Zãn 11
11
Lazaare húmú àá piè vìerɔ́ bòo
1Nùún dɔ̀ lɛ yèrè ɛ́ ɓɛ́ nɛ Lazaare ɛ́ hàarí dɔ. À hàarí wi Betani lóo hũn àá ɓá hĩ́ini Maari àá Maate. 2À Maari iè ɔ̀pe hṹnu lɛ hàarí koo hɔ̀ yurɔ lɛ tũnù tĩ Yiezu zehĩ́ lɔ̀n, à sùukɛa hɔ̀ àá mí ńɲĩihĩ́. Ɛ́ ɓà zuú Lazaare ɛ́ temu hàarí dɔ. 3Ɛ́ ɓà hĩ́ini nìɛ ɓɛ̀ ɲu sɔ ɛ́ tɔrɛ àdɔ̀ nɛ a vɛ bie lɛ́ Yiezu ǹ nɛ: «Ɲunsɔ, mì pàá ɛ́ dɔ.» 4Ɛ́ hɔ́ lɛ ɛ́ Yiezu ɛ́ ɲɛ́ hɔ́, á zɔn bie nɛ làa: «À Lazaare duiè ɛ́ yí dìɛ lɛ mii ɓí-e wɛ̀. Kɛ́ Dɔfĩn ɛ́ den mii bè lè ǹ ɛ̀ dàá zɛ̃́ní mí pànkɛ́ ɛ̀ piè Zuú yèrè ɛ̀ dàá yí hɔ́ ɓàarɔ́.»
5Yiezu den hàarí wɛ Maate àá ɓà hã̀á àá ɔ́ Lazaare cɛ̃̀un. 6Ɛ́ bòo lɛ á ɲɛ́ ɛ̀ ɓɛ̀ nɛ Lazaare ɛ́ dɔ, á bĩniɛ wɔ́ wihĩ́ bɔ̀nbɔ̀ ɲu lèpe viì lɛ á wi hũn, 7à den bie lɛ́ mí kɛ̀ránzɛ̀ɓɛ̀ ǹ nɛ làa: «Mì ke khũ̀á vɛ hɔ Zudee pɛ̃̀hɛ̃ hũn.» 8Ɛ́ ɓɛ́ kɛ̀ránzɛ̀ɓɛ̀ ɛ́ bie àá ɔ́ nɛ làa: «Kɛ̀ránlɔ, hɔ̀ lò ɲɛùn yí míì ɛ̀ ɓɛ̀ Zuifuɓɛ zɔn cɛ̀ nɛ ɓɛ ɛ̀ taà kɔ ɓé àá hɔ́ sɛ̃̀nlɛ̀a hɔ̀ Zudee pɛ̃̀hɛ̃ hũn, ɛ̀ kɔ̀ sĩ̀n wɛ kɔ bĩní khũá vɛ yán?» 9Ɛ́ Yiezu zɔn khɛ́ lɛ́ ɓà ǹ nɛ làa: «Kè kùi ɛ́ dũ nɛ hɔ̀ iè líɛrɛɓɛ́ pírú àá bɔ̀nbɔ̀ ɲu ɛ́ temu wi wu-cooní hũn lò. Kɛ́ nìnbírɔ ɛ́ vɛ le wurù ńpiemu hũn, á yá kenkeníkɛ, iè hɔ̀ lɛ á loo hɔ bòo wìée. 10Ɛ̀ nìnbírɔ lɛ ɛ́ vɛ hɔ sṹnúhṹ hũn, ɛ́ pe ɛ́ kenkeníkɛ, iè hɔ̀ lɛ ɛ́ ńpiemu ɛ́ bĩniɛ mínɛ ɔ̀ ǹ wɛ̀.» 11Ɛ́ hɔ́ lɛ ɛ́ Yiezu ɛ́ bie hɔ̀pe biehĩ́ sɔ sí vɔ́, á bĩniɛ zɔn khɛ́ sĩiniɛ nɛ làa: «Kiè pàá Lazaare iè wìe dũmua, kɛ́ ń den nin vɛ yán, ɛ̀ vɛ tĩ̀ní-ɛ.» 12Ɛ́ ɓɛ́ kɛ̀ránzɛ̀ɓɛ̀ zɔn nɛ làa: «Ɲunsɔ, kɛ́ á ɓen iè wìe dũmua, á ɓén fuen lò.» 13Yiezu den hṹn iè Lazaare húmú bòo á bie, kɛ́ piè kɛ̀ránzɛ̀ɓɛ̀ pe hṹn líi ɛ̀ ɓɛ̀ nɛ mu iè dɛmu khã́amá á nɛ̀. 14Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ ɛ́ yí dũń ɔ́ Yiezu bòo lɛ á nɛ̀, á zɔn khɛ́ lɛ́ ɓà ǹ wìée nɛ a Lazaare ɛ́ húrun. 15Á bĩniɛ zɔn bie lɛ́ ɓà ǹ làa: «Ń hɛ̀ wɛ niǹte iè hɔ̀ lɛ ɛ́ ń yí kań yán wɛ̀. Ń wɛ niǹte mìpe bòo hũn iè hɔ̀ lɛ ɛ́ hɔ́ ɓén lɛ́ ɛ́ mí ɛ́ wookɛ ɛ́ dɛsĩ̀. Ɛ́ mí wo lɛ́ nɛ ke vɛ piè viì.» 16Ɛ́ Toma lɛ ɓɛ́ wóò ve nɛ Lɛ́yɛnù ɛ́ zɔn bie lɛ́ ɓá ńkɔhĩ́ kɛ̀ránzɛ̀ɓɛ̀ sí kɛ́ ǹ nɛ làa: «Mì ɓiɛ̀ ke vɛ, ɛ̀ kè páaní vɛ hí àá ké Kɛ̀ránlɔ!»
17Ɛ́ Yiezu mii vɛ dɛ̃, ɛ̀ Lazaare ɛ́ wũ̀nɛ vɔ́ ɛ́ hɔ́ yú wihĩ́ bɔ̀nbɔ̀ nɛ́. 18Betani ɛ́ lúwi àá Zerizalɛɛmu; pehɔ̀ niìrɔ ɛ́ yá yí kílɔ́nɓɛ̀ bɔ̀nbɔ̀ tĩ wɛ̀. 19Ɛ́ ɓɛ́ Zuifuɓɛ nìnbí-kuì ɛ́ wo ɓɛrɛ ɔ̀ Maate àá Maari viì, ɛ́ ɓɛrɛ ɛ́ peɓɛ̀ tĩɛ̀ ɛ̀ hĩ̀iníkɛ ɓà zuú húmú bòo hũn.
20Ɛ́ bòo lɛ ɛ́ Maate ɛ́ ɲɛ́ ɛ̀ ɓɛ̀ nɛ Yiezu wi le wṹn lɔ̀n ɛ́ ɓen, á hĩ́nà van lɔ́ piè híɛhɔ́ ɛ̀ sĩ́ kɛ́ Maari pe kɛsí hɔ́ yíe. 21Ɛ́ Maate ɛ́ zɔn bie lɛ́ Yiezu ǹ nɛ làa: «Ɲunsɔ, kɛ́ kɔ́ hṹn wi hũ̀nún, nɛ kìe zuú ɛ́ yí hí wɛ̀. 22Kɛ́ hɔ́pe lɛ lɔ̀n, ɛ́ ń dũ kɛ́ Dɔfĩn ɛ́ mii lɛ́ hɔ́ bòo lɛ ɛ́ kɔ́ ɛ̀ hɛ̃un piè viì míkùi kɔ ǹ.» 23Ɛ́ Yiezu zɔn bie lɛ́ á ǹ nɛ làa: «Mì zuú ɛ́ mii vìé.» 24Ɛ́ Maate zɔn nɛ: «Ń pe wo dũ kɛ́ á ɓén vìé ɓɛ́ nìhiè vìerɔ́ zɔn, lè mɛ́n-sí hũn.» 25Ɛ́ Yiezu zɔn bie lɛ́ á ǹ nɛ làa: «Ńpe iè hɔ̀ vìerɔ́ ɛ̀ ǹ lò iè lè mɛkɛ̃nì. Kɛ́ nìnbírɔ ɛ́ dũmuasɛ̃̀ mi ǹ, ɛ́ piè mɛkɛ̃nì ɛ́ wé yán, hɛ̀rí kɛ́ á yɛ̀rɛ́ hṹn húrun. 26Ɛ̀ nìnbírɔ lɛ yìe wi, lɛ dũmuasɛ̃̀ mi ǹ ɛ́ yá hí yá mi wɛ̀. Kɔ́ dũmuasɛ̃̀ hɔ̀ ǹ?» 27Á zɔn nɛ: «Ɲunsɔ, hɔ̀ bɔn, ń dũmuasɛ̃̀ kɛ́ kɔ́ iè ɔ̀ Masiya, àpe Dɔfĩn Zuú lɛ sãawi à ɓen lè dímíɲɛ́ hũn.»
28Á Maate bie hɔ̀pe sí vɔ́, à cɔ́ van vɔn ɓá hãá Maari à hũmɛkɛa lɛ́ à ǹ nɛ làa: «À Kɛ̀ránlɔ ɛ́ wi hũ̀nún á nɛ kɔ ɓen.» 29Ɛ́ hɔ́ lɛ ɛ́ Maari ɲɛ́ hɔ́pe sí, á síɛ khɔ́sí hĩ́nà ɛ́ zɔ̀ kã́a Yiezu. 30Hɔ́rɔsí ɛ̀ Yiezu ɲɛùn yí ɓen zɔ lé lóo hũn wɛ̀; kɛ́ á wi le viì lɛ á Maate ɛ́ van lɔ́ sɛ̃́ piè híɛhɔ́ hũn. 31Ɛ́ ɓɛ́ Zuifuɓɛ lɛ hṹn wi le zũnù hũn àá ɔ́ Maari ɛ́ piè tĩì ɛ̀ hĩ̀iníkɛ, ɛ́ mɔn kɛ́ á khɔ́sí hĩ́nà lɔ́, ɛ́ ɓɛ́ tĩì ɛ̀ ɓɛ̀ nɛ a ie wìe ɛ́ mii vɛ lé wírí lé búi lɔ̀n, ɛ́ ɓɛ́ hĩ́nà bɔ̀ piè máahṹ.
32Ɛ́ bòo lɛ ɛ́ Maari ɛ́ van dɛ̃un lè viì lɛ ɛ́ Yiezu ɛ́ wi hũn, á mɔn ɔ̀, á van kùerɛ síɛ mí nunkɛ́yìe lɔ̀n piè híɛhɔ́ à bie lɛ́ à ǹ nɛ: «Ɲunsɔ, kɛ́ kɔ́ hṹn wi hũ̀nún, ɛ́ kìe zuú ɛ́ hṹn yá ɓén hí wɛ̀.» 33Ɛ́ Yiezu ɛ́ mii húi ɛ̀ Maari ɛ́ wírí, ɛ̀ ɓɛ̀pe Zuifuɓɛ lɛ ɛ́ bɔ̀ɓán àá ɔ̀ ɛ́ lò ɓiɛ̀ ɛ́ wírí, ɛ́ hɔ́ hɛ̀ zɔn ɔ̀ ǹ cɛ̃̀un, ɛ́ piè tĩì yóò yáa míkùi. 34Á ɓɛ̀ dìenin nɛ làa: «Mí wũ̀nɛ à yí hũn?» Ɛ́ ɓɛ́ zɔn nɛ: «Ɲunsɔ, ɓen ɛ̀ kɔ̀ vɛ mi.»
35Ɛ́ Yiezu ɛ́ wírie. 36Ɛ́ ɓɛ́ Zuifuɓɛ ɛ́ bie nɛ: «Mì húi bòo lɛ á hɛ̀ dàa hṹn wɛ-a!» 37Kɛ́ ɓɛ́ nìɛ ɓɛ̀ yìɛní dɔ̀ peɓɛ̀ tĩ́ihṹ ɛ́ zɔn ɛ́ bie nɛ: «Àpe lɛ hɛ́rɛ a mui yìe, á sũǹ hṹn yí dɛ̀ yá lɛ́ àpe Lazaare ɛ́ yá hí?»
38Ɛ́ Yiezu tĩì sĩ̀n yóò yáa cɛ̃̀un, á khie cɔ́ van lè búi viì. Lè búi mu hàarí iè kṹ-bɛhɔ́ dɔ̀ lɛ ɛ́ wi le lɛnù hũn, ɛ́ ɓɛ́ bìríkɛa lè sɛ̃̀n-bɛhɔ́ dɔ̀ ɛ́ khie híɛ ɲunù. 39Ɛ́ Yiezu ɛ́ zɔn bie nɛ làa: «Mì bìríkɛ le sɛ̃̀n-bɛhɔ́ ɛ̀ khíi lé yán!» Ɛ́ Maate, lɛ iè ɔ̀pe lɛ húrun ɓà hãá ɛ́ zɔn bie lɛ́ à ǹ nɛ làa: «Ɲunsɔ, níkɛàni ɛ̀ piè tũnù ɛ́ hĩní, iè hɔ̀ lɛ á wũ̀nɛ lɛ iè pehɔ̀ wihĩ́ bɔ̀nbɔ̀ nɛ́.» 40Ɛ́ Yiezu zɔn bie lɛ́ à ǹ nɛ làa: «Ń yí bie hɔ ɛ́ yí lɛ́ kɔ ǹ nɛ kɛ́ kɔ́ dũmuasɛ̃̀ ɛ́ kɔ́ ɛ́ mi Dɔfĩn ɓàarɔ́?» 41Ɛ́ ɓɛ́ wo bíríkɛa lè sɛ̃̀nlè ɛ́ khie lɔ́ yán. Ɛ́ Yiezu hóoniɛ mí ɲún yòoniɛ àá hɔ́ hóohũn, à zɔn bie nɛ làa: «Yàá, nín kɔ̀ bɛrikɛ ɛ̀ dé iè hɔ̀ lɛ ɛ́ kɔ́ wɔ́ hɔ́ bòo lɛ ɛ́ ń hɛ̃nnɛ kɔ̀ viì ɛ́ lɛ́ mi ǹ. 42Ń dũ kɛ́ kɔ́ wóò wé hɔ́ bòo lɛ ɛ́ ń wóò hɛ̃un kɔ̀ viì ɛ̀ lɛ́ mi ǹ fúu. Kɛ́ ɓɛ́ iè ɓɛ̀ nìnbirìe lɛ kíríkɛa mi ǹ bòo hũn ɛ́ ń dàa ɛ́ bie kɛ̀amu, bòo lɛ ɛ́ wé ɛ̀ ɓɛ̀ dɛsĩ̀ kɛ́ kɔ́pe ɛ́ te nin tɔrɛ.» 43Á khɛ́ hɔ́pe sí vɔ́, à zɔn bérɛ cɛ̃̀un ɛ́ nɛ: «Lazaare, hĩ́ní ɓen lé!» 44Ápe lɛ ɛ́ hṹn húrun ɛ́ hĩ́nà ɓɛrɛ lɔ́, kɛ́ piè níhĩ́ àá piè zehĩ́ ɛ́ bɛ́nin àá hɔ́ pɔnkɔ̀-níhĩ́, ɛ̀ piè híɛhɔ́ ɛ́ lò híɛnin àá lé pɔnkɔ̀rɔ́. Ɛ́ Yiezu zɔn bie lɛ́ ɓà ǹ nɛ làa: «Mì khíi ban hɔ̀ pɔnkɔ̀-níhĩ́ ɛ̀ lé piè lɔ̀n, ɛ̀ mì fùansí e ǹ nɛ a lan.»
Ɓɛ̀ Zuifuɓɛ ɛ́ cɛ̀ ɓɛ̀ ɓé Yiezu
Mat 26.1-5; Mar 14.1-2; Lik 22.1-2
45Ɛ́ ɓɛ́ Zuifuɓɛ bìkuì lɛ hṹn ɓɛrɛ ɔ̀ Maari viì ɛ́ mɔn hɔ̀ bòo lɛ ɛ́ Yiezu wɔ́, ɛ́ ɓɛ́ dũmuasɛ̃̀ à ǹ. 46Kɛ́ peɓɛ̀ nìɛ ɓɛ̀ yìɛní dɔ̀ ɛ́ van yú ɓɛ́ Farizĩɛɓɛ ɛ̀ ɓɛ̀ bie hɔ̀ bòo lɛ ɛ́ Yiezu wɔ́ ɛ́ lɛ́ ɓà ǹ.
47Ɛ́ ɓɛ́ khɛ̃́ndàariè hándíe àá ɓɛ́ Farizĩɛɓɛ ɛ́ vɔn ɓɛ̀ Zuifuɓɛ lìe lèriè lɛ kɛ́ ɛ́ koo ɓánlɔ̀n ɛ̀ ɓɛ̀ ɛ́ bie ɛ́ nɛ làa: «Ké wo ke wiɛwiɛlɔ́? Àpe nùún sɔ ɛ́ lò ɛ́ yéréké bòo ɛ̀ wé cɛ̃̀un! 48Kɛ́ ké fùɛrɛ̀sí-e ǹ á wé kɛ̀amu, ɛ́ ɓɛ́ nìnbirìe ɓɛ́kùi ɛ́ ɓén dɛsĩ̀-ɛ ǹ, ɛ́ ɓɛ́ Rɔmu siè ɛ́ wo ɛ́ ɓén wua ke Dɔfĩn zũ-bɛhɔ́ àá kè cɛ̃̀mɛ̀nɛ́.» 49Ádɔ̀ peɓɛ̀ tĩ́ihṹ, lɛ yèrè ɛ́ ɓɛ́ nɛ Kayiifu, lɛ hàarí iè ɔ̀pe khɛ̃́ndàarɔ wì-bɛhɔ́ hɔ́pe lɔ́líe hũn, ɛ́ kùusɔ ɛ́ zɔn bie lɛ́ ɓà ǹ nɛ: «Mí yí dũ bòo dɔ̀ hùúu! 50Mí yí dũ kɛ́ lɛ ɛ̀ nìnbí-cóoní ɛ̀ hí ɓɛ́ cɛ̃̀mɛ̀nɛ́ nìɛ yènsénín ɛ́ bòo tṹ hɔ́ lɛ ɛ́ ɓɛ ɓen wua hɔ cɛ̃̀mɛ̀nɛ́ míkùi?» 51Hɔ̀pe sí á khɛ́ ɛ́ yí bòo lɛ á khɛ́ míte ǹ wɛ̀. Kɛ́ hɔ́ lɛ ɛ́ hɔ́pe lɔ́líe hũn àpe temu iè ɔ̀ khɛ̃́ndàarɔ wì-bɛhɔ́, á khɛ́ àá Mɛkɛ̃n-Sãanu pànkɛ́ nɛ Yiezu fɔ́ɓán à hí ɓɛ́ Zuifuɓɛ yènsénín. 52Á den yí mii hí ɓɛ́pe Zuifuɓɛ ɓɛ́ dòonún yènsénín, kɛ́ á lò mii ve ɓɛ Dɔfĩn nìɛ lɛ saakɛa wi le dímíɲɛ́ hũn ɛ̀ ɓen kóo ɓánlɔ̀n ɛ̀ ɓɛ̀ wé dìcóoní. 53Ɛ́ wo dàá mìí pehɔ̀ zɔ̀n, ɛ́ ɓɛ́pe Zuifuɓɛ hándíe wo wɔ́ ɓɛ́ ɲunù àá dìcóoní ɛ́ nɛ ɓɛ ɛ̀ ɓé Yiezu. 54Ɛ́ sí iè hɔ̀pe ɛ́ Yiezu dàa bĩniɛ yáà múakɛ ɓɛ Zuifuɓɛ tĩ́ihṹ ɛ̀ ɓɛ̀ mi wɛ̀. Kɛ́ á den khie cɔ́ van lè dáanú dɔ̀ lɛ wi le ńɲiherà sɛnù, lè lóo dɔ̀ lɛ ɛ́ ɓɛ́ wóo nɛ Efarayiimu hũn, ɛ́ van kɛsí yán àá mí kɛ̀ránzɛ̀ɓɛ̀.
55Ɛ̀ ɓɛ̀ Zuifuɓɛ Nyiewɛlɔn sɛ́rí ɛ́ wo hṹn lúwi, ɛ́ ɓɛ́ nìnbirìe cɛ̀rìɛɛ ɛ́ sɛ̃̀nɛ́hã̀ yòó van hɔ̀ Zerizalɛɛmu, ɛ́ ɓɛ vɛ tiɛ ɓɛ́te kɛ́ lé sɛ́rí ɲɛùn yí dɛ̃ wɛ̀. 56Ɛ́ ɓɛ́ ɔ̀ Yiezu ɛ̀ cànkɛ, kɛ́ ɓɛ́ ɛ́ dièkɛ ɓán lè Dɔfĩn zũ-bɛhɔ dànkɔ̀ hũn nɛ làa: «Mí lièníkɛ ɛ̀ mì nɛ wɛrɛ̀? Á ɓén ɓen lèpe sɛ́rí yée kɛ́ á yá ɓén ɓen?» 57Ɛ̀ ɓɛ̀ khɛ̃́ndàariè hándíe àá ɓɛ́ Farizĩɛɓɛ ɛ́ den hṹn lɛ́ lé ɲunù nɛ kɛ́ nìnbírɔ dɔ̀ dũ viì lɛ ɛ́ Yiezu wi hũn, ɛ̀ ɓàasɔ ɛ̀ bie hɔ lɛ́ ɓá ǹ bòo lɛ ɛ́ wé ɛ̀ ɓɛ́ vɛ ɓaà ɔ̀.
Айни замон обунашуда:
Zãn 11: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation