Zãn 15
15
Divɛ̃n vɛ̃̀hṹ àá mí ńnɛhɛ̃ wĩ̀i
1Ɛ́ Yiezu ɛ́ bĩniɛ zɔn bie ɛ́ nɛ làa: «Ǹpe iè lè divɛ̃n vɛ̃̀hṹ àá bɔ̀bín, ɛ̀ kìe Yàá ɛ́ iè ɔ̀lɛ ɛ́ te pe le bòo ɛ́ húi. 2Ɛ́ hɔ́ ńnɛ́hɛ̃, lɛ wi mi ǹ míkùi kɛ́ hɔ́ yá biè ɛ̀ hɛ, ɛ́ kìe Yàá ɛ́ ɓén ɓúukɛ hɔ ɛ́ kóosí. Ɛ̀ hɔ̀ ńnɛ́hɛ̃ lɛ ɛ́ hɔ̀ biè ɛ̀ hɛ, á ɓén tánkɛ hɔ ńnɛ́n-cíini lɛ wi pe hɔ́ sɛhĩ́ɛ ɛ́ lé yán, ɛ́ hɔ́ wo bĩní ɛ́ wookɛ hɛ hɔ biè ɛ́ sãàní. 3Ɛ́ kɛ̀amu, ɛ́ hɔ́ bòo lɛ ɛ́ ń kɛ́rɛa àá miɛ, ɛ́ lɛ́ ɛ́ mí wo zĩ̀níkɛa ɛ́ ce. 4Ɛ́ mí cɛ dìń mi ǹ, kɛ̀a bòo lɛ ɛ́ ń dàa can dɛ̃̀ miɛ ǹ. Ńnɛ́hṹ ɛ́ yí dɛ̀ biè yá hɛ míte ǹ, kɛ́ lé yí cɛ dĩń lé vɛ̃̀hṹ ǹ wɛ̀. Ɛ́ kɛ̀amu, ɛ́ mípe ɛ́ ɓiɛ̀ yí dɛ̀ biè ɛ́ yá hɛ, kɛ́ mí yí cɛ dĩ̀ń mi ǹ wɛ̀.
5Ɛ́ ńpe iè lè vɛ̃̀hṹ, ɛ̀ mìpe iè hɔ̀ ńnɛ́hɛ̃. Kɛ́ álɛ ɛ́ can dɛ̃̀ mi ǹ, ɛ̀ ǹpe lò ɛ́ ɓiɛ̀ can dɛ̃̀-a ǹ, ɛ́ ɓàasɔ ɛ́ wóo hɛ biè bɔ̀kùi, iè hɔ̀ lɛ ɛ́ mí yí dɛ̀ bòo dɔ̀ ɛ́ yá wé míte ǹ kɛ́ ńpe ɛ́ bòo mí wɛ̀. 6Kɛ́ álɛ ɛ́ yí cɛ dĩ̀ń mi ǹ, ɛ́ kìe Yàá ɛ́ leń ɔ́ ɛ́ tɛ́viɛní kɛ̀a le ńnɛ́hṹ lɛ ɛ́ ɓɛ́ wóò cɛ̃́un tɛ́viɛní bòo sí, ɛ́ lé wo ɛ̀ he. Ɛ̀ hɔ̀ ńnɛ́hɛ̃ lɛ hɔn ɛ́ ɓɛ́ wóò khui ɛ̀ vɛ kóo hɔ́ dũń hũn, ɛ̀ hɔ̀ cĩ̀. 7Kɛ́ mí ɛ́ can dɛ̃̀ mi ǹ, ɛ̀ niǹ biehĩ́ ɛ́ lò wi mi tĩɛ̀ hũn, ɛ̀ mì hɛ̃un bòo lɛ ɛ́ mí wɛ míkùi, ɛ́ mí yí hɔ́. 8Kɛ́ mí ɓen ɛ́ hɔ̀ bɔ̀tente ɛ̀ wé buòní, kɛ̀a bòo lɛ ɛ́ lé vɛ̃̀hṹ ɛ́ dàa wóò hɛ hɔ bie bɔ̀kùi, ɛ̀ mì iè niǹ kɛ̀ránzɛ̀ɓɛ̀ àá bɔ̀bín, ɛ̀ kɛ̀amu, ɛ̀ mì ɛ́ kìe Yàá ɛ̀ ɓàanínin. 9Kɛ̀a bòo lɛ á Yàá dàa wɛ mi, ɛ́ ńpe ɓiɛ̀ wɛ miɛ. Ɛ́ mí kań niǹ wanminu hũn. 10Kɛ́ mí tɛ̀ niǹ ɲunù bienù bòo, ɛ̀ mì wi niǹ wanminu hũn kɛ̀a bòo lɛ ɛ́ ńpe ɛ́ tɛ̀ kìe Yàá ɲunù bienù bòo, ɛ́ dàa wi piè wanminu hũn. 11Ń khɛ́ hɔ́pe sí ɛ́ lɛ́ miɛ ǹ bòo lɛ ɛ́ wé ɛ̀ niǹ tĩwiɛ̀ ɛ̀ wé àá miɛ, ɛ̀ mì tĩwiɛ̀ ɛ̀ dàá ɲunù tí.
12Ɛ́ niǹ ɲunù bienù ɛ́ iè lè lɛ: Mì wɛní ɓán àá mí nì-cóohɛ̃, kɛ̀a bòo lɛ ɛ́ ń dàa wɛ miɛ. 13Kɛ́ nìnbírɔ ɛ́ lɛ mí mɛkɛ̃nì ɓá pàáɓɛ́ yènsénín, ɛ̀ wanminu dɔ̀ lɛ ɛ́ bĩniɛ pɔ le ɛ́ mínɛ wɛ̀. 14Kɛ́ mí ɛ́ hɔ̀ bòo lɛ ɛ́ ń bie lɛ́ miɛ ǹ ɛ̀ wé, ɛ̀ mì iè kìe pàáɓɛ́. 15Ɛ́ ń wo bĩniɛ yá mi ve nɛ niǹ tɔntɛ́riè, iè hɔ̀ lɛ á tɔntɛ́ ɛ́ yí dũ bòo lɛ ɛ́ ɓɛ́ ɲunsɔ ɛ́ wé wɛ̀. Kɛ́ nin mì ve nɛ kiè pàáɓɛ́, iè hɔ̀ lɛ ɛ́ hɔ́ bòo lɛ ɛ́ ń ɲɛ́ kìe Yàá viì míkùi ɛ́ ń zɛ̃́niɛ àá miɛ. 16Mìpe ɛ́ yí teń mi ɛ́ yí muń, kɛ́ ńpe ɛ́ te miɛ munɛ. Ɛ́ ń munɛ miɛ ɛ́ tɔrɛ nɛ mi vɛ hɛ hɔ biè, hɔ̀ bie lɛ ɛ́ wóò kań yán fúu, bòo lɛ ɛ́ wé, ɛ̀ hɔ̀ bòo míkùi lɛ ɛ́ mí wóo ɓén hɛ̃un niǹ yèrè lɔ̀n kìe Yàá viì, à lɛ́ hɔ́ miɛ ǹ. 17Hɔ̀ bòo lɛ bòo hie lɛ ɛ́ ń nɛ mi fɔ́ɓán ɛ́ mì wé iè hɔ̀ lɛ ɛ̀ mì wɛní ɓán mìkùi àá mí nì-cóohɛ̃.»
Bòo lɛ ɛ́ dímíɲɛ́ nìɛ dàa hɛ́rɛ Yiezu àá mí kɛ̀ránzɛ̀ɓɛ̀
18Ɛ́ Yiezu ɛ́ bĩniɛ zɔn bie ɛ́ nɛ làa: «Kɛ́ ɓɛ́ dímíɲɛ́ nìɛ ɛ́ hɛ́rɛ miɛ, ɛ̀ mì dũń kɛ́ ɓɛ́ hɛ́rɛ mi ɛ́ cɔ́ miɛ. 19Kɛ́ mí bòo ɛ́ hṹn sɛ̃̀ lè dímíɲɛ́ ǹ, ɛ́ ɓɛ́ dímíɲɛ́ nìɛ ɛ́ hṹn ɓén wɛní miɛ iè hɔ̀ lɛ ɛ́ lépe dímíɲɛ́ ɛ́ te miɛ. Kɛ́ ńpe ɛ́ den munɛ miɛ, ɛ́ líeniɛ lè dímíɲɛ́ hũn, ɛ́ mí wo bĩniɛ bòo yí sĩ̀ lè dímíɲɛ́ ń wɛ̀. Ɛ́ sí iè hɔ̀pe temu lɛ́ ɛ́ ɓɛ́ dímíɲɛ́ nìɛ ɛ́ dàa hɛ́rɛ miɛ. 20Mì bí nɛ mi hũn ɓé hɔ́ bòo lɛ ɛ́ ń bie lɛ́ miɛ ǹ nɛ a tɔntɛ́ ɛ́ yí pɔ ɓɛ́ ɲúnsɔ wɛ̀. Kɛ́ ɓɛ́ nìnbirìe ɛ́ bieniɛ niǹ lɔ̀n, ɛ́ ɓɛ́ ɓiɛ̀ ɓén biení mí lɔ̀n. Kɛ́ ɓɛ́ ɛ́ tɛ̀ niǹ bienù bòo, ɛ́ ɓɛ́ ɓiɛ̀ ɓén tɛ̀ mì biehĩ́ bòo. 21Ɓɛ̀ ɓén wé hɔ́pe sí míkùi àá miɛ niǹ yèrè bòo hũn, iè hɔ̀ lɛ ɛ́ ɓɛ́ yí dũ ape lɛ ɛ́ te nin tɔrɛ wɛ̀. 22Kɛ́ ń hṹn yí ɓen, ɛ̀ ɓen bie àá ɓɛ́, ɛ́ peɓɛ̀ bɔ̀koohɛ̃ ɛ́ hṹn yá ɓén wé wɛ̀. Kɛ́ kɛ̀a sáalɛ, ɛ́ ɓɛ́ wo yí dɛ̀ bɔ̀tĩɛ̀ ɛ́ yá yí ɓɛ́ bòo hũn wɛ̀. 23Nìnbírɔ lɛ kɛ́ á hɛ́rɛ mi, à lò ɓiɛ̀ hɛ́rɛ kìe Yàá. 24Kɛ́ ń hṹn yí wé hɔ́ bòo lɛ ɛ́ nìnbírɔ dɔ̀ ɛ́ ɲɛùn yí wé yí mi ɓɛ̀ nìnbirìe tĩ́ihṹ, ɛ́ peɓɛ́ bɔ̀koohɛ̃ ɛ́ hṹn yá ɓén wé wɛ̀. Kɛ́ kɛ̀a sáalɛ, ɛ́ ɓɛ́ wo mɔn hɔ̀ bòo lɛ ɛ́ ń wɔ́, ɛ̀ ɓɛ̀ lò pɛ́ hɛ́rɛ mi, ǹpe àá kìe Yàá. 25Kɛ́ hɔ́ den wɔ́ kɛ̀amu, bòo lɛ ɛ́ wé ɛ̀ hɔ̀ bòo lɛ ɛ́ wɛ̃́ peɓɛ̀ làndɛ́ vɛ̃hṹ ɛ́ nɛ: “Ɓɛ̀ hɛ́rɛ mi, kɛ́ ń lò yí yáakɛ bòo dɔ̀,” ɛ̀ dàá ɲunù tí. 26Mì Yíinírɔ ɛ́ vaá-ɓen, àpe lɛ ɛ́ nin tɔn à lí-e Yàá viì ɛ̀ dàá ɓen síɛ mí viì. À iè hɔ̀ bɔ̀berà Mɛkɛ̃ni lɛ lɔ́ àá ɔ̀ Yàá viì. Ɛ́ pɛ̃̀hṹ lɛ kɛ́ á ɓɛrɛ, á ɓén bie niǹ bòo. 27Ɛ̀ mìpe lò ɓiɛ̀ ɓén bie niǹ bòo, iè hɔ̀ lɛ ɛ́ mí kɛrɛ àá mì niǹ tɔnlɔ́ fìi ɓánlén fúu ɛ̀ ɓen dɛ̃ zoòni.»
Айни замон обунашуда:
Zãn 15: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation