Zãn 16
16
1«Ń bie hɔ́pe bòo sɔ sí ɛ́ lɛ́ miɛ ǹ bòo lɛ ɛ́ wé ɛ̀ bòo dɔ̀ bí lɛ́ ɛ̀ mì fùansí hɔ́ ńdɛsĩ̀nlɔ́ ǹ wɛ̀. 2Ɓɛ̀ wóo ɓén ɲɛ miɛ ɛ́ líení ɓɛ́ Zuifuɓɛ ńkóoɓánlɔ̀n zĩhĩ́ɛ hũn. Ɛ̀ pɛ̃̀hṹ dɔ̀ ɛ́ ɓén vɛ dɛ̃, ɛ̀ ɓɛ̀lɛ ɛ́ mì ɓé, ɛ́ wóo ɓén lieníkɛ nɛ hɔ iè Dɔfĩn tɔnlɔ́ ɛ́ ɓɛ́ ɛ́ tɛ́. 3Ɓɛ̀ wóo ɓén wé hɔ́pe sí iè hɔ̀ lɛ ɛ́ ɓɛ́ yí dũ kìe Yàá, ɛ̀ ɓɛ̀ lò yí dũ mi wɛ̀. 4Kɛ́ ń den bie hɔpe bòo sɔ sí ɛ́ lɛ́ miɛ ǹ bòo lɛ ɛ́ wé, kɛ́ pehɔ̀ pɛ̃̀hṹ ɛ́ van dɛ̃un, ɛ̀ mì liení kɛ́ ń sɛ̃̀nɛ́hã̀ bie hɔ lɛ́ miɛ ǹ.»
Lè Mɛkɛ̃n-Sãanu bòo lɛ ɛ́ lé wóò wé
«Ń yí bie hɔ lɛ́ miɛ ǹ pehɔ̀ fìi ɓánlén, iè hɔ̀ lɛ ɛ́ ń hṹn wi ɓánlɔ̀n àá miɛ. 5Ɛ́ Kɛ̀a sáalɛ ɛ́ ń wo vaá-vɛ alɛ te nin tɔrɛ viì, kɛ́ hɛ̀rí nìnbírɔ mì tĩ́ihṹ ɛ́ yá nìn dìenin nɛ hɔ iè yí ɛ́ ń vaá-vɛ wɛ̀. 6Kɛ́ mí tĩɛ̀ den yòó yáa cɛ̃̀un, iè hɔ̀ lɛ ɛ́ ń bie hɔpe bòo sɔ sí ɛ́ lɛ́ miɛ ǹ. 7Kɛ́ hɔ́ lò den iè bɔ̀berà ɛ́ nín bie àá miɛ nɛ hɔ bòo ɛ́ tṹ mí viì ɛ̀ ǹ lan; iè hɔ̀ lɛ kɛ́ ń yí lan, á lɛ mii yíiní miɛ ɛ́ yá ɓen wɛ̀. Kɛ́ ń ɓen cɔ́, ɛ́ nín vɛ́ tɔn ɔ̀ á ɛ́ ɓen mì viì. 8Kɛ́ á ɓen ɓɛrɛ, á ɓén zɛ̃́ní ɛ́ lɛ́ ɓɛ́ dímíɲɛ́ nìɛ ǹ, ɛ́ ɓɛ́ dũń kɛ́ ɓɛ́ iè biè lɛ yí dũ hɔ bɔ̀koohɔ́, ɛ̀ ɓɛ̀ yí dũ hɔ cã̀anírɔ́, ɛ̀ ɓɛ̀ lò yí dũ hɔ lìe lènlɔ́ bòo wɛ̀. 9Á ɓén zɛ̃́ní ɛ́ lɛ́ ɓà ǹ kɛ́ peɓɛ̀ bɔ̀koohɔ́, iè hɔ̀ lɛ ɛ́ ɓɛ́ yí dɛsĩ̀ mi ǹ wɛ̀. 10À ɓén zɛ̃́ní ɛ́ lɛ́ ɓà ǹ kɛ́ hɔ́ cã̀anírɔ́ iè hɔ̀ lɛ ɛ́ ń vaá-vɛ kìe Yàá viì, ɛ́ mí wo yá ɓén bĩní mi mi wɛ̀. 11Á ɓén zɛ̃́ní ɛ́ lɛ́ ɓà ǹ kɛ́ hɔ́ lìe lènlɔ́, iè hɔ̀ lɛ ɛ́ Dɔfĩn ɛ́ lɔ̀ lèpe dímíɲɛ́ sɔ lɛ bɛ́zuú lɛ iè ɔ̀ Sitũanɛ lìe vɔ́, ɛ́ mii biení lɔ̀n.
12Ń bĩniɛ dàa bòo bɔ̀kùi dɔ̀ ɛ́ nin bie lɛ́ miɛ ǹ, kɛ́ hɔ́pe lɛ lɔ̀n ɛ́ mí ɲɛùn yí dɛ̀ mì hũn yá hè pehɔ̀ bòo hũn wɛ̀. 13Kɛ́ lé Mɛkɛ̃n-Sãanu lɛ iè hɔ̀ bɔ̀berà Mɛkɛ̃ni ɛ́ ɓen ɓɛrɛ, ɛ́ Lé ɛ́ zɛ̃́ní miɛ àá Dɔfĩn bɔ̀berà bòo míkùi, ɛ̀ Lè yá wóo ɓén bie mí kùrú bòo, kɛ́ bòo lɛ ɛ́ Lé ɲɛ́ míkùi iè pe ɛ́ Lé wóo ɓén bie, ɛ̀ Lè ɓén bie bòo lɛ vaá-ɓen bòo ɛ́ lɛ́ miɛ ǹ. 14Lè ɓén ɓàaní mi ǹ, iè hɔ̀ lɛ ɛ́ bòo lɛ bòo sɛ̃̀ mi ǹ iè pe ɛ́ Lé ɓén fé ɛ́ khíi bie ɛ́ lɛ́ miɛ ǹ. 15À Yàá bòo lɛ á te míkùi ɛ́ ń ɓiɛ̀ te. Ɛ́ sí iè hɔ̀pe ɛ́ ń dàa nɛ le Mɛkɛ̃n-Sãanu ɛ́ ɓén fé bòo lɛ bòo sɛ̃̀ mì ǹ ɛ́ khíi bie ɛ́ lɛ́ miɛ ǹ.»
Mì tĩyaarè lɛ ɓén zɛ̀ní ɛ́ khíi wé tĩwiɛ̀ bòo
16Ɛ́ Yiezu ɛ́ bĩníɛ zɔn bie ɛ́ nɛ làa: «Hũ̀nún àá fĩ́i ɛ̀ mì yá ɓén mi mi, kɛ́ hɔ́ ɓen khie wɔ́ fĩ́i ɛ̀ mì sĩ̀n ɓén bĩní mi mi.» 17Ɛ́ piè kɛ̀ránzɛ̀ɓɛ̀ dɔ̀ ɛ́ khie ɛ́ bie ɓán hũn ɛ́ nɛ làa: «Ɛ́ hɔ́ wo iè ńɓùo á ɛ́ cɛ̀ mii bie á dàa nɛ hũ̀nún àá fĩi ɛ̀ kè yá ɓén mi mí, iè kɛ́ hɔ́ ɓen khie wɔ́ fĩ́i ɛ̀ kè sĩ̀n ɓén bĩní mi mí, ye iè hɔ̀ lɛ ɛ́ mí vaá-vɛ a Yàá viì?» 18Ɛ́ ɓɛ́ bĩniɛ zɔn bie nɛ: «Ɛ́ hɔ́pe lɛ á nɛ hũ̀nún àá fĩ́i iè bòo á nɛ wɛrɛ̀? Ké hɛ̀ yí dũ bòo lɛ á bie ɲún wɛ̀.» 19Ɛ́ Yiezu ɛ́ dũnɛ kɛ́ ɓɛ́ ɛ́ cɛ̀ ɛ́ ɓɛ ɛ̀ dìe ɔ̀ ǹ, á zɔn bie lɛ́ ɓà ǹ nɛ làa: «Mí ɛ́ dìekɛ ɓán hɔ̀ bòo lɛ ɛ́ ń bie lɔ̀n nɛ hũ̀nún àá fĩ́i ɛ̀ mì yá ɓén mi mi, kɛ́ hɔ́ ɓen khie wɔ́ fĩ́i ɛ̀ mì sĩ̀n ɓén bĩní mi mi. 20Ɛ́ nin bie hɔ lɛ́ miɛ ǹ àá bɔ̀bín nɛ mí ɓén wíríkɛ kɛ́ mí ɛ́ cãamɛkɛ, kɛ́ ɓɛ́ dímíɲɛ́ nìɛ pe ɛ́ wɛ ɓɛ́te. Mí ɓén kań lé tĩyaarè hũn, kɛ́ mí tĩyaarè ɛ́ ɓén zɛ̀ní ɛ́ khíi wé tĩwiɛ̀. 21Hɔ̀ ɛ́ dɛ̃̀ kɛ̀a ie hṹnu lɛ ɛ́ ɓen mii te, à tĩì wóò yaa, iè hɔ̀ lɛ ɛ́ piè lɔ̀nbiè pɛ̃̀hṹ ɛ́ van dɛ̃un. Kɛ́ á ɓen tɔn vɔ́, à hũn ɓé mí lɔ̀nbiè ǹ, iè hɔ̀ lɛ á wɛ míte ɔ̀ zĩncáahɔ́ lɛ ɓɛrɛ lè dímíɲɛ́ hũn bòo hũn. 22Ɛ́ kɛ̀amu, ɛ́ mípe iè pe ɛ́ wo wi le tĩyaarè hũn hɔ̀pe lɛ lɔ̀n. Kɛ́ ń ɓén bĩní mi miɛ, ɛ́ mí wo ɓén wɛní míte, ɛ́ mí tĩwiɛ̀ sɔ ɛ́ nìnbírɔ dɔ̀ ɛ́ yí dɛ̀ yá vúa wɛ̀. 23Lè wurù mu ɛ́ ɓen van dɛ̃un, ɛ́ mí yá bĩní dìe mi ǹ àá bòo dɔ̀ bòo wɛ̀. Nin bie hɔ lɛ́ miɛ ǹ àá bɔ̀bín nɛ hɔ bòo lɛ ɛ́ mí wóo ɓén hɛ̃un ɔ̀ Yàá viì míkùi niǹ yèrè lɔ̀n, á wóo ɓén wé ɛ́ lɛ́ miɛ ǹ. 24Fúu ɛ̀ dàá ɓen dɛ̃un zoòní, kɛ́ mí ɲɛùn yí hɛ̃un bòo dɔ̀ niǹ yèrè lɔǹ wɛ̀. Mì hɛ̃un ɛ́ Dɔfĩn ɓén lɛ́ bòo lɛ ɛ́ mí hɛ̃nnɛ miɛ ǹ, ɛ́ mí tĩwiɛ̀ ɛ́ wo ɲunù ɛ́ tí.
25Ń bie hɔpe bòo sɔ sí míkùi ɛ́ lɛ́ miɛ ǹ àá wũ̀a. Kɛ́ pɛ̃̀hṹ dɔ̀ ɛ́ vaá-ɓen, ɛ̀ ǹ yá wóo ɓén khɛ́ àá miɛ kɛ̀amu wɛ̀, kɛ́ ń wóo ɓén bie ɔ Yàá bòo ɛ́ lɛ́ miɛ ǹ wìée. 26Lè pɛ̃̀hṹ sɔ hũn, ɛ̀ mì wóo ɓén hɛ̃un hɔ̀ bòo lɛ ɛ́ mí ɛ́ cɛ̀ à Yàá viì niǹ yèrè lɔ̀n, ɛ̀ ǹpe yá wóo ɓén bie ɛ́ lɛ́ miɛ ǹ nɛ nin hɛ̃un ɔ̀ Yàá ǹ ɛ̀ lɛ́ miɛ ǹ wɛ̀. 27Iè hɔ̀ lɛ á Yàá míte ǹ ɛ́ wɛ miɛ. À wɛ miɛ iè hɔ̀ lɛ ɛ́ mí wɛ mi, ɛ̀ mì dũmuasɛ̃̀ kɛ́ ń lɔ́ Dɔfĩn viì ɛ́ dàa ɓɛrɛ. 28Ń lɔ́ á Yàá viì ɛ́ dàa ɓɛrɛ lè dímíɲɛ́ hũn, ɛ́ kɛ̀a sáalɛ ɛ́ nin lé lépe dímíɲɛ́ hũn ɛ̀ khũ̀á vɛ a Yàá viì.»
29Ɛ́ piè kɛ̀ránzɛ̀ɓɛ̀ zɔn bie lɛ́ à ǹ nɛ làa: «Lɛ iè kɔ̀pe ɛ́ den wo ɛ́ khɛ́ wìée kɛ́ kɔ́ yá wũ̀a ɛ̀ wĩ̀ wɛ̀. 30Kɛ̀a sáalɛ ɛ́ ké wo dũ kɛ́ kɔ́ dũ bòo míkùi, kɔ́ dũ hɔ bòo lɛ ɛ́ ké hṹn ke dìe àá kɔ. Ɛ́ sí iè hɔ̀pe temu lɛ́ ɛ́ ké dàa dũmuasɛ̃̀ kɛ́ kɔ́ lɔ́ Dɔfĩn viì ɛ́ dàa ɓɛrɛ.» 31Ɛ́ Yiezu zɔn kɔ̃́niɛ ɓɛ̀ nɛ làa: «Mí nɛ kɛ̀a sáalɛ ɛ́ mí den wo dũmuasɛ̃̀? 32Ɛ́ pɛ̃̀hṹ dɔ̀ ɛ́ vaá-ɓen, ɛ̀ lè yɛ̀rɛ́ ɓen dɛ̃un vɔ́, lɛ ɛ́ mípe mìkùi ɛ́ ɓén saakɛ ɛ́ lankɛ, hɔ́rɔ àá mí vaǹlén ɛ̀ mì ɛ́ kɛ́ mi niǹ dòonún. Kɛ́ ń den mí niǹ dòonún, iè hɔ̀ lɛ á Yàá ɛ́ wi àá mi. 33Ń bie hɔ̀pe sí míkùi ɛ́ lɛ́ miɛ ǹ, bòo lɛ ɛ́ wé ɛ̀ mì yí hũn-wiɛ̀ niǹ viì. Mì lɔ̀n ɛ́ ɓén be le dímíɲɛ́ hũn, kɛ́ mí hɛ̃̀ mì tĩɛ̀, ǹpe ɛ́ yú pànkɛ́ lè dímíɲɛ́ lɔ̀n.»
Айни замон обунашуда:
Zãn 16: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation