुबि पिलातुसो (रोम देशो मोह्ड़े राज्यपाल) कछंङ लेन्ज़ा शिली। 2दंङ दोरे दिह कुचे यीशु मसीहू टोहकठे दोष लगाएच़ी लेहतिरे कि; “दिह ञेंहतु मीहतिंङ भड़काएच़ा दंङ महाराजा बि कर रंड्रीमी थल्जी इंकार लहज़ा।” 3पिलातुसे यीशु रुहक्ती, “छि कांह यहुदी तु रज्ज़ा शुनाह?” यीशु ज़ि दोबि जुबाब रेंहई, “वेई! केई केनेह कुट्रातन।” 4दंङ पिलातुसे यहुदी मोह्ड़े पुरोहितरे ए मीहतंङ साते कुहतो, “गिह्बी दिह मीहू अंद्रेग छले गलती माह खोकसिरी।” 5पर दोरे ऊहई लाह पक्का शुहचे कुट्री लेहतिरे, “दिह गलील प्रदेशो दोरच़ी देर्तिंङ यहुदिया प्रदेशो भत्ते मीहतु बिचंङ एनोह शिक्षा ओ दोरच़ी लड़ाई झगड़ाओ बजह बणेक्पी लेहकी तोह। दिह गलील प्रदेशंङज़ि शुरू लहतो दंङ देर तचेक अच़ा अंजा। 6दिह रेड्रीरंङ पिलातुसे रूहकातो दिह मीह गलील प्रदेशो शुदाह?” 7दंङ दिह ञेंए कि यीशु रज्ज़ा हेरोदेसो प्रदेशो शुह, झांह लेह दुह दोऊ कछंङ चरच़े च़रतिर, छना कुचे दुह टेमारिंङ रज्ज़ा हेरोदेस लाह यरूशलेम शहरंङ तोहई।
हेरोदेसो तुईज़ी यीशु
8रज्ज़ा हेरोदेस यीशु तंङे महस खुश शुहचे इलि, छना कुचे दुह महस ध्याड़ारंङ बे दोबि खंड्रिमी तहरे; दिऊ थल्जी कि दोऊ पाहठी थसी तहरे, दंङ यीशु बि छा हेरानी ऊ कम खंड्रिमी उम्मीद तहरे। 9दुह यीशु दोरच़ी अंयों शुहदा गप्पारे रुहक्च़ी लेहती, पर दोई दोबि छले जुबाब माह रेंई। 10यहुदी मोह्ड़े पुरोहित ए यहुदी शास्त्रीर खड़े शुहचे दोऊ टोईच़ी दोष लगाएच़ी लेहतिरे। 11दंङ रज्ज़ा हेरोदेसे एनोह सेनिक रंङ साते यीशु बेज़ती ए मज़ाक लहरी लेहतिर, दंङ चमकदार खमज़ेर लेहकी पिलातुसो हखा याहच़े च़रति। 12दुहए ध्याड़ारिंङ पिलातुस ए हेरोदेस साथीकु शुहचे इलिरे; छना कुचे दिहबे तुहई दोकु इच्च़ा जुह्टो बैरी तोईरे
पिलातुसो दोरच़ी यीशु बि सच़िमी दंड
13पिलातुसे यहुदी मोह्ड़े पुरोहितरे ए यहुदी मुख्यारे ए मीहरे बुलाके दोतंङ कुहतो, 14केहच़ी दिह मीह गिऊ कछंङ ह्न्दंई, कि दिह दंगा लहज़ी ए थल्जी मीहतु बिचंङ फूट केट्रा, दंङ खांई, गेह केहतु तुईज़ी दोऊ फेंसला लाहतग, पर अंऊ गप्पातु केहच़ी दोऊ टोईच़ी दोष कुट्रातंई दुह गप्पातु पाहठी गेह दोहरिंङ छले गलती माह खोक्शातग; 15रज्ज़ा हेरोदेसे ए ला दोऊ अंद्रेग छले गलती माह खोकसिरी, छना कुचे दोई दिह हेंदु हखा याहच़े चरच़तो; दंङ खांई दिह मीह सच़िमी सज़ाओ जोगे छले गलती माह लहतो। 16“झांह लेह दोबि गेह कोड़े रंङ तेंङज़ि लेह चरच़े च़रपोग।” 17पिलातुस फसह त्याहरो मुक्का यहुदी मीहतु थल्जी इच्च़ा केदी बि रिहा लहज़ाते। 18दंङ भत्ते मीहरेर ठ्रोहका शुहचे हाऊष रंड्री लेहतिरे, “दिह्बी सचे च़रतुंई, दंङ ञेंहतु थल्जी बरअब्बा बि रिहा लेह च़रतुंई।” 19बरअब्बा बि इलाकंङ मीहतु बिचंङ फूट केहट्री ए हत्या लहज़िमी थल्जी जेलंङ केहषी तोहई। 20पर पिलातुसे यीशु रिहा लहज़िमी थल्जी मीहतिंङ यच़ाह समझाति। 21पर मीहरे हाऊषेके कुट्री लेहतिर, “दुह क्रूसो टोईच़ी चढ़ाएतु, क्रूसंङ।” 22दोई तीसरा फेरा रूहकातो, “छिले, दिह छि मांजी लहसी ततो? गेह दिऊ अंद्रेग सच़िमी जोगे छले मांजी लाहसी माह खोक्शातग। दिऊ थल्जी गेह दिबी कोड़े रंङ तेंङज़ि लेह इबि रमोग।” 23पर मीहरे हाऊषेके-हाऊषेके कुट्री लेहतिरे कि दोबि क्रूसो टोईच़ी केहच़ी सच़ी च़रतिन, दंङ दोतु हल्ला बेहसी लेहती। 24झांह लेह पिलातुसे कुड़ी कि मीहतु मांग पुरा लांही। 25दंङ पिलातुसे मीहतु हिटीऊ हिसाबे दुह मीह रिहा लेह केई अरी फूट, झगड़ा ए मीह सच़िमी बजाहज़ि कैद तोहई; दंङ यीशु बि दोतु हिटीऊ हिसाबे रेंऐ च़रति।
यीशु बि क्रूसो टोईच़ी केट्री
(मत्ती 27:32-33; मरकु 15:21-24; यहून्न 19:17)
26अपेहल सैनिकरे यीशु बि शिल्ज़ी लेहकी तोईरे, दंङ दोच़ी शमौन मिन्दु इच्च़ा मीह अरी नगरओ दोहरची यरूशलेम शहरो हखा अपि लेहकी तोहई दुह कुरेन शहरो तोहई, दोबि च़ुमने क्रूस खाके दोबि यीशु थले-थले रेंज़ा शिलिरे। 27मीहतु महस मोह्ड़े भीड़ दोऊ थले शुई दंङ अंयों शुदाह मेच़िमी रे लाह तोईरे अरी यीशु थल्जी क्रपि लेहकी तोईरे। 28यीशु ज़ि दोतु हखा किरज़ा कुहतो, “हे यरूशलेम शहरो मीओरे, गिऊ थल्जी थाह क्रपतुंई; पर छिला धिर शुहबिमी तोह दोऊ पाहठी केनातु कटुतु थल्जी क्रप्तुंई। 29छना कुचे खांई, दुह दुखो ध्याड़ारे अपातोर, अंऊर मीहच़ी कोहर, धन्य शुहरे दोरे मेच़मीरे अतु अपेहला कटुरे माह तोईर, अच़ि अपेहला कटुतिंङ जन्म माह रेंईर अच़ि अपेहला दोतु भाषे पोषण माह लहतोर। 30दुह मुक्का मीहरेर गोहतिंङ कोर, कि ञेंहतु टोईच़ी दह्चे ईलांई, दंङ दुह रंगी ठाहरीरिंङ कि ञेंहरे कपचे च़रतुंई। 31अगर अरीया निर्दोष मीहरंङ साते झांह शवाह ता सोचेक्तुंई कि दुह मीहतंङ साते छि शोतो अरी मीहरे दिह सज़ाओ जोगे तोतोर।” 32यीशु रंङ साते सेनिका तु दोरच़ी सच़िमी थल्जी झुह्ट ऊई मीहतिंङ ला रेंज़ा शिलिर अरी महस गुहनेगार तोईरे। 33अपेहल दोरे दुह ठाहरीरिंङ अतिंङ कोपली (खोपड़ी) कुट्री पिचातेर, दंङ सेनिका ज़ि यीशु ए दुह कुकर्मीर ला इच्च़ा सुचंङ हासी इच्च़ा फुचंङ हासी क्रूसो टोईच़ी केरिरे। 34दंङ यीशु ज़ि कुहतो, “हे बाह, दितिंङ माफ लेह च़रतु, छना कुचे दोच़ी माह ञेंहच़ातोर छि लाहतोर।” दंङ दोच़ी चिट्ठी केट्रे दोऊ खमज़ेर एनातु बिचंङ फाए च़रतिर।
35मीहरे खड़े शुहचे खंड्री लेहकी तोईरे, दंङ यहुदी मुख्या रे ला मज़ाक लेह कुट्रातेर; “दिह ऊई मीहतिंङ बचाकते, अगर दिह परमेश्वरो मसीह शुह ता, दंङ दोऊ अंङषी शुह ता एनाबि बचाएतु।” 36सेनिकरे ला कछंङ अंज़े ए सिरका रेंऐ दोऊ मज़ाक लेह कुट्रातेर, 37“अगर कांह यहुदी तु रज्ज़ा शुनाह ताह, केनाह बि बचाके च़रतु।” 38दंङ सैनिकज़ि क्रूसो तोरिंङ बक्शे तकती लगाएती अतु टोईच़ी यीशु ऊ थल्जी दिह च़ेहसी तोहई कि, “यहुदी मीहतु रज्ज़ा।”
सेहम यह्च़ाड़ कुकर्मी
39अरी कुकर्मी क्रूसंङ टोहंषी तोईरे, दोतु बिचंङज़ि इच्च़ा यीशु बुराई लेह कुहतो, “कांह छि मसीह माह शुनाह? दंङ केनाबि ए ञेंतिंङ बचाएतु।” 40दिरंङ अईदि दुह रैहच़ी कुहतो, “कांह छि परमेश्वरारंङ साते ला माह बेवातना? केई ला ता दुह ए सज़ा खोक्चातन। 41दंङ हेनारे ता कानूनो हिसाबे सज़ा खोकच़ातंई, छना कुचे हेंज़ी हेंदु कर्मो फल खोक्चातंई; पर दिह छले मांजी कम लहसी माह।” 42दंङ दोई कुहतो, “हे यीशु, अपेहल कांह इच्च़ा रज्ज़ा ठ्रोह अपोन, दोहपल गिऊ लाह गेश लोहू।” 43यीशु ज़ि दोबि कुहतो, “गेह करंङ हेले कुट्रातग कि तोग ए कांह गेरंङ साते स्वर्गंङ शॉन।”
यीशु एनोह जान रंड्री
(मत्ती 27:45-56; मरकु 15:33-41; यहून्न 19:28-37)
44नीरा शुहतर भत्ते देशंङ हंयार शुहचे इलि, दंङ दुह षुमु पहरङ (लगभग 3 बजे) तचेक तोहई। 45दंङ एकेऊ छंङी अच्च़ा इलि, दंङ यहुदी मंदिरो दुह पर्दा अंऊ भत्ते मीहतिंङ परमेश्वरो तुईज़ी इबिमी रंङ साते रोकेक्चते, तोरिंङ ज़ि योंङ तचेक ट्रलशा इलि, 46दंङ यीशु ज़ि मोह्ड़े हाऊष रें कुहतो, “हे बाह गेह घेंङौ आत्मा कांह गुहड़िंङ रंड्रातग,” दंङ दिह कुचे प्राण रें च़रति। 47दंङ सेनिकातु मुख्या दिह भत्ते धिर खांई परमेश्वरो तारीफ लहरी, दंङ कुंई, “हेले दिह मीह धर्मी तोहई।” 48दंङ मीहरे अरी दिह खंड्री ठ्रोहका शुहचे तोईरे, दिह भत्ते खांई काह कुटेके एनोह चुंखा यह्च़ा इलिर। 49पर दोऊ भत्ते साथीरे ए अरी मेच़मीरे गलील प्रदेशंङ च़ि दोरंङ साते अंज़े तोईरे दोरे खड़े शुहचे दिह भत्ते धिर खंड्री लेहकी तोईरे।
यीशु बि पथेक्च़ी
(मत्ती 27:57-61; मरकु 15:42-47; यहून्न 19:28-42)
50दोर तिंङ यूसुफ मिन्दु यहुदी महासभा ओ इच्च़ा नेता तोहई, अरी रूठे ए धर्मी मीह तोहई। 51दंङ दोतु योजना ए कमो दोरच़ी राजी माहतोई। यूसुफ यहुदिया प्रदेशो अरीमतिया इलाकाओ बंङज़ा ए परमेश्वरो राज्य इंतज़ार लहज़ा तोहई। 52यूसुफे पिलातुसो कछंङ इलजे बिनती लहरी कि यीशु लाश दोबि रें च़रतु; 53दंङ दुह तकशे मलमलो चादरो बिचंङ ज़िल्ज़ी लहरी, दंङ यीशु फुक कब्रङ अंऊ गोह कोरेकि बणाएठ्री दोहर केहरी; दंङ दोहर अरीला केहषी माहतोई। 54दुह अरामो ध्याड़ो तेयारी ध्याड़ा तोहई, दंङ अरामो ध्याड़ा शुरू शुहबिमी तोहई। 55दंङ दुह मेच़िमी ज़ि अरी दोरंङ साते गलील प्रदेशंङ च़ि दोर तिंङ अंज़े तोईरे, थलेच़ि इलजे दुह कब्र खंयातोर, दंङ दिह लाह कि दोऊ फुक छना ठ्रोह केह्षी तोत। 56दंङ दोरे मेच़मीरे एनोह चुंखा यह्च़ा रूठेबासरंङ चीज़रे ए यीशु फुकारिंङ चाच़िमी थल्जी इत्र तेयार लाहतेर, दंङ अरामो ध्याड़ारिंङ दोच़ी मुसाओ कानूनो हिसाबे आराम लहरिर।
Айни замон обунашуда:
लूको 23: LBFNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.