Zãn 12
12
Maari ɛ́ yurɔ́ lɛ tũnù tĩ ɛ̀ kóo Yiezu zehĩ́ lɔ̀n
Mat 26.6-13; Mar 14.3-9
1Ɛ́ hɔ́ lɛ ɛ́ hɔ́ kɛ́ wihĩ́ huiézĩ́ ɛ̀ lè Nyiewɛlɔn sɛ́rí ɛ́ dí, ɛ́ Yiezu ɛ́ cɔ́ van Betani, lè lóo lɛ á vìeniɛ ɔ̀ Lazaare hũn. 2Ɛ́ ɓɛ́ van perɛ Yiezu ǹ yán. Ɛ́ Maate ɛ́ hṹn te hɔ díe ɛ́ sãankɛ. Àpe Lazaare ɛ́ hṹn wi ɓɛpe lɛ ɛ́ kɛsí ɛ́ páaníɛ dí àá Yiezu tĩ́ihṹ. 3Ɛ́ Maari ɛ́ van mɔ̀ hɔ̀ yurɔ́ dɔ̀ lɛ tũnù tĩ lɛ ɛ́ buò ɛ́ yú litiri tĩ́ihṹ ǹ, lɛ yàamu hie cɛ̃̀un, lɛ wóò lé lé vɛ̃̀n-cíi dɔ̀ ǹ lɛ yèrè ɛ́ ɓɛ́ nɛ naare, ɛ́ ɓen koo Yiezu zehĩ́ lɔ̀n, àá hɔ̀ sùukɛ̀ àá mí ńɲiihĩ́. Ɛ́ lé zũnù míkùi ɛ̀ yòó tú àá hɔ̀ yurɔ́ sɔ tũnù. 4Ɛ́ Zudaasi Yisikariyɔɔte lɛ iè pe Yiezu kɛ̀ránzuú dɔ̀, àpe lɛ ti-e ɓén dé ɓɛ́ nìnbirìe núnú hũn, ɛ́ zɔn bie ɛ́ nɛ làa: 5«Hɔ ńɓùo ɛ́ ɓɛ́ dàa yí yìɛní hɔ́pe yurɔ́ sɔ ɛ̀ yí denie#12.5 Dienie khĩɛ́-tĩ ɛ́ hàarí wé tɔntɛ́ lɔ́lɔ́-kùi sàanín ɓà ńmaà. khĩɛ́-tĩ (300) ɛ̀ khíi lɛ́ ɓɛ́ nìkherà ǹ?» 6Kɛ́ ɓɛ́ den yí ɓɛ́ nìkherà á Zudaasi ɛ́ koo ɛ́ hè bòo hũn á dàa hɔ́pe sí ɛ̀ bie wɛ̀. Kɛ́ hɔ́ iè hɔ̀ lɛ á den iè kɛ̃̀múi. Àpe ɛ́ te peɓɛ̀ màa hàarí wóò bìsí, á den hàarí wóò kɛ̃̀mɛkɛ hɔ lɛ ɛ́ ɓɛ́ wóò yí. 7Ɛ́ Yiezu zɔn bie lɛ́ à ǹ nɛ làa: «Fùansí-e pe hṹnu sɔ ǹ. À wɔ́ hɔ́ niǹ yírí wũ̀nlɔ́ bòo hũn. 8Ɓɛ̀ nìkherà ɛ́ wi mí tĩ́ihṹ fúu, ɛ̀ ǹpe ɛ́ yí nin kań mí tĩ́ihṹ fúu wɛ̀.»
9Ɛ́ ɓɛ́ Zuifuɓɛ nìzã̀amáa ɛ́ ɲɛ́ ɛ̀ ɓɛ̀ nɛ Yiezu wi Betani lóo hũn, ɛ́ ɓɛ́ hĩ́nà van yán, kɛ́ hɔ́ den yí Yiezu mí dòonún bòo hũn wɛ̀. Ɓɛ̀ den lò hṹn wɛ ɛ́ ɓɛ ɛ̀ mi-ɛ Lazaare lɛ ɛ́ Yiezu vìeniɛ. 10Ɛ́ Dɔfĩn khɛ̃́ndàariè hándíe ɛ́ lɔ̀ tɔ̀ nɛ ɓɛ́ lò ɓiɛ̀ ɛ́ ɓɛ́ ɓí-e pe Lazaare, 11iè hɔ̀ lɛ ɛ́ piè bòo hũn, ɛ́ ɓɛ́ Zuifuɓɛ cɛ̀rìɛɛ ɛ́ fùɛrɛ̀sí ɓà ǹ, ɛ̀ ɓɛ̀ dũmuasɛ̃̀ Yiezu ǹ.
Yiezu vaá-zɔ Zerizalɛɛmu lóo
Mat 21.1-11; Mar 11.1-11; Lik 19.28-40
12Ɛ́ pehɔ̀ sí lɛ ɛ́ tĩ, ɛ́ ɓɛ́ nìzã̀amáa lɛ ɓɛrɛ lè Nyiewɛlɔn sɛ̀rí ɛ́ ɲɛ́ ɛ́ ɓɛ̀ nɛ Yiezu wi le wṹn lɔ̀n ɛ́ vaá-ɓen Zerizalɛɛmu. 13Ɛ́ ɓɛ́ khie khɔ́ hɔ̀ tèĩ́n ńnɛ́hɛ̃ ɛ̀ ɓɛ̀ van lɔ́ sɛ̃́ piè híɛhɔ́ kɛ́ ɓɛ́ ɛ́ bénkɛ ɛ́ nɛ làa: «Nɛ Dɔfĩn yèrè ɛ̀ ɓàaní! Nɛ Ɲunsɔ Dɔfĩn ɛ̀ dúɓɛ́ ɔ́pe lɛ ɛ́ ɓen piè yèrè lɔ̀n! Nɛ Dɔfĩn ɛ̀ dúɓɛ́ Yizarayɛɛle bɛ́zuú ǹ!» 14Ɛ́ Yiezu ɛ́ mɔn ńnɛ̀kɛ̃nɓi-fìɛ dɔ̀, á khie yòó ɔ́, ɛ́ yòó kɛsí piè lɔ̀n, kɛ̀a bòo lɛ ɛ́ hɔ́ dàa wɛ̃́ hɔ́ Dɔfĩn bienù vɛ̃hṹ hũn ɛ́ nɛ làa:
15 «Mì bí zán wɛ̀ mìpe Siɲɔn lóo nìɛ,
Mì húi mí bɛ́zuú lɛ ɛ́ ɓen,
Kɛ́ á kɛsí ńnɛ̀kɛ̃nbi-fìɛ lɔ̀n.»
16Ɛ́ pehɔ̀ yìi hũn, ɛ̀ ɓɛ̀ kɛ̀ránzɛ̀ɓɛ̀ ɛ́ hṹn ɲɛùn yí dũ pehɔ̀ ɲún wɛ̀. Kɛ́ hɔ́ lɛ ɛ́ Yiezu ɛ́ zɔn mí ɓàarɔ́ hũn vɔ́, ɛ́ ɓɛ́ den síɛ lieniɛ hɔ̀ lɛ kɛ́ hɔ́ wɛ̃́ piè bòo hũn, ɛ̀ hɔ̀ bòo míkùi ɛ́ wɔ́ ɛ́ ɲunù van tṹ kɛ̀a bòo lɛ ɛ́ lé Dɔfĩn bienù ɛ́ dàa bie hɔ̀. 17Ɛ́ ɓɛ́ nìzã̀amáa lɛ hàarí wi yán lɛ ɛ́ Yiezu dàa vɔn ɔ̀ Lazaare lè búi hũn, à vìeniɛ ɔ̀, ɛ́ bie hɔ̀ bòo lɛ ɛ́ ɓɛ́ mɔn. 18Ɛ́ sí iè hɔ̀pe ɛ́ ɓɛ́ nìzã̀amáa dàa ɓen lɔ́ sɛ̃́ piè híɛhɔ́, iè hɔ̀ lɛ ɛ́ ɓɛ́ ɲɛ́ hɔ́pe yéréké bòo lɛ á wɔ́ bòo. 19Ɛ́ ɓɛ́ Farizĩɛɓɛ ɛ́ khie ɛ́ khɛ́ ɓán hũn ɛ́ nɛ làa: «Mí loo kɛ́ mí yí dɛ̀ bòo dɔ̀ yá wé lò, ɓɛ́ nìnbirìe ɓɛ́kùi ɛ́ vɛ àá piè viì.»
Ɓɛ̀ Kɛrɛkiɓɛ dɔ̀ ɛ́ cɛ̀ nɛ ɓɛ ɛ̀ mi Yiezu
20Ɓɛ̀ nìnbirìe lɛ ɛ́ hàarí yòó van hɔ̀ Zerizalɛɛmu ɛ́ yòó ɓàaniɛ Dɔfĩn lè sɛ́rí yìi hũn ɛ́ kɛrɛkiɓɛ dɔ̀ ɛ́ hàarí wi tĩ́ihṹ. 21Ɛ́ ɓɛ́ van lúwiniɛ ɔ̀ Filiipu ǹ lɛ ɛ́ lé hɔ́ Bɛtesayida lóo, hɔ̀ Kalile pɛ̃̀hɛ̃ hũn, ɛ̀ ɓɛ̀ bie lɛ́ à ǹ nɛ làa: «Kɛ̀ránlɔ, ké wɛ ke mi Yiezu.» 22Ɛ́ Filiipu ɛ́ van bie hɔ̀ ɛ́ lɛ́ Andere ǹ, ɛ́ ɓɛ́ khie bɔ̀ɓán ɓɛ́ nìɛ ɓɛ̀ ɲu ɛ́ van bie hɔ̀ ɛ́ lɛ́ Yiezu ǹ. 23Ɛ́ Yiezu zɔn bie lɛ́ ɓà ǹ nɛ làa: «Lè pɛ̃̀hṹ wo ɓɛrɛ dɛ̃un, lɛ á nìnbírɔ Zuú ɛ́ fɔ́ɓán à yòó zɔ mí ɓàarɔ́ hũn. 24Nin bie hɔ lɛ́ miɛ ǹ àá bɔ̀bín nɛ kɛ́ lé sìi biì dìcóoní ɛ́ yí kùén síɛ hɔ́ tĩ́ní hũn ɛ̀ síɛ lé, ɛ̀ hɔ̀ lɛ kɛ́ ɛ̀ tiè, ɛ́ lé wé lépe biì dìcóoní lò. Kɛ́ lé ɓen kùerɛ síɛ lɔ́, ɛ̀ hɔ̀ lɛ kɛ́ ɛ́ tie, ɛ̀ lè den hɛ hɔ biè lɛ buò. 25Nìnbírɔ lɛ kɛ́ á bɔ̀ mí mɛkɛ̃nì bòo hieniɛ, á ɓén vĩ́iní lé, à lɛ ɛ́ yí bè mí mɛkɛ̃nì bòo hiení lé dímíɲɛ́ sɔ lɛ hũn, ɛ́ ɓén yí lé mɛkɛ̃nì lɛ yá vé. 26Kɛ́ nìnbírɔ ɛ́ nɛ mii tɛ́ niǹ tɔnlɔ́, à fɔ́ɓán à bè niǹ máahṹ, ɛ́ lé viì lɛ ɛ́ ń ɓén kań hũn, ɛ́ niǹ tɔntɛ́ ɛ́ ɓiɛ̀ ɛ́ wé hũn. Kɛ́ nìnbírɔ ɛ́ niǹ tɔnlɔ́ ɛ̀ tɛ́, ɛ́ kìe Yàá ɛ́ ɓén ɓàaní ɓàasɔ ǹ.»
Yiezu ɛ́ mí hṹmú bòo ɛ̀ bie
27«Kɛ̀a sáalɛ ɛ́ niǹ tĩì ɛ́ wo yòó yaa. Ɛ́ ń wo nin zɔ bie nɛ wɛrɛ̀? Ń sũǹ ɛ́ zɔ́ bie nɛ Yàá, fuení mi ǹ lèpe lɔ̀nbiè yìi sɔ lɛ hũn? Kɛ́ hɔ́ lò iè pehɔ̀ bòo hũn ɛ́ ń dàa ɓɛrɛ. 28Yàá, ɓàaní kɔ́ yèrè ǹ!» Ɛ́ tɛmu dɔ̀ yòó tɛ̀ hɔ́ hóohũn ɛ́ nɛ: «Ń ɓàaniɛ lè ǹ vɔ́, kɛ́ ń nin bĩní ɓàaní lè ǹ.» 29Ɛ́ ɓɛ́ nìzã̀amáa lɛ hṹn dɛ̃̀ yán ɛ́ ɲɛ́ lé tɛmu sɔ, ɛ́ ɓɛ́ bie nɛ hɔ iè hóo-nɛ̀mɛ́kɛà. Ɛ̀ ɓɛ̀dɔ̀ nɛ a iè mɛlɛkɛ ɛ́ temu ɛ́ bie àá ɔ́. 30Ɛ́ Yiezu bĩniɛ zɔn bie lɛ́ ɓà ǹ nɛ làa: «Hɔ̀ yí ńpe niǹ bòo hũn ɛ́ hɔ́pe tɛmu sí dàa yòó tɛ̀ wɛ̀, kɛ́ hɔ́ iè mìpe mì bòo hũn. 31Ɛ́ kɛ̀a sáalɛ ɛ́ lépe dímíɲɛ́ sɔ lɛ lìe lènlɔ́ ɛ́ wo dɛ̃un. Kɛ̀a sáalɛ ɛ́ lépe dímíɲɛ́ sɔ lɛ bɛ́zuú lɛ iè ɔ̀ Sitũanɛ ɛ́ mii leń ɛ̀ tɛ́ líení yíe. 32Ɛ̀ ǹpe, pɛ̃̀hṹ lɛ kɛ́ ɓɛ́ ɓen hóoniɛ mi yòoniɛ hɔ̀ hóohũn, ɛ́ ń ɓén vɛ́ ɓɛ́ nìnbirìe ɓɛ́kùi ɛ́ dàá ɓen niǹ viì.» 33Hɔ̀pe sí á bie kɛ̀amu, kɛ́ hɔ́ iè bòo lɛ á dàa ɓén hí á ɛ́ zɛ̃́ní. 34Ɛ́ ɓɛ́ nìzã̀amáa zɔn kɔ̃́niɛ ɔ̀ nɛ làa: «Kìe làndɛ́ vɛ̃hɛ̃ lɛ á Moyiize ɛ́ wɛ̃́ ɛ́ zɛ̃́ní ɛ́ lɛ́ kie ǹ hũn, ɛ́ hɔ́ bie nɛ ape Masiya ɛ́ wé yán fúu. Ɛ́ kɔ́ wo wiɛ dàa nɛ a nìnbírɔ Zuú ɛ́ fɔ́ɓán à hóoní yòoní? À nìnbírɔ Zuú sɔ ɛ́ iè wieni?» 35Ɛ́ Yiezu zɔn bie lɛ́ ɓà ǹ nɛ làa: «Hɔ̀ ńpiemu ɛ́ wi mi tĩ́ihṹ, kɛ́ hɔ́ yá ɓén míi wɛ̀. Ɛ́ mí hĩ́ní vɛ kɛ́ hɔ́pe ńpiemu ɛ́ wi àá miɛ, bòo lɛ ɛ́ wé ɛ̀ hɔ̀ síbínú bí ɓen yòokɛ mi lɔ̀n wɛ̀. Iè hɔ̀ lɛ álɛ ɛ́ vɛ hɔ síbínú hũn ɛ́ yí dũ viì lɛ á vaá-vɛ wɛ̀. 36Mì dɛsĩ̀ hɔ̀ ńpiemu ǹ lè yìi lɛ ɛ́ hɔ́ wi àá miɛ hũn, bòo lɛ ɛ́ wé ɛ̀ mì wé ńpiemu nìɛ.»
Ɛ́ hɔ́ lɛ ɛ́ Yiezu ɛ́ bie hɔ́pe sí vɔ́ á khie cɔ́ ɛ́ van tànkɔ̀niɛ míte à kɛ́ ɓɛ́.
Zuifuɓɛ ɛ́ yí tɛ̀ nɛ ɓɛ́ dɛsĩ̀ Yiezu ǹ wɛ̀
37Hɔ̀pe yéréké bòo bɔ̀kùi sí ɛ́ Yiezu wɔ́ míkùi ɓɛ̀pe Zuifuɓɛ yìe hũn, kɛ́ ɓɛ́ den pɛ́wi ɛ́ yí dɛsĩ̀-ɛ ǹ wɛ̀. 38Hɔ̀ wɔ́ kɛ̀amu, ɛ́ Dɔfĩn bɔ̀háanírɔ Ezayi bienù dàa ɲunù ɛ́ tú. Àpe Ezayi ɛ́ den hàarí bie ɛ́ nɛ làa:
«Ɲunsɔ, ɔ̀ iè wieni ɛ́ temu dũmuasɛ̃̀ hɔ̀ bòo lɛ ɛ́ ké bie ɛ́ lɛ́ ɓà ǹ?
À iè wieni temu dũnɛ kɔ̀ núnú pànkɛ bòo lɛ ɛ́ lé wɔ́?» 39Ápe Ezayi ɛ́ bĩniɛ munkɛa hɔ̀ bòo lɛ temu lɛ́ ɛ́ ɓɛ́ nìnbirìe dàa yí dɛsĩ̀ ɛ́ nɛ làa:
40 «Dɔfĩn ɛ́ muiniɛ peɓɛ̀ yìe,
Ɛ̀ Hɔ̀ dĩìniɛ peɓɛ̀ tĩɛ̀,
Bòo lɛ ɛ́ wé ɛ̀ peɓɛ̀ yìe ɛ̀ bí mi bòo,
Ɛ̀ peɓɛ̀ tĩɛ̀ ɛ̀ bí dũń bòo dɔ̀,
Ɛ̀ ɓɛ̀ dàá bí khũ̀á khíi húi àá ńpe Dɔfĩn viì, ɛ̀ ǹ wiɛní ɓɛ́ wɛ̀.»
41 Ezayi ɛ́ khɛ́ hɔ́pe sí, iè hɔ̀ lɛ á hàarí mɔn Yiezu ɓàarɔ́. Ɛ́ hɔ́ iè piè bòo á ɛ́ bie. 42Kɛ́ hɔ́pe sí míkùi hũn, ɛ́ ɓɛ́ Zuifuɓɛ hándíe cɛ̀rìɛɛ ɛ́ den hṹn dũmuasɛ̃̀ Yiezu ǹ, kɛ́ ɓɛ́ Farizĩɛɓɛ lɛ ɛ́ ɓɛ́ zán bòo hũn, ɛ́ ɓɛ́ yá hɔ̀ bie wìée wɛ̀. Bòo lɛ ɛ́ wé ɛ̀ ɓɛ̀ dàá bí ɲɛ ɓɛ ɛ̀ líení ɓɛ́ ńkóoɓánlɔ̀n zũnù hũn wɛ̀. 43Lè yèrè lɛ ɛ́ ɓɛ́ ɛ́ yí ɓɛ́ nìnbirìe viì ɛ́ ɓɛ́ wɛ ɛ́ pɔ le yèrè lɛ ɛ́ lé àá Dɔfĩn viì.
Yiezu bienù ɛ́ te ɓɛ nìnbirìe lìe ɛ́ ɓén lè
44Ɛ́ Yiezu zɔn bérɛ nɛ làa: «Kɛ́ nìnbírɔ ɛ́ dũmuasɛ̃̀ mì ǹ, ɛ̀ hɔ̀ yí ńpe nìn dòonún á dũmuasɛ̃̀ nin, kɛ́ á lò ɓiɛ̀ dũmuasɛ̃̀ àlɛ ɛ́ te nin tɔrɛ ǹ. 45Àlɛ mɔn mí, ɛ́ lò ɓiɛ̀ mɔn ɔ̀lɛ te nin ɛ́ tɔrɛ. 46Ǹpe iè hɔ̀ ńpiemu lɛ ɓɛrɛ lé dímíɲɛ́ hũn, bòo lɛ ɛ́ wé kɛ́ á lɛ dũmuasɛ̃̀ mi ǹ à bí kań hɔ́ síbínú hũn wɛ̀. 47Kɛ́ nìnbírɔ ɛ́ ɲɛ́ niǹ biehĩ́ à yí ɓɛ́ɓɛ́ hɔ̀ ǹ mí tĩì hũn, ɛ̀ hɔ̀ yí ńpe te piè lìe ɛ́ ɓén lè wɛ̀. Iè hɔ̀ lɛ ɛ́ ń yí ɓen lè dímíɲɛ́ hũn ɛ́ nin ɓen lè ɓɛ̀ dímíɲɛ́ nìɛ lìe wɛ̀. Kɛ́ ń den ɓɛrɛ ɛ́ nin ɓen fuení ɓà ǹ. 48Kɛ́ álɛ ɛ́ pɛ̃́ mi tɛ́viɛniɛ, ɛ́ yí tɛ̀ niǹ biehĩ́ bòo, à yú mí lìe lèrɔ vɔ́: lèpe bienù lɛ ɛ́ ń bie ɛ́ te pie lìe ɛ́ ɓén lè lè mɛ́n-sí zɔn. 49Iè hɔ̀ lɛ ɛ́ ń yí bie niǹ biehĩ́ sɔ niǹte ǹ, kɛ́ kìe Yàá lɛ te nin tɔrɛ ɛ́ te bòo lɛ ɛ́ ń sãawi ɛ̀ ǹ khɛ́ ɛ́ zɛ̃́niɛ lɛ́ mi ǹ. 50Ɛ́ ń dũ kɛ́ kìe Yàá bòo lɛ á nɛ a nìnbírɔ fɔ́ɓán à wé, ɛ́ wóò lɛ́ lé mɛkɛ̃nì lɛ yá vé. Ɛ́ sí iè hɔ̀pe ɛ́ hɔ́ bòo lɛ ɛ́ nín bie ɛ́ iè kìe Yàá bòo lɛ á nɛ ń bie.»
Айни замон обунашуда:
Zãn 12: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation