Zãn 14
14
Yiezu ɛ́ iè lè wṹn lɛ wóò vɛ Dɔfĩn viì
1Ɛ́ Yiezu bĩniɛ zɔn bie lɛ́ mí kɛ̀ránzɛ̀ɓɛ̀ ǹ nɛ làa: «Mì bí lɛ́ nɛ mi hũn ɛ̀ yaa wɛ̀. Mì dɛsĩ̀ Dɔfĩn, ɛ̀ mì lò dɛsĩ̀ mi ǹ. 2Vuò bɔ̀kùi ɛ́ wi kìe Yàá zũnù hũn. Kɛ́ vuò hṹn mí yán, nɛ ǹ hṹn yá ɓén bie ɛ́ lɛ́ miɛ ǹ nɛ nin vɛ sɛ́sɛ́ viì ɛ̀ dàá hìé miɛ wɛ̀. 3Kɛ́ ń ɓen van sɛ́sɛ́a lè viì vɔ́, ɛ́ nín khũ̀á ɓen fé miɛ ɛ́ dàá vɛ niǹ viì, bòo lɛ ɛ́ wé ɛ̀ lè viì lɛ ɛ́ ń wi hũn, ɛ́ mí ɓiɛ̀ kań hũn. 4Mí lò dũ le viì lɛ ɛ́ ń vaá-vɛ hũn wṹn.» 5Ɛ́ Toma zɔn khɛ́ lɛ́ à ǹ nɛ: «Ɲunsɔ, ké wo yí dũ le viì lɛ ɛ́ kɔ́ vaá-vɛ, ɛ́ ké wo wiɛ dàa dɛ̀ pelè wṹn ɛ́ dũń?» 6Ɛ́ Yiezu zɔn bie lɛ́ à ǹ nɛ làa: «Ǹpe temu iè pe wṹn, ɛ̀ nin pe bɔ̀berà, ɛ̀ nin pe mɛkɛ̃nì. Nìnbírɔ ɛ́ yí dɛ̀ Yàá viì ɛ́ yá vɛ kɛ́ á yí khíi àá niǹ viì wɛ̀. 7Kɛ́ mí ɓen dũ mi, ɛ́ mí ɓén dũń kìe Yàá. Ɛ́ kɛ̀a sáalɛ ɛ́ mí wo dũ ape Yàá, ɛ̀ mì lò mɔn ɔ̀.» 8Ɛ́ Filiipu zɔn bie lɛ́ à ǹ nɛ: «Ɲunsɔ, zĩ́ní-ɛ Yàá kiè ǹ, ɛ́ hɔ́ wo ɛ́ yí kie.» 9Ɛ́ Yiezu zɔn bie lɛ́ à ǹ nɛ: «Filiipu, hɔ̀ hàarí sí ɛ́ ń dàa wi àá miɛ ɛ̀ kɔ̀ pɛ́wi ɲɛùn yí dũ mi? Àlɛ ɛ́ mɔn mi ɛ́ mɔn ɔ̀ Yàá. Ɛ́ hɔ́ iè ńɓùo ɛ́ kɔ́ dàa nɛ ń zɛ̃́ní-ɛ Yàá miɛ ǹ? 10Kɔ́ yí dɛsĩ̀ kɛ́ ń wi-e Yàá ǹ, à Yàá ɛ́ ɓiɛ̀ wi mi ǹ? Hɔ̀ biehĩ́ lɛ ɛ́ nín bie àá miɛ míkùi ɛ́ yá lé àá niǹ viì wɛ̀. Kɛ́ a Yàá lɛ wi mi ǹ ɛ́ te mí bòo ɛ́ wé. 11Mì dɛsĩ̀ hɔ̀ lɛ ɛ́ ń bie nɛ ń wi-e Yàá ǹ, à Yàá ɛ́ ɓiɛ̀ wi mi ǹ. Kɛ́ mí ɓen pɛ̃́, ɛ̀ mì wo dɛsĩ̀ mi ǹ hɔ̀ bòo lɛ ɛ́ mí mɔn kɛ́ nin wé bòo hũn.
12Nin bie hɔ lɛ́ miɛ ǹ àá bɔ̀bín nɛ nìnbírɔ kɛ́ á dũmuasɛ̃̀ mi ǹ, á ɛ́ wé hɔ́pe bòo lɛ ɛ́ nín wé. À yɛ̀rɛ́ ɛ́ wé bòo lɛ ɓàakɛa ɛ́ pɔ hɔpe lɛ ɛ́ ń wɔ́, iè hɔ̀ lɛ ɛ́ ń vaá-vɛ a Yàá viì. 13Ɛ́ bòo lɛ ɛ́ mí wóo ɓén hɛ̃un niǹ yèrè lɔ̀n míkùi ɛ́ ń wóo ɓén wé ɛ́ lɛ́ miɛ ǹ, bòo lɛ ɛ́ wé ɛ̀ ǹpe Zuú ɛ̀ lɛ́ hɔ́ ɓàarɔ́ ɔ̀ Yàá ǹ. 14Kɛ́ mí hɛ̃nnɛ bòo dɔ̀ niǹ yèrè lɔ̀n, ɛ́ nín wé hɔ́ ɛ́ lɛ́ miɛ ǹ.»
Mɛkɛ̃n-Sãanu tɔní ɓensíɛnírɔ bòo
15«Kɛ́ mí wɛ mi, ɛ́ mí ɓén wé hɔ́ bòo lɛ ɛ́ ń bie lɛ́ miɛ ǹ nɛ mi wé. 16Ɛ̀ ǹpe ɛ́ ɓén hɛ̃un ɔ̀ Yàá ǹ nɛ a tɔní nìnbí-ɓuɛ̀ ɛ̀ lɛ́ miɛ ǹ, à wé mí Yíinírɔ, ɛ̀ kań àá miɛ fúu. 17Ɓàasɔ iè hɔ̀ bɔ̀berà Mɛkɛ̃ni lɛ ɓɛ́ dímíɲɛ́ nìɛ ɛ́ yí dɛ̀ yá yí, iè hɔ̀ lɛ ɛ́ ɓɛ́ yí loo ɔ, ɛ̀ ɓɛ̀ lò yí dũ a wɛ̀. Kɛ́ mípe ɛ́ dũ a, iè hɔ̀ lɛ á wi àá miɛ fúu, à lò wi miɛ ǹ.
18Ń yá ɓén fùansí miɛ ǹ kɛ̀a ńhínlɛ̀a wɛ̀. Ń ɓén khũá ɓen mì viì. 19Hũ̀nún àá fĩ́i ɛ̀ ɓɛ̀ dímíɲɛ́ nìɛ ɛ́ yá bĩní mi mi wɛ̀. Kɛ́ mípe ɛ́ ɓén mi mi, iè hɔ̀ lɛ ɛ́ nin yìe ɛ́ wi, ɛ̀ mìpe lò ɓiɛ̀ yìe ɛ́ ɓén wé. 20Ɛ́ pehɔ̀ zɔǹ, ɛ́ mí den ɓén dũń kɛ́ ńpe ɛ́ can ɓán àá kìe Yàá, ɛ̀ mìpe ɛ́ can ɓán àá mi, ɛ̀ ǹpe ɛ́ lò ɓiɛ̀ can ɓán àá miɛ. 21À nìnbírɔ lɛ ɛ́ tɛ̀ niǹ ɲunù bienù bòo, à lò wóò vɛ bè lè ǹ, ɛ́ temu wɛ mi; àlɛ ɛ́ wɛ mi ɛ́ kìe Yàá ɛ́ ɓén wɛní, ɛ̀ ǹpe ɛ́ lò ɓiɛ̀ ɓén wɛní ɓàasɔ, ɛ̀ nin zɛ̃́ní niǹte àá ɔ́.»
22Ɛ́ Zuude, àlɛ yí-e pe Zudaasi lɛ ɛ́ ɓɛ́ wóo nɛ Yisikariyɔɔte ɛ́ zɔn bie lɛ́ à ǹ nɛ làa: «Ɲunsɔ, hɔ ńɓùo temu lɛ́ ɛ́ kɔ́ dàa sãawi ɛ̀ kɔ̀ zɛ̃́ní kɔ́te àá kie, kɛ́ kɔ́ yá zɛ̃́ní kɔ́te á ɓɛ́ dímíɲɛ́ nìɛ?» 23Ɛ́ Yiezu zɔn kɔ̃́niɛ ɔ̀ nɛ làa: «Nìnbírɔ lɛ wɛ mi ɛ́ wóò wé hɔ́ bòo lɛ ɛ́ nín bie. Ɛ́ kìe Yàá ɛ́ ɓén wɛní ɓàasɔ, ɛ́ ńpe àá kiè Yàá ɛ́ ɓén ɓen ɓàasɔ viì, ɛ́ ɓén wé ké zɔǹlén piè viì. 24Kɛ́ nìnbírɔ lɛ yí wɛ mi ɛ́ yáà tɛ̀ ɛ̀ wé hɔ́ bòo ɛ́ bie wɛ̀. Ɛ́ hɔ́pe bòo lɛ ɛ́ mí ɛ́ ɲí ɛ́ yí niǹ kùrú biehĩ́ wɛ̀; kɛ́ hɔ́ lɔ́ kìe Yàá lɛ tɔrɛ mi viì.
25Ń bie hɔ̀pe bòo sí ɛ́ lɛ́ miɛ ǹ kɛ́ ń wi mi tĩ́ihṹ. 26Kɛ́ mí Yíinírɔ, lɛ iè lè Mɛkɛ̃n-Sãanu lɛ ɛ́ kìe Yàá Dɔfĩn ɛ́ ɓén tɔní ɛ́ lɛ́ miɛ ǹ niǹ yèrè lɔǹ, ɛ́ te hɔ bòo míkùi ɛ́ ɓén kɛ̀rán àá miɛ, à lò ɓén lieníkɛ miɛ àá hɔ́ bòo lɛ ɛ́ ń bie lɛ́ miɛ ǹ míkùi.
27Ń vaa lan, kɛ́ nin lɛ́ lé hũn-wiɛ̀ miɛ ǹ, nin lɛ́ niǹ hũn-wiɛ̀ miɛ ǹ. Ń yí nin lɛ́ lé miɛ ǹ kɛ̀a ie dímíɲɛ́ bòo lɛ ɛ́ lé dàa ɛ́ wóo lɛ́ lé wɛ̀. Mì bí hìení mí kuò, ɛ̀ mì lò bí zán wɛ̀. 28Mí ɲɛ́ hɔ́ lɛ ń bie nɛ ń vaá-lan, kɛ́ ń lò nɛ ń ɓén khũ̀á ɓen mì viì. Kɛ́ mí hṹn wɛ mi, ɛ́ mí hṹn ɓén wɛní míte hɔ̀ lɛ ɛ́ ń vaá-vɛ á Yàá viì bòo hũn, iè hɔ̀ lɛ á Yàá ɛ́ ɓàń pɔ mi. 29Kɛ̀a sáalɛ, ɛ́ ń wo khɛ́ hɔ́pe bòo sɔ lɛ ɛ́ lɛ́ miɛ ǹ kɛ́ hɔ́ ɲɛùn yí wé wɛ̀. Bòo lɛ ɛ́ wé kɛ́ pɛ̃̀hṹ lɛ kɛ́ hɔ́ ɓen van wé, ɛ̀ mì dɛsĩ̀. 30Ń yí nin bĩní khɛ́ bòo bɔ̀kùi àá miɛ wɛ̀; iè hɔ̀ lɛ ɛ́ lépe dímíɲɛ́ sɔ lɛ bɛ́zuú#14.30 Ɓɛ̀ ɓen nɛ dímíɲɛ́ bɛ́zuú, ɛ̀ hɔ̀ iè Sitũanɛ ɛ́ ɓɛ́ nɛ̀. ɛ́ ɓen. À yí dàa pànkɛ́ niǹ lɔ̀n wɛ̀. 31Kɛ́ ɓɛ́ dímíɲɛ́ nìɛ ɛ́ fɔ́ɓán ɛ̀ ɓɛ̀ dũń kɛ́ ń wɛ a Yàá, ɛ̀ ǹ wóò wé hɔ́ bòo lɛ á nɛ ń wé. Mì hĩ́ní ke lan ɛ̀ lé hũ̀nún.»
Айни замон обунашуда:
Zãn 14: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation