Bɔ̀werà 3
3
Mùamúa dɔ̀ wiɛnírɔ́
1Ɛ́ wurù dɔ̀ zɔn, ɛ́ Piɛre àá Zãn ɛ́ yòó vaá-vɛ Dɔfĩn zũ-bɛhɔ́ hũn lè wu-háaré lɛ iè hɔ̀ Dɔfĩn hɛ̃nnɛ̀ yìi hũn.
2Ɛ́ nùún dɔ̀ lɛ ɛ́ tɔn vaá-lé à iè mùamúa ɛ́ ɓɛ́ wóò dàá dàá ɓen, ɛ̀ ɓen bìsí lé Dɔfĩn zũ-bɛhɔ́ zĩínù ɲunù lɛ ɛ́ ɓɛ́ wóò ve nɛ «zĩínù ɲunù lɛ ɛ́ sãa» viì, à hɛnkɛ hɔ bòo ɓɛ̀ nìnbirìe lɛ ɛ́ wóò yòó zɔ le Dɔfĩn zũ-bɛhɔ́ hũn viì. 3Ɛ́ bòo lɛ á mɔn Piɛre àá Zãn kɛ́ ɓɛ́ yòó lè Dɔfĩn zũ-bɛhɔ́ ɛ̀ zɔ, á zɔn hɛ̃nnɛ bòo peɓɛ̀ viì. 4Ɛ́ Piɛre àá Zãn ɛ́ mɔ̀ ɓɛ́ yìe fɛ́-à ǹ ɛ́ húi, ɛ̀ Piɛre zɔn khɛ́ lɛ́ à ǹ nɛ làa: «Húi kie.» 5Á nùún ɛ́ yòó ɓɛ̀ húi, à tĩì à nɛ ɓɛ ɓén lɛ́ bòo dɔ̀ mí ǹ. 6Ɛ́ Piɛre zɔn bie lɛ́ à ǹ nɛ làa: «Ń yí dàa màa ɛ̀ ǹ lò ɛ́ yí dàa sɛ̃́ní lɛ ɛ́ lɛ́ kɔ̀ ǹ wɛ̀. Kɛ́ bòo lɛ ɛ́ ń dàa ɛ́ nín lɛ́ kɔ ǹ: Nazarɛɛte Yiezu Kirisa yèrè lɔ̀n, ɛ́ kɔ́ síɛ hĩ́ní vɛ.» 7À síɛ zɛnkɛa ɔ̀ ǹ àá piè ńdóonín núnú ɛ́ hóoniɛ yòoniɛ. Ɛ́ mí laà hũn, ɛ́ piè zehĩ́ àá piè zekàáyìe ɛ́ yòó yú pànkɛ́. 8Á yénkie ɛ́ yòó dɛ̃̀, à ɛ́ khie ɛ́ vɛ. Á yòó zɔn lè Dɔfĩn zũ-bɛhɔ́ àá ɓɛ́, ɛ́ vɛ kɛ́ á ɛ́ yíekɛ ɛ́ Dɔfĩn ɛ̀ ɓàanínin. 9Ɛ́ ɓɛ́ nìnbirìe ɓɛ́kùi ɛ́ mɔn ɔ̀ kɛ́ á ɛ́ vɛ, ɛ́ ɓɛ́ wo ɛ́ Dɔfĩn ɛ̀ ɓàanínin. 10Ɛ́ hɔ́ lɛ ɛ́ ɓɛ́ dũnɛ kɛ́ á iè ɔ̀pe nùún sɔ lɛ hṹn wóò kansí lé Dɔfĩn zũ-bɛhɔ́ zĩínù ɲunù lɛ sãa viì ɛ̀ hɛ̃nkɛ hɔ bòo, ɛ́ hɔ́ hɛ̀ yòokɛa peɓɛ̀ lɔ̀n cɛ̃̀un, hɔ̀ bòo lɛ ɛ́ wɔ́ ápe nùún sɔ ǹ bòo hũn.
Piɛre bòo lɛ á zɔn ɛ́ bie le Dɔfĩn zũ-bɛhɔ́ dànkɔ̀ hũn
11Ɛ́ hɔ́ lɛ á nùún sɔ ɛ́ hṹn yá Piɛre àá Zãn máahṹ ɛ̀ lé, ɛ́ ɓɛ́ nìnbirìe lɛ ɛ́ hɔpe bòo sɔ ɛ́ hɛ̀ yòokɛa lɔ̀n ɓɛ́kùi ɛ́ van zɔ̀ ɓɛrɛ peɓɛ̀ viì, lè Dɔfĩn zũ-bɛhɔ́ ńzɛ̃hṹ lɛ ɛ́ ɓɛ́ wóò ve nɛ Salomon ńzɛhṹ viì. 12Ɛ́ bòo lɛ ɛ́ Piɛre ɛ́ mɔn hɔ̀, á zɔn bie lɛ́ ɓɛ́ nìzã̀amáa ǹ ɛ́ nɛ làa: «Mìpe Yizarayɛɛle nìɛ, hɔ ńɓuò ɛ́ hɔ́pe sí dàa yòokɛa mì lɔ̀n kɛ̀amu? Mí wiɛ dàa ɛ́ mɔ̀ mì yìe fɛ́ kiè ǹ ɛ́ kè húi kɛ̀a bòo ɛ́ hɔ́ iè kèpe kè pànkɛ́ tàá kè bòo lɛ ɛ́ ké dàa can kè kuò Dɔfĩn bòo hũn ɛ́ temu lɛ́ ápe nùún sɔ lɛ ɛ́ dàa yú ɛ́ vɛ? 13À Abarahaamu àá Yizaake àá Zakɔɔbu lɛ iè pe kè zĩkĩ́nɓɛ̀ peɓɛ̀ Dɔfĩn, ɛ́ zɛ̃́niɛ mí tɔntɛ́ Yiezu ɓàarɔ́ bòo. Ɛ́ mípe mìte ǹ ɛ́ ti-e dɔ́ ɓɛ́ pànkɛ́ ɓàasiè núnú hũn ɛ̀ mì pɛ̃́ á bòo à Pilaate híɛhɔ́, hɔ́rɔsí kɛ́ ápe Pilaate ɛ́ lò den hàarí wɛ ɛ́ mii fùansí-e ǹ. 14Mí pɛ̃́ á Dɔfĩn nùún lɛ ɛ́ cã̀aní bòo, ɛ̀ mì nɛ a nìɓé iè pe ɛ́ ɓɛ́ fùansínin ɛ̀ lɛ́ miɛ ǹ. 15Ɛ́ mí lɛ́ á mɛkɛ̃nì ɓàasɔ ɛ́ ɓɛ́ ɓɔ́. Kɛ́ Dɔfĩn ɛ́ vìeniɛ ɔ̀ ɛ́ líeniɛ hɔ̀ húmú hũn, ɛ́ ké mɔn ɛ́ bòo ɛ̀ bie. 16Ɛ́ Yiezu yèrè pànkɛ́ àá hɔ́ ńdɛsĩ̀-ɛ ǹ, temu lɛ́ ápe nùún sɔ lɛ ɛ́ mí loo ɛ̀ mì lò dũ-a ɛ́ dàa yú hɔ́ pànkɛ́ á dàa dɛ̀ ɛ́ vɛ. Hɔ̀ iè piè ńdɛsĩ̀ Yiezu ǹ ɛ́ temu lɛ́ á dàa wan hĩ́ɔɔn, kɛ̀a bòo lɛ ɛ́ mí dàa mɔn hɔ̀.
17Ɛ́ kɛ̀a sáalɛ mìpe kìe zɛ̀ɓɛ̀, ń dũ kɛ́ mípe àá mí ɲúuhɛ̃ siè bòo lɛ ɛ́ mí wɔ́ àá ɔ́pe Yiezu ɛ́ mí ɛ́ wɔ́ kɛ́ mí yí dũ hɔ wɛ̀. 18Kɛ́ hɔ́ ɛ́ wɔ́ kɛ̀amu, ɛ́ hɔ́ bòo lɛ ɛ́ Dɔfĩn sɛ̃̀nɛ́hã̀ khɛ́ hàarí àá mí bɔ̀háaníriè ɓɛ́kùi ɲihĩ́ɛ ɛ́ dàa ɲunù ɛ́ tú. Hɔ̀ hàarí bie nɛ mí Kirisa, ɛ́ lɔ̀n ɓén be. 19Ɛ́ mí zɛ̀ní mí tĩɛ̀ ɛ̀ mì fùansí hɔ́ bɔ̀koohɛ̃ wénlɔ́ ǹ, ɛ̀ mì lɛ́ míte Dɔfĩn, bòo lɛ ɛ́ wé ɛ̀ Hɔ̀ dé mí bɔ̀koohɛ̃ sɛ́wɛ́rí ɛ̀ lɛ́ miɛ ǹ. 20Ɛ́ Ɲunsɔ Dɔfĩn ɛ́ den ɓén lɛ́ hũn-wiɛ̀ wihĩ́ miɛ ǹ, ɛ̀ Hɔ̀ lò ɓén tɔní-ɛ pe fuenírɔ Yiezu Kirisa lɛ ɛ́ Hɔ́ sɛ̃̀nɛ́hã̀ munɛ mì bòo hũn ɛ́ lɛ́ miɛ ǹ. 21Kɛ́ kɛ̀a sáalɛ, ápe Yiezu Kirisa ɛ́ sãawi à kań hɔ́ hóohũn fúu ɛ̀ vɛ dɛ̃ le pɛ̃̀hṹ lɛ ɛ́ Dɔfĩn ɓén lɛ́ ɛ́ hɔ́ bòo míkùi ɛ́ khũ̀á ɛ́ wé bɔ̀fĩɛ̀, kɛ̀a bòo lɛ ɛ́ hɔ́pe Dɔfĩn dàa sɛ̃̀nɛ́hã̀ khɛ́ hɔ́ hàarí àá mí bɔ̀háaníriè tentiè ɲihĩ́ɛ. 22À Moyiize ɛ́ hàarí bie nɛ làa: “Mì Ɲunsɔ Dɔfĩn ɛ́ ɓén tɔn mí bɔ̀háanírɔ dɔ̀ ɛ́ lɛ́ miɛ ǹ kɛ̀a ie ńpe bòo sí, á ɓén lé mì dàa hũn. Ɛ́ mí sãawi ɛ̀ mì wóo ɲí hɔ́ bòo lɛ á mii bie ɛ̀ lɛ́ miɛ ǹ míkùi. 23Kɛ́ nìnbírɔ lɛ ɛ́ yáà ɲí-ɛ pe bɔ̀háanírɔ sɔ bòo, ɛ̀ ɓàasɔ ɛ́ ɓɛ́ leń ɛ́ lé ɓà dàa nìɛ tĩ́ihṹ ɛ́ lé vɛ́ ɓé.” 24Ɛ́ ɓɛ́ Dɔfĩn bɔ̀háaníriè lɛ hàarí wóò bie ɓɛ́kùi, ɛ̀ dàá mìí àá ɔ́ Samuɛle pɛ̃̀hṹ, àá ɓɛ́pe lɛ ɛ́ khie sɛ̃̀mɛ́kɛa ɓɛ́kùi ɛ́ bie hɔ̀pe wihĩ́ sɔ lɛ bòo. 25Ɛ́ hɔ́ bòo lɛ ɛ́ Dɔfĩn ɛ́ hàarí bie àá mí bɔ̀háaníriè ɲihĩɛ́ ɛ́ bòo ɛ́ sɛ̃̀ miɛ ǹ, ɛ̀ mì lò bòo wi lépe ɲɛbíi lɛ ɛ́ hɔ́pe Dɔfĩn ɛ́ hàarí dú àá mì zĩkĩ́nɓɛ̀ hũn. Hɔ̀ den hàarí bie àá Abarahaamu ɛ́ nɛ làa: “Ń ɓén bè kɔ̀ máahṹ nìɛ ǹ ɛ́ dàa dúɓɛ́ ɓɛ́ sṹsùnù dàa nìɛ ɓɛ́kùi.” 26Ɛ́ hɔ́ lɛ ɛ́ Dɔfĩn lerɛ mí tɔntɛ́, ɛ́ hɔ́ iè mìpe ɛ́ Hɔ́ tɔniɛ ɔ̀ ɛ́ lɛ́ nin vɔ́, ɛ̀ Hɔ̀ nɛ a ɓen dúɓɛ́ miɛ ǹ, à lɛ́ ɛ̀ hɔ́rɔ ɛ̀ wóo fùansí mí bɔ̀koohɛ̃ wénlɔ́ ǹ.»
Айни замон обунашуда:
Bɔ̀werà 3: bwj
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation