Apostoloin ruavot 11
11
Pedrin sellitykset Jerusalimas
1Apostolat da Juudien eri kohtis eläjät uskovellet kuultih, kui Jumalua tundemattomatgi rahvahat otettih vastah Jumalan sana. 2Konzu Pedri tuli Jerusalimah, ymbärileikatut#11:2-3 Ymbärileikatut oldih vai jevreit, ymbärileikkuamattomat – kai muut. uskovellet viäritettih händy: 3«Mikse sinä menit gostih ymbärileikkuamattomien luo da söit heijänke?»
4Sit Pedri sellitti heile, kui oli kai allus loppuh suate. Häi sanoi: 5«Minä olin Joppen linnas da moliimmos. Sit minä unohtimmos da minule oli nägy: taivahaspäi heityi juuri minun edeh milienne, buitegu suuri hursti, kudai heitettih n՚elläs čupus. 6Ku rubein kaččomah sidä, näin sie muan n՚ellijalgazii, zvierilöi, vilizijöi dai taivahan linduloi. 7Minä kuulin vie iänen, kudai sanoi: ‘Nouze, Pedri, iške da syö!’ 8Minä vastain: ‘Ei, ei Ižändy! Nikonzu en pannuh suuh nimidä paganua da eipuhtastu.’ 9Sit iäni toizen kerran sanoi taivahaspäi: ‘Kudaman Jumal puhtasti, sidä sinä älä sano paganakse.’ 10Nenga oli kolme kerdua. Sit kai nostettih järilleh taivahah.
11Juuri sil aigua kolme miesty azetuttih sen taloin edeh, kudamas myö olimmo. Heidy oli työtty Kesariespäi minun luo. 12Hengi käski minule lähtie heijänke ebäilemättäh. Minunke lähtiettih nämä kuuzi vellie, i myö menimmö sen miehen kodih, kudai työndi kuččumah minuu. 13Se mies saneli meile, kui nägi anhelin seizomas hänen talois. Anheli oli sanonuh hänele: ‘Työnnä Joppeh miehii tuomah tänne Simonua, kudamua sanotah vie Pedrikse. 14Häi sanou sinule sanat, kudamien vuoh suat piäzendän sinä dai kai sinun pereh.’ 15I konzu rubein pagizemah, heityi Pyhä Hengi heijän piäle, kui allus heityi meijän piäle. 16Sit mustoitin, midä sanoi Ižändy: ‘Iivan ristii viel, a teidy ristitäh Pyhäl Hengel.’ 17Ga sit ku Jumal andoi heilegi juuri moizen lahjan kui meile, konzu rubeimmo uskomah Ižändäh Iisussah Hristossah, kenbo sit olin minä vastustamah Jumalua?»
18Tämän kuultuu kaikin hil՚l՚ettih da ruvettih ylendämäh Jumalua sanoil: «Ga onhäi Jumal andanuh Händy tundemattomilegi rahvahile riähkiskiändymizen da sen kauti elaijan!»
Antiohieh rodieu uskojien kanzukundu
19Jälles Stefanan tapandua uskojii ruvettih painamah, i hyö levittih muadu myö. Hyö mendih Finikieh, Kiprale da Antiohieh suate, no ei saneltu Jumalan sanua muile, ku vai jevreilöile. 20Yhtelläh heijän joukos oli erähii kipralazii da kirenielazii, kudamat Antiohieh tulduu ruvettih sanelemah gretsieläzilegi hyviä viestii Ižändäh Iisussah näh.
21Heidy kannatti Ižändän käzi, i suuri joukko rubei uskomah da kiändyi Ižändän puoleh. 22Viesti täs tuli Jerusalimas olijan uskojien kanzukunnan korvih, i hyö työttih Varnavua Antiohieh. 23Ku sinne tulduu häi nägi, midä Jumalan hyvys luadii, häi ihastui da kehitti kaikkii tävvel sydämel rippumah Ižändäs. 24Varnava oli hyvä mies, täyzi Pyhiä Hengie da uskuo. I äijy rahvastu Antiohies yhtyi Ižändäh.
25Sit Varnava lähti Tarsah eččimäh Saulua, 26löydi händy da toi Antiohieh. Sie hyö ynnällizen vuvven oldih yhtes uskojien kanzukunnanke da opastettih suurdu rahvasjoukkuo. Antiohii oli enzimäine kohtu, kus opastujii ruvettih nimittämäh hristossalazikse.
27Sih aigah Jerusalimaspäi tuli Jumalan iänenkandajua Antiohieh. 28Yksi heis, Agavu-nimelline, Hengen vallas olles ennusti, gu kogo muailmale tulou suuri n՚älgy. Muga rodihgi keisari Klavdien aigah. 29Sit opastujat otettih mieleh työndiä abuu Juudies eläjile uskovellile, jogahine omii taguzii myöte. 30Mugai hyö luajittih da Varnavan da Saulanke työttih uskojien kanzukunnan vahnimile d՚engua.
Айни замон обунашуда:
Apostoloin ruavot 11: LIVVI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003